Тайö вöлi уна во сайын. Öти арся лунö бать дорö пырис сылöн тшöтшъяыс, пальса лесничöй Епö Сандрö. Кык олöма морт мыйкö дыр сёрнитiсны ас костаныс. Сэсся Епö Сандрö бергöдчис мелань. Мый нö, шуö, он нажöвитчы. А сэки ме ичöт на вöлi. Кыдзи, юалi. Пожöм коль пö таво зэв дона, вочавидзис сiйö. Лесничество пö арбыд и тöвбыд кутас примитны кольсö.
Сылöн кывъясыс мöрччисны меным. Сёрнитчи ас коддьöмкöд. Найö кывзiсны вом паськöдöмöн: сьöмыд öд быдöнлы колö. Öти кöсйö ньöбны лыжи, мöд — коньки, коймöд — велосипед. А бать-мам эз озыра овны. Со и сёрнитчим пожöм коль чукöртны да вузавны. Медводдза лым усьöм бöрын кутiм кытшлавны лыжиясöн Эжва дорса веретяяс. Йи ёнмöм бöрын тшöкыда вуджавлiм и мöдлапöлö. Öтувтчылiм кык-куим мортöн, мед гажаджык вöлi. И весиг гырысьяс, кодъяс прöстджыкöсь вöлiны, босьтчисны тайö уджас.
Пыр жö казялiм, мый медся колля пожöмъяс быдмöны оз веретя шöрын, а дзик дорас. Татшöмъясыс быттьö мукöдсьыс торъялöны. Сукджык туганаöсь. Пашкырджыкöсь. Но торйöн нин колляöсь вöлiны öтка пожöмъяс. Найö быттьö ошйысисны мукöд водзас асланыс пашкыр мыгöрöн, увъяс вылас улiсянь вылöдз сярвидзысь колльöн.
А кыдзи кольтö чукöртны? Ныжиник чернад да челядь вынэбöснад пöрöдны татшöм пожöмтö зэв дыр. Сэки жö тöвнад öдйö пемдö. А ми лэччывлiм веретяö урокъяс бöрын нин. Со и сюсьмöдчим тшытшлыны пожöмъястö. Каям дзик йылас да лэччигмоз вочасöн кералам увсö. А сэсся бöрас нин öктам кольсö. Сап пемыдöдз. Медбöрын пуктам тыра мешöксö даддьö да лыжиасьöмöн кыскам сiйöс турун кыскалан вöла туйöдз. А сэсянь сиктöдз куим-нёль километр на. Гортö воам брöд ваöсь. Ёна и мудзлывлiм. Но öд и сьöмыс миянлы бöрынджык эз этша вичмы.
Дерт, öтарсянь кö, ми бур вöчим. Миянлысь кольсö косьтасны, киллясны да чукöрмöм кöйдысыс отсалас кыпöдчыны выль вöрлы. А мöдарсянь кö, челядь киöн тшытшлöм пожöмъясыс асьнымöс жö и повзьöдлiсны. Быттьö пасьтöмöсь. Чурвидзисны сöмын ув помъясыс. Торйöн нин шуштöм вöлi на вылö видзöдны гожöмын, кор гöгöр ставыс дзордзалiс да пушкыралiс. Сэки вывтi нин вöлiны жальöсь тайö пожöмъясыс. Дерт, найö эз нин дыр сэсся сулавны. Öдйö косьмылiсны. Тшöтш и чардби либö ёсь тöв пöрöдлiс. А öд вöлiны сэтшöм мичаöсь...
Сэсянь пыр гудыртчывлö сьöлöмöй та йылысь казьтылiгöн. Эз-ö буретш тайö кадсяньыс миян пиысь öткымынлöн чуж кутшöмкö веськодьлун кытшалысь вöр-ва дiнас? А кодсюрö, мöдарö, вочасöн гöгöрвоисны омöльсö да велöдчисны ёнджыка радейтны войвывса пармасö.
Назад в раздел
