Медводдза глава
Паськыд Печора ва вывтi Ниа Шор деревняö тöвзьö-воö «Заря». Сiйö зэв мича, енэжлань гоньгöдчöм каля кодь. Шыльыд морöсыс ю веркöссьыс торъялöма, топыд ваыс шлачкöдö пельк кынöмас, а сэсся кучкöм бöрас оз нин вермы мынтöдчыны лэбач-теплоходысь, сибдö «Заря» бокъясö ёся шеновтчöм бордъясöн.
Ва веркöстi лэбысь «Заря» дорас важöн велалicны Печора бердын олысьяс. Та вöсна кöть и любуйтчöны сылöн лэбöмöн — сувтланiнас могтöг некодi воча оз котöрт. Посньыд челядьысь öтдор.
Вы-ы-лысянь видзöдöны ва кузя воысь-мунысьяс вылас Ниа Шорын олысьяс. Керкаясыс изъя ласта вывсянь заводитчысь джуджыд да крут кыркöтш вылын — щелья вылын, кыдзи асьныс шуöны танi олысьяс.
Ниа Шор деревнясö ключьясысь артмöм татшöм жö нима шор юкö кык пельö. Шор пöлöныс бöръя вояснас гыпкöмöн буждалiс, артмис паськыд да джуджыд кырöм, и öнi нелямын керкаа деревнясö кык пельö юкöмыс ёна тöдчö. Кырöм кывтыдас ставнас выль керкаяс, чачаяс кодьöсь, гизьгысьöмаöсь дзик щелья вевдорас томиник кыдз пуяс пöвстö, югыд мича öшиньяснаныс найö пыр видзöдöны вöльнöя шлывгысь паськыд ю вылö, сы сайын лöзалысь парма вылö.
Кырöм катыдас пöльясöн на тшуплöм оланiнъяс. Кузьмöсöсь да ляпкыдöсь, тыдалö, мед тöлыс омöльджыка веськалiс. Воймöмаöсь. Вöр лэдзысьяслöн коркöя баракъяс кодьöсь. Ниа Шорын татшöм керкаыс абу жö öти семьялы. Некымынлы.
Катыдса татшöм медводдза керкаас олö Зоя Раменкова, скöт дорын уджалысь, доярка, кызь квайт арöса ныв, Печора райсöветса депутат.
Мöд орчча кузь керкаас олöны рытыв джынъяс Ира—Володя гозъя, асывладор джынъяс — Тольчи Вань — Иван Данилович гöтырыскöд. Ира — скöт видзысьяслöн бригадир, Володя верöсыс — Ниа Шор лавкаын вузасьысь. Зоя — райсöветса депутат, орчча керкаса Ираида Филиппьевна Филиппова — босьт вылöджык — партия обкомса член. Со и серавлöй та бöрын: нелямын керкаа деревня, пемыд вöр!..
Тольчи Вань — Иван Данилович Головин — висьöм кузя нелямын сизим арöса пенсионер, öттшöтш школа ломтысь, кöнi гöтырыс, Римма Васильевна Головина, велöдö. Иван Даниловичлöн эм «Вöйысьясöс спаситöмысь» медаль да сы вылö документ.
Ещö водзö керкаын Öкуль да Василиса пенсионеркаяс олöны. Водзынджык — щелья чурклань — Иван Даниловичлöн воча вокыс Семö, пенсионер жö нин, Иван вокыскöд тшöтш школа шонтö. Но, а мукöд кадас, гожöмнас кö, ветелясьöны — сын чери кыйöны, бадьяс костысь пырей турун ытшкöны да мотора пыжöн шливйöдлöны, öшинь ув йöраныс бöрын чöвтöны.
Кыркöтш вылö кыпöдчысьсö видзöдысьяс сразу тöдiсны: художник Андриян Попов воö. Быд гожöм волö Ниа Шорö карса художник Андриян Попов. Ыджыд тушаа, паськыд пельпома, сьöд кудриа юра, сiйö волысалас мыш саяс мольбертöн, бумагаöн, краскаöн сьöкыд нопсö да крука бедь отсöгöн — ранитчылöма война дырйи — пöлöсöн ньöж кашкас-каяс щельялöн морöсöд, веськыд коксö водзö чургöдöмöн здук шойччас Ване дядь йöр дорын, сэсся йöръяс пöлöн пач под кодь зумыд трöпа кузя чотiктас водзö, сылöн рисуйтчан местаö — щелья йылö. Тан, дзик щелья дорышас, Андриян дыр сулалö памятник кодь, любуйтчö лöза-еджыда шöвкöн пöртмасьысь Урал гöраяслöн морöсöн, вöр-ваöн, кодi вольсыштчöма пом ни дор, ышöдö, чуксалö, душитö парма весьтын сулалысь художникöс видз выв дзоридзьяса, мырпома-чöдъя, багульника сынöдöн. Кузь лун памятник кодь сулалö Андриян мольберт весьтын. Öктö, серпасалö войвывлысь гожся рöмъяс, дзебö краска рöмъяс пытшкö и пöим кодь посньыд печораса гебъясöс, кодъяс лясöны косьмытöм на краска вылас тэрмасьöмöн да öта-мöдсö йöткалöмöн, кыдзи тай визув челядь снимайтчыны пуксялöны öти чукöрö.
Ниашорсаяс тöдöны Андриян художникöс, пыдди пуктöны сылысь уджсö, кöть сёрниö, ещö унджык — вензьöмö — оз пырны. Кутчысьöны татшöм «деласьыс». Сöмын öтпыр Дмитрий Анисимович Канев — Сьылысь Митра, Профессор (сэтшöм прöзвищеяс) крукасьлiс рисуйтчысь дорö. Пыркнитiс юрнас, медым вешйывлас синсö дзебысь виж чолкаыс, да юалiс — гöлöссö нарошнö кызöдöмöн, тшапитöмöн:
— Тадз шуам. Морт олöм!.. Мый сiйö сэтшöмыс да кыдзи тайöс гöгöрвоны?.. Мыйын смыслыс?..
Кост мысти:
— Вочавидзöй, пöжалуйста, раз тi эм художник да, сiдзи шуны, тöдмалад олöм!..
Татшöм юалöм бöрын кузя видзöдiсны öта-мöд выланыс художник да Митра. Художник — синъяссö ёна читкыртöмöн, нюмъялiгтыр. Митра — нюжöдчöмöн, юр вемсьыс став чукыльяссö тайö юалöм вылас зэвтöмöн. Но воча кывсö виччысьны эз кут, шылькнитiс чолкасö, тшапа вешйис бокö. Юалöмсö сетöма. Мед мортыс думайтö. Сы вылö и юалöмыс: «Морт олöм. Мый сiйö сэтшöмыс?..»
Татшöм сьöкыд юалöмъяссö сеталöмысь Митра новлöдлö «Профессор» ним. Сьылысь Митра, содтöд — Профессор.
Босьтчисны видзöдны вадорö, «Заря» сувтланiнö. Сэнi, пöрöдöм да якöра пыжъяс дорын, öтарö да мöдарö чарскис-ветлiс портфеля, мугöм костюма том морт. Ветлöдлiс гырысь воськовъясöн, копрасигтыр, павкъялысь юрсисö мольöдiгтыр. Тешкодя ветлöдлiс. Со друг джöм сувтiс кокъяссö паськыда пуктöмöн, лэптiс веськыд кисö юр бöрас, кынмылiс, видзöдiс Печора мöдлапöлö, сэсся друг ловзис, öвтыштiс портфельнас да зiля мöдiс дзарöдны деревнялань, кырöм кывтыдлань. Шарскис, шарскис да крута бергöдчис, косiс öнтая сулаланiнас.
— Гашкö, мöдар берегас мада пиыс кöсйö... Щука ты вылö...
— Куварканъяс! Туфлинас да костюмнас! Шапкатöгыс!— скöра öлöдiс Хозяинов.
— Оз кö сайöдiн корсь. Зэв тай визула войлö,— серöктыштiс Ваньö дядь.
— Юавны колö. Мортыс абу миянысь,— шыасис тшöтш Ираида Филиппьевна.
Но мортыс — стройын ветлöдлысь салдат моз — вöчис ещö öти ыджыд воськов берег пöлöн, сэсся бергöдчис шуйгавылö да босьтiс веськыд визь кыркöтшлань, кöнi сулалiсны да пукалiсны сы бöрся видзöдысьяс. Кыпöдчис Ваньö дядьлöн бензина да пыж мотора сарай дортi, Ваньö дядьлöн кык пöв пасьта нюжöдöм сера пос кузя. И петiс кыркöтш вылö стöч Ваньö дядь керка дорö — гортас катöдысь сера поссö стöча тувъялöма Ваньö дядь.
— Здравствуйте...— шуис воöм морт да öти кисö бара лыбöдiс юр бöжсö шыльöдны.
— Здоровьеысь бур нинöм абу. Тэныд здоровье жö,— «Здравствуйте» вылö тадзи шыасис Ваньö дядь.
Воöм мортыс, шöр тушаа и арлыднас нин, буракö, матö комынö воö, а шогмытöма яндысьысь, тыдалö. Быд шуöм бöрын гогнитö юрнас, виньдалiгмоз, вомсö ёна паськöдлö, сэтшöм пö уна сёрнита. Дыр эз гöгöрвоны кывзысьяс, мый кöсйö мугöм костюма мортыс, сы понда мый ылысянь панiс сёрнисö, эз стöча. Висьталöмсьыс став ковтöмсö шыбитöм бöрын картинаыс лои яснöй. Том мортыс обласьтса столицаын уджалысь, то ли газетысь, то ли ещö кутшöмкö органысь, волöма видзöдлыны, кыдзи стрöитöны Печорскöй ГРЭС. Видзöдлан делаыс эштöма, и воöма Ниа Шор деревняö. Узянiн, юр сюянiн юасьö.
— Юрийöн менö шуöны. Со удостоверение,— шуис бöръясö том морт и зэв тэрмасьöмöн сюйис кисö пинжак морöс зептас, кыскис дзоляник удостоверение да мыччис Ваньö дядьлы.
— Милöй тэ морт,— серöктiс да öвтыштчис удостоверениеысь Ваньö дядь.— Милöй тэ морт! Мый нö серамсö каран?.. Кутшöм ме документ видлалысь? Тыдалö вед тай — коми морт, ззв яндысьысь морт. Кутшöм нö ме документ видлалысь! Хозяинов, гашкö, ферма зав, видзöдлас...
— Разрешитöй,— нюжöдчис документлань Хозяинов. Видзöдлöм бöрын шуис:
— Ваньö дядь! Тэ öтнад гортад. Лэдз корреспондентсö патера вылö. Чайниктö пузьöд. Сын черитö жарит.
— Чайниксьыс тэ гулешитчы, Василей,— серöктiс Ваньö дядь.— А ме и самöвар на сямма пуктыны. Шомыс эм, важ сапöгыс эм жö пöльтнысö. Чайника чайтö нö кодi юас: ме али корреспондент!.. Сын черитö тэнад кыйöмаысь жаритам, Василей Александрович, али?..
— Аслыд сюрас, эн бöрд.
Мöд глава
Ваньö дядьлöн керка. Ывла посводзсянь воськовтан пыдi посводзö. Танi — кык öдзöс. Öтиыс войвылö — гидö, мöдыс—лунвылö, олан вежöсъясö. Дор комнатасö пöвъясöн юкöма кык пельö: пöвъя стен саяс пусян-пöжасян пач да джаджъяс, öшиньяса джынъяс — мыссян пельöс, лабич, паськыд да кузь сёян пызан. Мыссян доз весьтас — джаджъяс жö. Сэнi Ваньö дядьлöн быдсяма посньыд коланторйыс: шылаяс да емъяс, кыснанъяс, жилкаяс, винтъяс да ключьяс, пыж моторлы свечаяс да прокладкаяс. Сэнi жö — аслас дзоляник кöрöбын — вöйысьясöс спаситöмысь медаль да сы вылö документ. Медальсö öтчыд на и öшöдлiс морöсас Васьö дядь. Дуригмоз. Нывбабаяслöн праздник дырйи — Март 8 лунö.
Ваньö дядь чукöртö пызан. Лэптöма пызан вылö конфоркаа, лапъя вугъяса да медальяса виж самöвар. Руалö да шумитö самöварыс. Пу тасьтiö кыза шöралöма лавкаысь нянь. Ыджыд гырничын вылльöв лэптöма. Колö петавны кöбрегса кöзöдö черила.
Юрий корреспондент пыдi вежöсас. Кияссö мыш саяс пöрысьяс нога кресталöмöн, сiйö видзöдалö стенын öшалысь карточкаяс, öшиньяс пыр тыдалысь Урал гöра да Печора ю.
Пырис Ваньö дядь кöбрегсянь, и пыдi вежöссянь воча петысь Юрийлöн нырбордъясыс чошнитчылiсны, вом пытшкöсыс вазис: Печора чери дук паськалiс керка пытшса сынöдас.
Ваньö дядьлöн медводдза кузь сёрниысь кытсюрö пелькöдöмöн-дженьдöдöмöн
— Эжва ёртö... Кыдзи ме гöгöрвои висьталöмсьыд, тэ, Юрийö, институт помалöмыд, учительскöйöс, сэсся öти во газетын уджалöмыд, öти во армияын вöлöмыд, öнi бара газетын быттьöкö. Кыдзи тэ видзöдан татшöмтор вылö... Ме лыддьывлi, быттьöкö пö японеч-учёнöйяс тöдмалöмаöсь, мый мортыд, ловъя мортыд, во пиас некымын раз пикö волö. Сэки сiя мортыс вермас вöчны сэтшöмторъяс, мый и думыштнытö он куж. Пример вылö, шуам, ыж кодь рам морт, кодi мöд кадö кö гутöс оз печикты, ог нин шуöй каньöс либö понйöс, а татшöм лунас — кор воас с=йö луныс — вермас и тэныд сьылiдзиръяд сöтны и асьсö мыйкö карны. Татшöм лунсö пö стöча позьö тöдмавны быд мортлысь, и сэки пö весиг уджалöмысь колö сiйöс мездыны.
Сiйö, значит, татшöм мортыс сайд юрнас вомсö оз восьтывлы, немöйсьыс-немöй. Немöйыд ува-аватö шулас на, а Митрейыд — оз. Чорыд да гуся морт. Век чöв олö, кывзысьö юрсö пöлöстöмöн да ассьыс мыйкö думайтö. Уджалысь кöть, а тайö чорыдлун вöснаыс ли мый ли — мужикъяс öтдортчамкодь сыысь. А юыштöм юрнас, значит, сэтшöм: либö кильчö сод вылас пукалö да лёкнога сьылö, горзö, мотивсö сöвсем оз куж нуöдны. Либö шöйтö деревнятi да рочасьö. А сэсся крукасяс, шуам, тэö синъяснас да пыр öтиöс юалö. Рочöн, каналья, юалö: «Человеческöй смысл пö! Што оно такое?..» Аха...
Меся, Митра, Печора мортö... Меся, юалан, а ачыд нö тöдан он? Меся, изьвинит татшöм корöмысь, а тöдан кö, Митра другö, висьтав, мыйын олöмыслöн смыслыс?..
— Тöда пö,— шуис Митра. Аха. Öти «тöда» и шуис. Ме быдöн шемöсмылi. Меся, Профессор и эм. Митра öтведь сетiс: медым пö, Иван Данилович, тöдны аслад олöмлысь смыслсö — мыйла олан, мыйла колан — колö пö, Иван Данилович, тöдны мöдтор: эпохаыслысь смыслсö, кадыслысь, значит, кодö тэ олан. Тайöс пö мöдсö тöдан?.. Меся, юрöс керыштасны — ог сяммы öтведь сетны, Дмитрий Михайлович. Менö вичалö, и ме сiйöс вичыштi. Тайöс кö пö он тöд, и кодарö овны да кодарö олан — он тöд.
Тэ нö, меся, кысь тöдан? Митра нинöм эз шу, книга судзöдiс сервант шкапсьыс да пызан вылас пуктiс. Тайöс пö колö лыддьыны. Тайö пö тэныд шпионъяс да важ царъяс серти книгасьыд унджык восьтас. Гортад нуны пö ог сет, а верман кольччыны да введение главасö лыддьыны. Меным пö удж вылö кад.
Юрийö... Ки пыдöс пасьта деревняын нелямын во Митракöд олам, а непöштö думыштны — вöтавны эг куж, мый Канев Митракöд татшöм сёрни коркö лоас.
Аха. Меся, со тай мыйын вöлöм делаыс. Меся, ме школа шонта, ветеляся, турун ытшка аслам мöслы, гöтыр водзын кампузитча, закон торкалöмöн — тулыс-арнас — и тыв на чöвтла Печöра юö, нитшсявны заводитöм юрö быдсяма ёг-лöпнас тырöм, меся, ме тайö смыслсьыд бокытi ветла... Шог лоис, Юрийö... лыддьöм бöрад. Меся, Митраöс серавлам, а сiйö со кутшöм вöлöм. Меся, Митраöс колö рисуйтны щелья йылö ветлысь художниклы. Юала: меся нö ме пыр на важ олöм ола — Тольчи да Микол дедъяс моз?.. Тольчиыс — батьсянь дед лоö, Миколыс — мамсянь.
Öнтай тай шулiн, Юрийö, Эжва зонмö, мый татчö медводдза овмöдчысьлы колö памятник сувтöдны — öнi сэтчöдз воим да висьтала: медвойдöр овмöдчылöма татчö батьсянь дедö — Тольчи. Во сё лоö сысянь.
Сiйö, значит, петöма Ижмаысь гöтырнас, посни челядьнас Печора бокысь бур олöм корсьны. И катас пыжöн Печора кузя миян Ниа Шорöдз. Чеччас галькиа да крут берегас. Прöста чеччас, шойччыны. Шор дорас вöлöм зэв джуджыд да кыз ниа — сы улö узьмöдчас, медулыс увъяс зыбка öшöдас. Мöд лун асывнас кытшовтас матiгöгöрсö — шорсянь неылын паськыд да кузь куръя — тöв и гожöм позяс кулöмасьны. Юсянь матын — тыяс, видз-му каригмозыс бара жö позяс кыйсьыны. Öти лунö-асылö матiгöгöр вöр-васö войлöдлас, Тольчилöн сьöлöмыс инасяс: татчö позьö овмöдчыны. И водзö оз кат. Му керка босьтчас лöсьöдны.
Тольчи нимыс, Юрийö, прöзьвище. Дед вöлöм зэв тэрыб кока, оз пö мун, а кольча моз тюрö. Аха. Та вöсна первой Кольчаöн шуасны: Кольча. А сэсся Кольчаыс Тольчиö пöрас: Тольчи.
Ижмаö кö ме муна да Даньö Ваньöн висьтася — некодлы тайö нинöм оз восьты. А висьтася кö — Тольчи Вань, олöмаяс, пöрысьяс шуасны: «О, мада пиö, Тольчи рöд лоан...» Аха.
Значит, тэрыб да уджач вöлöма. Вина дзик абу юлöма, табак абу нюшкылöма. Пыр тюрö-войöдö кытчöкö. Сэсся Микол дедö воас Ижмасянь жö, семьянас. Другъяс вöлöмаöсь Тольчиыскöд. Микол дедыс, значит, дзик мöд морт. Быттьöкö абу тэрыб, а ён да сердит, и некодыр печальö абу усьлöма. Пыр пö вылын юра да аха-хаöн серöктö. Уджавнытö ёна вермöма. Коркö-некоркö видз-му лöсьöдасны, овмöдчасны. Шуласны, важ йöз пö абу юлöмаöсь. Микол дедыс вöлöм сунисöдз вермö юнытö. Вошъяс кö пö юны да кутысь оз ло — помöдз юсяс.
Сэкъя олöмö прöмыснад, чери-яйнад, ярмарка вылö вöлöм петöны. Менам кык дед мунасны. Тольчиыс додь тыр ньöбасьöмöн косас, а Миколыс — оз кö гöтырыс корсьны ветлы — оз и во. Мунас гöтырыс — Микол мый нажöвитлöма, ставсö нин прöжöвитöма. Не сöмын ньöбас — вöлыс ни доддьыс абу кольöмаöсь. Гöтырыс бöрдны вошъяс. А Микол дедыс, значит, тадзи шуас: «Натальö! Любöй гöтырö, эн бöрд». Вачкас аслас шуйга пельпомö — со пö тэныд муыс да виддзыс, веськыд пельпомас вачкас — со пö тэныд парма зверь прöмысыс да ягöд-вотöсыс.
И бара выльысь прöмышляйтны да му-видз карны вошъяс. Татшöми вöлöм мам кузя дедыс. Печаль тöдтöм. Дедъяс дорын, Юрийö, ме нем ог сулав. Уджавнытö дыш, юнытö — сюсь. Юа да ог удж карны Микол дед моз чепöсйы, а юрöс клёнöда, бöрыннас, делö вöчöм мыстяыс, каитча. Аха... А кодлы менам клёнгöм-каитчöмыд колö. Аслым, гашкö, мед сьöлöмöс кокньöдны.
Ме сэки ёна шензи. Öд думышнытö сьöкыд: сымында тысяча во сайын щелья лайколын, кытi быд лун кодiкö да вуджам, морт нин олöма. Сiйö, Юрий, ме моз жö аддзис да видзöдалiс тайö Печора юсö, ю сай вöрсö, чери кыйис, юква пуис, котралiс да чеччалiс, усявлiс да доймавлiс, радейтлiс да страдайтлiс, серавлiс да бöрдлiс, мича лунъясö щелья йывсянь «Охо-хо!» горзiс да йöлöгаö кывзысис, шондi да кодзувъяс бöрся видзöдiс, думайтiс да шензис, и, гашкö, ме моз жö юасис думнас: «Мыйла ола? Мыйла да кодлы кола?..»
Сэсся кувлiс сiйö, мöд чужлiс да шензьывлiс. Дивö... И со меöдз воис, ме ола... Гашкö, налöн вирысь артми... Да...
Ставсö тайöс шуалöм бöрын Иван Данилович шондi водзын лым тола моз небзис-топалiс, ёнджыка мышкыртчис, дзик öтнасöн быттьö колис да мунiс сiйö ылi-ылiас, сiйö ылi-ылi йöз дорас, кодсянь лоис Ваньö дядь. Сэсся бöр косiс да шуис Юрийлы.
Ваньö дядьлöн Юрийлы пыжын воча кывйысь
Милöй тэ морт... Кысянь вочавидзны тэнад юалöм вылö, кысянь?.. Гашкö, пöткасянь заводитам, лэбачьяссянь... Босьтам юсьöс. Ачым эг аддзывлы, но шуöны, юсьыс кö воштас ассьыс пöвсö, вылö-вылö качöдчас енэжас, сэсся топöдас бордъяссö телö бердас да из моз усьö пöв вошöминас. Тадзи ассьыс олöмсö орöдö. Пöлыс кö быри — и сылы овнысö нинöмла, некутшöм радлун да гаж виччысьнысö: сьöлöмыс, вернöй лэбач сьöлöмыс оз лэпты овнысö, кор пöлыс бырис вöльнöй светсьыс... Да... Уткаöс босьтам...
Кольöм тулыс, ытва дырйи, татысь куръясьыс сьöд уткаöс ранитi. Дасысь унджык утка пукалiсны. Кыпöдчисны енэжас, но эз эновтны ранитöматö, вöчисны кытш куръя весьтын да бöр пуксисны. Öти утка торйöдчис чукöрсьыс, öтнас уйö. Стöч сы дорö ранитöм да сунлöм утка петiс. Сёрнитöны ас ногыс. Кöнкö, юалö öтиыс: мый пö эн кыпöдчы, доймин али мый? Мый тэкöд, милöй?.. А ме, морт-зверö, мöдысь школги. Ранитöмаыд сунiс, мукöдыс выльысь кыпöдчисны. Куръя весьтi кытшолöн водзö лэбисны. Но öти кольччис, ранитöмаыдлöн пöлыс. Пуксис, меöн дойдöмаыд быйк петiс орччöн. Эз нин сёрнитны мöдны: гöгöрвоана лои делöыс. Тыдалысь бадь йывъяслань öдйö мöдiсны уйны, меысь сайöдчыны.
Коймöдысьтö эг лый, Юрийö, кöть и кыкнаннысö эськö верми босьтны. Жальö петiс. Меся, гозъя тысячаысь унджык верст колöкö лэбисны, медым чужанiнас воны да гозъя поз вöчны. Мед, меся, мунасны, мед милуйтчасны, гашкö, эг ёна дойд да поздысьны да бурдöдчыны вермасны, ар кежлас поз тыр утка-челядьöс быдтасны.
И быдтысисны вед. Танi, куръя турун пиас. Ёна гусьöн олiсны, а мортыд казялан тай, мортсьыд он дзебсьы. Öнi морт вылö вуджам. Аха. Значит, тадзи... Юрийö!.. Тая сёрниыс, кодöс öнi висьтала, медым татчö куръяас и коляс. И деревняын некодлысь та йылысь нинöм эн юась. Аха...
Гöгöрвоан, шуан... Значит, тадзи...
Öнi кö мунам ми деревняö да вуджам кырöм саяс, кöнi выль керкаясыс, да воам Рочева Анна керка дорö — то кылам патефон музыка да йöктöм. Некодi деревняын тайö пöраö оз гажöдчы, зэв нин, гашкö, бакенщик Педöр лавка сур юö гöтырыскöд, пыж кокора пилитöм бöрын. Аха. Либö ферма зав Хозяинов, гашкö, öти шкальчик пöрöдiс. Сылы шкальчикыд стöкан пöсь чай юöм кодь, кымöсыс муртса и ньылöдлö.
Некодi, значит, оз гажöдчы, а тайö керкасяньыс, медбур дояркалöн керкасяньыс, патефон музыка кылö. А патефон пластинкаыс пыр öтитор сьылö: «Казачок!» Значит, «раз, два, три, казачок, раз, два, три, казачок, ох и танец, этот танец, казачок». Тöдан, шуан, татшöм сьылансö?.. Ышöдана сьыланыс, ки-кокнад зымнитны да клопнитны телепит, а кылан Анна керкаысь тайö сьылансö да öтка йöктöмсö — и голиад быттьö кутчысьласны, синваыд он тöдлы да петас. Öтнас, Анналöн пиыс, Витя Рочев, ворсö да йöктö. Йöктö, значит, «казачок» сьылöм улас, кор матiгöгöрын некодi быттьö абу. И бöрдö. Синваыс пö чунь кызта тюрöдö чужöм кузяыс. А войнас, значит, кор нин ставыс узьны водасны, Витяыс öтнас мунö щелья йылö — дзик миян весьт кыркöтш йылö, кöнi öнi сулалам пыжнас, да мый думайтан, Юрийö, милöй морт, вöчö?.. Он тöд, шуан... Ме кö тэ местаын, тадзи жö шуи, эг жö тöд. Аха... Юрийö! Милöй мортö!.. Витяыс сулалö щелья йылын арся букыш войнас, видзöдö, значит, миянлань — куръялань, парма чуркас видзöдö да бöрдö гöлöсöн да «Лю-ба-а!» чуксалö... Öнi гöгöрвоана, Юрийö?..
Витяыс да Любаыс тшöтш быдмисны, тшöтш велöдчисны. Любаыс кöкъямыс класс бöрын карад велöдчис, сэсся танi клубын уджалiс. Витяыс дас класс помалiс, электрикö велöдчис во джын, Печораын уджалiгöн армияö босьтiсны. Кымынысь щелья йылас котöртлiсны ныла-зонма, кымынысь öтлаын снимайтчылiсны, быд карточка мышын клятва: некор не вунöдны öта-мöднысö.
Армияас колльöдiгас быд пызан сайын орччöн пукалiсны жöника-невеста моз. Любасö сывйыштöма Витя вöсни коскöдыс öти кинас, топöдöма дiнас да пöртмасьöны шондiа-муа гозъя моз, ставыс быттьö гозъя олöм вылö дась. Прöщайтчигас часiяснаныс вежсисны. Аха.
Таво тулыс инженеръяс волiсны, ва мерайтысьяс, мерайталiсны, значит, медым даннöйяс чукöртны, кодi колö ГРЭС-сö стрöитöм могысь, либö мöдтор вылö. Тайö каднас, значит, инженер öтик, он шу — лёк морт, волейболöн бура ворсö, пушка ядрö моз волейбол мачыс сэки лэбö, кор гаситас сетка бердас чеччыштлöмöн — синмалас Любатö. Шуам на ногöн: Печора ватö мерайтас, и Любатö синъяснас да вежöрнас мерайтас. А мый сэнi мерайтнысö! Инженерыс тэ моз кузь тушаа, шыльыд да сöнöд. А Любаыс, значит, сы дорын да тэ дорын — питшöгад новлöдлана: кокньыдик, мелi, гöптасьысь бандзибъяса. Абу моднöй öнiя нывъяс моз — лöз гöгыльяса еджыд платтьöа. Платтьöыс, значит, гожся тöвру кодь кокньыд да мелi, быд мыльк да гöп тайö платтьö улас тöдчö.
Юрийö!.. Любасö дивитны ме ог лысьт. Мунiс сiйö инженерыскöд, клуб ключсö, волейбол мачсö лючки сдайтiс фермаса зав Хозяиновлы, и вöлi Люба да эз ло быттьö.
Витяыд сэсся отпускö воис. Петiс, значит, «Заря» теплоходысь, вöскресенньö лунö воис, йöзыс уна вадорас. Витя — Печора шань пиö, отпускö воöм салдатö — здоровайтчалö вадорö веськалöм йöзкöд, а синнас йöз юр вывтiыс видзöдö, бергöдлö, нюжйöдлö голянас да оз аддзы, кодöс корсьö. Югыд лöз ной берета, сэтшöм жö визьяса тельняшка тыдыштö куртка увтас. Десантын, значит, служитö Витяыс. Военнöй паськöмнад лэбач кодь кокньыдöн кажитчö Витяыс, кöсъяс кö — думайтан — сырчик моз скокйыны-котöртны вермас да варыш моз лэбзьыны. Некод нинöм эз шуны Люба йылысь. А Витя, значит, эз горт керкаас, мамыс керкаö войöд, а менам суседö — Öкуль баб ордö кöр моз öдйö кайис, кодi быдтiс Любасö. Любаыс внучка лоö Öкуль баблы. Öкуль нылыс Любасö верöс сайö петтöдзыс на чужтылiс, зэв томöн, да мамыс и лои быдтысьнас. Люба мамыс öнi Сибирынöсь кöнкö, верöсыскöд. Öкуль баб и висьталас ставсö Витяыдлы.
И вот, Юрийö, велöдчöм мортö!.. Видзöдан ывла вылас, сiйö жö миян деревня вылас да тöдтöм мортыдлы чайтсьö ставыс мичаöн да бурöн, шуам, быттьöкö гöгöр бур, кöть кык дор вур, а вуран кö — и резьдас-потласяс ставыс. Кыдзи нö вуран, кор Витя, шуам, инасьтöм лов кодь, йöрмöм лэбач кодь. Вуран кö татшöм бурнад — сьöлöмыс потас. Менö кытчö вуран — кор сьöлöмöй покой жö оз тöд, нöйтчö висян сьöлöмö, оланног на корсьысьö.
Гашкö, ферма зав Хозяиновöс позяс вурны?.. Сiйö, значит, дзик дöвöлен талун кежлö артмöм олöмнас. Асывнас нарадитас, вылын морöсöн овмöссö кытшовтас, казанканас журкнитлас кытчö колö... Öтикöд баитас, мöдкöд сола чери сайын пукыштас. Делаыс мунö мыйта колö. Но вуран кö сiйöс татшöм бурнас — бара жö резьöдны ковмас. Мыйла? А сыла, значит, Юрийö, мый Филиппова Ира сiйöс важöн критикуйтны лöсьöдчö партсобранье вылын. Юышталöмысь, значит, да халатносьтысь. Сiдзкö, бара жö оз позь вурнысö, критика делö вылö ковмас петкöдны.
Андриян сулалiс йöр потшöс вылö морöснас лэдзчысьöмöн. Потшöс бокын жö уджалан кöлуйыс, рама вылö зэвтöм да косьмытöм на щелья йывсянь талун гижöм серпас: куръя, Печора юлöн кузь кöдж, лöза-вижа парма, енэж визьын Урал излöн еджыда-лöза морöсыс. Серпас кыдз серпас, чужан мулöн öти пельöс. Андриян оз первойысь лок да аддзы войвывлысь скуп мичсö, рöмъяссö. Тöдiс: оз серпасъяс вöсна ветлы коймöд гожöм щелья пöлöн, а быттьöкö гусьöникöн кыйöдчö, мыйкö медколанасö виччысьö, код бöрти ловзяс, воссяс, томмас да босьтчас чорыд, вир пузьöдана пöтлун тöдтöм уджö. Талун öктiс щелья йылын тöдса рöмъяссö да вуджöдiс найöс зэвтöм дöра вылö, а син водзас олiсны то джуджыд кыркöтш вылын печкысьяс Öкуль да Василиса, то коксö гожйöдысь Зоя Раменкова, аслас йöр дорын мышкыртчöмöн пукалысь да куритчысь Ваньö дядь — Урал дорын матын коми деревняысь олысьяс.
— Пöра, пöра!— серпассö тэрмасьöмöн помалiгöн кыпыда аслыс шуалiс Андриян Емельянович, быттьöкö кывлiс фермаса зав Хозяиновлысь лунъя шуасьöмсö.— Пöра! Воис сiйö медколанаыс. Пöра, другö, Андриян Емельянович. Пырысьтöм-пыр портретъяс гижны!..
Ваньö дядь ордö пырöм да лабичö пуксьöм бöрын быттьöкö нинöм абу вылас серавлiс да шмонитiс Андриян Емельянович — гажа юра морт моз. А юрас дугдывтöг нöйтчис Ваньö дядь: кватлалiс да донъялiс Иван Даниловичлысь быд вöрзьöм-вежсьöм. Керкаö пырöм бöрын Ваньö дядь здук кежлö сувтлiс кöтшасас, думыштчылiс, тыдалö, артыштiс, мыйсянь босьтчыны гортса уджас — кык гöсьтöс колö примитны. «Аха» шуис да копыртчис кöтшас пельöсö мыссьыны. Мыссис шумöн, гöрдöдтöдз ниртiс кöтöдлöм чужöмсö, дзугис небыдик да этшаник юрсисö, сыныштiс вит чуньнас и юрсилöн лаб сорсъясыс ещö ёнджыка разi-пельö чурвидзны мöдiсны.
И со Ваньö дядь сулалö пачводз занавес сайысь петöм бöрын. Пызан выв дась. Самöвар шумитö и руалö. Пöсь кайö жаритöм сынъяса паськыд да джуджыд латкасянь. Пызан сайынöсь гöсьтъяс — Юрий да Андриян Емельянович. А Ваньö дядь сулалö пачводз занавес сайысь петöм бöрын, сукарöсь сера, гырддзаяс дортiыс чукрасьöм сосъяса дöрöма, пыжöн ветлыны еджыда-сьöда пон куысь вурöм жилетыс пöрччытöм. Öти кручки вылö пöласö кизялöма, мöд кручкиыс — вылысыс — орöма. Ваньö дядь сулалö занавес дорын гырысь лыяса, кузь тушаа, морöс выйнаыс кыпöдöмöн ырöш тыра туис кутö да синъяс сертиыс, сулаланног сертиыс — мыйкö шуны кöсйö пызан сайö пуксьытöдз.
Андриян Емельянович нюмсорöн, синъяссö читкыртöмöн, крепыда видзöдö печораса морт Иван Данилович Головин вылö да тöдö нин: тайö жилетнас ковмас пукавны Тольчи пилы портрет гижигöн...
— Иван Данилович!— кыпыда и быттьöкö шензьыштöмöн шуис Андриян Емельянович.— Лавкаö ветлытöг татшöмторъяс эмöсь занавес саяд? Туис тыр.
И Ваньö дядь шыасис.
Ваньö дядьлöн пачводз дорын сулалiгöн кывйысь
Гашкö, öнi, кор гöсьтъяс пызан сайын пукаланныд, и оз ков шунысö сiйöс, мый шуны думайта. Но лёкыс нинöм абу, заводитöма да шуа нин.
Со тайö сын черисö кö эгö кыйö талун Юрийкöд — мыйöн эськö сэсся тiянöс гöститöдi, мый и лэптi паськыд пызан вылас!.. Печораса сюра-тошка мужик кö консерва банка ньöби да восьтi, кодi нянь шомöдз нин шоммöма дыр куйлöмсьыс — мый эськö тi шуинныд ме йылысь, бур йöзö! Думсьыныд эськö не тыр сюсьöн лыддинныд, кодлöн абу ставыс гортас. Аха.
Велöдчöма йöзö!.. Тi менö изьвенитöй, а печораса дядьö кö шома скумбрия да хек кута няклявны, мыйысь мöда этiя юнас нимкодясьны?.. Пасьтанас да джуджданас? Мöдлапöлö пода туйсö потшöмнас?.. Прöстит менö, Печора-матушкаö, вердысьö-юкталысьö. Тадзикöн тэ йылысь бур йöз дырйи горза. Прöстит, Печора юö, ассьыд дик быдтастö. Гусясьöмöн, а пызан вывсö вежлан на, чöсмöдлысь на лоан, сьöлöм бурмöдысь. А мый тэнад чужтöм-быдтöмаöн шышъяс моз пöльзуйтчам — асьным мыжаясыс, му вывтi ветлысь кык кока зверъясыс. Нёль кокöн ветлысь зверъясыд, шуöны, вытьысь вывтi оз начкыны-джагöдны, а морт горшыд паськыд. Вöля кö вöлi, некутшöм кутöд кö эз ло — быд пу костö эськö лэч да капкан окталiм, ньöти вис потштöг эгö кольö, быд тыö да куръяö кулöмъяс чöвталiм...
Лыддин тай Юрийö: дас куим ветель менам чöвтöма. Позьöсö кыкöс. Закон серти. Öти пыж вылö, значит. Сiйöн и шыш кодь петан ю вылад: кылан ассьыд мыжтö. А месö мыйöн лöньöда йöй сьöлöмöс? А лöньöда, значит, таöн. Аслам кык ветель да любöй гöтырöлöн кык — нёль лоö; рöдимöй куим нывлы быдöнлы кык ветельöн — квайт.
Квайт да нёль — дас чукöрмö. Кык пилы кык ветельöн — ещö нёльöс содты. Дас нёль ветель артмö. Менам дас куимöс чöвтöма. Слава богу! Этшаджык на. Законсö абу торкöма.
И мунан ветельяс дорад честнöй сьöлöмöн. То анисöн няньтö сулöдан, медым чöскыд дук ветельсяньыд паськалiс; то кöнтусь вый пытшкын нянь шöрöмъястö туплялан; рысьтö пуан, роктö быдсикас шыдöссьыс пуан... Тадзи быдсяма чöскыднас чöсмöдлан сын черитö, и сiйö сэсся водзöс вештас: коркö кык душ кольччас дас куим ветеляд, мöдысь куимöн пырасны. Талун со Юрийкöд сизим душ лыддим.
Печора юыс, значит, сё ветымын тысяча во нин тадзи визувтö да вердö-юкталö сы дорын олысьясöс, учёнöйяс шуöны. Талун вердö жö на, пасибö рöдимöй юлы, кöть и ёна пакöститчам сылы кык кока зверъяс. Мотора пыжъясöн ар черисö лыа вылö лэптам ракаяслы кокавны, ю воргасö сутугаöн, топлякöн, быдсяма кöртнас вольсалiм, ньöти тöня оз сюр, кöнi ва олысьыс оз кутчысьлы тывъяд. Сибдас тывйыд татшöм тöняад, да мездалiгас матькан, скöрман да ю мыш кузяыс пелыснад швачкöдан-нöйтан: «На тэныд, на тэныд!» Мортö, зверö!.. Быттьö юыс, абу асьным, мыжаясыс!..
Ладнö. Пуксьыламö. Талун сетiс на вом вежансö матушкаыс... Эз на дзикöдз накажит. Терпитö на. Ыджыд сьöлöма уджалан, матушöй. Скöрмылан ми вокыд да бурöдны-лöньöдны сямман, козьналан на мыйкö, он на тыртöм киöн лэдз. Пукавлывлi матушка дорас, синва кисьтлi... Сёö, вай, сёö. Енмö-Кристосö... Сьöлöмöй кык мортлöн: öтиыслöн — дик, ышмысь; мöдыслöн, значит, бара жö дик — йöй нор, бöрдысь...
Чери чепöльтöм да ырöш юöм бöрын Ваньö дядь чеччис пызан сайысь, нимтiс асьсö увтыртана кывйöн, гöсьтъяслы шуис:
— Тi сёö-юö, Юрий да Емельянович. Сёрнитöй. Меным Семö братан дорö колö петавны. Дзикöдз вунöдi öти делö.
— Мортö, мортö,— керкаысь петöм бöрын шуасис Ваньö дядь, кыкнан кинас кутчысис зэлалöм чужöмас, личкис чуньяснас пывсян тшынысь моз курдöм синъяссö.
Ю дорö лэччöм бöрын сöлiс якöрöн кольöм пыжö, пидзöсчанясис, гумовтiс содз тыр ва да койыштiс чужöмас. Печора-мам лöня лолалiс из вылö кольöм пыжъяс дорын, пелькöдчис сылöн быдтасъяслöн лунся удж бöрын. Тэрмасьтöг мыськалiс пыж бокъяс, нюжöдчывлiс вылöджык косö — изъяс вылö, пыравлiс гöпъясö — чукöртiс бензин-мазут ляксö, йöткалiс найöс, вöтлiс берег дорысь шöрö да пыдöджык, кöнi вына пияныс сöнöда да кыпыда ыпйöны-мунöны служба вылö Вой саридзö.
— Ин дивит, Печöра-мамö, öпеть лёк сьöлöмöн тэ дорын пукала... А код дорö сэсся пукся?— юалiс да öдва кутчысис бöрддзöмысь Ваньö дядь, друг гöгöрвоис, мыйла сылы сэтшöм деливö лои пызан сайын пукалiгöн.— Гöтырö Лариса нылöкöд шоччыны мунiсны, Люся нылö — газопровод вылын, Настя нылö Вöркутаын велöдö, öнi лунвылын шойччö жö, Нина нылö Кöджöрöмын фельдшералö, Шурик пиö армияын, Толя пиö сантехникö практика вылын. Код дорö сэсся шыася?.. Марья чойö дикöн нимтö... Код дорö сэсся пета да шыася?.. Деливö да и баста. Сирöта быттьö, некодлы ковтöм, некодöн жалиттöм...
Юрийлы да Андриянлы Ваньö дядьлöн öшинь ув йöр дорын висьтысь
— Моторъяснас, значит, телевизор видзöдöны,— шуис Ваньö дядь да лолыштiс, думыштчис, тыдалö, вайöдiс син водзас, кыдзи ниашорсаяс телевизорсö видзöдöны. И ловзис: кымын водзö — сымын кокньыда да шмоньсора артмис висьтыс.
— Совхознöй станциясö тулыснас ремонт вылö сувтöдiсны. Фундаментсö и пытшкöссö выль двигательлы дасьтöны, Д-60 улö. Канев Митра ремонтируйтчö. А телевизорыс миянö станция сувтöдтöдзыс воис, телевизор кöрсö удитiсны нин тöдмавны.
Станцияыд сувтiс и мортыд кутiс думайтны: аха, неужтö некутшöм петан туй абу? Неужтö телевизор ньöбöма, а петкöдлыны оз кут? Канев Митра станция вöсна... А ачыс, значит, Канев Митраыс, телевизор дорас лютöя велалiс. Думайтöны йöзыд: Митра öти тöлысьöн станциятö эштöдас, оз вермы öнi телевизортöг, терпитам öти тöлысьтö. Станция, значит, сувтiс, йöзыс мöд рытас кино вылö петiсны клубö, а Митра абу клубын.
Митра пö тай, Профессор, оз тыдав,— бергалöны кино видзöдны пуксьöмаяс. Киноыд да спектакыд Митратöг оз кольлы.
Сiя пö станция дорад мöд смена уджалö. Медъя,— сералöны йöзыд. Любö налы, мый Митра станция дорын тадзи рöбитö. Сэки воас клубö Хозяиновлöн, ферма завлöн, пиыс — шпингалет, коймöд классын велöдчö — да клубтырнас горöдас:
— Канев Митра телевизор видзöдö!— лолыс тырöма беднöйлöн, синъясыс кольча кодьöсь. Татшöм юöр вайис!
— Станцияыс уджалö мöй?— шызясны йöзыд.
— Сiйö аслыс станция, дзоля станция öшинь улас лöсьöдöма!.. Зэв интереснöй кино видзöдö. Разведчикъяс йылысь!..
Йöзыд — мужичöйяс — гызьöбтасны Митра дорад.
Да: йöрас мотор броткö. Пырасны керкаас да — «С чего начинается Родина...» телевизор сьылö, Ладога 205, кокъяса, пызан пöв пасьта экрана. А Митра, значит, со кыдзи мöд сменасö станция вылын рöбитö: пуксьöма пан-барон моз джуджыд креслöö, юрчутыс муртсысь тыдыштö. Визя пижамаа, кöр кысысь тяпияса... Енмö-Кристосö... Öтнасöн разведчикъяс йылысь кино видзöдö джуджыд креслöö шняпкысьöмöн. Челядьыс Митралöн абу, эз лолы. Саньö гöтырыс паччöр занавес костiыс видзöдö, кияснас щöкаяссö пыкöма да. Кынöмсö, значит, пöсь паччöр вылын шонтö, любöысла кок гыжнас кокчöръяссö гильöдышталö да клубö петтöг, билет босьттöг кино видзöдö. Да...
Йöй народыд сэки гöгöрвоас, мый станция эштöдан уджтö штурмöн оз кут босьтны Митра, мöд сменатö оз кут рöбитны, бур кино кö лоас — вермас на и öтисö не тыр уджавны. Сэки и вошъясны мужикъяс стационар моторъястö лыпöшитны. Сюрö тай! Татшöм моторъяснас войдöр пыжöн ветлiм, важöн шыблалiм ковтöм кöрт чукöрöс пыдди, а чуйдiс телевизорыд, да бара тай петiсны вöльнöй светас! Кыланныд тай асьныд, кыдзи рöбитöны нелюбöй-яс... Таркöдöны быд öшинь ув йöрын да позьö думыштны тöдтöм мортлы, быттьöкö Вой саридзö жö полнöй кодöн нöбалö Ниа Шор деревняыс. Печöра юыскöд тшöтш!..
Войдöр, значит, телевизорöдз, Митра сьылöмöн нималiс деревняын. Прöст кадас, рытъяснас, шойччан лунъясö пуксьöма кильчö сод вылас, видзöдö саридзö шуньгысь Печöра юыс вылö, сы сайын парма вöрö, Урал излöн вичко юръяс вылö да сьылö. Сьылö, кытчöдз понъяс оз вошйыны лёкысь омлявны. Дöнзясны, значит, понъясыс. Сы понда дöнзясны, мый Митра кыв шуавтöг сьылö, омлялö жö быттьö. А понъясыс, значит, кывтöм пемöсъяс, оз гöгöрвоны, мыйя да мый йылысь омлялö Митра. Аха. На моз абу öд чеп йылын Митра! Мыйя сылы омлявнысö?..
А Митра, гашкö, ыджыд-паськыд вöля йывсьыс и сьылö, пукалö да. Мый тöдан мöд морт сьöлöмысь! Гашкö, лöсьöдлö гöлöссö, ыдждöдлö да вöсньöдлö сiйöс, да лыддьöдлö татшöм ногöн, кыдзи тай кöр даддьын мунысь пö лыддьöдлö. Мый аддзö — сiйöс и сьылö. Сьылö, кöнкö, Митра: «Со нö менам Печöра юыс, со нö бакенщик будкаыс; бакенщик будка весьтас менам куим ветель чöвтöма, законсö абу торкöма: кыкыс аслым, öтиыс — гöтырлы. Со нö кывтыдын Лугöвöй, изъя берега Лугöвöй. Сэнi менö тэрыб комъяс виччысьöны, менам «корабликкöд» ворсны. Мыш сайын кильчö посводзöй, сы сайын — керка посводзöй. Керка посводзас, паськыд вонъя крöватьын, Сане гöтырöй, ышлолалö, менö виччысьö...»
— Со мый, вöлöм, сьылö,— дзикöдз ловзис, серöктiс Ваньö дядь.
Öнi Митра оз сьыв. И понъяслы, значит, öнi нинöмысь юрсö жуглыны рыт-войсö, а бур соседъясыслы пельясаныс и сьöлöм выланыс лöнь лои. Уна провод да чурвидзысь антенна вöсна Митра керкаыс полярнöй станция кодь.
Митра öнi — удж помалöм бöрын ли гöсти ветлöм бöрын кöть — мый этшсьыс гортас тэрмасьö. Морöс кудас гымакылö сьöлöмыс, паръясыс калькмунöмаöсь-воссьöмаöсь. (Ваньö дядь петкöдлö, кыдзи воссьöмаöсь).
Öшинь ув йöрас пырöм бöрын Митра пырысьтöм-пыр öзтö мотортö да грымöдö керкаас пырö...
Эжва другъясö! Ме эг на страститчы телевизор дорас, и аслам на лöсьöдтöм. Аха. Соседъясö могöн лöсявла да сэки син пыр нуöдла. Ме ог тöд, кыдзи карын тiян, а миян, значит,— регыдтö на да — биа висьöм кодь телевизорыс. Сiя жö Митратö босьтам.
Мотортö öзтöм бöрын пырас керкаас да чуньясыс тiралöны телевизортö öзтiгöн. Сё збыль. Ог пöръявлы. Сэтшöм, значит, окота да любö, буракö, горт керка шöрас киносö видзöдны. Сэсся гурнитас телевизор дорад — матöджык да весьтасджык — джуджыд креслöтö, пуксяс да виччысьö, кор трачкöдчигтыр ломзяс телевизорыд, да сэсся и вуджöртас мыйкö сэнi, овны, значит, кутас.
Петкöдчас дикторыд да «Бур рыт, дона ёртъяс» шуас. А Митра, значит, песовмунлас креслöас да «Привет» шуас, сэсся кинас петкöд-лöмöм содтö, тэрмöдлö: «Мунам водзö».
И дикторыд кывзысьö Митраöс, нуöдö водзö: лыддьöдлö, мый лоас тарыт, Митра вылö видзöдöмöн, быттьöкö кыкöн — диктор да Митра!—и пукалöны пемыд вежöсас. А дикторыс кö нывбаба рöдысь — Митра оз лютöя тэрмöдлы: мед сёрнитö. Митра сэки яндысьтöг видзöдö сы вылö, ставсö видзöдалö да донъялö. Видзöдалö, кыдзи сёрнитысьыс юрсисö гартлöма, мыйö пасьтасьöма, кыдзи сёрнитö, кыдзи вом дорнас вöрöдö, кыдзи юрсö пöлыньтлö висьталанторсö помалöм бöрын. И нывбабаыс кö сьöлöм вылас воас Митралы, сiйö, значит, шуö: «Шогмана, но вежнясян, сöтана. Мунам водзö!» Аха.
Телевизорыд уналысь вежис оланногсö. Войдöр кö, телевизортöг, Митра пукалiс татшöм здукас кильчö водзас, либö корабликасьны петавлiс Лугöвöй из вылö, либö олöм йылысь вензис орчча керкасакöд. Кöть кодкöд! Öнi тая деласö гортысь петавтöг позьö вöчны, орчча керкасатöг. Кодi сёрнитö телевизор пыр — сыкöд и вензьыны вошъяс Митра. Кытчöдз оз кус телевизорыс — пыр аддзас, код дорö крукасьны...
Витöд глава
Гöсьтъясöс водтöдiс Ваньö дядь пыдi вежöсын никелированнöй крöватьясö. Ачыс, гöсьтъясöс меститöм бöрын, вель дыр пукалiс дзоля посводзö сувтöдöм пу крöватьын, сэсся пöрччис камашъяссö, гачсö, пон куысь жилетсö да пырис вонйö, кок лапаяссö, öта-мöд бердас любöа ниртiг, дзебис гöна эшкынлöн кок пöдлöсъясö.
Вой кежлас ыркнитöм сынöдöн лолавнысö кокньыд. Моторъяс кусöдöм бöрын деревняын лöнис, сöмын понъяс гежöдика тявкнитлöны. Позьö бура узьны-шойччыны, а Ваньö дядь оз узь, бергалö крöватяс. Гатшнас и кымыньнас водлiс, шуйга и веськыд бокъяс вылас, юрлöссö морöс улас кыкнан кинас сывъялöмöн, а синъясыс воссьöны, вöт нисьö вемöс думъясыс гартчöны.
«Анна Каренина» спектакль Володя сосед ордас шöрсяньыс видзöдiсны. Öнi куйлö крöватяс Ваньö дядь, думайтö кино-спектакль йылысь да Каренина Анна местаас Римма гöтырыс тыдалö. Ваньö дядь öти арöн ыджыдджык Риммасьыс. Радейтчöмöн öтлаасисны. Гöтрасьöм бöрас первойя кадас Ваньö эз пöтлыв гöтырсьыс: Риммаыс пöжасьö, а Ваньö уськöдчö окавны сiйöс. Риммаыс лежнöг дзоридз кодь: дженьыд соска зэв вöсньыдик алöй ковтаа, ковта юрйылас да сой чигсö топöдысь сосъяс помас сьöд прöшви; кельыдлöз юбкаа. Вöсни коска, зумыд морöсъяса да кокъяса Риммаыс котралö пачводза керкаын, сьöд сэтöр синъяса гöгрöс чужöмыс ковта мозыс жö ыпъялö пач бисьыс да томлунсьыс. Ваньö видзöдö син бöжнас, кыдзи гöтырыс ва тыра чугун укватöн кыскö, кыдзи лыскöн пач подсö чышкö. Аддзö Ваньö, кутшöм лöсьыда да мичаа уджалö пачводзас гöтырыс, быттьö мойдкывйысь Василиса Прекрасная сы ордö локтöма, и оз вермы терпитны: чеччас кузь тушанас, локтас пачводзö, кузь кияснас шыркнитас-кутас копрасьысь гöтырсö, веськöдас, бергöдас асланьыс, топöдас морöс бердас, чужöм бердас да тöкöтьö оз пöд окыштöмсьыс. Муртса-муртса костöдлас вом дорсö Риммаыслöн вомысь, лолыштны, и бара нин пöдтö мелi вир-яя, лежнöг дзоридз гöтырсö, мый вынсьыс топöдö ас бердас, шамралö кияснас юрсö, пельпомъяссö. И некыдзи оз пöт.
Ваньö дядьлы щелья йылын Витялöн воча кывйысь
— Ог тöд, Ваньö дядь. Нинöм ог тöд. Нем ог сяммы вöчны. Пыр сiйö син водзын. Люба. Радейта сiйöс, Ваньö дядь. Висьтавны ог куж, кутшöма радейта. Отпускö петöм бöрын кок улысь мусö эг кыв, сэтшöм окота öдйöджык, öдйöджык гортö воны. Ме сiйöс сöмын аддзи да кылi. Вуджöртас мича ныв — Люба, вуджöртас ещö мича ныв — Люба. Ме серала налы бöрсяыс: менам Люба ещö на мичаджык, медся мича. Эй тi, нывъяс! Вöльнöй светса медся мича нывъяс! Менам Люба ставсьыныд тiысь мичаджык, шаньджык! Эй тi! Менам Любаыс Печöра джуджыд кыркöтш йылын олö, сэнi, кöнi и чужлiс! Сылöн чöдлач кодь гырысь да лöз синъяс, кудель кодь небыд юрси, сiйö сьöла кодь рам, тэрыб шор кодь визув да кыпыд! Эй тi! Ми жöник да невеста!..
Ваньö дядь! Ме ог вермы! Ме öтнассö сiйöс аддза! Воа татчö, щелья йылö, да чайтсьö: Любаö паськыд парматiыс мелы паныда котöртö, вешталö чутöдчысь лыска увъяссö да котöртö! Меным воча. И ме ачым дась парма пытшкас чеччыштны, воча котöртны: «Люба! Люба!»— горзыны.
Вои гортö, морöсын ытва ва мында радейтöмыс, а сетнысö некодлы! Некодлы, Ваньö дядь. Кöть горöд да чеччышт тай со буждöмас!
Ваньö дядь! Ме нем ог сяммы вöчны, узьны ни сёйны. Ме быттьö мортöн овтöм му вылö веськалi, кöнi некод дорö шыасьны, кöнi абу радейтöмыс, кодi пöдтö, уськöдö менö! Ме ог тöд, кытчö мен вош-тысьны, Ваньö дядь! Ме ог тö-ö-д! Нем ог тöд!— горöдiс Витя Рочев и водiс луд вылö, дзебис кöтасьöм чужöмсö том тош моз чутöдчысь шынель сосъясас.
Ваньö дядь судзöдiс гач зепсьыс тшынасянсö, öзтiс, кыскыштiс да пöльыштiс öтчыд, лöня шуис:
— Бöрдышт, Витя пиö, некодi оз аддзы. Эн яндысь. Да и мыйла яндысьнысö радейтöмсьыс! Мöдторйысь колö яндысьны да повны: кор некод дорö радейтöмыс абу. Вот тайö бедасьыс страшнö колö повны да виччысьны. А радейтöмсьыс огö яндысьöй. И огö усьöй, Витя, кöть и сьöкыд. Пöв воштöм вöсна юсь моз огö шыбитчöй сьöкыд изйöн. Радейтöмнас ми кыпöдчам да мöд мортöс корсям, кодлы сiйöс козьнавны.
Витя! Дона пиö! Печöра зарни мортö! Мый ме тэныд шуа, том другö? Тая делаас ме ачым лючки ог ов, чота, но тöда, Витя: радейтан делаыс толькö кык мортлöн. Толькö кыклöн! И некодi коймöд тшöктыны да индыны оз лысьт, сöвет сетöмысь öтдор. Тэд кö аддзысяс коркö сэтшöм мортыс, кодi радейтчан делöын кутас ыджыдö да тöдысьö, индалысьö пуксьыны — сiя мортсö, Витя, бокитi кытшлав. Сiя мортыс — лёк морт да йöй морт. Аха.
Люба кузяыд со мый шуа. Ме кö тэяд местаын — медым сьöлöмöс лöньöдны — гашкö, звöнитлi Любалы. Точнö. Звöнитлi эськö.
Кöкъямысöд глава
Видзöдiс Митра да думайтiс. Юавны кö — мый йылысь думайтан Митра?— Митра эськö дрöгнитiс да шöйöвошлi татшöм юалöмсьыс, сьöлöм вылас деливö лоис. Тыр садь морт — кыдзи верман висьтавны, кор думайтан дзик быдсямасö, и збыльсö, и мойд да вöт кодьсö. Ловъя мортöс быдтор вöрзьöдö. Пуясöс да турунöс, ваöс да биöс — оз, а ловъя лолöс унатор вöрзьöдö. Пöткаясöс, зверъясöс — асланыс поз вöсна тöждлун уджöдö. А мортлы быдтор йылысь шуöма тöждысьны, думайтны. Синмöн став аддзанасö, вежöрöн да сьöлöмöн став кыланасö мортлы колö йитны.
«Вот Печöра ю визувтö,— думайтö да аскöдыс сёрнитö Митра.— Бур. Мед визувтö. Вой саридзö. Печöра ва вывтiыс мунöны мортöн вöчöм да веськöдлан теплоходъяс, пыжъяс, баржаяс, самоходкаяс, совхозлöн «Плотва» катер. Печора ва пытшкас быдсяма чериыс мунö-локтö жö. Öтияс воöны Вой саридзсянь, тэрмасьöмöн кыпöдчöны изъя да югыд ваа Печора йылö да сылöн вожъясö, медым сэнi — югыд да сöстöм ваас, лöнь ваас — сетны олöм ас кодьныс выль черияслы. Мöдъяс — ю йылым чужöмаяс да быдмöмаяс — швучкöны Печора кывтыд, Вой саридзö петöны. Коймöдъяс — чукöрöн олысь гырысь и посньыд черияс — ютiыс öтарö и мöдарö гуляйтöны. То ньöж уйöны, то ыззьыласны да пуля моз мöдласны шургыны. Юö суналысь каля повзьöдчö либö ёсь пиньяса сир, либö нöшта мыйыськö повзьöны. Урал из тыдалö, мöдлапöвса парма, сусед керкаяс. Гöгöр,— кыдзи аддзö да кылö Митра,— пöрадок. Пöрадок.
И Митралöн чайтсьö: пöрадокыс сы вöсна, мый Митра кильчö сод вылас пукалö да кывзысьö уна сикас олöм бöрсяыс. Пока пукалö да кывзысьö Митра — пыр пöрадок лоас. Митра танi думайтö, мый му пасьталаыс, дзик быд помын да пельöсын, колö Митра кодь пукалысь да пöрадок бöрся кывзысьысь. Мед му пасьталаыс вöлi Печора ю дорын кодь чöв-лöнь, мед — главнöйыс — некöнi вир кисьтöм эз вöв. Татшöминыс кö лоас — сэтöнi пöрадок лöсьöдны колö, уськöдчыны нюжмасьтöг да став вынöн, пöдтöмöн пöдтыны колö вир кисьтны заводитöмсö.
Дмитрий Канев друг торксьö думайтöмсьыс и деливö лоö сьöлöм вылас. Пукалö, шöйöвошöм мортлöн чужöмöн видзöдö Печора сайö, точкöдö-чегъялö чуньяссö. Да... Гöтырыслöн чукöстöмыс казьтыштiс, мый Митралöн да Саньöлöн абу челядьыс, ныв ни пи. Мунас тайö олöмсьыс Дмитрий Михайлович Канев, и пöрадок бöрсяыс видзöдны да кывзыны некодöс кольны ас местаас. И мыйлакö чайтсьö и чайтсьö Митралы, мый кор ciйö оз ло, кор сiйö оз нин кут вермыны чепöсйыны да суитчыны олöмас, сэки олöм пöрадокыс вермас торксьыны, мыйкö оз сiдзи кут мунны. И таысь медся деливö. Лöсьыд Тольчи Ваньлы!.. Квайт ныла-пиа колясны сы бöрти пöрадок бöрся видзöдны да кывзысьны. И öнi нин отсасьöны батьныслы...
Митралöн кöч кодь еджыд Жульö понйыс видзöдö сэтчö жö, кытчö и кöзяиныс, пöлньöдлö юрнас, вежлалö кокъяссö, легнитлö бöжнас — кöсйö став аддзанасö гöгöрвоны да йитны кöзяиныс моз да выныс, сюсьлуныс сы вылö оз тырмы. Сы вöсна, мый оз сяммы став аддзанасö йитны да гöгöрвоны. Жульö никöстö да пуксьö кö-зяиныскöд дзик орччöн, дугдö видзöдны паськыд Печора сайö, пуктö юрсö кöзяиныслöн пидзöс вылö да видзöдö сöмын öтилаö: Канев Митралöн лöз синъясö. Жульö видзöдö кöзяиныслöн синъясö да чайтö: кöзяиныс сылöн ставсö тöдö да гöгöрвоö...
Назад в раздел
