Быд во терпитны позьтöма виччыся тайö кадсö, медым кок улын южакылысь сöмын на усьöм лым вывтi восьлалiгöн бара волыны ас берегса сэтшöм тöдса лыа кöса вылö.
Гожöмнас танi йöза да шума. Тшöкыда аддзан чери кыйысьяс-öс, кылöдчысьясöс, турун пуктысьясöс. Дöзмöмпырысь мый вылö кö норасьöны каляяс. Ньöв моз тэрыба лэбалöны корсьысигмоз истанъяс да му джыджъяс. Лыа берегö швачöдöны кывтысь-катысь суднояссянь гыясыс. Рытыв да вой тöв дырйи татчöдз кылö мöдлапöвса парма-расъяслöн шувгöмыс. Тшöтш и ваыс кажитчö ловъяöн. Сёльöдчö-ворсöдчö визулыс берег дорын, муткырасьö шöрланьын. Мукöддырйи ва веркöсас сявмунöны арпиян, быттьö китыр рудзöг койыштiсны сэтчö, либö чеччыштлöмöн пластнитчас ва вылö пач пöдан кодь ёдi.
Весиг войнас оз ланьтлы танi тайö аслыссикас олöм-вылöмыс. Унзiльпырысь ропкöдчöны ас костаныс вадоркайяс. Берег дорын пемыдас ноксьöны ва шыръяс. Налы и пöраыс öнi. Муртса-муртса вöрыштöны бадь коръяс. Да и овлö-ö гожöмнад войыс? Сöмын на шондiыс удитас саявны джуджыд нöрыс сайö, и бара нин асъя кыа киссьö-паськалö енэж пасьта. Быдöн дженьыд войвывса гожöмö зiльö босьтны ассьыс пай, апыштны олöмсö, нимкодясьыштны гежöд гожся шоныднас, гажнас, мичлуннас. И некор сэки сувтыштлыны, мöвпыштлыны.
Дзик мöдтор аддза öнi, медводдза лым усьöм бöрын. Чöвлöнь. Нинöм оз торк вöрлысь да валысь рамлунсö. Быттьö ыджыд да сьöкыд удж бöрын ставыс гöгöр мудзöма да шойччö. Тайö кажитчысь чöв-лöняс син доймытöдз видзöда муткырасьысь ю вылö. Оз кöсйы сiйö сетчыны. Зумыда визувтö, жуглö берег дорысь медводдза лымйöн вевттьысьöм клянича кодь вöсни йисö, быттьö зэвтлö ассьыс вынъяссö. Сiйö и кыз йи улын мöдас венласьны кöдзыдыскöд, кытчöдз тулыснас дзикöдз оз вермы, да радысла, аслас помтöм вынöн ошйысигмоз, ылькнитас видзьяс да лыа кöсаяс вылö, писькöдчас веретяяс дорöдз.
Быттьö ловъя лов, кодi эскö аслыс, кöть и личкöны сiйöс нелючкияс, сьöкыдлунъяс, оз уськöдчы норасьны, оз шöйöвош, а зэвтчылö, выныштчылö да венö став омöльсö. И сэки ыджыд радлунöн, долыдлунöн, олöмыслы пыдiсянь эскöмöн тырö сылöн морöсыс.
Вадор пöлöн медводдза лым вывтi восьлалiгöн сьöлöм вылö сiдзжö чöв-лöнь пуксьö. Горша ньылала сöстöм cынöдсö. Дзорга челядьдырсянь тöдса местаяс вылö. Кутшöм ёна гöгöр вежсьöма! Сэтчö-ö веськалi? Збыльысь, кадыд, вöлöмкö, быдтор вежö.
Со буретш весьтас кымын мöдлапöвса неыджыд мыльк вылын сулавлiс ыджыд да пашкыр пожöм. Дiнсö öдвакö кык морт вермылiсны шымыртны. Сiйö и вöлi челядьдырйи аслыссикас компасöн мöдлапöвса гöгрöс ты дорö кежигöн. Мукöдысь бокын, пожöм быттьö ошйысьлiс аслас öтнас, вын-эбöснас ас коддьöмъяс водзас. Сы вылö и збыльысь шензьöмпырысь вöлi видзöдлывлам. Быттьö и миянлы, челядь котырлы, вадорын собалiгöн мудзöм бöрын, сiйö ассьыс вынсö тшöтш сетлывлiс.
Но татчö волiгъясöн во-мöд-коймöд нин ог аддзы ыджыд да пашкыр пожöмсö. Тыртöмджык лоис мöдлапöв берегыс. Юалi ас сиктсаяслысь. Вочавидзисны, мый лыйöма пожöмас чардби да йылыс сылöн сотчöма. А бöрынджык мелиораторъяс видзьяс бурмöдiгöн пожöмсö пилитöмаöсь.
Тайöс кывлöм бöрын сьöлöм вылын неуна кöдзыдджык лоис. Быттьö мыйкö вошöма, оз тырмы.
Öд быдысь вадорö волiгöн вöлi видзöдлывла мöдлапöвлань. Аддза тöдса пожöмсö, и пыр жö кокниджык лоö. Сiйö быттьö аслас туганъясöн шенасигмоз шуö вöлi меным: «Эн пов, мортöй. Ловъяöсь на. Олам на. Сiдзжö и тэ ёнджыка эскы аслыд, аслад вынъяслы».
И кöть абу нин сiйö, но эз мун миян дiнысь ас йывсьыс казьтышттöг. Орчча кыддза-пипуа рас пöлöн посни пожöмъяс бырскöбтöмаöсь. Быттьö кодкö кöдзöма найöс. Тайö ас йывсьыс ыджыд да пашкыр пожöм паметь колис.
Медводдза лым вывтi мунiгöн казяла мöдлапöв берегын вежсьöмъяс. И тöдсаöсь, и абу тöдсаöсь коркöя вуграсянiнъяс. Со водзынджык дзик берег пöлöн неважöн на шувгис ыджыд пожöма яг. Сись кодь пуяс сулалiсны да асланыс мичлуннас ошйысигмоз видзöдчисны ваö. Сэтшöм тшапöсь вöлiны, быттьö нöшта куим нэм кöсйисны овны. А öнi лыда нин кольöма. Кöнöсь нö мукöдыс? Ваыс нуöма. Дугдывтöг, торйöн нин ытва дырйи, кырöдö берегсö. Со и пуясыс ваö веськалiсны, лыаöн тырисны. И быттьö бара жö нюкыртлö пытшкöстö. Збыль öмöй вочасöн вошö тайö мичлуныс?
Но природаыс сiдзи нин вöчöма, мый öтиторйыс мöдторйöн вежсьö. Мöдлапöвса крут берегысь, кöнi пожöмъяс сулалiсны, ваыс лыасö тайö берегас вайöма. Коркö ыджыд лыа кöса вылын нинöм эз вöв. Но вочасöн бадьяс паськöдчисны, а на коласын гожöмнас коскöдзыд турун быдмö. Коркö-некоркö бадь пуяс улын öдöбтчасны и мöдлапöвса пожöмъяслöн пияныс. Сэтысь вирыс таладорас вуджас.
Оз öмöй и миянкöд тадзи овлы. Кор томöсь на, унатор вылö надейтчам, эскам. Дзулькйö-пуö вынным. Пырджык аскиа лунö видзöдам. И ог весиг сяммöй донъявны ас гöгöрысь быдлунъя олöмсö. Но вочасöн ставыс вежсьö. Мыйсюрö удайтчö миянлы, а мыйкö и оз. Лоам сюсьджыкöн. Тшöкыдджыка кутам мöвпыштлыны ас гöгöрса йылысь. Стрöгджыка нин видзöдам ас вылö, ёртъяс вылö. Дерт, унатор воштiм. Но и унатор босьтiм, медым зумыдджыкöн лоны. И сэки öтитор кöсъям, медым эськö эз жö личкыны воясыс срокысь водз. Медым удайтчис став бурыс, мый кöсйысьлiм вöчны. Öд сэтшöм нин мортыс, мый сiйö векджык олö бур вылö, аскиа лун вылö надейтчöмöн. Медым эз кус миян сьöлöмын тайö эскöмыс да зумыд петасъясöн петкöдчис.
Медводдза лым медводдза дзор юрси кодь жö. Кутшöма виччысян сiйöс, медводдза лымсö. А тшöкыда локтö тöдлытöг. Быттьö тöрыт на гöгöр вöлi сьöдовруд. А талун асывводзнас видзöдлi öшинь пыр и эг эскы аслам синъяслы. Гöгöр еджыд эшкынöн шебралöма вугралысь вöр-васö, быттьö тöждысьысь мам ассьыс ичöт ныв-писö.
Со тадзи жö и медводдза дзор юрсияс тыдовтчöны тöдлытöг. И шензьыштан, и шогсьыштан. Збыльысь, некытчö он воштысь сыысь. Олöмыс бергöдö ассьыс. Öд нинöм миянлы кокниа оз сюр. Быдтор вöсна колö мынтысьны вын-эбöсöн, сьöлöм дойöн. Кымын водзö, сымын ёнджыка быд воштöм йиджö миянлы. Но и зумыдджык лоö миян подувным. Öд эм, кодлы восьлавны бöрсяньным.
Оз-ö сы вöсна, мый водзтi эгджык куж донъявны сiйöс, мый эм, öнi пыр ёнджыка заводитö кыскыны чужанiнö, кöнi вужъясöй. Кытшовта выльысь челядьдырсянь тöдса местаяс, сёрнита матыссаяскöд, тöдсаяскöд. И быттьö выль вын ставыс тайö сетö меным. Кокниджык сьöлöм вылын. Медводдза лым аслас чим еджыдлуннас быттьö весалö ыджыд удж вöчöм бöрын мудзöм вöр-васö, вöчö сiйöс сöстöмджыкöн. Син доймытöдз видзöда тайö чöв-лöнь еджыдлун вылас, и сöстöмлун пуксьö сьöлöм вылö, и мыйыськö каитча, и кодöскö кора прöститны нем думайттöм вöчöмторйысь, и окота аслым лоны сэтшöм жö сöстöмöн да еджыдöн.
Назад в раздел
