Имолты порайн, хар тут кератман, сэр унтан, сорни каншты ёх омассат. Нял хоятал унат, ветметэл похл,энгки. Нийл тал ловаткем. Пэтула нэмиса.
Хуван ил олты пора ёхтас, туп хулантыя ям потар век ант холал. Сорни каншты ёх кутан пирасьшак икие ус. Епим ики. Ай тэлан лув мув эвалт сорни сяляк каншас. Улмал сыс каман хорпи кута питылыйс арнг-монсянг ики. Лув си иса потартас, ёх па хулантсат.
Пэтул аселан каман пуш ястыса:
– Нанг лулн, Пэтул, ил олсан ки!
Похл,энгки потар хулантты шенгк саманг.
– Асие, ронамта са! Ма еша па омаслам.
Я си… Епим ики потрал етшас. Тут харан туп тутанг л,авмат хасьсат. Сорни каншты ёх ситы си омаслат, тутанг л,авмат пела олямман.
Си кут, тутанг лавмат кут элты ай, ай эвие нох этмас. Акание хорпи, туп лыланг. Упатлал вуртэт, ернасал восты. Ёшан иси востышак охшамие каталал.
Кертман няханг сэман ангкармас, нови пенгклал хутламтысат. Сялта куран пурмас, охшамиел восемас па якты сонтэмас. Ситы яма кентат якал. Курал тувемал, ёшал тувемал – вантты умась. Сорни каншты ёх лылэл ермас. Ситы си машьяйн вантлат, исимет молты эвалт нумаслат.
Лыланг Акание оланган тутанг л,авмат кератмат ларыйс. Сялта, тангха, ратхаран лувел ермата ис ларытыя, – вутнгатшак манас ларыты. Сорни каншты ёх тут эвалт иси елшак хатлат, эвие енгэматы юш ларпая верман. Лыланг Акание ёх пунгалан енгэмал, сялта сэм вантман уна ил, сэм вантман энмал. Муйкем унашак ил, сикеман сорни каншты ёх тут эвалт па елшак хатлат.
Ин эвие хувалташак енгэмал па ловатангашак ил. Мунты ёх метшак хувашак хатлат. Лыланг Акание хоятат кутан ларыты питас. Хоятат сыйтман якал. Мет йухат воллы сорни каншты ёх кимпия питас, лувилал кертман ларыйл па энмал. Пэтулыи палата ис. Ун унши юх леп лоймтас, куран пурмас, пенгклал ворлэмисат, охшамал восемислы, пенгк хул, мохты кусялтас:
Фи-т-ть! Й-ю-ю-у…
Си кут, патл,ам ат кутан, макл,а няхалман увалтас, сам манты кеман. Аканиел вантмелкем си. Ахолта манас хойн уйтла.
Ун ёх ки вотча омассат, моса нэмалты вер па ант тыйс. Тут пела вантом отат, нумассат:
«Ванталан са, си ловатан си тут пела вантсом, сэмнгаламан, илампа, лэпалты питсайм, кат йохн кутан!»
Пэтулыи туп ситы ант нумасас па асел инсясал:
– Аси, сит хой?
Асел ястал:
– Макл,а. Хой па патл,ам кутан? Па ант хуллылэн, хоты лув ухнгалтыйл?
– Антом, антом макл,а эвалт! Лувел хоты ма ал уйтлэм, си воой эвалт ма ант паллам. Нанг манэм Лыланг Акание эвиен эвалт яста.
– Па муй симась эвие?
– Па ин тутанг л,авмат элты якам отэн элты. Ант нумлэн? Хоты нын л,акки хатты питсаты, хун лув тут эвалт пунглашак манман якты питас.
Аселан па мохилалан Пэтулыи инсясты питса, муй са вантас. Похиел муйл ханятал, муй вантас иса си потарсаллы. Итан холна инсясса:
– Яста са, лув муй палаткем ус?
– Оланган хоты ма ёшпатэм ловаткем, йухат хась ма ловатэма, ма палатэма ис.
Сорни каншты икел ястал:
– Яна си, Пэтул, ма лувел иси вантсэм!
Пэтул асел па па ёх иси Лыланг Акань эвии вантмел. Туп Епим ики турпкайл сухтыйл па машьяйн омасал. Сорни каншты ёхн инсясты питса.
– Епим ики, нанг па муй ясталан?
– Сит си ясталам, ма Лыланг Акание иси вантсэм, туп нумассам тол,мам сэман лэпалсайм. Си эвалт яна, тангха, Тутпар-Якпар эвие ёхтылыйс.
– Хой симась Якпар эвие?
Епим ики си потарты питас:
– Хуллысэм ма пирась хоятлам эвалт, маттыки сорни улты л,отат альтыя ай эвие ёхтылытал. Хота Тутпар-Якпар эвие сэма питал – сита сорни канша. Сита ар сорни антом. Сорни пул,лал атэл оллат. Вус хирты питлан – тута сорни сэм мосятлан, тата сорни сэм мосятлан. Оланган мув ус хирты питтына сорни кев сэмал артат ёша питал. Синганся, муйкем малашак хирла сикем шимла ил. Мет йухат воллы холал. Си сорни кев сэмат холыя нох акатты юпийн па нэмалты ант мосятлан. Туп воллы ёрэмасэм маты л,отан хирты – амуй хота лув нох этмас, амуй хота Тутпар-Якпар эвие мува ил лонгас.
Сорни каншты ёх унгал версат:
– Сит хоты мунг арталалэв. Халэват оланган рат харан ус хирлув. Сита ки сорни ант мосятлув Тутпар-Якпар эвие унши юх пунгалан мува ил лонгам л,оталан хирсты питлув. Сяха лэра ил, тал таклы нанг потарсан, муй па яна моса ант нялмисан.
Сиитэлан, сэм л,ап ёвармасат, ил олсат. Пэтулые яха сыхасяс, ил олас па нумасты питас:
«Амуй эвалт ин макл,аев няхас?»
Епим ики эвалт сикуш инсясты учислы. Хулталан, икел ики хуван-ванан наркиты питмал.
Кимет хатал алангсахат, Пэтул нох верламалан, ёхлал нох килмел. Молхатал рат харэл ун мув уса хирмел. Сорни каншты ёх нял унши юх пунгалан лойлат и туран увлат:
Там лотан си мува ил лонгас.
Пэтул па ел увалтас:
– Хоты, нын, исты! Хоты, нын, исты, мохиет! Ёрэмаслан, тангха! Тутпар-Якпар эвие там унши юх вошл леп лоймтыйс… Тата куран пурмас.
Сорни каншты ёх ошлы питсат.
– Ветмет хоят нох килас – ветмет сиран потартал. Янгмет хоят ус ки – янгмет л,от, лулн, аляс. Илампа, тал таклыя каншатлув. Там вер воськаты мосал.
Ант эвалман, кашнг л,отан мув ус хирылысат. Туп нэмалты ант мосятсат. Епим ики Пэтулала си ястал:
- Лэпалсайн, илампа. Ой ант тайлан.
Си яснгат эвалт Пэтул еша нопсал шакас. Ястал:
– Сит, акайи, макл,аен, торас верас. Мин ойеман лув си ухнгалсаллы па атмась няхсаллы.
Епим ики ястал:
– Макл, а пела нур ал тува. Сит хося вер антом.
– Сит хося си вер ул!
– Сит хося вер антом!
– Сит хося си вер ул!
– Сит хося вер антом!
Катнган тал таклы увлатан. Сорни каншты ёх туп няхлат:
– Унал па айл иси нэмалты ант уйтланган, мунг па отшам отат, лынан хулатлув па нэмалты верлы пораев хайлув.
Си вер юпийн си, пирась Епим ики Сорни Кев Сэм икия нэмиты питса, Пэтулыел па Якпар Тунькая.
Си вер куртанг, воошанг няврэматан моштаса па Пэтулые ермас. Каамн шиялала, вернтыты питла:
– Якпар Тунька! Якпар Тунька! Лыланг Аканиен эвалт потарта са! Потарта са Тутпар-Якпар эвиен эвалт!
Пирась ики хоты, верантыты таха пела тыш ант тайл. Пэтул па сит эвалт воллы нопсал шакас. Нэм аратыман, няврэмат пилан кутармас. Камн сиран атмась лявтас. Сай тахайн, сэм сайн холлас. Куртанг ар няврэм, воошанг ар няврэм метшак няхлат, метшак верантылат. Си ловатан тура ёхтаптаса – ёхи манты ант лытла. Си кут и вер па этас. Асел кимет пуш ими тус. Аньхэл харх-морх! Похл,энгки самал питас, ёхи манты палал.
Епим акайл ики ёхи иси мортанган янгхас. Хут хатал сыс рупатайн метла, ёхи манты йур антом. Муй нэмалты верлы тыел-тохэл шушты. Ёлан хойн лув лавалла – вотча ус.
Ёх рупитты етшалат, ёхи манлат. Лув па Пэтулыел пилан сорни каншты тахайн хасьлатан.
Па муй верты? Ситы улланган, ар сыр потар потарланган. Пирась ики ай отал сорни кев сэм каншты уталталлы. Тухал порайн па Тутпар-Якпар эвиян нумалмиллан. Ситы си уллатан. И веран туп и нопса питты ант верытлатан. Пэтулыел ястал сорни мосяттыя макл, а торас верал. Епим икел па – макл,а маттыки торас ант вертал. Ситы си уллатан.
И пуш па урая хойсатан. Хатал холна палтат лойл. Хошам. Торан хотан пунгална пусанг понман. Пэлнгайнг. Тутал тупшак, тупшак ныла – кул пусанг пол,ыйл. Вантанан, кул пусанг кутна ай, ай эвие этмас. Воллы, воллы ин елпишак вантыйм эвиян хорпи. Ернасал па охшамал мунты эвалт еша путышакнган. Кертман няханг сэман ангкармас, нови пенгклал хутламтысат. Сялта куран пурмас, охшамиел восьэмас па якты сонтэмас. Ситы яма кентат якал. Курал тувемал, ёшал тувемал – вантты умась.
Оланган ай л,акат хуват енгияс. Сялта ун л,акат ларытты питас. Сэмна вантман унашак, унашак ил. Торан хотан шомая ёхтас, торан хот мохты яксаллы.
Ситы си ларыйл, ситы си якал, и куман энмал. Пэтул ловата, Пэтул палата ис. Ун унши юх леп лоймтас, куран пурмас, пенгклал ворлэмисат, охшамал восемислы, пенгк хул, мохты кусялтас:
Фи-т-ть! Й-ю-ю-у…
Си кут, макл,а ухнгалтэмас, няхалман увалтас, сам манты кеман. Аканиел вантманкем си. Ахолта манас хойн уйтла. Епим ики па вантылангал сир моштас:
– Ахолся макл,а ёхтас, атанг воой, хатлал кутапан?
– Ванта са! Па си мин ойеман макл,айн нох уса. Тутпар-Якпар эвиен моса ин макл,аен эвалт хонтас.
– Нанг муй Тутпар-Якпар эвие вантсэн?
– Нанг па муй ант вантсэн?
Сялта питчаснган потартыя муй вантсатан. Си эвалт китантак Тутпар-Якпар эвиян вантман. Туп мува шуйлам л,отал кат сира альлаллан.
Епим ики тыштас па ел нюхмас:
– О-ох-ох! Илампа, па нэмалты антом. Кат йохн кута питылысман, тангха.
Яснгал соханты кумал антом, мув сох, тук сох илпи эвалт пусанг этты питас. Торан хотан тутан питса. Ой, тангха, тайсатан, йингк ванан улмал. Тэрматыман тутан л,ап шошапсалан. Нэмалты пормас тутан ант ёсса. Епим акайл ики поснган ешаи ёсамнган. Пэтулан поснган нох алэмасайнган.
Ванталан, поснгалал ай усыетан этамнган. Исимет ай куранг хоят ай калмат хаймал. Эталтаслы си калмат Епим акайл икия.
Инсяслаллы:
– Там па муй иси кат йохн кут? Ал сайкат улам вер?
Па муй вертыя, Епим ики эвалмас:
– Эх, Тунька, Тунька! Няха пайтсайман мин Тутпар-Якпар эвиенан. Молты порайн па сэма ки питал, пол,сянган ляксаты лувел мосал. Па ишан хоятат атат лэпалтыйл, няха атат пайтлаллы!
Пэтул па пойкасял:
– Акайи, Лыланг Акань эвии нэман хун сорненг л,отал ант альлаллы. Макл,айн альты куман ант мала.
– Сит нанг верэн, – Епим ики нюхмас, – ма па мув усат хирты па ант питлам. Си арат хирассам – мэта. Ая хун исам Тутпар-Якпар эвиен юпийн наварты.
Пирась ики холна хув ликасьман потартас. Тунька па Тутпар-Якпар эвиел шалитас.
– Нанг, акайи, лув пелайл нур тувман ал ликася. Лув хоты, нанг си вантлэн, муй хорпи хорам па кашнг. Макл,айн ант ки палтаптаса, мин, лулн моса хуван ойя питсаман, сорни кев сэмат мосятсаман.
Макл,а эвалт Епим ики нэмалты ант ястас, Тутпар-Якпар эвиел исипа л,акатлаллы:
– Сита си лув нангэн ойн шошапсаллы! Ёхи манты елэм!
Пирась ики сикуш ликасьман потартал, Тунька па Тутпар-Якпар эвиел шалитал:
– Акайи, хоты лув яма якал!
– Якты хоты яма куш якал, па сит эвалт минэман муй онтас? Ватты, холна ант лангхалайм.
– Ма ки хоты ин куш вантсэм, лулн, – тыштас Пэтулые. Сялта инсяслаллы: – нанг муй, акайи, пунгла керэмалан. Вантты холна ант питлан?
– Хотсат ант питлам? – нюхмас ун ики. Па нанг па муй хорпи похл,энгки! Нанг па муй хорпи! Муй вер охвелма питал, сита века си хасял. Ситы ки еллы улты питлан, ма итэм ун шук тулан. Улмем хуват шукасьсам, ой па тась каншман нюхлассам. Сит эвалт нэмалты ант этас. Нуша хоят уранган понам моса ой антом, тась антом.
– Хотсат антом, ма си, ма сэман вантсэм.
– Лукашал, нанг верэн. Ма па нанг пилэнан ой каншты ант манлам. Мета си каншатсам, улмем хуват. Курлы питсам.
Па муй верты? Ситы улланган, ар сыр потар потарланган. Пирась ики ай отал сорни кев сэм каншты уталталлы. Тухал порайн па Тутпар-Якпар эвиян нумалмиллан. Ситы си уллатан. И веран туп и нопса питты ант верытлатан. Пэтулыел, ястал, сорни мосяттыя, маттыки, макл,а торас верал. Епим икел па – макл,а маттыки торас ант вертал. Ситы си уллатан.
Тала ис. Сорни каншты ёх вооша мантсат. Рупитты мосал. Рупата орты хоятан латал ху латал веран маса. Пэтулыи ёлан хасяс. Рупитты ловата ант ювмал. Ёлан па улты сирал па антом. Аньхэл ими харх-морх. Си кут, асел, рупитам тахаялан мушмас. Туп, туп лыл шукал ул. Леккар хота потса. Аньхэл метшак оха манты питас, метшак харх-морх. Пэтул тура ёхтас:
– Ма, илампа, Епим акаем ики хося улты манлам.
Аньхэла метшак ям.
– Куш холта мана, – аньхэл увал, – куш Тутпар-Якпар эвиен хося. Манэм вер антом!
Пэтул вайнгалал нох хойлтас, оош сох эвалт ёнтам сах, келан ярапсаллы. Асел мил, луматты куш вутчийс, аньхэлан нох нярэмаса. Лув тайм, ая ювам мил,ал оха понас па ким этас.
Куртанг, воошанг няврэматан моштаса па Пэтулые па ерматла, шиялала, вернтыты питла:
– Якпар Тунька! Якпар Тунька! Лыланг Аканиен эвалт потарта са! Потарта са Тутпар-Якпар эвиен эвалт!
Няврэмиет ант хусьлаллы, ситы шушал. Туп ястас:
– Муй нын! Отшам отат!
Куртанг ар няврэмал, воошанг ар няврэмал еламан ёхатсайт. Хотсат куняр няврэм верантыты, ем ант вул? Пойкасьман инсясты питсэл:
– Нанг холта манлан?
– Епим акаем хося.
– Сорни Кев Сэм хося?
– Матты ота моса Сорни Кев Сэм – ма па акаем.
– Манты кутэн хув ант ул. Холты ал тапа.
– Юшал хоты уйтлэм.
– Ал потлайн. Вантлэн, муй хорпи иськи. Нанг па холна пос ант тайлан.
Няврэмат вантлэл, Пэтул ликлы потарты питас. Похиет метшак питсат лувел инсястыя:
– Тунька! Нанг яна Тутпар-Якпар эвие вантсэн?
– Тут л,уман вантсэм, пусанг кутан вантсэм. Моса молты ишан па шиялалэм, туп потарты кум антом, – ястас Тунька па еллы шушмас.
Епим ики амуй Еврсорт куртан ус, амуй Овскуртан, воланг ант уйтса. Ясталат курт кималан, воош кималан хотыел улмал.
Ишнел шомайн пал, пал унши юх лоймал. Манты кутал хув, шушты кутал хув. Сялта па иськи пора – кутпанг тал кутап.
Пэтулые еша иськийн потса кепа, хотала ёхтас. Туп ов нура каталты учийс, хулталан:
– Фи-т-ть! Й-ю-ю-у…
Ангкармас па – юш кутапан лонсь потал,ыи ларыйл, хорасалан Тутпар-Якпар эвие хорпи. Пэтулые ванашак нёхамтас, ямашак ванттыя. Лонсь потал,ыи ситы си еллы ларыйл, хува питас. Пэтулыи Тутпар-Якпар эвиел юпийн си хухалал, хухалал. Сэр тахая ёхтас, ант вантыланг мув. Вантлаллы – хар л,от, кертман иса шевем унт. Хар л,от кутапан и пирсямам сумат юх лойл, мал па Апл,ак лонсь кутапан. Исимет амуй лыйм, исимет амуй халам юх. Ин лонсь потал,ыи си сумат пунгла ёхтамтас, сумат кератман ларыты питас.
Пэтул тэрматыман, юшлы, Апл,ак лонсь хуват ситы си рунгкал.
– Си хуват нюхалсэм па ёхлы хун керлалам!
Кур вевал тармам кеман, ёш вевал тармам кеман исимет амуй лыйм, исимет амуй халам пирась сумат юхал хося ёхтаптыйс. Си кут лонсь потал,ыел л,акки кул,мас. Тал туп паркатам лонсь сэмат венша хойсат.
Пэтунька хась си холлас. Сялта па муй хоты ювамтас? Лув курлал пунгална, лонсь, мув унты лолты питас. Вантлаллы, Пэтунька, лонсь ус патына Тутпар-Якпар эвиел якал. Ернасал па охшамал мунты эвалт еша путышакнган. Кертман няханг сэман ангкармас, нови пенгклал хутламтысат. Сялта куран пурмас, охшамиел восьэмас па якты сонтэмас. Ситы яма кентат якал. Курал тувемал, ёшал тувемал – вантты умась. Мув сох элты манал, лув елпелан лонсял лолал. Хота куран пурмал сита восты ванши энмал, лыланг л,ыптат тыйлат.
Пэтунька кератман, эвие, ларэмас, Пэтунька хошамты питас. Тутпар-Якпар эвиел вутнгатшак ларыты питас, ловатангашак ис, палатангашак ис. Лонсьлы харал иса унашак па унашак ил. Ин мунты исимет амуй лыйм, исимет амуй халам пирась сумат юхал шувлал похты питсат, восты л,ыптат этсат. Тутпар-Якпар эвиел метшак каркама якты питчас, айкеман холна арыйл:
Ма хосяем руванг!
Ма хосяем руванг!
Ма хосяем руванг, руванг лунг!
Тутпар-Якпар эвиел си якал, си ларыйл, ернас понал нох аламла. Ешавул Пэтунька палата, Пэтунька ловата ис. Лонси харал вутнга ис, исимет амуй лыйм, исимет амуй халам пирась сумат юхал нуват кутан сиськет увты питсат. Руванг, руванг. Исимет каврам лунг рува ис. Пэтулые шак йингк халепа лыллас. Охал эвалт шак йингк овал, шаншвур хуват шак йингк овал.
Мил, л,энгкел Пэтул хуван нох эхсаллы, ош сох сахал па куш нох эхты вутчислы. Тутпар-Якпар эвиел ястал:
– Нанг, похии, сахэн нох ал энгхи, хошмен шавии! Сикем мушан нумаса хотсат ёхлы юшен каншлэн!
Пэтунька унгал верас:
– Па нанг манэм ты тусэн – нанг ёхлы манты юшэм па али!
Лыланг Акань хорасанг эвиел няхал:
– Ванталан са муй хорпи! Сялта ма кум ки ант тайлам?
– Кум шитлан! Ма лайллэм!
Ин эвиел си потартал:
– Сикем мушан, там карсар л,энгкен вуйлыя. Сяха лув нангэнг хошмаллаллы па ёхлы манты юшэн альлаллы. Кертман ангкармас. Исимет амуй лыйм, исимет амуй халам пирась сумат юхал вошан катра карсар шиялас. Иса харнгайн лэвам, налал хал, ымал.
Пэтулые карсарал услы. Тутпар-Якпар эвиел ястал:
– Карсарэн ёш эвалт ал л,утты, такан каталман таи! Ёхлы манты юшэн постаман таи! Сяха ты иты юшэн карсарэнан хун альла. Товина, илампа, исипа парта ёхатлан!
– Пахоты! Исипа мин Епим акаем ики пилан ёхатламан. Туп тови ёхатал – мин ты ёхтапламан! Нанг иси ёхтылыя яктыя.
– Ма кумем антом. Нанг яка. Епим акаен ики па иси ат якамтал, иси ат наврамтал!
- Нанг па муй рупата тайлан?
- Ант ныла? Ванты, талан лунг верлам, па нанг хорпен отат кашна туллам. Нумаслан муй, сит кен вер?
Сялта ел няхалтас, енгта потал,ы иты ларэмас, охшамал восемас, пенгк хул, мохты кусялтас:
– Фи-т-ть! Й-ю-ю-у…
Эвии лойм л,отал ант хасямтас. Ваншэнг харал лонсянга ювамтас. Исимет амуй лыйм, исимет амуй халам пирась сумат юхал л,ыпатлал питапсат – там халал, тум халал. Пирась сумат тайн макл,а машьяйн омасал, охал тыел-тохэл кертыйл. Сумат кератман си арат лонсь питмал па Пэтул лангкар вуша ёхатал. Ин макл,айл сикуш карсаран палтаптыллы, тумел ситы си омасал. Ин мунты лунг эвалт и харнгайнг карсар хасяс. Карсар налал эвалт ёша хошам, эла хошам. Сикем ям!
Пэтулыи карсаралан сялта сухтала, Апл,ак кут эвалт нох талла. Оланган карсарал хась л,уттаслы. Йухатшак утламтас па вер ямашак манты питас. Молты тахайн карсар юпийн куран шушал, хота па карсаран талла. Сикем осьхуль. Шуштал тумпина юхат хося пос сэварал, юшал кентат постал. Туп номасан ёхатла пос сэварматы – карсарал лув сиралан пос понамтал – тюк-тюк, юх эвалт кат щел,ам раканал.
Рамкапты питмал порайн Пэтул Епим акайл хося карсаралан ёхтаптаса. Ун ики кур лонгла хухмал. Похиел шиялал – шенгк аматал. Инсясты питсаллы, хоты па хотсат. Пэтунька муй хоты ус ситы акаяла потарсаллы. Пирась икел ант эвалал. Пэтул ястал:
– Ант ки эваллан лэпнга этлыя. Сита карсарэм хайсам, ванты.
Епим ики ким этлыйс, карсарал ёхи лонгалсаллы. Янапа, мунты харнга кутан сорни кев сэмат мосятас. Лунгатман – хут сэмии. Си юпийн велси еша эвалмас па инсясал:
– Си л,отэн мосятлэн?
– Пахоты, – похл,энгкел ёхлы нюхмас,– мосятлэм, юшэм посна понман ат ул.
Кимет хатал, Епим ики, уйтты хоятал эвалт лох вохас. Тунга сира исимет амуй лыйм, исимет амуй халам пирась сумат юхан хося яхсатан. Постам юш хуват хоты муй хув, муй лаварт. Епим ики нопсал ямаллас. Мосятам сорни кев сэмлал тасянг вос ху икия тыныслы. Шитам ох онтасан тал сыс мохэнган яма устан – тарамты арат лэстан, тарамты арат инсьсатан.
Туп тови ёхтас, катнган мохты исимет амуй лыйм, исимет амуй халам пирась сумат юхан хося нёхапсатан -хухалмастан. Сялта муй? Туп мув сох нох еша хирэмаслан – си арат сорни кев сэм этмас. Хиш кут эвалт ёшан каншлаллан. Епим ики шенгк амтас, еша холна якамтас.
Ёша питам сорни л,отан, сорнел пилан ханятты ош ант тайсатан. Пэтунька – ай хорасалан ишкасьман альсаллы, пирасял па ханятты сир ант тайс.
Туп ёх моштантысат, мохты тохи оратсат. Хоятат тохи сорни хирты китсайт. Сорнэнг л,отал пояр икина икарса. Сишна, тангха, макл,айл охал тыел-тохэл кертас. Ин катнган еша кум шитсатан, вет тала тарамты арат сорни кев сэм сопасластан. Ям хув си онтасан яма устан. Иса Тутпар-Якпар эвиян нумман тайсаллан.
– Молты ишан лулан па ат сэма питылыйс!
Си юпийн па ант вантылыса. Сорни кев сэманг л,от Тутпар-Якпар эвии сорни л,ота ин тамхатал унты си альсила. Си.
Назад в раздел
