Анна ёна воис сьöлöм вылас Иванлы. Аннук, Ануш, Анечка — сэтшöма тайö нимъясыс лöсялöны мичаник том нывлы. Кöть öнi жö гöтрась, но Иван гöтрасьöм йылысь эз на мöвпав. Сöмын на воис армияысь да эз на пöт бурлачитöмсьыс. Зумыд да топыд тушаас ворсöдчис вирыс, а карын сымында мича ныв!
Аннакöд найö тöдмасисны ресторанын. Кузь кокъяса нылыс пыр жö уси син улас Иванлы. Дженьыдик кучик юбкаыс тöкöтьö вевттьыштöма лядьвейсö, кельыдлöз ковтаыс бура лöсялiс сэтшöм жö рöма синъяслы, кодъяслысь рöмсö нылыс нöшта на тöдчöдöма лöз тушöн. Юрсисö вывлань пашкыртöма да кöртыштöма бöрас юбка кодьыс жö сьöд вöсни ленточкаöн.
Иван шмонитiгтыр вöзйысис колльöдны Аннаöс пöдругаыскöд. Кор воисны налöн общежитиеöдз, пöдругаыс пыр и воши кытчöкö, а Иван кольччис нывъяслöн сöстöм жырйö асылöдзыс. Ныв эз вöтлы сiйöс: юыштöм винаыс смелмöдiс али зонмыс мыйöнкö мусмис. Код тöдас. Иван асьсö мырдöн эз вöзйы, эз и сет водзö вылö кутшöмкö надея...
Анна ачыс корсьлiс сiйöс, звöнитлiс удж вылас, радлана гöлöсöн юöртлiс, мый кольöдiс сылы бур книгаяс. Культпросвет училище помалöм бöрын сиктса нывлы уси шуд кольччыны карö да уджавны медся ыджыд библиотекаын. Иван велалiс нывлöн тшöкыда звöнитлöм дiнö, мукöддырйи и дöзмывлiс вывтiасьöмсьыс: гаражсьыс ёртъясыс шмонитны нин кутiсны, сирасьöма пö тэ дiнö нылыс. Но... этайö небыд вом доръясыс да кузь кокъясыс юр кольмытöдз кыскисны зонмöс.
А сирасьöмыс збыль и лоис. И падмöдiс тайö мыйтакö зонмöс: эз-ö Аннаыс вывтi кокниа сетчы? Шутёвтан кö — пон моз ротсьöдас, вазьöм мелi синъясöн дзоргö, быттьö чöскыдтор виччысьö. А малыштан кö — дась вылад öшйыны. «Гашкö, и мукöдъяскöд татшöм жö мелi да шань, сетчысь и?» — Иван мыйлакö помöдз эз эскы том мичаник нывлы.
Öтчыд Анна дыр эз мыччысьлы, но Иванöс тайö эз падмöд, тöдiс — ачыс локтас. И локтiс öд. Виччысьöма удж дорас. Сöмын эз вöв важ кодьыс кыпыд да гажа, синъясыс эз радлана öзйыны зонмöс аддзöм бöрын.
— Ваня, меным мамö ыстiс сэтöра варенньö, гашкö, ветлам ме ордö?— юалiс.
Зонлöн тарыт кежлö вöлi мöд мог — ветлыны варччыштны бассейнö, но сэтöра варенньöыс... Сё мокасьтыд, тöдö, мый Иван радейтö буретш тайö варенньöсö.
Чай юöм бöрын Иван топöдыштiс ас дiнас мыйыськö шогалысь нылöс, но мöдыс небыдика мездысис зон киясысь да шыасис:
— Ваня, а тэ радейтан посни челядьöс?
— Гы-ы, код нö найöс оз радейт?— Иван эз на нинöм гöгöрво.
— Да?! Збыльысь? Ме сэтшöм рад, Ваня! Тöдан, а миян кага лоö, буретш гожöм заводитчигас,— радлiгтырйи, коставтöг дзользис Анна.— Сэтшöм бур кадö сiйö чужас. Шоныд лоö, рузумъяссö позяс ывла вылö öшлыны, здукöн и косьмасны!
— Мы-ы-ый? Кутшöм рузумъяс?
— Йöюк тэ! Кагасö öд рузумъясö тубралöны, он мöй тöд?
— Кутшöм кага?
— Да миянлысь, Ванюк, миянлысь! Тэнсьыд и менсьым.
— Менсьым?
— Дерт! А кодлысь нö?
— Кöть кодлысь, но не менсьым!
— А кыдз нö рузумтöгыс?— Анна дивитана видзöдiс дöзмöм Иван вылö.
— А сiдз! Оз ков некутшöм рузум! И кагаыс оз ков!
— Ваня, донаöй, кыдз нö оз ков? Ловъя мортыс?
Ваньöс быттьö нöшалiсны: юрыс жувгис. Сiйö эз кöсйы эскыны тайö юöрыслы. Крукыштiс, ок и крукыштiс сiйöс кузь кока Аннаыс, Анушыс, Анечкаыс... «Анна, Анна-ванна... И ньöти абу мича нимыс. Эштiс олöм, воссис гаж... Эштiс? Эз на заводитчыв и эштiс?»— Иван чеччис улöс вылысь, воськовтiс шкаплань, пасьтасис, бергöдчис нывлань.
— Аски водз колö чеччыны. А тэ ачыд тöдан, мый колö вöчны. Некутшöм кага миянлы оз ков!
Анна пукалiс юрсö лэдзöмöн, быттьö эз кыв.
— Кылан, Анна? Ветлы, кытчö колö. Ачыд гöгöрвоан ставсö...
Ныв чöв олiс. И Иван мунiс аслас общежитиеö. «Тадзсö, гашкö, бурджык на,— мöвпалiс, öти бöрся мöд сигарет шпуткигмоз.— Мый колö, шуöма. Дерт, чорыда.» Но сiдзсö Иван эз лыддьы асьсö чорыд мортöн. Посни челядьтö сiйö и збыль радейтiс. Но öнiсянь асьсö кабалаö сюйны? Олöмыс сöмын на заводитчö да? Анна моз жö сiйö мунлiс ас сиктысь да öнi некутшöм гезйöн нин сэтчö бöр он кыскы. Карса олöмыслысь кöрсö бура нин видлалiс да. Да и сылöн-ö кагаыс? Гашкö... Да, кодлыськö кöйдыссö Анна сы вылö öшöдö. Оз вермы лоны, мед татшöм сибыд нывлöн Иван öтнасöн вöлi. Кодкöдкö нöшта на дурис, кöнкö. Да и радейтö-ö сiйö Аннасö? Карын сымында мича ныв! Торйöн нин гожöмнас аддзан налысь мичлунсö, кор ки-кокъяссö мыччöдасны да бобувъяс моз вöччасны уна рöма платтьö-ковтаясö. Иван быдöн гажмыштiс. Пузьылöм руыс бöр лöнис и. Но век жö войнас сылöн эз узьсьы...
Гоз-мöд вежон сiйö виччысис на нывлысь звöнитöм, но телефон дорö сiйöс эз корлыны. Кымынкö тöлысь мысти кузь кокъяса мичаник нылыс колис сöмын сылöн вöтъясын. Иван удитлiс тöдмасьны мукöд нывъяскöд, важ мозыс эз кедзовт ресторан. Но мыйлакö Анна моз некод эз сидз зон сьöлöмö. Ырыштчывлiс звöнитны нывлы, но асныра этшыс эз лэдз тайöс вöчны. Вежöрсö чеплялiс кутшöмкö дой ас вöснаыс: та öдъя и вунöдöма сiйöс сибыд пон кодь Аннаыс? Али ворсöдчис сöмын? Кöнкö, öнi мукöдъяскöд мусукасьö. Тайö думыс и йиджис сылöн вежöрö да эз сет вöчны нывлы паныд воськов. «Мед кö и!»— мырдöн-сорöн дзебис сьöлöм пельöсас Анна йылысь мöвпъяссö. Вежöгыс, буди, и венiс. Кокньöдыштiс сэсся. Тулысыс помасис водз. Войвыв шондiыс быттьö тэрмасис шонтыны йöзсö: пöжис гожöм шöрын моз. Гöгöр ставыс ловзис. Шондiсьыс гажтöмтчöм муыс пыдö лолалiс. Иван быттьö кылiс сылысь лов шысö. Ок, кутшöма сiйö радейтiс войвыв гожöмсö! Ичöтдырсяньыс пыр виччысьлiс сiйöс. Виччысис и öнi. Лöсьöдчис петны отпускö. И график серти шойччан кадыс сылöн июньын. Вот машинасö дзоньталас и кольлас тöлысь кежлö мöд мортлы. Нöшта вежон и — кöть кытчö лэбышт. Майбыр, кага ни баля, ачыс аслыс кöзяин. Но Иванлысь мöвпъяссö торкисны. Кор öти асылö сылöн вöлi нин кырымалöма отпускö петöм йылысь шыöдчöм, телефон дорö корис диспетчерыс, кутшöмкö ныв пö звöнитö.
«Анна!»— Сöмын сiйö нывъяс пиысь тöдiс гаражсьыс телефон номерсö.
Иван радпырысъ шыасис трубкаас:
— Аннук! Тайö тэ?
— Ме абу Анна,— стрöг ныв гöлöс öлöдiс.— А эн на кö дзикöдз вунöд сiйöс, пыр жö ветлы роддомö.
— Кытчö?— шемöсмис Иван.
— Кытчö кылiн. Сэнi ставсö тöдмалан!
— Сiдзкö, Анналöн чужис кага? Ныв али пи?
— Ме тай шуи, сэн ставсö тöдмалан. Кылан? Быть ветлы, эн на кö вошты морт сямтö,— шуис нылыс да крапкис трубкасö.
Во джын коли нывкöд бöръя аддзысьлöмсянь и со — Анна вайöма кага! Тайö юöрыс вöлi шемöсмöданаöн. Чайтiс, орöдчис нин кузь кокъяса Аннаысь, вунöдны нин заводитiс. Сiдз и кöвъялiс кагасö. Бура и крукыштiс. Отпускö петан лунö татшöм юöр! Ставыс торксис. А! Оз и мун некытчö. Шутёвтас кытчöкö карсянь ылöджык — некод оз кут! «Эн кö пö вошты морт сямтö,— дöзмис Иван тöдтöм звöнитысь ныв вылö.— Иван Логинов абу сэтшöм, мед воштыны морт сям!» Бара на пузьылiс асныра этшыс. Дерт, сiйö ветлас роддомас. И дзоридзьяс ньöбас! Медмичасö.
Регыд ки тыр дзоридза да сеткаын сок банкаа да яблöка зон матыстчис роддом дорö, öчередь вылö видзöдтöг сюйсис справочнöйлань, чургöдiс сэтчö дзоридзьяссö да гораа шыасис еджыд халата нывбаба дорö:
— Тайöс сетöй Анна Петруневалы. Шуöй... Этайö... Верöсыс вайис. Но и чолöм месянь.
Мукöд мужичöйяс шызисны, кутiсны боклань дзескöдны сiйöс. Но нывбабаыс, кутшöмкö тетрадьö видзöдлöм бöрын, юалiс: — Анна Петрунева? А тэ, сiдзкö, сылöн верöсыс?
— Верöс, дерт, код сэсся? Код нö чужис? Ныв али пи?
— Соксö да яблöксö босьта мамыслы, а дзоридзыс оз ков.
— Кыдз оз ков? Ловъя морт чужис, а тэ — оз ков?
— Чужис. Да... абу ловъя. Кулöм кага вайöма Аннаыд.
— Тэ мый сöран?
— Энлы вай горзы! Ме верма жö горöдны. Водзджык колiс локны. Мöд лун нин виччысьöны кодöскö, мед кагасö дзебны. Тэ, зонмö, эн пинясь танi, а босьт кагасö моргысь да дзеб. Гожöм öд, шоныд.
Гожöм, збыль гожöм. На Иван тайö здукас эз казяв сылысь рöмъяссö, эз казяв и яръюгыд пöжысь шондiсö. Недыр и корсис моргсö, неыджыд ляпкыд керка. Öдзöс дорас пукалiс мужичöй сяма гöрд, пыкталöм чужöма олöма тьöтка. Истöг тувйöн гудйысьö пиняс, тыдалö, сöмын на нуръясьöма.
— Мый колö?
— Кага колö дзебны, кык лун нин пö танi.
— Тэ мед ещö вежон виччысин. Справкатö вай,— корис тьöткаыс.
— Кутшöм справка?
— Мый тэнад кагаыс, а абу мöдлöн. Метö сета, а гашкö, абу тэнад?
— Менам. Сöмын справкаыс абу,— Иван гöгöрвоис нин, мый гырд синма кыз тьöткаыслысь он вермы нинöм корны.
— Мун загсö да кор. А кабалатöгыд ме ог сет.
Иван скöрысь сьöвзис да котöртiс автобус сувтанiнö.
Час джын мысти сiйö сулалiс нин загсын, корис справка.
Но сэнi уджалысь, мича паськöма, тыдалö, асьсö бура видзысь, идöра нывбабаыс, гöгöрвотöма видзöдiс зон вылö да долис:
— Справкасö ме сета, но колö гöтрасьöм йылысь свидетельство, мый тэ да кагаыслöн мамыс — гозъя.
— Но менам абу свидетельствоыс...
— Сiдзкö, эн и дöзмöдчы танi. Нинöмöн ог вермы отсавны,— нывбаба бергöдчис, нюжöдчис тумбочка вылын сулалысь чайниклань да чуткис шнурсö розеткаö. Сэсся сiдзжö тэрмасьтöг перйис тумбочкасьыс чашка да сакар доз.
Тайöс аддзöм бöрын Иванлöн зэлалiсны сöнъясыс. «Мый нö тайö? Ясыда шуи, кутшöм справка колö, а этайö... (Иванлы эз сюр колана кывйыс) чай кöсйö юны. Кыдз бара вермö? Али оз гöгöрво? Морт тайö али машина? А-а, робот сяма морт... Сюялöмаöсь юрас быдсяма инструкциясö... Оз гöгöрво менö. И мукöдöс оз гöгöрво тайö ловъя мича машинаыс,— зонлы дум вылас уси аслас «ЗИЛ»-ыс. Кутшöма сiйö «кылiс» Иванлысь кияссö, а овлö, и кывъяссö.— Гашкö, этайö машинаыслы бур кывъяс жö колöны?»— и сiйö видлiс на корны:
— Донаöй, тэ öд нывбаба, сэтшöм мича нывбаба...— но эз удит помавны.
— Тэныд вылö нывбабаясыс ресторанъясын бекъяснас вежньöдлöны, а ме — загсын уджалысь. Гöгöрвоин? Ме — удж вылын!
— Но... и тэнад эмöсь, кöнкö, челядь.
— Да, эмöсь. И верöс менам эм. А тi... Гöтрасьны-гижсьыны он кöсйöй, а челядьöс вöчаланныд. Гижсьöй, сэки сета справкасö,— и нывбаба мича, гöрд рöма гыжъяса кияснас тэрмасьтöг разис кампет кор.
— Да тэ, тэ... машина! Öзйысь бугыльяса, кын сьöлöма машина!
И Иван шашаритчис кияснас пызан дорышъясö, лэптыштiс да зымнитiс джоджас. Чашкаыс лэбыштiс да колсмунi-потi. Öнi эськö ярмöм Иван вермис и пызансö чашкаыс моз вазнитны, но друг аддзис нывбабаыслысь кельдöдöм чужöмсö да тiралысь кияссö, кодъяс корсисны телефон трубка.
— Милиция! Локтöй öдйöджык!— вöсни гöлöсöн нывбаба чилöстiс трубкаас.— Виöны! Да, загсысь звöнитöны! Код морт танi куражитчö!
Но «код» мортыс лöнис нин, тiралысь кинас перйис сигарет да гоз-мöд истöг чегöм бöрын вöлись öзтiс, пыдö кыскыштiс ас пытшкас тшынсö. Виччысис милиционеръясöс. Но кор пырисны куимöн, пыр жö кыкнан боксяньыс кватитiсны сойöдыс. Тайöс асныра зонмыд некыдз эз вермы терпитны да выныштчöмöн нетшыштчис. Но кыкыс уськöдчисны мышсяньыс да кисö песовтöмöн личкисны Иванöс джоджö.
Недыр мысти зонмöс вайöдiсны нин отделениеö. Сэнi сiйö видлiс на гоз-мöдысь нетшкысьны, но сiйöс буракодь мутшкылялiсны, ёна и кучкалiсны кынöмас сiдз, мый дыр эз шед лолыс. Видлiс на водзсасьны, но öтиыс скöрйывсьыс садь быртöдзыс зургис син костас. Палялöм бöрас Иванлы сьöкыд вöлi вöрзьынысö, гырк пытшкöсыс сотчис, косьмис горшыс. Дыр эз виччысь: сiйöс нуöдiсны офицер дорö, кодi лöсьöдöма нин пызан вылас кабала, мед гижны протокол.
— Уна юин?— юалiс, кор пасъялiс Иванлысь ним-овсö.
— Ме абу код,— ньöжмыда, кывзысьтöм кывсö сьöкыда бергöдлöмöн, вочавидзис Иван, капитаныслы веськыда синмас видзöдöмöн.
— Экспертиза петкöдлас, код тэ али садь...
...Недыр мысти Логинов восьлалiс нин кар кузя. Код тöдас, мый небзьöдiс капитансö: экспертизаыс, пыкöса чужöмыс али кага йывсьыс висьтасьöмыс...
Иван эз тöд, сетас-ö öнi справкасö загссьыс нывбабаыс, но мунiс буретш сы дорö. Сöмын на воськовтiс порог вомöныс, кыдзи нывбабаыслöн повзьöмысла шармисны синъясыс да кайисны плешкас, а киыс нюжöдчис телефонлань. Öдзöссö крапкöмöн Иван петiс ывлаö, мöдысь веськавны отделениеö ньöти эз вöв окота. Таксиöн воис гортас, босьтiс шкапсьыс сьöм, ставсö, мый вöлi. Сёрнитчис таксисткöд, мед сэсся не воштыны кадсö. Öнi сiйö тöдiс, мый колö вöчны. Магазинын корис вузасьысьсö тубрыштны кутшöмсюрö посни кöлуй, ки пыдöс ыджда паськöмтор вылö видзöдлöм бöрын бара на курыда нюкыртчис сьöлöмыс.
...Кор Иван сюйис моргса стöрöжика-тьöтöлöн пöсялöм киö некымын гöрд деньга да водка доз, мöдыс дöвöля шуис:
— Тадзтö кö, сета. Абу жö кын сьöлöма. Öнтай нин думыштi, мися, колiс сетны шойсö. Да код тöдас...
Тьöтöыс нямлялiс на кывъяссö вомас. Сыысь öвтыштiс вина дукöн.
— Тэ, пиук, ачыд гöгöрвоан, кутшöм менам уджыс, оз на и быд морт вермы, а ме уджала. Штоптö, дерт, лоö юыштны.
Иванлы мустöм вöлi тайö юсьöм, мужичöй кодь тьöткаыс, но гöгöрвоис, мый сiйö öнi ачыс ставсö вöчас, мый колö...
Кладбище вылын олöма стöрöжыс кыв шутöг индiс колана местасö, сетiс зыр. Сэн жö бергалiс ичöтик, ар вита нывка, тыдалö, стöрöжыслöн внучкаыс. Нывкаыс сюся видзöдiс, кыдзи Иван босьтiс зырсö да нуис пашкыр пожöм дiнö. Сэтчö жö пуктiс ичöтик гортсö да заводитiс кодйыны гу. Нывка матыстчис тöдтöм морт дiнö, кутiс видзöдны.
Сэсся юалiс:
— Дядя, а тэ кодöс дзебан?
Иван дугдiс кодйыны. Горшас мыйкö самасис, курдiс. Сiйö сöмын öнi гöгöрвоис, мый талун медводдзаыcь и бöръяысь аддзылiс ассьыс писö, мый вот öнi сюяс пузчужöм кагасö кыз му улö да сэсся некор нин оз аддзыв. Ни ичöтöн, ни быдмöмаöн. Люсмунöм Иван копыртчис, топöдiс тöдтöм ичöтик нывкасö ас бердас да бöрддзис курыда, синватöг, горшас самасьöм шмаксö помся ньылалöмöн. Нывкаыс ыджыд морт моз малыштiс сiйöс юрöдыс да юалiс:
— А мамыс кагаыслöн абу?
Тайö ичöтик, но тöлка мортыс казьтыштiс Иванлы, мый кöнкö больнича палатаын сы моз жö, а гашкö, и ёнджыка на, шогсьö-вийсьö пиыс вöсна Анна, сылöн вунлытöм морт...
Кор пуксис машинаас, юалiс шоперыслысъ:
— Водка сюрас?
— Аддзам.
Водкаыс таксистыслы öдйö и сюри. Иван пиньнас нетшыштiс пробкасö да кисьтiс ас пытшкас, гашкö, доз джынсö. Чайтiс, кокньöдас, но водкаыс кöть и кучкис юрас, вежöрыс ясыда кутiс ставcö, мый лои талун сыкöд. Видзöдлic орччöн пукалысь таксист вылö. Кывзысьтöм кывсö бергöдлöмöн шуис:
— А öд и тэ — машина...
— Мый?— эз гöгöрво мöдыс.
— Робот, мися, тэ! А ме? Ачым? А ме тшöтш робот. Ме пытшкын — кабала. Сэтчö ставсö пасъялöма... Кыдзи овны, мый вöчны...— Иван нюжöдчис таксистлань да юалiс:— А тэ пытшкö мый гижöма?
И заводитiс гораа серавны: «Ах-ха-ха... Охо-хо...»
«Коддзис тай. Гортас колö нуны»,— мöвпыштiс таксистыс. И машинаыс вöрзис.
Назад в раздел
