1
Лöнь Дзол-тыöд кузя сынöм бöрын найö петiсны юлань тэрыба нöбöдысь векньыдик вискöд Эжваö да веськöдчисны ва паныд.
А гажыс да мичыс танi, паськыда шлывгысь сё-муса юыс вылын! Таладорыс сьылысь виддзöн да коръя вöрöн вежöдö, а мöдлапöлыс еджыд шыльыд лыаöн вералö, а сэсся, водзöсö, лыска-пожöма ягъясöн зумыда кыпöдчö. Сöдз! Ыркыд тöвру вильшасьö öдöба исковтысь помтöм ва весьтöд. Шондi абу нин гожöм шöрся кодь яр, буретша мелiалö быттьöкö йöлöн кизьöртыштöм лöзов енэжсянь.
Ок, сё майбырöй, гажа му!
Öти лопта пелысöн бöжалысь Микит судзöдiс кöлуй тыра ыджыд чуманысь кружка, пöлыньтчылöмöн гумовтiс тырысмоз ва, нимкодьмöм-небзьöм чужöма, видзöдлiс на чужва рöмлань муныштысь Эжва ваыс вылö, сэсся сетчыштiс öключинаöн сынысь пиыслань да шоныда вöзйис:
— На, Виталей, ю Эжва васö, водзö содты вынтö-эбöстö!
Мöдыс, гажа луныс кодь жö кыпыд руа, сöдз чужöма, веськыд кинас сынны дугдывтöг, шуйга кинас вежавидзöмöн босьтiс кружкасö да, бура шоналöмвывсьыс, горша юис.
— Ак, чöскыд и эм, батьö, Эжва ваыд!— ошкыштiс сэсся вом доръяссö кимöдзнас ниртыштiг да и ворсiгтырйимоз, велалöмпырысь, нöшта на азымджыка мöдöдчис кыкнан кинас песны-сынны öключина пелысъясöн: зумыд кокъяснас öпругö мыджсьöмöн лажыньтчылас-кусыньтчылас да ыджыда курыштас пелыс лоптъяснас визув васö, мый вынсьыс сыныштiгмоз нярснитчас-веськöдчас, и бур набойяса кузьмöс пыжыс быттьöкö чеччыштöмöн öдöбтчö водзö, мед кöть и ён визув паныд.
А бöжалысь батьыс выльысь гумовтiс васö, бара на видзöдыштiс кружкаö да нöшта на чöскыдпырысь, чурскöдчöмöн юис. Да шуис сьöлöмтырнас:
— Быттьöкö Енмыс, чужваöс моз, вийöдöма татшöм добрасö. Став йöзыслы бур вылö...
— Енмыс абу, батьö. Торйöн нин öнi, вичкотö тупкöм бöрын, некöн сылы лои овнысö,— кыпыд ру вывсьыс кежтöг шуис Виталей.
— Код на пö тöдас, эм ли абу ли...— бöжалан пелыс тёльскöдчöм мозыс жö мелiа сёрнитiс Микит.— Медтыкö сыöн ли кодöнкö мöдöн сетöм тайö ывла гажыс эз чин да быр-а...
А Виталей дöрöмсö пöрччöмöн, куш пасьтöгыс чашйö-сынö. Гожъялöм сойясыс сылöн быттьöкö тупыльтчöмаöсь чигнас-выннас, батьыс серти, Микит серти, тöдчымöн кызджыкöсь да и кузьджыкöсь сылöн сойясыс, тшöтш и морöсыс вылынджык да паськыдджык. И быдлатi Виталейлöн гöглясьö-ворсö бур вын...
Ёна жö нимкодь видзöдны батьыдлы татшöм мича-ён том выныдлöн пессьöм-ворсöм вылö. Да сьöлöмтырнад кывны, мый тайö мичыс-выныс тэкöд тшöтш йитчöма. Позьö шуны — тэсянь петöма...
А мелi тöвруыс ыркöдö! Вавыв сöстöмлуныс мыськовтö! Сынышталö Микит шыльыд клячöн гöгрöстöм пома öти лопта пелысöн, аслас жö чорыд ки пыдöсъясын ёна нин шылялöм пелысöн, нимкодьпырысь гоннялö öтар и мöдар, сöстöм сынöдыскöд тшöтш шоныд ывлаыслысь нюдз вежсö босьтö лов вылас, и гожся зэръясöн пожъялöм лыа еджыдсö, и лöзов гумыльгаöн воча шлывгысь юлысь пасьтасö, и мелi шондiлысь жайгöмсö. Ок, лöсьыд!..
Татшöм мичыс да гажыс пиын Микитлöн лов вылысь быттьöкö вушйöны став тöждысьöмъясыс да вийсьöмъясыс. Быттьöкö мыськовтö найöс лолыс вылысь Эжвалöн уна ваа визулыс. И наысь мынтöдчöм кыпалöм лолыслы окота лоö весиг сьывны.
Катöны и катöны найö воча шлывгысь, шондi югыдöн ойдöдöм паськыд-гажа Эжва паныд. Öтиыс азыма косялö-вартö кузькодь öключинаясöн, мöдыс нимкодьпырысь сынышталöмöн бöжалö. Налы колö воöдчыны Таш-ю вомöдз, абу и ёна ылын, Эжвалысь некымын ыджыд кусынькöдж ковмас кытшовтны. Сэнi, джуджыд кыркöтш дорас, шуисны лэдзлыны подольникъяс миногаöн, оз-ö кутчысь гоз-мöд стерлядь. Микитлöн гöтырлы, Гранялы, Виталейлöн мамлы, тырö нелямын арöс, тшöтш и аслас, Микитлöн, сэнi жö матын нимлуныс, нёль-ö-вит лун сöмын костыс, öти арöсöн сiйö ыджыдджык гöтырсьыс, и век нин öти лунö пасйывлöны нимлунсö... Дерт, Дзол тыаныс налöн, код дорын пукалö сиктныс, быдсяма чериыс жö мыйта колö эм, сын и ёдi, ёкыш и сир, черитöгыд некор оз ов Микит, но стерлядьыс тыад оз пыр. Сылы Эжва колö, да и сэнi на оз быдлаын сулав: сылы мед джуджыдiн и визулiн вöлi... А сэсся, чери кыйигмоз, позяс пищальöн кытшовтыштны Таш-ю öтар-мöдарöдыс, оз-ö дозмöр позтыр вылö веськавны, сьöла позтыр вылö ли. Öнi найö, котыръясыс, разавтöмöсь на, эз на удитны воймыны повзьöдлытöмъясыд, да гоз-мöд пöткатö позяс и понтöг бура лыйны. Кöсйисны мамныслы чöскыдджык да бурджык нимлун лöсьöдны и — быть лöсьöдасны!
Тайöс тöд вылас уськöдiгöн Микит шоныда мöвпалö Граняыс йылысь: шань гöтырöн козьналiс сiйöс Енмыс ли код ли, ачыс кужис бöрйынысö ли. Уджавны кужö и асьсö кутны кужö, быд нинöм абусьыс оз чиршась да тоткы мукöд тырлы-бырлы бабаыс моз. Мелiлуныс тырмö и. Со тай вит пиöс быдтöны нелямын арöса гозъя: кыкöныс, со тайö Виталейыс да ыджыдджык вокыс сылöн, Бöрис, германечкöд война водзсаöсь, томöнтö гöтрасьлiсны да водз тай челядясьлiсны гозъя. И мыйдыра бурöн-шаньöн виччысис сiйöс Граняыс — нёль во чöж, первой немечыскöд зыртчисны, а сэсся и гражданскöй вылын тшöтш ковмис дорйыны Микитлы выль власьтсö, Варшава дорöдз пыралiс, öдва-öдва ловйöн мынiс сэтысь... А сэсся НЭП дырйиыд ёна уджавны пондiсны гозъя да, выль керка лэптiсны да бурджыка да пöтöсджыка пондiсны овны да, нöшта на куим питорöс лöсьöдiсны. Ёнджыкасö эськö нывкаöс нин виччысьöны вöлi, но мыйлакö тай налöн век öтарö пиян вöлi чужöны... Рокöсныс ли мый ли гозъялöн сэтшöм ногöн шузьöдöма... Но и мед эськö быдмöны да! Со тай кутшöм молодечьяс кыпалöны, Виталей сертиыс кö босьтны. Да и ыджыдджык вокыс сылöн, Бöрис, тöкöтьö сöмын вийöрджык та серти... И мукöдыс, посниуловыс, ен сыкöд, тотшкун кодьöсь кымын жö быдмöны...
Та кузятö эськö немтор повнытö да. Гозъя томöсь на да ёнöсь на да, ставнысö бура эськö вермисны быдтыны. Лючки отсавны быдöнлы и. Со тай нö Бöриссö бура гöтралiсны и выль керкаö овмöдiсны. Мукöдсö сiдзи жö позис и. Конöд Митрей моз. Сiйö тай со, Конöд Митрейыс, квайт ныла-пиалы выль керкаяс зымкнитiс НЭП дырйиыд. А öнi сэсся кулакалiсны Митрейсö...
Да, олöмыс тай со бара на Эжва кусынь моз крута песовтчис!..
Микитлысь татшöм мöвпъяссö виччысьтöг торкис вомас кутан кыснан кöвйöд чорыдакодь тракнитöм. Сэсся сiйö лэптiс пыжö весь-мöда быгыльтан кодь гöгрöс сирпиöс.
— Со миянлы и юква ужнайтны лоис,— öдöба веглясьысь черисö куим вугыра кыснан вылысь мынтöдiгмоз долыдасис Микит.
— Тэныд, батьö, век быттьö кодкö мыччалö да домавлö кыйдöссö!— чуймыштöмöн шуис Виталей: öд öключина пелыснад сынöмöн ызöдчыштöны найö, да сылы чайтсис, мый весьшöрö лоö кыснан кöвсö кыскöмыс.
— А менам самыс чöскыд!— вочасö серöктiс батьыс.
— Ыргöн патроныс «чöскыд?»
— Ме сiдзи кери сiйöс, мед видзöднысö тшöг кельчи кодь чöскыд вöлi, сирлы кöть ёкышлы.
Эжваö Льöм-ю петанiнтi катiгöн Микит тшöктiс пиыслы неджык бузöдчыны, сы вöсна мый сэнi, ю вомыслöн йирын, век бура олö чериыс. И öд бара на тшапнитчис лэдзöм «чöскыд» кыснанас пурт кузя кымын чошкöдчöм тшöтя-бордъя ёкыш. Сiдзкö, öнi нин öддьöн бур юква лоö!..
Но нимкодьыскöд тшöтш танi Микитöс и ышлолалан ру босьтлiс. Öд Льöм-ю кузяыс, катыдланьынджык, аслас сылöн видзьяс вöвлiны, вель кузякодя öтар и мöдар берегöдыс. Шонъянöй батьыскöд на перйылiсны да весавлiсны найöс. Некымын додь небыд вöр турун вöлi петкöдöны сэтысь быд во, ёнджыкасö вöвъяслы да ыжъяслы. Öнi, дерт, тшöтш жö колхозлы вуджисны тайö видзьясыс. Сöмын тай таво сiдз-тадз нин пуктöмаöсь найöс, сьöдас моз. Ачыс сiйö, Микит, пуктысигас эз жö нин и кайлы сэтчö, бöртинас сöмын кытшовтыштiс ком вугралiгмоз. Видзöдлiс öтувъя уджалöмаыс вылö, и сьöлöмыс нюкырмунлiс: буракö пö тайö боки видзьястö колхозалiгад дзикöдз вылö эндöдласны на...
— Мый нö, батьö, Льöм-ю видзьяссьыд али мый шог босьтiс, дугдiн тай сьывнытö?— кыпыда, но сэк жö и гудйыштана юасьö Виталей, сылы, дерт, некор на вöлi, батьыс моз, гöг сюрöснас йитчыны татчöс виддзыскöд и вöр-ваыскöд.
— Кыдз нö оз босьт!..— воча ышлолалö Микит.— Асланым киястöг эндыласны на, буракö, колхознад... Эстшöм чöскыд да пöтöс туруна видзьяс!.. Бурдöдчан туруна видзьяс, шуны кö нин...
— Но и мый, мед кöть и эндасны!— ёна падъявтöг зiльö эскöдны асланьыс батьсö Виталей.— Колантор тай кыскасьны сэтчö, ном позъяс! Ми, батьö, бурджык, öтувъя выннад Эжва дор видзьяссö паськöдам. Матынджык и турунаджык! Да машинаяс лэдзам сэтчö! Йöзлысь уджсö кокньöдам!
— Мыйта пöсь миян войтöдöма сэтчö...— оз вермы лöньны майшасьысь сьöлöмыс Микитлöн.
— Ме видзöда да, батьö, тэнад кулаклöн кодь жö лолыд!— веськыда керыштö та вылö Виталей:— Век на тэ жалитан колхозö сетöмасö.
— Да вед кыдзи нö он жалит, пиö...— Микит оз вермы кутчысьны, мед нöшта öтчыдысь не ыльöбтыны бара на дзенöбтöм сьöлöм дойяссö.— Сымда му-видз... Ас киöн ставсö мыркöма-лöсьöдöма... Мамыдкöд... Тi нö, Бöрисыдкöд, ёна-ö на удитiнныд отсасьыштны миянлы... Кымын мыр бертöма... Кымын вутш юр путкыльтöма... Öнi сэсся сöмын на лючкиджыка овмöдчыны кутiм, а ковмис ставсö сетны... Кык вöв дай кык мöс... Не сöмын пöсьöн, но тшöтш и вирöн лöсьöдöмаяс... Гöг вöрзьöдана да кос чегана вийсьöмöн... Кодкö öмöй öнi чередитас найöс ачым моз, сiйö жö пемöссö? Вердас-юкталас?..
— Немтор эн жалит, батьö, ставыс бур вылö вöчсьö!— кыпъялö Виталей.— Öдйöджык гугöд ассьыд кулацкöй пытшкöстö! Колхозад немтор оз вош, пыр öтарö озырмыны кутас колхозыд! Öтувъя кыпыд удж дырйиыд. Выль олöм воссяс! Не сöмын сьöкыд удж мыркана, но и юр югдöдана! Лов бурмöдана! Ленин да Сталин ёртъяс ставсö тайöс бура мöвпыштöмаöсь! Ылысь водзысь бура аддзöмöн!
Виталейыс, кöть и том на, дас кöкъямыс арöса, комсомолечьяслöн ячейкаöн сиктын юрнуöдö, газет и книга лыддьö да татшöм ногöннад бура велалöма дöжнасьны. А водзö кежлö кöсйö пырны велöдчыны рабфакö, мед пö лоны сэсся ыджыд юралысьöн ли веськöдлысьöн. Не сöмын асланыс сиктын, но весигтö и карын!
А мый, гашкö, мыйкö и вермас петны сыысь бара на песовтчöм олöмас,— лöсьöдлö та боксянь Микит.— Ассьыс кö юрсö водзджык оз песовтны. Ыджыд юрыс сылöн, сiдзсö, оз нин лёка уджав. Да и Вöрса кодь повтöм и чорыд кыськö артмылöма. Кор Конöд Митрейöс кулакалiсны, позьö шуны, медъёна войтырсö ыззьöдлiс Виталейыс. Тырмас пö татшöм мирöедсö терпитны сиктын! Татшöм вир юысьсö! Татшöмыслöн озырмöдчöм вылö пö öмöй миян вöчöма Сöвет власьтсö? Став мусö-видзсö пö сылысь мырддям да пыртам öтувъя колхозö! Став няньсö мырддям да нуам государстволы! А югыд öшиня керкаас выль школа восьтам! Да мöдам дорны-вöчны сэтöнi Выль Мортöс!
Сiдзи сэсся и керисны Конöд Митрейыскöд. Куш сöмын няньсö, быдпöлöс ногасö, Митрейлысь мырддьöмаöсь куимсё пуд! Абу сьöкыд гöгöрвоны, кутшöма тiльсис Митрейыс, мед быдтыны та мында няньсö миян войвывса лыа сора да сёй сора муяс вылын! Да сэтшöм дженьыдик гожöмнас! Да сэк жö и кузь тöвбыд кежлö турун на колiс удитны пуктыны сымда скöтыслы!..
А асьсö Конöд Митрейсö, ёнакодь нин пöрысьмöм мужиксö, вöтлiсны ягö пöрöдчыны, «твёрдöй заданньö» тыртны. А тайö лёк «твёрдöй заданньöыс» пö сы ыджда, мый черöн-пилаöн некод ловъя морт оз вермы сiйöс тыртнысö. А он кö тырт — водзö на топöдöны и мыждöны кулакöн шуöм мортöс: öнi нин веськыда Чов лагерö йöршитöны. Пукав сэнi да дон босьттöг мырсьы мукöд мыждöмаяскöд, а öти сайын и бур мортланьö веськöд ассьыд кулак ловтö!..
Колö жö, аняби (би киньыс бипур) нога мырсьöмсьыс мыжаöн лои Митрейыс!.. Му-видз вöдитöмсьыс да кыйсьöмсьыс... Да асьсö бур туйын кутны кужöмсьыс... Ыджыд праздник дырйиыд кöть вöлi и юыштас винатö Митрейыс, лун либö мöдöс, а коймöд асывнас керыштас: шань сэсся, уджавны колö! Да бара нин муркöдчö ош моз, уджсьыс пöтöмсö оз тöдлы...
Но тайö öмöй бур, веськыд öмöй тайö, кор унджык нянь быдтöмысь дядьöыс мыжаöн лоö? Унджык скöт видзöмысь да?— майшасьö и некыдз оз вермы гöгöрвоны Микит.— Но тай лёкöдiсны морттö «кулак» нимöн... Кöть эськö и, кор тай китö кабыртан кулакас, зумыдджык на сiйö лоö... А Митрейыслысь ыджыд овмöссö пуз-паз вöчисны. Бур на кöть, мый ныла-пиасö удитiс меститны, быдöнлы керка лэптiс да отсалiс асшöра овмöдчыны, да найöс öнi эз нин вöрзьöдны...
Окма жö эськö да! Йöзыдлы тай абу жаль, кöть и сiйö жö Виталей коддьöмыслы... Выль олöм тэчысьяс! Быдтор тöдысьяс да гöгöрвоысьяс!.. Бур на кöть, мый батьсö, асьсö Микитöс, эз шу кулакнас! Сiйö жö Виталейыс. Нöшта кö öти вöв да мöс вöлi, вермисны на и асьсö сiйöс, Митрейöс моз жö, пыркнитны и сюгнитны (бырöдны). Да тшöтш «твёрдöй заданньö» вылö вöрö тодмышкавны. Либö Човйö йöршитны... Татшöм пияныдлы вед öнi, кодъяс велалöмаöсь быд пельöсысь классовöй врагöс корсявны да эрдöдавны, налы вед, кöнкö, эмöсь кöть абуöсь батьясыд... Налы медтыкö öдйöджык кулакöс бырöдны да колхоз лöсьöдны... Веськыда тай сiдзи и горзöны: ликвидируем пö кулака... Быттьö не йöзöс, а номъясöс кöсйöны нырыштны...
2
Коймöд подольниксö вöйтiгöн берег йылын, налöн кöлуй дiнын, тыдовтчисны йöз. Мышканыс неыджыд нопторъяса кык мужичöй.
Ва вывсянь найöс казялöм бöрын ая-пиа сiдзи и чур-чермунлiс-ны пыжаныс. Кыкнаннысö — сöдз енэжсянь кыськö югнитöм чардби моз — лыйыштiс мöвп: сэтöнi налöн ружье и патронташ! Мыйла нö, восьса вомаясыд, колисны ружьесö сэтчö?!
Сэсся, татшöм чардыштöмсьыс сайкалыштöм бöрын, Виталей пöся-зэлыда вашнитiс:
— Петны колö, батьö! Пищаль дiнад!.. Ме тэд шулi, мися, оз ков кольны!
— Энлы на, öнi мый нин керан...— матö воöмöн мöдыс корсис жö петан туй.— Миянлы оз ков петкöдлыны, мый повзим... Лёк йöз кö, öнi найö сiдз и тадз нин кватитасны ружьетö... Вай жö тэа-меа вöйтам нин помöдзыс подольниксö да лючки-бурöн петам на дiнö... Быттьö немтор сэтшöм-татшöмыс эз ло.
Виталей мурöстiс ас гуас дöзмöдöм ош моз да кыдзкö-мыйкö выныштöдiс асьсö бара на вöйтасяна ногöн сыныштавны. Ачыс син бöжнас, дерт жö, вугырасьöма береглань. А батьыс — «нöш юра Микит!»— быттьö сiдзи и колö, водзö лöсьыдiника лэдзасьö-самасьö...
А берегвывсаясыс — матын да, казялö ёсь синма Виталей,— на кодь кымын жö йöз, öтиыс олöмаджык, мöдыс ёна томджык, гашкö и, на моз жö, ая-пиа. А нöшта казялiс Виталей, кыдзи томджыкыс довкнитлiс юрнас налöн, кыйсьысьяслöн кöлуйлань, а ёнджыкасö, дерт, кöнкö, пищальыслань да, буракö, мыйкö шуис. И таысь Виталей сирöд чаг моз бара на чажмунлiс öдйöджык береглань чепöсйыны.
Воысь дядьöыс сэккостi выльысь на шуис рочöн:
— Извиняйте, что побеспокоили... Такое дело, как раз на вас вышли...
«Дерт жö, пышйысьяс!— öнi нин дзикöдз дугдö падъявны Виталей.— Сöмын вот кысяньджык пышйöнысö?.. И кодарынджык корсьöны найöс?.. Мый нö вöчны?.. Гашкö, код тöдас, кутшöм йöз!.. Гашкö, медлёк йöзыс?.. Медыджыд мыжсö керысь йöз?.. Öнi жö кутны да кöртавлыны кияссö мышканыс?.. А сэсся и лэччöдны сиктö... Веськыдасö öд татi, подöннас, абу и ылын... А сэсся и карöдз öтвылысь лэччöдны... Гашкö, быдлаын нин корсьöны найöс?.. Винтовкаа да понъя охранникъяс?.. Гашкö, öнi кö он кут найöс, бара на кутшöмкö лёктор керасны?!»
А батьыс Виталейлöн, Микит, тэрмасьтöг рöч йылö кыпöдчис жö да, быттьö нинöм абу и лоöма, быттьö важöн нин тöдса воысьясыскöд, воча сёрнитö:
— Отдыхайте, чого там. Места под вольным небом всем хватит.— Батьыс рочнад бура кужö сёрнитны, велавлöма кузятö воюйтлiгъясад да мый да.
Дерт жö, ая-пиа пышйысьясыс! Öткодь кымын мыгöръясаöсь да. Виталей серти мыйтакö ичöтджыкöсь, но, буракö, зумыдöсь жö, кöть и видзöдана омöльтчöмаöсь. Картузъяс уланыс векньыдик кузьмöс чужöмаöсь, сiдзсö абу мисьтöм чужöмаöсь, лöзоват синмаöсь кыкнанныс... Чужöмъяс сертиыс кö, он и шу лёк йöзöн!— весигтö чуймыштö Виталей.— Но öд пышйысьяс!.. Кöнкö, судитöмаяс!.. Кулакъяс ли!.. Народлöн и государстволöн врагъяс!..
— Вы не беспокойтесь!— сёрнитö олöмаыс.— Мы передохнём малость, покоротаем ночку у костерка и на утренней зорьке двинем дальше...
Сiдз нин доналöм Виталейöс чуймöдтöг оз овны татшöм кöсйöмъясыд. Сылы окота горöдны вöрыс и юыс пасьталанас: «Весасьöй татысь, кытчöдз эг на кöртавлы мышканыд киястö! Эжва берегыс али мый оз тырмы тiянлы?! Мыйла быть колö миян дiнö сибдыны?!» Но öд тадзи кö вöтлан... Лэдзан кö öнi найöс... Войнас, узигад, бöр локтасны да мыйкöкертасны. Сутшйöдласны... Либöнöсь сэки быть нин пищальтö босьтасны да дiзьйöдласны.. А сэсся и ваö брутйöдласны шойястö... Мун пö да и корсь сэки!.. Мый нö вöчны?..
Томыс дзескöдöм кöин моз сатöка дзенкнитлö видзöдласнас Виталей вылö. Пищаль вылас ли. Дерт жö, öнi нин сiйö каитчö, мый ас кадö эз тшапнит пищальсö. Йöй ногöн кольлöмаинсьыс... Öнi кö эз, либö войнас ырыштчас татшöмыд!.. Вугыртыштан да... Мый нö вöчны?.. Мый нö батьыс думайтö?.. Мый сiйö накöд сiдзи лебезитчö?!
— Да, ничево...— гöлöссö вежтöг сёрнитö батьыс.— Отдыхайте. Счас костёр запалим и ужин готовить будем. У нас уж и рыбка есть на уху.
— Да?!— дзикöдз ловзьö и долыдмö олöмаыс.— Свежая рыбка?.. Уж цельный век, кажется, не пробовал!.. А раньше...— но танi сiйö видзöдлö аслас ёртыс вылö да тшöкмунö.
А пытшкöснас ёна жö зэлалöм Микит, дерт, гöгöрвотöг оз ов, мыйджык вöчсьö лов выланыс на дiнö петысьяслöн. Öд, буракö, и збыльысь кысянькö пышйöны найö. Öнi налöн, дерт жö, бöръя тшупöд вылöдзыс октöма и зэвтчöма ловныс. Öнi найö быдтор вылö дасьöсь. И некыдз оз позь öнi накöд лёкавнысö... Он кö быттьö ружьетö чургöдöмöн лэччöд органъясö... Но кыдзи нö позьö вöчны татшöм лёктор йöзсö тöдмавтöг?! Öд со сэтшöм жö, на кодь жö, йöз... Уджалысь мортлöн киясаöсь, лючки чужöмаöсь... Гашкö и абу нин сэтшöм мыжаöсь, кöть и пышйöны кысянькö... Вермас лоны, Маджа ю йывсянь... Сэнi пö тай кулак посёлок сьöд вöр шöрас лэптöны, Волга дорысь да Дон дорысь мырдысьöн вайöдöм йöз. Спецпереселенецъяс... Öдвакö Лöкчимлагысь тайöяс... Этатшöм томиникыслы, гашкö, нинöмысь на Лöкчимлагас веськавнысö?.. Ая-пиа да, чужöмъяснас ёнакодь öта-мöдныс вылö мунöны да, дерт, кöнкö, кулак посёлоксьыс... Нинöмла найööс миянлы вöрöднысö... Нинöмла на вылö каттьысьнысö... Мед бурöн мунöны, кытчö мöдöдчöмаöсь... Оз на зэв кокни ло налы дзебсясьöмнас гортöдзныс воöдчыны.
Кыддза рас дорöсöд чашйысьö Виталей, ропмунöм мырсö ош моз путкылялö, кос увсö да кос понöльсö моздорас чукöртö и некыдз оз вермы кусöдны ыпъялысь ловсö. Медбöрын чорыда шуö батьыслы:
— Миянлы колö лэччöдны тайöясöс органъясö!
Батьыс, Микит, кöть и кутшöмакö виччысьö писяньыс мыйкö татшöм ногасö, повзьö:
— Мый тэ, Виталей! Вай, пиукöй, татшöм лёктор ми огö керöй!
— Менам комсомольскöй сöвесьтöй оз лэдз менö мöд ногöнсö керны!
— А морт сöвесьтыд нö?— ышловзьöмöн шуö Микит.
— Батьö, медводз колö вийсьыны государственнöй интерес понда!— падъявтöг дöжныштö та вылö Виталей.
— Ме эськö и гöгöрвоа да...— матö воöма батьыс.— Но кыдзи нö тэ лысьтан кутнысö найöс? Кысь тэ тöдан, кутшöм найö йöз? Кöть вед и юасьны пондан, найö веськыдасö оз висьтасьны тэныд... Мед кöть и мыйыськö мыжаöсь... Мыжтöг мыжаöсь ли...
А видзкодьсö кытшовтысь кыддза раскыслöн мöдар дорöсын кылiс мукöд пес чукöртысьяслöн нöшта на пöсьджык да зэлыдджык сёрни.
— Миянлы эз ков петкöдчынысö на водзö!— лöгалöмöн вийсис томджыкыс.— Öнi ставсö тэ дзугин, папа!
— Миянлы кыдзкö колö вуджны Вычегда мöдарас, Сашок...— Микит моз жö зiльö öлöдны да лöньöдны дзескöдчысь писö батьыс сылöн, Степан.— А пыжтöгыс кыдзи вуджан та пасьта васö?.. Тöдтöм васö?.. Сэсся и миянлы кыдзкö-мыйкö колiс эськö юасьыштны тöдысь йöзыслысь водзö туйясным йылысь...
— Томыс сiдз и тадз видзöдö тшапнитны миянöс! Ме аддза и сьöлöмöн кыла. Мыйкö колö миянлы керны, папа! А то татöнi и помасяс миян туйным!
— Миянлы ставсö колö бурöн керны, Сашок! Öд со ми заводитiм нин шанясö да бурасö... Тöждысьтöг кольöм ружьенысö эгö вöрзьöдöй... Тайöс öд найö казявтöг эз овны... Со тай нö батьыс свежöй юква вöзйö...
— Лэчкаласны найö миянöс свежöй юкванад!
— Мыйла нö, Сашок... Комиясыд, буракö, абу лёк йöз... Сьöлöма и гöгöрвоысь йöз... Вöра кöдзыд муад кузятö олiгöн, ме чайта, велалöмаöсь кывны мöд мортöс... Со тай нö миянлы маджасаясыс кутшöма отсасисны баракъяссö лэптiгöн... Вöлöн и быдторйöн... Тöвнад со быдса йöраöс кыйисны да колисны посёлокö... Кутшöма мездiсны тшыгъялöмысь... А сэсся и, видзöд, сиктас пöшти тöвбыд тöвйисны миян öткымын старикъяс да посни челядь... Сытöг, баракъяссö эштöдтöдз, ставныс эськö найö гегдiсны да чергысисны... Сiдз нин мыйтаöн кулалiсны-а...
— А ме ныр-вом сертиыс казяла, мый томыслы быть колö кутны миянöс. Да лэччöдны кытчö колö!
— Сашок, сыночек, ради всех святых, кывзысь менсьым!— кевмысьöмöнмоз корö батьыс.— Ме унджык нин тэнад серти аддзылi олöмсö... Унджык тöда и казяла... Син ни пель кö кутан усьласьны быдöн вылö, ми некытчöдз огö и волöй... Мамтö ни чоюкъястö огö нин и аддзылöй сэсся. Сэтшöма пö тшыгъялöны, коньöръяс... Миянтöг сiдзи и кувсьыны вермасны... Миянлы колö быть воöдчыны на дiнöдз!.. Миянлы колö пырны кутшöмкö стройка вылö да нуöдны найöс сэтчö... Öнi пö тай быдлаын, Рассея пасьталаыс, мыйкö да мыйкö лэптöны... Документтö пö ёнасö оз и юасьны... Уджавны кутам да, и няньтö век нин мыйтакö сетыштасны... А огö кö öнi ми воöдчöй мамыдъяс дiнöдз, миянлы сэсся не аддзывны нин найööс... Кызмырдысьöн кольöдiм найöс тьöткаыд ордö, чайтiм бур вылö, а видзöд, лёк вылö лоис... Украинаын пö и став лунвылас голод... Мыйта йöз пö тшыглы кулö...
— Будь проклят татшöм олöмтö! Код сöмын думыштöма сiйöс!— йирыштö пиньяснас Сашка.
3
— Счас мы такую ушицу сварганим!— зумыда сатшкöм мöтыр йылö джынйöдзыс ва тыра ыджыдкодь пöрт öшöдiгмоз зiльö личöдыштны зэлöдчöмöн чöв олöмсö Микит.
— Да? Правда, у нас тоже есть треска солёная...— ылöсас быттьö вöзйö жö ассяньыс олöмаджык воысьыс, Степан; сiйö, дерт, казявтöг оз ов сы кодь кымын жö арлыда коми мортыслысь личыдлань лэдзöмсö.
— Треску вы наперед поберегайте,— быттьöкö и воысь-мунысьяслысь могсö гöгöрвоыштöмöн варовитö Микит.— А у нас — вона рыбка свежая. Пока сюдой подымались на лодке, блесной вытягнули щучку да окунька... Пиöй, вай керышт да мыськышт öдйö!
Водзвыв кульыштöм сюмöд вылö Виталей лэпталiс сирсö и ёкышсö, абу ёна гырысьöсь чериясыс, но абу и посниöсь кыснан вылад шедöмаясыд, бур юква вöчасны татшöмъясыд... Роч ая-пиалöн на вылö видзöдлiгöн небыда-мелiа ловзьылöны синъясыс, важöн нин найö эз аддзывны ни эз видлыны вомнаныс ю черисö, кöрсö нин сылысь вунöдыштiсны, а öд водзтi, Дон ю дорын олiгöн, кутшöма жö чöсмасьлiсны сiйöн...
— Значит, богата рыбкой ваша Вычегда?— зiльö жö водзö пестыштны небзьöдчöмсö Степан.— Раз мимоходом таких красавчиков вытянули...
— Богата, матушка, грех жаловаться!— варовитö Микит.— Всякой рыбёшки полно! Только не ленись, лови!
— У нас...— заводитлiс Степан да муртса эз висьтав Дон ю йывсьыныс, но пырысь-пыр жö тшöкмунiс да мöдарлань песовтчис сёрнинас,— у нас в котелочке давненько уж не бывало свежей речной рыбки... Мы всё больше тресочкой солёной пробавляемся...
Бурöн кö быттьö, мый нöшта колö мортлы? Ловтырнад нимкодясь гажа ывланас, матын кылысь юнас и кодзула пыдöстöм енэжнас, кый со татшöм черисö сöстöм ваа юысь да пöттöдзыд чöсмась!
Но со тай йöзлы лоö видзчысьны и повны öта-мöдсьыныс. Вежöрнас медлёксö ковмö лöсьöдлыны öта-мöдныс йылысь. Веськыда сёрнитны он лысьт мöд морткöд. Ас йывсьыд веськыда висьтавны он лысьт мöд мортлы. Дойдöмысь полан, вузалöмысь, кытчöкö нуöдöмысь. Узигкостiыд сутшкöмысь да джагöдöмысь полан... Вöчим жö тай бур олöм!
Джын юквасö Микит лэдзис воысьяслöн пöртйö, шöрипöв юкис и сюмöд вылö лэпталöм да чепöль помсянь солыштöм черисö — би мöдарсаяслы мыччис ёкышлысь юрладорсö да сирлысь бöжладорсö. И пондiсны акйöдлöмöн ырскыны-панясьны кыкнан ая-пиаыс, торйöн нин рочьясыс ловтырнас чöсмасьöны и нимкодясьöны, сэтшöма нин гажныс бырöма татшöм тшын кöра юквасьыс, и тшöтш быттьö важ шудыс — код тöдас кытчö кольöм олан гажыс да шудыс! — чöскыд юква сорыс ылькнитлö лов выланыс, некор нин öмöй бöрсö оз волы сiйö?!.
— Ну, спасибочки, мужики, вот славно угостили... Вот наелся так наелся, аж живот распёрло, что твой бубен кавказский. Вовек не забуду!— сьöлöмсяньыс шуис олöмаджыкыс, Степан, кор лои помалöма юквасö да вильöдöма-нёнялöма быд лытор и бордтор...— О господи, как хорошо-то! Как славно-о!..
А ружье сулалiс коз пу дiнын, вöсньыдик бедьтор кодь быттьö чöла сулалiс, пыкыштiс килльысьöм кырся кыз козсö, но мыйта вын йöршитчöма сы пытшкö! И, дерт, сылы дзик веськодь, кодарö кöть оз вувзьысь пыдöстöм пöсь выныс...
Öнi Виталей век нин вöлi медматын ружьеыс дiнын. И зарадитöмаöн видзис, мед быд здукö удитны пезьдыны...
Би мöдарсаяслöн öтарö жö мöвпыштлывсис ружьеыс йылысь. Сiдзи и тадзи. Торйöн нин Сашкалöн, öд сiйö вöлi том и яр, а сэсся öд сылöн сöнъясöд визласис-чепсасис дыр кад чöж вöльнöя олысь казакъяслöн пöсь вир...
Микит, табак кöшельсö шуйга ки пöвсьыс лэдзлытöг, ньöжмыда гаровтö чигарка, мед мичаджыка да зумыдджыка артмис чигаркаыс, зэв сьöлöмсяньыс тайöс вöчö, табаксö буретш колана мында чепöльтö кöшельсьыс да чöвтö увдорладорыс кусыньтöм кабалатор вылö, сибыд чунь помъяснас лючки уджалö и вежöра синъяснас донъялана видзöдö, кывнас буриника дуллявлö шöрвыйöдыс гöрбакодьöн петысь чигаркасö,— быттьö таысь коланаджык уджыс öнi Микитлöн и абу. Сэсся ньöжмыдiника жö босьтö киас кос ув, сюйö помсö биö да öзтö вомас сюйöм чигаркасö.
Шоныда жайгысь билань чужöмнас-водзнас нёровтчöмöн, олöмаджык рочыс, Степан, куритчö жö, сöмын сылöн чигаркаыс абу Микитлöн кодь мышвыла-йöга, а веськыд да шыльыд, но табак тшыныс сiйö жö чорыд кöра махоркаыслöн. Степан пöся и гаж бырöмöн вийсьö-мöвпалö, кыдзи эськö сюртöг-шедтöг воöдчыны налы ылi гортöдзныс, Дон ю дорöдз. Ой, оз, буракö, кокни ло! Кымынысь со тадзи ковмылас тангысьны быдпöлöс йöзыскöд. И код пö тöдас, мыйджык налöн лов выланыс. Кутшöм капканъяс окталöма! Гашкö, оз и ков некод дiнö матыстчынысö налы? Сэтшöм гусятор вылад петiсны да? Мортыд пö тай мöд мортлы век кöин кодь. Торйöн нин öнi кöин кодьöсь лоисны йöзыс, кор джын йöзсö кулакъясöн да троцкистъясöн вöчисны... Да мукöд пöлöс врагъясöн... Гортсьыныс, миянöс моз, нетшкалiсны... Код тöдас кытчö, сьöд вöр шöрö сатшйöдлiсны... Тюрьмаясö пуксьöдалiсны... Ой, горе-беда!.. Гашкö, этайöяс, комиясыс, и збыльысь, кыдз шуис Сашок, нарошнö миянöс чöскыд юкванас тетьйöдлiсны, медым кыдзкö-мыйкö асылöдзыс ылöдлыны да кутыштны, а сэсся и, югдыштöм бöрас, чургöдны ружьесö... Томыс тай со, збыльысь, оз и вешйыв ружьеыс дiнысь. Лэчыд синъясыс öтарö бужгылясьöны да бытшласьöны и...
Пиыс Степанлöн, дас öкмыс арöса Сашка, куйлö шоныд би дорын гатшöн да видзöдö кодзулöсь енэжö. Мыйта кодзув мыччысьöма вой кежлас! Танi тай найö, быттьöкö гортаныс кодьöсь жö. Кöть и сы ылнаö нуисны-ылöдiсны гортсьыныс! Кöрт туйöд, скöтöс моз, дзескыд вагонъясын мыйдыра гургöдiсны Войвывлань, а сэсся и водз тулысын Вычегда кузя мыйта катöдiсны кöдзыд баржаясын. А сэсся и подöн на мыйта вöтлiсны. Кытчöдз, медбöрын, кöчьясöс моз, эз лэдзны сьöд вöр шöрö. Кöсъянныд кö водзö овны, вöчöй аслыныд оланiн... Мыйла колö вöлi сьöд вöр шöрас вайöдны найöс? Вöрсö некор аддзывтöм йöзöс? И мед нин кöть со татшöм ю дорас овмöдiсны, вайöдiсны кö нин сы ылнаöдзыс! Быть налы колö морттö дзескöдны да пöдтыны помöдз! Кöть и мыжтöм мыжъяссьыс!.. Кутшöм мичаöсь да югыдöсь кодзувъясыс! Век кöть видзöд...
Сэсся Сашкаöс донöдöм кöрт моз дзужнитö важöн нин кыйöдчысь мöвп:
«Миянлы колö быть босьтны тайöяслысь ружьесö! Йöй ме йöй, öнтай эг босьт берег вылас кольöмасö!.. Öнi войнас, унмовсясны да, гусьöникöн сöтыштны!.. А ковмас кö, и мырддьыны!.. Сэсся пыжас пуксьыны да öдйöджык кывтны...»
«А пондасны кö ёна водзсасьны? Сэки мый лоö?»— воча ыпнитö Сашкалöн весьöпöртана мöвп.
Виталей, дженьыд гöленя кöтiа кокъяссö билань нюжöдöмöн да мышнас кыз козйö мыджсьöмöн, синъяссö джынвыйö куньтыртöмöн, чöла видзöдö би вылö да тшöтш и би мöдарсаяс вылö. Виталей, асьсö рытывбыд песöм бöрын, öнi пöшти оз нин падъяв, мый сылы колö кутны тайöясöс да лэччöдны органъясö. Тайö троцкистъяссö либö кулакъяссö. Тайö пышъялысь врагъяссö! Кöсйö кö быттьö сiйö, Виталей, водзö сöстöма да честнöя овны. Кöсйö кö сiйö водзö быдмынысöвмыны югыда воссьысь олöмас. Кöсйö кö водзö велöдчыны да Ыджыд Мортöн лоны Выль Олöмас!
4
Но узян унмыд тай быд мортлöн, быд ловъя ловлöн век нин овлö вынаджыкöн став мукöд кöсйöмъясысь дорысь. Весиг ёна тöждысьöмъястö да вийсьöмъястö, весиг мыйыськö полöмтö, зэвтчы кöть эн, дзикöдз вылö вевттьылö да личкылö сiйö. Кольöм войсö лючки узьтöм, ёна мудзöм кыкнан том мортыс эз и казявлыны, кыдзи шоныд би дорысь пондiсны нöбöдны найöс чöскыд унлöн мелi бордъясыс. Ружье тасмасö сойнас крукыштöм Виталей весиг коз дiнö нёровтчöмнас и унмовсис.
Батьяснысö налысь, тöдöмысь, личкис жö узян унмыс, но налöн, кыкнанныслöн, ёна вöзйысис лов вывсьыныс юасяна, унатор тöдмавны кöсъяна сёрни, да и быдторйысь кывкутöмыс олöмаджык йöзыдлöн вöлi унджык,— та понда найö пальöдiсны на личкысь уннысö öтарö чигаркаяс гаровталöмöн да чорыд табак тшын нёнялöмöн.
— Буракö, татöн тiян ёна шань да веськыд олöм вöлöма...— шуис роч дядьыс быттьöкö Микитлысь сёрни визьсö жö кутöмöн.
— Ми водзтi иган ни томан эгö тöдлöй!— пöся шуис Микит.— Мöд мортысь дзебсясьöм ни.
— Ме видзöда нин... Весиг со ружьетö берег вылö ас кежсьыс колянныд?..
— Ми водзтi, вöр керкаын кö узям, ружьесö ывлаö, тув йылö вöлi öшöдам!
— Видзöд со!— ёна чуймö татшöмторсьыд Степан.
— Та кузя мöд мортысь миян полöм эз вöв!— став коми войтыр вöснаыс сьöлöмыс бурмöмöн бара на тöдчöдö Микит.
Степан ньöжйöникöн гаровтö выль чигарка, öзтö, видзöдлö чöскыда узьысь пиыс вылö, тшöтш и Виталей вылö чöвтлö синсö, сэсся, быттьöкö и воссьыштöмöн нин, шуö:
— Миян эськö гортын... станицаын, коркö тадзи кымын жö вöвлi да...
Микит казявтöг оз ов мортыслысь небзьöдчыштöмсö, да мый вермö шоныдджыка юалö:
— Буракö, кулакалöмаöсь жö тiянöс?..— Микитлы татшöм нога збыльсьыс öнi эськö личыдджык лои сьöлöмыс вылын: мед нин тöдтöм йöзыс, бурджык, кулакъясöн вöлiны, а не УСЕВЛОН-са пышйысь заключённöйясöн.
А роч Степан татшöм веськыда юалöмсьыс ырсмунлö, лэчыда сатшкысьлö зэвтчöм видзöдласнас матын, ас мозыс жö би помланьын пукалысь коми морт вылö, кодi со, кöнкö да коркö, вель бура велавлöма рочöн сёрнитны. Коми дядьыслöн восьса бур чужöмыс, лöзоват тöлка синъясыс и быттьöкö нинöм лёксö оз вöзйыны сылы, ылi гортланьыс гусьöн пышйысь Степанлы, и сэтшöм чöскыд юкваöн со номсöдiс мортыс,— ставсьыс таысь Степанлöн дзескалöм лов вылö виччысьтöг ылькнитö — тувсов ытваöн моз гызьмунлö!— пöся аттьöалан гы, йöзлысь сьöлöмъяссö öта-мöдыскöд йитан сöстöм югыд вöрзьöм, кодi, гашкö и, лоö му вылас медмича да меддонаторъясысь öтиöн! И Степан шуис пыдiö дзеблавтöг нин:
— Куды там! До кулаков мы не доросли... Всего лишь подкулачники! Воронка молодого, двух быков да двух коровёнок забрали у нас... Ну и хату, конечно, с лабазами... И пашенку... И закуток луга в степи... Со всеми корешками выдрали с земли родной... Как нехристь какую... Как вражину лютую Земли Русской!..— тайö курыд кывъяссö шуигöн роч Степан весиг ойöстiс моз, а сэсся и паськыд лыöсь кияснас тупйис омöльтчöм кузьмöс чужöмсö да лöнис.
Татшöм юöрсьыс ёна чуймöм Микит чöв олiс жö, зiлис кыдзкö вежöртны да гöгöрвоны ставсö тайöс. Сiйö весиг асьсö видлiс лöсьöдлыны олöм тöв нырнас гартлан-песан дядьöыс пыдди. Тшöтш и асланыс сиктса Конöд Митрей пыдди. Кыдзи эськö сiйö, Микит, на моз жö воштiс ассьыс гортсö, неважöн на лэптылöм выль керкасö. И со тайö гажа Эжва кырсö. И шоныда жайгысь войся бисö. И ю чериысь сьöлöм бурмöдана юква... Вежöртiс ставсö тайöс Микит, и сэтшöм гудыр лолiс сылы. Сэсся и шуис Микит:
— Таысь?.. Та мында «озырлунсьыс»... вайöдiсны миянöдз?
— Оказали такую честь...— курыда нюмыртчылö Степан.
— А ме колхозö нуи кык вöв да кык мöс...— ышлолалö Микит.— Аслыным öти мöс кольöдiсны да...
— Сiдзкö, танi тiян мöдджык кулакалан меркаыс,— шуö Степан.
— Абу кö быд сиктын аслас мерка да бала...— шуö Микит.— Ме кывлi: быд сиктö пö сетöма план, мыйта колö кулакавнысö. Со и корсьöны, кодi «мыжаджык...»
— Да ещö кутшöм партеец курыштöма власьтсö сиктас,— шуö Степан.— Да кыдзиджык видзöдлас сiйö тэ вылö...
Татшöм сёрнияс бöрас Микит дзикöдз дзугыльмылö. Мый нö тайö вöчсьö олöмас!.. Мыйла нö сэтшöма пондiсны дойдны да жугöдны крестьянинсö?.. Йöзöс вердысь-удысьсö?.. И татшöм чиршöдлöмсö шуöны медколана да медвеськыд туйöн... Оз вермы лоны... Некыдз оз вермы лоны!.. Но со и аслас сылöн пиыс, Виталей, быттьö коддзöма жö татшöм дöжнасьöмсьыс... Ладмылöм нин олöмыс вылö ыршасьöмсьыс... Налы öд, том йöзыдлы, мый — кодкö мыйöнкö ыззьöдiс, выль олöм йылысь мойдöмъясöн весьöпöртiс,— и уськöдчисны пылльыны син ни пель... Кöть кодлыськö овмöс... Кöть быдса морт олöм... Кöть вичколысь зарни креста юрсö... Нинöм абу жаль!.. Некодöс абу жаль!.. А сэсся Микит юалiс кытшö топöдöм кöин моз матö воöм мортлысь:
— А бöрсö мунанныд да... Воланныд кö быттьö гортöдзныд... Чайтанныд, öнi мыйкö бур вылö вежсяс али мый тiянлы? Важ бурыс бöр али мый воас?..
— Вермас ставыс дзикöдз вылö пазьмунны миян... — курыда ышловзис Степан. — Может всё полететь к чертям собачьим!
— Но век жö лыбöдчинныд татшöм туяс?
— У нас тама гибнут... самые... самые... родненькие!— курзьöм горшыс пыр мырдысьöн сöдзöдiс Степан.— С голодухи мрут...
— Лунвылас, медся няня муясас, кулöны?
— Как мухи мрут!..
— Но, беда!— лов тырнас доймасьö Микит.— Ми танi со, видзöд, жугъя нянь (сю вартöм бöрын колясъясысь пöжалöм нянь) жö сёям... Ичöт кöшас жö воим вöлöгаыс кузя... Сюсь йöзыс, колхозö пыртöдз, джын скöтсö начкалiсны... Сэсся и муяссö тышкас-мышкас омöлика кöдзисны мырдысьöн чукöртöм колхозас... Кысь сэн бур няньыслы лэптысьны?.. Мый со лоö-а?.. Мый со лоö-а?..
— А миян сюсьджык йöзыс, кулачитöмсö виччысьтöг, каръясö уськöдчисны. Ми кодь йöйыс сöмын, вомъясöс паськöдöмöн, виччысим тайö шудсö... Миян партияысь сымда йöз татчö воигöн кувсис... Кöдзыд тöвнас да... А öнi пö сэсся и гортын голод...
— Ок, беда, беда!..— тшöтш вийсьö Микит.
— Неча сказать, керим тай выль олöм!— лöгпырысь нин сöдзöдö Степан.— Ме ачым винтовкаöн да шашкаöн тышкаси крестьяналы му юклöм вöсна. А сэсся мырси-песси ачымöс жалиттöг НЭП дырйи. Челядьлы бурджык олöм кöсйи лöсьöдны. А со тай — лöсьöдi... Позтöм кöк кодьöн коли... Пышъявны лоö... Код тöдас, кутшöм петляö юртö сюян...
Сэсся, татшöм сёрнияссьыс небзьыштöм бöрын, Микит висьталiс Степанлы — дерт, шуам, нимъяснысö öта-мöдныслысь эз на жö кутны юасьны-а — мый сылöн чужöмыс, водзысяньыс, кажитчис зэв тöдса кодьöн. Весиг öдва эз чукöст берег вылысь казялöм бöрын Ёгорöн. Тайö роч морт Ёгорыскöд пö коркö найö, 1917-öд воын, разведкаö пыралiгöн, немечлы пленö веськавлiсны, а сэсся и бöр пышйисны да вель кузя писькöдчисны Неман гöгöрса вöръясöд. Сiйö, Микит, вöртö бура тöдö да, лючки петiсны асланымладорö, кöть эськö и быдсяма дзугъяс да лэчкас жö веськавлiсны. Öтчаяннöй, но шань морт пö вöлi Ёгорыс!
Татшöмтортö кывлöм бöрын мöдыс, Степан, дерт, шонавтöг зз жö ов, сiйö водзö на воссьыштiс ловнас да кутiс юасьны, кыдзи эськö налы бурджык петны кöрт туй дорöдз. Микит веськыда жö воча висьталiс, мый, дерт пö, регыдджык и кокниджык сöвны пароход вылö да кывтны Котласöдз. А сэтöн сэсся и пуксьыны поездö... Но татшöм туй вылас пö быдлаын оперуполномоченнöйяс кыйöдчöны да ёна куталöны пышйысьястö... А тiян пö öд, кöнкö, некутшöм лючки документ абу. Пырысь-пыр и тшапнитасны да бöр косöдасны. Либö нöшта на дзескыдджыкинö йöршитасны...
Ме ногöн пö, водзö на висьтавлiс коркöя тöдса кодь роч мортлы ассьыс мöвпъяссö Микит, бурджык нин подöн писькöдчыны тiянлы Сыктыв катыд, сэсся Визинсянь кежны Абъячойлань, сэсянь Леткалань да петны Мурашö, кодi кöрт туй дорö жö нин пуксьöма. Дерт, ылынкодь тадзисö, куимсё гöгöр верст лоö, но мый нö вöчан, петiнныд кö нин татшöмторйыс вылö. Ми пö коркö, Ёгорыскöд, та мында кымын жö писькöдчим вöръястi да хуторъястi...
— Но позьö петны кöрт туй дорöдзыс и мöдджык вожöд,— велöдiс Микит.— Визинсяньыс позьö век кайны Сыктыв пöлöн, дзик ю йылöдзыс эм кутшöмсюрö туй, а сэсся Комисянь вуджны Вятскöй муö да веськавны Рудничнöй станцияö, кытчöдз вожавлö кöрт туйыс Сибирскöй визь вывсянь. Татi Мурашöдз кымын ылна жö, но этшаджык паныдасьлö сиктыс-грездыс да йöзыс гежöдджыка олö...
— Ме эськö и, öтнам кö быттьö вöлi, верми и пыжöс ассьым сетны... Мед кöть нин сьöд войяснас кывтны тiянлы Котласöдз... Но...— Микит тöдчöдана пöлыньтлiс юрсö коз бердö багатыр моз нёровтчöмöн узьысь Виталей вылö.— Ог лысьт... Пиöй со... Этiйö... Сiйö миян... Кыдз тэд шуны...
— Гöгöрвоа...— ышловзис роч Степан, кодöс пыж йывсьыс коми дядьыслöн кайтыштöмыс ёнакодь шызьöдлiс да босьтчöдлiс: öд и збыльысь, пыжнас увлань кывтöмыс вермис лоны не сöмын кокньыдджыкöн, но и надейнöджыкöн!.. Но олöмас быдторсö нин аддзылöм Степан тöдiс и мöдтор: мырдысьöнсö öнi налы немтор оз позь керны, оз позь лёкысь вöрöдны лöня на дзизгысь чушкан позсö... Медтыкö бордтöм петук Сашкаыс немтор эз дзуг-а!..
5
Код тöдас, дыр-ö, регыд-ö тадзи ныровмунлiсны мудзöм да майышмунöм дядьöяс, но роч Степан бöрсö ырсмунiс-садьмис Сашкалöн кыдзкö не сiдзи вöрзьöдчöмысь. Восьтiс синсö. Сашка варыш моз пуксьöма да дзоргö-видзöдö би мöдарланьö. А синъясыс ыпъялöны! И чужöмыс быттьö ымралö! Дерт жö, бара на ружье вылö сiйö ыршасьö!
Сэсся Сашка шыр кыйöдысь кань моз пондiс сувтны-чеччыны!.. А синъясыс öгралöны!..
— Тэ нö мый, Сашок?— повзьöмöн шöпнитiс батьыс. Сашка, вом дорсö курччöмöн, öлöдана летйöдлыштiс чуньнас.
«Сiйö кöсйö кватитны ружьесö!»— веськыда сьöлöмöдзыс чунгис Степанлы. И узян унмыс пырысь-пыр жö лэбовтiс-палялiс. И сiйö кузнечлöн кöрт кинас ляснитiс кок йылас сувтны удиттöм на Сашкаöс бöр му бердö, гатшöн швачкöбтiс, ачыс вывсяньыс сьöкыда личкис, а мöдыс муткылясьö-пессьö улiас, мый вермöмсьыс нетшкысьö...
Дерт, татчö тшöтш и би мöдарсаяс ырсмунiсны. Мый лоöма?!. Мый тi сэнi керанныд?.. Пищальыс тай Виталейлöн, ен сыкöд, дiнас на сулалö-а...
— У него падучая!..— кашкö-каргö олöма роч дядьыс.— Давно не было... А тут вот снова приступ... Помогите...
Микит да Виталей чепöсйисны на дiнö. Кияснас тшöтш личкöны роч том мортöс. А мöдыс пессьö ставныс улын гусьыс вöрзьöдöм ош моз. Пиньсö йирö. Дась ставнысö курччавны-орйöдлыны...
— Сашок, ну чего ты!.. Успокойся, родной...— батьыс муртса оз бöрд, личкö и тшöтш мелiа шыльöдö пиыслысь ньылöдöм чужöмсö.
А Виталей мыйöн сöмын казялö на улын муркöдчысь зонлысь векыштчöм чужöмсö да пöся ыпъялысь синъяссö, пырысь-пыр жö мöвпыштö: «тайö абу рöдимеч висьöм!..» Öд неважöн сылы ковмылiс нин тадзи кымын жö личкыны сиктса öти тьöтööс, кодöс пö важöн нин шыблалö да песö рöдимеч висьöмыс,— сэки кос чагъясöс моз жö чеччöдлiс найöс, кык зонмöс, садьтöг вийсьысь тьöтöыс, но эз тадзи. Кияснас тадзи эз кватлась да пескылясь сiйö, и быгзьöм вома чужöмыс вöлi дзик мöдкодь руа... «Сiдзкö нö мый? Эз-ö тайö шпанаыс кöсйы уськöдчыны менам пищальлань? Сöмын батьыс удитiс кватитны медбöръя здукас да личкыны?.. Да, дерт жö! Сiдзи и эм! Кутшöм нö тайö рöдимеч висьöм?.. А ме стынита-узя... И батьö тшöтш, буракö, унмовсьылöма... Да öд öнi сiйö вермис нин пезьгöдны менö!.. Ме эськö öнi эг нин вöв ловъя!..»— тадзисö востымыштысь мöвпсьыс Виталейöс быттьö пывсян жарöн ойкнитöдö. И сiйö пырысь-пыр жö вешйö пищальланьыс да пондö сэтысянь видзöдны, кыдзи роч том морт вочасöн лöньö кык ён дядьöлöн топöдöм улын.
Пиыслöн дзикöдз лöньöм бöрын роч дядьыс кашкыштiс-вуджöдiс лов шысö, пыркöдыштiс муöссьöм ки пыдöсъяссö öта-мöд дiнас кучкалöмöн. Сэсся видзöдана тiралысь чуньяснас пондiс гартны чигарка. Гораа, нарошнö тöдчöдöмöн, шуис:
— Öнi тайö час-мöд, югдытöдзыс, бура узяс! А сэсся ми водзö мöдöдчам.
Микит лöсьöдыштiс бипур, выль кос увъяс лöдiс. И мелi би регыд выль вынöн ыпнитiс, быттьö аслас шоныдöн да югыдöн бöр кöсйис бурдöдны йöзлысь виччысьтöг ырзьылiгас пасьнитчöм вируля сьöлöм дойяссö. Микит пуксис да тшöтш гаровтiс мышкыра чигаркасö, öзтiс да пондiс мый вынсьыс нёнявны табак тшынсö. Прöст ки пöвнас видлiс коссьыс пуртöсын öшалан пуртсö: эм на жö тай, абу на усьöма ни немтор... Микит, дерт, казявтöг эз жö ов, мый некутшöм абу рöдимеч висьöм том мортыслöн... «Мыйыськö сiйö эз во öти кывйö батьыскöд! Мыйысь нö эськö? Гусьöникöн, миян узигкостi, мунны кöсйис? Пыжö пуксьыны да?.. Али — мый? Эз жö öд, кöнкö, ружье вылö ырыштчы?.. А мый, кöнкö, эзыс? Синъясыс тай тшыг кöинлöн моз öгралöны... Кöсйи вед кытчöкö пыдöджык дзебны ружьесö! Йöйыд, эг дзеб... Виталейлöн дзикöдз скöрмöмысь повзи... А öнi мый вермис трачнитчыны танi?.. Батьыс кö эз кут кöинписö?.. Но, бур морт, Ёгорыс... Абу эськö, кöнкö, Ёгор нима да... Сöмын ёнакодь вачкö сы вылö... Збыль нимсö юавны абу лöсьыд-а... Мый могысь пö тайö юасьö? Мый ковмöма?.. Сы туяд öд öнi быдторйысь лоö повны да видзчысьны...»
А Виталей босьтiс киас пищальсö, нарошнö ышмалiгмоз чегис-восьтылiс, перйылiс патронсö да би водзын видзöдлiс, бöр сюйис стволö да шлочнитiс-пöдлалiс. Сэсся перйылiс коскас öшалысь кучик пуртöсысь кузь пуртсö да, шабур пöланас чышкалыштöм бöрын, бöр жö сюйис. Батьыс да роч дядь быттьöкö и эз видзöдны Виталей вылö, но ловныслöн быд вир войтöн казялiсны и кылiсны сылысь быд вöрзьöм. Да весигтö тшöтш быттьö кылiсны ёна ыззьöм том мортлöн вирлысь пöся чепсасьöмсö. И, дерт, эз кокни вöв налы ставсö тайöс кывны да тöдны!
Öнi роч том морт сöмын öтнасöн узис. Узьöмас сетчис ли...
«Колiс рытсяньыс лэччöдны найöс сиктö!— ёна каитчöмöн муткырасьö лолыс Виталейлöн.— Чöрту, стерлядьнад дай ставнад! Шедас ли оз ли на пö сiйö! Йöйыд, кывзыси батьöлысь!.. А мый нö, асылыс тай матын нин, горöд «руки вверх» дай лэччöд!.. А роч дядьыс кö, збыльысь, мездiс миянöс пиыслöн лёк ырыштчылöмысь?.. Сэки кыдзи нö чургöдан сы вылö пищальтö?.. Тьпу, сöтанапызь, мый нö вöчны? Сiдзи бöр лэдзны — нöшта на лёк!.. Татшöм пиня-гыжъяыд код тöдас мый на вермас пакöститны!.. Сэсся и, лэдзан да, дядьыс и жалитны на пондас, мый войнас сiдзи торкис пиыслы... И мöдысь сэсся оз кер сiдзисö?.. Тьпу тэ, мый нö вöчны?.. Öнi, аслынымсö, не нин лякöссьыны, а лэччыны да сiдз юöртны органъясö?.. Кыкöн пö пышйöны... Асьным эгö вермöй кутны... Но сэки öд ставыс тайö быть жö нин кывсяс сиктын? И мукöдлаын... Пищаля йöз пö немтор энö вермöй керны!.. Сэки нö мый лоö?..»
Но мед кöть и помöдзыс ыззьöма да доналöма вöлi Виталей, асъядорса медся чöскыд узян унмыс бара на личкис сiйöс, му вылас ставсяыс вына бордъяснас выльысь нöбöдны кутiс сэтшöм дзескыд-öн да чорыдöн лоöм войся бипур дорысь. Гортса войпукö быттьö вайöдiс сiйö Виталейöс да кык мича ныв костö пуксьöдiс. И чиктылö-сералö нывъяскöд Виталей, öти дiнас топöдчылö и мöд дiнас. И сэтшöм шуда сiйö мича-шыльыд да шоныд вир-яя нывъясыскöд!..
Сэки батьыс, Микит, видзчысьöмöн босьтiс Виталей дiнын сулалысь ружьесö, лёткысьöм ки увсьыс кöвсö мынтöдöмöн. Сэсся роч морт син водзын перйис патронсö стволысь да сюйис гач зептас. А мукöд патроныс сумкаын, Виталейлöн коскас тасмаалöма. Сэсся Микит лöсьöдiс ружьесö ас дiнас.
Чöла куритчысь роч дядьыс кыв ни джын зз шу, но шогö усьыштöм синъяс сертиыс вöлi тöдчö, мый Микитлöн тадзисö вöчöмысь сылöн ёна личмунiс лов вылас...
Сöмын öнi найö эз нин тöдны, мый йылысь нöшта колö сёрнитны. Эз и вöв окота сёрнитнысö. Найö весиг зз кужны, кыдзиджык öнi колö думайтнысö öта-мöдныс йылысь. Немысь-немтор эз тöдны, мыйджык öнi бара на колö виччысьны öтарсяньыс и мöдарсяньыс...
Öнi найö сöмын медся ёна виччысисны югдöмсö! Выль луныслысь ловзьöмсö. Öнi, тыдалö, сё-муса югыдыс сöмын и вермис кыдзкö да мыйкö личöдыштны ва петмöн зэлалöмсö. Либöнöсь ставсö нин помöдз гöрддзавны!
«Муртса кутас лöзалыштны да, ме вуджöда найöс мöдлапöлö,— ас кежас лöсьöдлö Микит.— Сöмын вот ружьесö кытчö сэки воштывны?.. Пыжö сьöрысь босьтны?.. Али Виталейлы кольны?.. А сiйö кö сэки, Виталейыс, медбöръя здукас, чургöдас на вылö? Да горöдас: Шагом марш, восьлалöй по берегу!..»
«А кöть и оз ло тадзи,— муткырасьö сьöлöмыс Микитлöн,— кöть и лючки вуджöдас сiйö пышйысьяссö, сэки, буракö, сiдз и тадз ёна скöрмас сы вылö, батьыс вылö, Виталей. И код пö тöдас, мый на жö вермас лоны. Весиг öнöдз öтувъякодь на олöмыс ая-пиалöн кыз йи моз вермас шöри потны-шлопкысьны. А потöм йитö видлы пö бöрсö йитны...»
Но, мед кöть мый, Микит оз вермы, сьöлöмыс оз лэпты ружье улын лэччöдны тайö йöзсö, дзикöдз матö воöмнысла ылi гортланьыс писькöдчысь йöзсö, сиктö да сдайтны органъясö. Мыжтöг мыжалöм йöзсö!.. Сэки эськö сылы, Микитлы, крестьянинлы да кыйсьысьлы, олöмыс не олöм кодьöн лоис. Сэки эськö сiйöс, гашкö, и кувтöдзыс ныж пиня пуртöн йирис сöвесьтыс. Сэки эськö сiйöс сöвесьтыс кадысь водз водтöдiс гуö-гортйö... Татшöм пышйысьясыс нö мыйöн мыжаöсь, мый куш немторсьыс, мырдысьöн, вайöдöмаöсь найöс миян муö? А корсьны кö нин мыжаяссö, колö бурджыка видзöдлыны на вылö, кодъяс, мырдысьöн жö, лöсьöдлöны татшöм гöгöрвотöм олöмсö... Кодъяс, коз пу ньöрйöс моз, бара на кыдзисюрö песлалöны лад вылö пуксьылöм нин олöмсö...
— Ме, пиö, вуджöда найöс мöдлапöлас,— шуö Микит.
— Да?!— оз тöд, мый вочавидзны ни мый вöчны нöйтчысь сьöлöма Виталей.
— Карлань пö тай тэрмасьöны да, мöдарöдыс чожаджыка локтасны...
— Карлань?— дзикöдз падмис и шöйöвошис Виталей: мый налы карсьыс ковмöма? Дзикöдз йöйтöдлöмаöсь батьсö! Сылöн узигкостi... Ёна, дерт, карö лэччысь кодьöсь найö!.. Либö, карлань кö нин лэччöны, дерт, куш öти могöн: кыдзкö пароход вылö сöвны да водзö пышйыны!.. Но мый нö öнi сылы, Виталейлы, вöчнысö?.. Öд ныр увсьыс со войтыштöны шпанаясыс!.. Врагъясыс!..
Кор нин ставöн вöрзисны би дорысь, Виталей зэвтчöмöн шуис батьыслы:
— Пищальсö либö коль меным!
— Пищальсö?— здук кежлö падмылiс жö батьыс. Но сылöн, буракö, водзвыв нин ставсö вöлi мöвпалöма да артыштöма:— А друг да утка позтыр пондас лэбны юр весьтöд. Öнi вед, асъядорыс, найö ёна нин лэбалöны. Лыя!..
Виталей öнi öдва-öдва нин кутiс асьсö, мед не уськöдчыны батьыс вылö да мырддьыны пищальсö. Но сэсся юрас сылöн вирдыштö: «А, гашкö, тайöяс батьыслысь пыжсö пондасны мырддьыны? Мöдар берегас? Сэки мед кöть öти патронсьыс лыйö!..»
Том рочыс оз видзöд некод вылö. «Да öд тайö öнi вермас мырддьыны батьыслысь пищальсö! Пыжас!— муртса оз горöд Виталей.— Али нö мöдыс, батьыс сылöн, бара на оз лэдз?.. Ок и пеж морт жö эськö ме да!.. Колö жö выльысь на унмовсьлыны эстшöм здукö».
— Батька твой славный человече!— шуис Виталейлы моз, но тшöтш и ставлы кывмöн роч дядьыс.— Такого грешно забижать...
А кор воисны да сувтовкерлiсны берег кыр йылö, асъя руöн гöвкъялысь ваыс, визув вылын катласьысь паличсянь неылын, друг гораа ызмунiс, да мыйкö ыджыд да еджыд тювгысьлiс вылöкодь ва веркöсö. Быттьö ачыс Васаыс чолöмалiс йöзöс выль лун чужöмöн.
— Добрая стерлядка попалась!— шуис Микит, буракö, тöрытсянь медводдзаысь на личмуныштöмöн.— Она, родимая, как прицепится на крючок, завсегда свечку даёт. Обратно на волюшку хочет...
— Все на волюшку хотят...— ышловзис татчö роч дядь. Сэсся содтiс Микитлы:— Гашкö, пырысь-пыр жö колö кыйны сiйöс? Мынны вермас...
— Мед на этша-этш лöньöдчыштö,— шуис та вылö Микит.— Вуджöда тiянöс да сэки кыям. Вугыръясыс гырысьöсь и ёнöсь, оз на, гашкö, мын...
Сэсся и, быдöн век на зэлöдчöмöн, лэччалiсны кыр йылысь да пондiсны пуксявны пыжö. Виталей бöжалан пелысöн кутышталö пыжсö дзибрасьöмысь. Томджык вуджысьсö пуксьöдiсны пыж нырланьö. Батьыс сылöн лöсьöдчис öключинаясöн сынны. «Бур, мый «потшыштiс» тадзи дядьöыс писö!»— неуна личмуныштiс Виталей. Микит пуксис бöжавны, ружьесö индiс дiнас. Виталей öтуртöмöн моз (бергöдöмöн моз) лэдзис пыжсö, лöсьöдчис бöжсяньыс ёнджыка йöткыштны ва шöрлань. Но сэки батьыс сылöн, Микит, виччысьтöг шуис:
— Ружьесö, пиö, вай босьт и эм аслыд... Мый ме сiйöс понда кыскавны? Сiдз жö бара резсяс да кöтасяс...— Микит кöть эськö и ёнакодь нин эскис ас кодьыс жö олöма дядьыслы, но падъялöмыс да видзчысьöмыс сылöн дзикöдзсö эз жö вермы бырны. Öд век жö тайöяс — гусьöн пышйысьяс! И дерт, быд здукö быдтор вылö дасьöсь!.. Мыйкö лёктор кö друг думыштасны, удитан öмöй патронсö сюйны?.. А Виталей киын кö лоö ружьеыс, вавывсатö, гашкö и, ёнджыка на видзас лёкторсьыс... Микит мыччис ружьесö пиыслы берег дорысь калькалöм нин пыжсяньыс да пырысь-пыр жö тшöктiс роч дядьлы:
— Давай греби во всю мочь!
Куим морта швычöк пыж öдöба чепöсйис мöдлапöвлань!
Виталей здук-мöд кежлö падмылiс и шöйöвошлiс тадзисö лоöмысь. Сэсся том ош моз пелька, кыккокйыв, лэбовтiс рöч йылö. Öтка пуляа патронöн дзум зарадитiс пищальсö. Мед, ковмас кö, пырысь-пыр жö дзеновтны ва вомöн!
Сэк жö и Виталейлöн яр сьöлöмын чöжсис батьыс вылö лöглун. «Но — Микит! Но — лёк подкулачник! Со öд кыдзи бöбйöдлiс да кöмöдiс!»
И сэки кылiс Виталей лöглунöн ыпъялысь сьöлöмсьыс, мый таысь сiйö оз прöстит батьсö. Некор!
Сылы, выль олöм тэчысь Виталейлы, колö öтдортчыны батьыс дiнысь! Татшöм нöш юра батьыс дiнысь. Петiс кö нин сiйö кулаккöд да мукöд классöвöй врагыскöд тыш вылö. Выль олöм тэчöм вöсна тыш вылö. И чорыдджыкöн сылы колö лоны тайö тышас! Тырмас тавойся моз нюньöасьны! Весиг батьыскöд! Мед кöть и мамыскöд! Быдöнкöд, кодi потшас югыд олöмлань нуöдысь веськыд туйсö! Если враг не сдаётся, его уничтожают!— весиг казьтыштсис Виталейлы сьöлöмсö ыззьöдана чукöстöм.
Пыжын мый вынсьыс сынысь-бöжалысь батьыс Виталейлöн, Микит, öдйöджык жö нин зiлис воöдчыны мöдлапöв лыа дорöдз. Мед сэнi лючки-бура чеччöдны на дiнын войковтысьясöс. Да вöлисти мездысьны сьöлöм личкöдъяссьыс. Войбыдъя вийсьöмъяссьыс. А нöшта Микит бара на шогпырысь тшöтш мöвпалiс чужан вöр-ваыслöн аскиа луныс йылысь: мый нö сыкöд лоö, тадзи кö и водзö мöдасны шöтны да дзескöдны Коми мусö быдпöлöс йöзнас, мырдысьöн вайöдöманас? Кулакалöманас и судитöманас! Öд на пиысь абу, буракö, быдöн тайö роч мортыс кодь авъя руа да гöгöрвоысь...
Кор сэсся кыкöныс петiсны ва гыясöн шыльыда зумыдмöдöм уль лыа вылö, олöмаджыкыс шоныда шуис Микитлы:
— Ну, спасибочки тебе, человече, за все!.. За уху и ночлег... За всё!— чöвтлiс видзöдлассö чöв олысь пиыслань да содтiс:— Ежели бы не твоё благоразумие, сам черт не знает, чего бы могло стрястись у ночного костра...
— Чего там, все мы люди,— воча шуис Микит.— Нам, простым людям, добрым роботникам, чего друг с другом делить? Земли и воды вот этой нам хватает. Только старайся и трудись... Лишь бы не мешали нам жить...
— Да вот не получается так-то!— курыда шуис коркöя Ёгор вылö мунысь роч дядь.
— Знаете чого, вы лучше по-над Сысолой дёржите путь,— шуис сэсся Микит.— В город лучше не ходите. Там всё-таки опасней...
— Спасибо! Ещё раз спасибо за всё!— шуис роч дядь да весиг матыстлiс кисö шуйга морöс дiнас.
— Вам хорошо добраться, куды путь дёржите!— шоныда жö вöзйис Микит.
— Счастливо оставаться!— медбöръяысь шуис роч морт, да сэсся и кыкнанныс, бергöдчывтöг нин, пондiсны восьлавны кок уланыс шаракылысь еджыд лыа вомöн. Микит видзöдыштiс на пышйысьяслöн топыдик нопторъяса мышъясныс вылö, кытчöдз эз саявны найö сук бадь пöвстö, сэсся ыджыда ышловзис да ачыс аслыс шуис:
— Ок-ок-ок! Мед жö нин Енмыс видзас миянöс нöшта и татшöм «шудсьыс!..»
Но кузясö ышлолавны вöлi некор — колö вöлi бöр тэрмасьны мöдар береглань да öдйöджык кыйны ён вугырö шедöм стерлядьöс. Микит бергöдчис пыжнас да öдöба мöдiс сынны сöдз енэж пасьтала разалысь асъя кыалы воча.
1. Россияын кутшöм лоöмторъяслöн йöлöгаыс лои гижöд подулын?
Со кыдзи донъявсьö повесьтын «кулакалан» кадыс: «Но со тай йöзлы лоö видзчысьны и повны öта-мöдсьыныс. Вежöрнас медлёксö ковмö лöсьöдлыны öта-мöдныс йылысь. Веськыда сёрнитны он лысьт мöд морткöд. Ас йывсьыд веськыда висьтавны он лысьт мöд мортлы. Дойдöмысь полан, вузалöмысь, кытчöкö нуöдöмысь. Узигкостiыд сутшкöмысь да джагöдöмысь полан... Вöчим жö тай бур олöм!» Кутшöм лёктор вайис йöзöс мыжтöг мыждöмыс? Тöдчис-ö тiян сиктса йöз олöмын татшöм кадыс?
2. Мый понда тöждысьöны да вийсьöны повесьтса геройяс? Кыдзи тi чайтанныд, мыйла геройяслöн пытшкöсса монологыс абу сетöма веськыд сёрниöн? Кыдзи тыдовтчö авторыс?
3. Кутшöм олан сямыс Микитлöн? Мыйöн сiйö матын Степан олöм дорö? Мый йылысь найö мöвпалöны-варовитöны? Кутшöм тöждъясöн олöны? Кыдзи Микит донъялö Конöд Митрей котырöс «кулакалöмсö»?
4. Мыйöн пияныс торъялöны батьяссьыс? Воöны-ö том войтыр öти кывйö? Мый понда?
5. Кутшöм тöдчанлуныс висьт сöвмöмын ружьелöн?
6. Кыдзи автор петкöдлö геройяслысь лов пытш зэлавлöмсö да личавлöмсö?
7. Кöнi повесьтыслöн кульминацияыс? Мый петкöдчö та дырйи? Вежсьöны-ö геройяслöн видзöдласъясыс?
8. Коми литература видлалысь да донъялысь Г.В. Беляев И.Г. Тороповлöн «Кöнi тэ, кар?» висьт йылысь гижлiс: «Сымында гырысь мöвп писатель тöрöдöма тайö гижöдас! Став мöвпъясöн, чувствоясöн ми геройкöд öтлаынöсь. И ставсö сылысь кылан да гöгöрвоан быттьö ассьыд. Писатель мастера сувтöдö серпасъяссö син водзö. Оз быттьö сöмын ас йывсьыс, оз Федя Мелехин йылысь, а ставным йылысь висьталö. Со кыдзи йиджтысьö тайö висьтыс лыддьысь-ысь сьöлöмö, и тадзи овлö сöмын збыльысь художественнöй гижöдын, кор сэнi эм олöмсьыс босьтöм правда. Тайö правдасö петкöдлöма абу гöльмöдöм средствоясöн, абу синмö вывтi шыбитчана веськыдлунöн, а художественнöя. Автор оз мырдöн вöзйы ассьыс мöвпъяссö, но и сетö-ма найöс сiдзи, мый веськодьöн кольны он вермы».
Лöсялö-ö татшöм донъялöмыс «Нёльöн войся бипур дорын» повесьтлы?
Назад в раздел
