ЛЁТЧИК
Войнань шкане веленек пес валгонесь самолёт. Зярс лётчиктне оймсесть, Просо ванстась самолётонть. Мартонзо педясь цёрынезэяк. Вень перть эйкакшось аштесь озадо лётчикень таркасонть. Пачк кельмекшнесь, ансяк кудов эзь туе. Истямо покшоль цёрыненть мелезэ улемс лётчикекс.
КАБАНТ!!!
Минек од цёратне пек вечкить шабра велева тейтерьс якамо. Ней — машинасо, икеле — лисапедсэ. Истя весть вень куншкат сынь ардсть Оржаньбиёсто. Апак учне Кирёнь Павликень ве педалезэ прась. Сон чоподасонть эзь карма лотксеме — истякак ялгатнеде эль кадови. Кинть чирева кассь кукуруза, апарось саевлизе, — потстонзо марявсь кашторкс.
Конась-бути ялгатнестэ серьгедсь: «Некак кабант!»
— Ка-ба-ант?! — увкадсь Павликень вайгелезэ, эсензэ мерят педалезэ кассь, ливтязь ливтясь ялгатнень вакска, сельгень прамс пачкодсь Андрейвелень калмазыренть видьс, савсь мик учомс кадовозтнень.
Ней, кода а сы велев, эрьвась ледстясынзе тензэ идем тувотнень, весе велесь содасы те тамашанть.
СТАДАНЬ ВАНОМСТО
Купрю, Кирёнь Костя ды Бакланонь низэ валске марто сыргасть ревень ваномо. Купрют-Костят аволь одт, ютызь войнанть, Маша — од ава, Баклан ускокшнызе тюрьмасто.
Панизь реветнень сёлт чирес. Маша кайсесь штапо, венстизе рунгонзо наронть лангс, уставась книгань ловномо, реветнень лангс а варштыяк. Атятнень келест эль лиси превтеметнень пурназь-пансезь. Эзь цидярдо вейкесь, мольсь Маша ваксс:
— Шабра, истя а лади тейнемс. Эряви ваномс стаданть мельга…
Маша путызе ве ёнов книганзо, стясь, кедензэ нежединзе пукшозонзо, кода рангсты:
— Мон теть истят реветь невтян, истя ватксетядызь кавоненк, онстонкак карматадо стадань ваномо!
Атятнень келест кундатотсть.
Чокшне, стаданть нолдамодо мейле, куватьс пиледе пилес тошкасть: войнасояк, келя, истямо апарос эзинек понгоне…
ВАРЬГАТ СТУВТЫТЬ!
Аляка салава чупаськали Марёнень. Весть совась тензэ ды туемстэ стувтынзе варьганзо. Марё кирнявтсь мельганзо, верьга вайгельть пижни:
— А-ля-ка-а-а! Варьгат стувты-ы-ыть!
Аляка лоткась, сельгсь: эка, чаволкаесь!
Марё таго пижни:
— А-ля-ка-а-а! Варьгат стувты-ы-ыть!
Аляка таго пупставсь, сельгсь, мекев кинзэ поладызе…
ОДИРЬВА ЭРЯВИ
Иван атянь кулось низэ. Поминамодо мейле атя корты цёранстэнь:
— Вася, ней монень тейтерь эряви.
Цёразо лоцьк озавсь:
— Тетяй, ней косто теть сайтяно тейтерь? Иеть зяро?
ЭХ, УСКТАДЫЗЬ!
Коля мурдась армиясто шофёронь права марто. Колхозсо сеске макссть тензэ машина. Тетязо-авазо кенярдыть: паро, ускомс-кандомс ней киньгак сивелемс а эряви, машинась эсест кедь ало.
Сась шабразо, саизе Колянь тикше мельга. Машинанть истя пештизь, зярс сатотсть сянго недтне. Колянь тетязо озась кабинас, лиятне — тикше лангс, верев.
Цёрась кода лепштясы газонть ды таркасто — нармунекс ливтязь. Тетязо лоткавты:
— Тон истя иля ардо! Седе састо…
— Иля тонавто, монсь содан, мезе теян.
Пачкодсть кудов — а ломанть кузовасонть, а тикше. Весе чукаевсть киланга.
ТОНАВТЫНЗЕ
Андрейвелесэ клубонть кепедсть татарт. Велень цёратненень эрьва чи понгиль пельдест.
Ды вана сась Балтийской флотсо служамодо мейле Кабанонь Митрей. Пеняцясть цёратне моряконтень: келя, идемевсень чингисхантнэ ойме а максыть таргамс, балявтыть эйсэнек.
Митрей копордась седе покш смелчинь кис ды сыргась церьковав, косо се шкава ульнесь клубось. Тосо самай невтсть кино. Тапаризе алясь кедезэнзэ кшнань карксонзо ды кода ушоды аволямо…
Теде мейле татартнэ теевсть парсеень..
ГАВРЁ
Гаврё ульнесь велень васень трактористэкс. Ёвтнить, тракторозо берякшкель, секе тев каладыль. Цёрась ушоды нолдамонзо — сон пых а мери. Яки-яки перьканзо, а соды мезе теемскак. Мейле кежень пачк кодак вачкоди кшнинть ланга мейсэяк стакасо — тона сорк теи, прок тандады, урнозеви ды сырги.
СЕКРЕТНОЙ ПАКЕТ
Чокшне ланга Мишконь кенкшес вачкодсть. Сась милиционер сёрма марто. Кевкстизе Мишконь, служась-арась сон армиясо, машты-арась сёпомо сень, мезде ёвтнемс а мереви. «Эно кода эзинь служа!» — апаркстомсь мик Мишко.
— Уш бути служить, содат, кода весементь теемс. Нейке эряви кандомс те вана пакетэнть Ицялов ды каямс тосо почтань ящикс.
— Есть, товарищ младший сержант! — ансяк мерсь Мишко. Сонсь седе курок оршнесь ды сыргась.
Ушосонть кандылов, вармась пильге лангсто правты. Мишко керязь кери ловонь даволонть. Эно кода, бути истя кемить лангозонзо.
Зярс Мишко салавань сёрманть пачтясь, низэ ды милиционерэсь венть вейсэ ютавтызь...
ПЕЛЬКСТАМОТ
Татю лиссь мирденень Ахмед экшс. Чачсь цёрынест. Весть Татю мери мирденстэнь:
— Авань марто молян церьковав эйкакшонок лемдеме…
— Азё-азё! — мери Ахмед. — Овторникстэ мон сайса мечетев…
ТЕВТЕМЕ МАЙСЕМАТ
Иван атя тарка-эзем а муи: кода истя чоп аштемс книга велькссэ ды мезескак лияс а кундамс? Сонсь арси-мелявты — кодамо тев муемс ошонь инжентень?
Яксесь-ютнесь кудонзо перька, мезеяк эзь муе, тевтне весе теезь. Тесэ вановтозо пезнась кудо икеле рацяня сыре каленть лангс. Аравтызе сонзэ пилявтомс содамонть кедьстэ. Вешсь шабрасто пила, невтизе, кода эйсэнзэ важодемс. Лёва содамось кавто чить мокосясь каленть вакссо, колмоце чистэ оргодсь. Икеле чокшнестэнть, келя, кевкстнесь шабратнень, кона ёно Горькоесь. Нать, тов ношкстась… Ялго, паксянь трокс…
АПАРОНЬ ПАНДОМА
Андрейвелень машинась ваясь Калыш куншкас. Шофёронтень савсь кадовомс тоско удомо. Совась мирденень тей максозь Анд-
рейвелень аванень.
Тердизь столь экшс ярсамо. Сынсь ярсыть, сынсь кортыть. Кудазоравась кевкстни:
— Тон кинь?
— Федорункань.
— Ды те тон монь вишкинестэ чавилимик?! Нейке марш тестэ!
Ды савсь шофёронтень удомс рудазс пезназь машинасонзо.
МАТА АТЯ
Мата атя эскели Игнатовав, турва песэнзэ «сеянь пильге» тарны. Лоткась ваксозонзо машина: «Адя, озак!».
Цигарканть атясь эзизе ёрто, сельгизе ды нерьгстызе зепезэнзэ, маштови.
Мари атя, теке промо пупси эйсэнзэ пукшос. Ансяк кодат промот сёксень шкава?
Валгсь машинасто — пукшосонзо варя.
Кода понкстнэ допрок эзть пало?!
УЗЕРЕ
Митя сась кудов, тосо вишка ялаксонзо истя качакавтыть, мезеяк а неяви. Лелясь совавтсь узере, пезнавтызе потолокс ды мери:
— Нетядо, зяро таргиде — узереськак а пры качамонть пачк…
ПЕШТИНЕНЬ ПУРНЫЦЯТ
Иван атянь пенсиянзо кандызь калядамонь чистэ. Чокшне састь пештинень пурныцят. Иван атя ваны: вишкинесь прок Таня нуцьказо, седе покшось — Алёна…
Сон нерьгстась пурныцятненень пештинень таркас тёжань-тёжань целковойть.
Омбоце чистэ кевкстни нуцькатнень:
— Я, мезе рамиде казнетнень лангс, конатнень исяк чокшне пештинень пурнамсто максынь тенк?
— Ды минь эзинек якаяк пурнамо, — мерсть сынь.
ПШТИ ВАНКШНЫЦЯ
Милициянь прявтокс Игнадвелесэ ульнесь Филёткин. Сон учось министерствасто инжеть. Учось ды пельсь эйстэст. Окойники ванкшныцятне састь. Паро, те ульнесь эсенек райононь Од Чамзань цёра.
Эряви меремс, истят пшти ванкшныцят районось те шкас эзь сода. Ванянень макссть пистолет ды лишме. Сон якась велестэ велес, совсесь эрьва кудос, валгиль эрьва каськас — яла вешнесь ченькс. Ды истя колмошка ков азгондясь кудотнева.
Те шкастонть министерствасто милицияв сась оштё вейке ломань, ды сестэ чарькодевсь: Игнадвелев тосто киньгак эзть кучне. Удалга-удалга теде пачтясть Ваняненьгак. Сон эзь карма седе тов онкстнеме уцясканзо, ялга вельде ильтинзе пистолетэнть ды лишменть милицияв, сонсь секе чистэнть кадызе райононть. Марясть мейле, оргодсь натой Карагандав. А вана Филёткинэнь кисэнзэ каизь милициясто.
КЕЖЕНЬ ПАНДОМА
Ванянь милициясь эзизе каднокшно. Эрьва мезень кис чумондсть васняяк сонзэ. А весть озавтнизь КПЗ-в. Шка юты, лиси лангс — чумось а сон. Ванянь мелезэ мольсь неть нарьгамотнеде. Сась превзэнзэ пандомс кежтнень. Кармавтызь весть милициясо банянь уштомо. Пенгтнень кирвазтемадост икеле сон таргсинзе баня кевтнень ушов, чопоньпелев мекев вачкинзе тарказост. Сась милициянь прявтось баняв парямо, ухадсь кевтнень лангс кече ведь, сынь тышк эзть мере.
Эли кармавтызь весть Ванянь лишмень кильдеме. Сон кежень пандомань кис истя кильдизе ракшанть, зярыя таркань ютазь нурдось кадовсь ки куншкас.
ПРЕВС ПУТОМА
Вишкине Лиза якась-якась базарга, пекезэ вачсь, ярмаконзо мезеньгак рамамс арасть. Ваны, микшнить прякинеть: тантей чинесь эйстэст моли базаронь келес. Тейтерькинесь сонськак эзь фатя, кода каподсь вейке прякине ды чиезь ношкстась. Марясы, мельганзо пижнить: «Лиса пирожок украла…»
Сась кудов, ёвтни патянстэнь:
— Косто содасамизь? Пижнить: «Лиза пирожок украла…»
Авазо маризе кортамост:
— Кода-кода, тейтерем, тосо ульнесь? Эрьга, моненьгак ёвтника…
Лиза одов ушодсь ёвтнеме.
Авазо саизе стенасто кшнань карксонть ды адя эйсэнзэ Лизань лябамо ды кортамо:
— Иля сайне ломанень! Иля сайне…
ЯРСАК-ЯРСАК…
Паша баба анды вишка Сергеень, сонсь секе тев корты тензэ:
— Ярсак-ярсак, ярсамодо паро мезеяк арась…
Паша баба озась ярсамо, Сергей тензэ корты:
— Ярсак-ярсак, ярсамодо паро мезеяк арась…
НУЗЯКС ИГОРЬ
Школав туемадо икеле авазо кармавты Игорень:
— Шлик чамат!
— Школасо шляса…
Валске сась школав — прязояк толга потсо, апак судря.
— Ванта, кода муцить тодовсонть! — згили лангсонзо тонавтыцясь.
Игорьгак пейди.
ПАРО КАЛОШАТ
Атясь шнась прянзо, кодат парт ульнесть калошанзо: а даволдо а пелить, а вармадо…
Нуцьказо кунсолось-кунсолось ды мери:
— Тон, покштяй, теке шубадо кортнят…
КОРОМ УСКСТЬ
— Седе курок чийть кудов! — пижни Вовка Женя ялаксонстэнь. — Миненек кором усксть…
— Те аволь минек туртов — скалонтень…
ИГНАДВЕЛЕНЬ КЛУБОВ
Якимень оршизь-карсизь, саизь Игнадвелев киштеме. Кармавтсть тензэ туемстэ:
— Нолгот ожас иля нардтне, чипанят иля чулгсе, пек иля рака. Невть прят истя, теке сыть аволь Андрейвелестэ — Московсто.
Тейтерть пшкалить тензэ клубсо, секень вант, бажить те-
евемс мартонзо содавиксэкс. Яким каршозост мезеяк а корты, ансяк пейди. Истя невти прянть Московонь цёракс!
Сась Андрейвелев, прянь шназь ёвтни ялгатненень, кода якась Игнадвелень клубов…
ШКОЛАСО
Сапарь Лёшкань обуцязо манчицянь. Школасо тонавтыцятненьгак секе тев манчи. Ней вана манизе Назар Никитичень.
— …Мурзань пандонть каршо, лей чирестэ, муинь мамонтонь бивня… Школав туиксэлия, ды пек стака, а кандови…
Назар Никитич — историянь тонавтыця. Марясь мамонттонть, седе курок ёвтась теде школань прявтонтень — Варвара Ивановнанень. Урокто мейле Назар Никитич саизе Лёшань се тарканть невтеме. Молемс тов кеменьшка вайгельпе. Лёшань мелезэ арась молемс, ды ней уш мезеяк а теят. Пряпотсонзо килангонь перть яжавты, мезе ней теемс. Окойники чарькодсь, кода таго манямс тонавтыцянть. Улкоть човась кев. Вана невтьсазояк.
Пачкодсть — бивнясь арась!
— Нать, ведесь салызе, — мусь мезе меремс Лёшка. Сон якась-тейсь лей чирева ды мусь «кевень узере». Назар Никитич тенень седеяк пек кенярдозевсь.
СОКССО АРДТНИЦЯТ
Чечнясо войнадонть икеле Игнадвелень милицияв кучсть практикав кавто чечент. Самай те шкастонть Саранскойсэ ютавтовсть сокссо ардтнемань коряс пелькстамот. Кинь кучомс тов? Ноготнэ прасть чечентнэнь лангс, конат сокст эзть некшнеяк.
Монень савкшнось вастневемс мартост армиясо служамсто. Сынь ломантне истят — пеедькшнемат а чарькодить.
Састь сынь Чукалов сокстнэнь мельга. Теде икеле кармавтынь тенст: саст чикуншкадо мейле ды саест мартост пеельть — вирьсэ мезе а лисни.
Састь сынь алкукс обедтэ мейле.
— Пеельть, чей, саиде? — кевкстинь.
Сынь валтомо штавтызь оршамост: эрьванть карксамосо аволь ансяк пеель — кинжалгак.
Сокссо ардтнемс тенст эзь саво кувать. Вирьга ютамсто вейкесь синдинзе кавонест ардтнемапелензэ. Арсезевинь сестэ: кода бу пси верь цёратне пеельтнень-кинжалтнэнь тевс аволизь нолда?!
ЛАСТЕ АРДТНИЦЯ ВЕЛЕ
Ванянь путызь спорткомитетэнь прявтокс. Иенть прядовомсто кучсть Саранскойстэ конёв: эряви теемс отчёт, мезе теезь иень перть.
Мезе тозонь сёрмадат? Арсесь-арсесь Ваня, ды сась превзэнзэ: «Андрейвелень весе цёратне маштыть ласте ардтнеме. Сёрмадсаяк истя: «Колмосядт цёрат ардтнить лишмесэ…»
Сеньгак тешкстызе: кинь кодат разрядост.
Отчётось пачкодсь Саранскоев, тосто — Московов.
Прявтошсонть дивазевсть: «Вантакая, васоло велесэ мезть тейнить!»
Ды курок Андрейвелев састь Московсто инжеть. Састь ваномо, кода эйкакштнень тонавтыть конной спортонтень. Усксть мартост эрьва мезть: мазый новтат, жокеень понкст…
Ваня тандадсь: мезе теемс? Арсесь-арсесь ды… мезе ули, се ули: саинзе Петя атянень, кона важодсь конюхокс. Прявтошонь инжетне неизь лишметнень ды мик тандадсть: мезекс, келя, истя эрявсь кеверемс лишметнень рудазсо?..
КОДА ЧАЧИТЬ ЛЕМТНЕ
Вишкинестэ Колянь саекшнизь Талызинань базаров. Тетязо мись сюро, Коля вансь пертьпельга. Неизе, лия микшницянь лишмесь кармась сынст крандазсто сюро марто кескавонь пореме. Коля кода пижакады: «Юский мордовский мешок укусил!»
Истя педяськак тензэ Юской лемесь.
Лиянень вишкинестэ а ёвтавиль «пачалксе» валось, мериль «патайксе». Истя лемдизьгак — Патай.
Андрейвелень советэнь секретарекс ве шкасто ульнесь Пастухов. Кодат ансяк лемть эзь путне эйкакштненень: Олимпиада, Роза…
УСЬКЕРЕЙ
Якимть-Ёкот пелькстасть: кие седе бойкасто пачкоди вирь ужос.
Яким сась васенцекс. Теде мейле сонензэ кармасть мереме Уськерей.
БОЦЬКА ВАНЯ
Чамзат ваныть стадаст Мурзань пандсо. Кие-бути кевердсь тозонь чаво боцька. Ушоды-туи пиземе, вейке ломань ды кекшеви боцькантень.
Витят-Ванькат эзть учне пиземе, секс стада ваномо сыргамсто мезеяк эзть сае пряст-рунгост вельтямс. Крёпадсть парынестэ ды эзизь нееяк, кода пельтне вельтизь менеленть. Мейле кода ластоты велькссэст, кода ушоды валомо!..
Вейкесь эци боцькантень, омбоцеськак мельганзо. Ансяк кавонест кодаяк потмозонзо а кельгить. Вейкесь изнясь, эцесь, омбоценть састь кежензэ ялганзо лангс, тулкадизе боцьканть, ды тона кеверсь Пиянас.
Вант, киненьгак иля ёвтне, кода Пиянасо экшелинь, — кармавтсь ялганстэнь Ванька.
Чокшне ланга, эзть кенере совамо велес, Ваньканень уш путсть травамка: Боцька Ваня.
ЧАРЬКОДИДЕ?..
Модамарень таргамо шкасто школань прявтось максы тонавтыцятнень туртов кармавтомат, кие ки марто карми важодеме.
— Тон молят Бори Вася марто, тон — Орешка марто, тон — Каладо Керь марто. Чарькодиде?
— Чарькодинек…
ЗАВОД ЛЕЙ
Завод лейсэ седикеле ульнесть пиянь пидема кавто таркат. Оштё вейкесь ульнесь томбале, Ёко удало, Чукалонь лейсэ.
ПОКШ КИЛАНГО
Вишкинестэ минь якилинек Покш килангов мастумарьс. Войнань шкава Покш киланга веть ардыльть танкат Казаньстэ Московов. Исак Лексеич ёвтнекшнесь: зярдо-бути те килангстонть покштязо мукшнось сырнень поколь, конань, келя, кезэрень шкава тия ардомсто ёмавтызе инязорось.
Ней Покш килангодонть мезеяк эзь кадово. Трактортнэ весе моданть сокизь-ноцоризь…
Симеманть перька
УРЕНГОЙ
Уренгоень трубатнень таргамсто-путомсто Андрей вансь Чукалсо стада. Весть парсте крёпадсь. Те шкане тусь пиземе. Ваныцясь кекшсь пиземеденть Уренгоень трубанть потс ды матедевсь.
Пиземесь лоткась, трубань путыцятне сварясть оштё зярыя трубат, сыргасть тевест тееме седе васов.
Андрей кадовсь трубанть потс. Сыргозсь — ён а саи, косо сон. «Те, лисни, мон тоначисан!» — вешкезь вешксь пряпотсонзо тандавтыця арсемась.
Ушодсь пижнеме, вайгелензэ кияк а мари. Ансяк гайтесь мекев эстензэ велявты. Андрей тень эйстэ седеяк тандады. Моли-моли, кодаяк пе а сасави те чоподасонть. Зярс мольсь, сонсь а соды. Лиссь Чамза удалов, рудазов ды сакалов. Совась песэ кудонтень, кевкстни рузокс:
— Где я?
— Андрей, тон мезе? Эзимик сода?.. Минь мартот вейсэ тонавтнинек, — мери кудазорось.
— Мон, зярс молинь трубанть пачк, арсинь, уш Сибирев пачкодинь…
ДОЛКОНЬ ПАНДОМА
Валскензэ перть правлениянь кузтемпесэ теке свадьба, веленек некак тезэнь промсть. Тувталось вейке — Витянень течи максыть стадань ваномга ярмакт. Учить тень симиця ялганзо, учить велень аватне, кинь кедьстэ иень перть Витя сайнесь долкс.
Окойники Витя лиссь правлениясто. Весе ве вайгельсэ таргизь оймест.
Витя васняяк ношкстась лавкав, сайсь зярыя суликат. Вейкенть, эзь цидярдо, симизе тоско, видьстэ суликасто, кшинь паморькскеяк кургс эзь кая. Мейле кармась явшеме долконзо. Улевельтькак ярмактнеде колмоксть седе ламо, сестэяк сынь а сатовольть те пувозонтень — Витя иень перть сайнесь аватнень кедьстэ ярмаксояк, суликасояк.
— Кинень эзь сато, пандса од иестэ, — ладсинзе сон. — Мон таго карман стадань ваномо.
Сонсь сыргась кудо ёнов, мельганзо пувозокс симиця ялгатне.
Витя ансяк кенерсь эскельдямо поровтонь трокс, сяворсь кияксос. Ялгатне сонстемензэ комавтызь суликатнень петнявксонь пес. Ялатеке аламо.
Симицятнень ютксо ульнесть тетят-цёрат. Ваныть — ярмак киякссо, ведьгемень целковойть.
— Те монь, — мерсь сыресь.
— Вант, авам прят керясы те ярмаконть кисэ…
Сырентень а ледстявияк, понгонесь-арась зярдояк зепезэнзэ истямо ярмак, конёвось пукшонзо пиди. Таргизе, венстизе цёранстэнь:
— Мезе, цёрат, кадык уш керясы прям. Чийнеде, туеде кавто суликат…
РОШТОВАНЬ ЧИ
Роштовань чистэ Андрейвеленек иредьстэльть. Парторгось сась правленияв, эль а аварди:
— Веленть келес ськамонзо Маркелыч пильге лангсо аштеви… Мезе ней теемс?
Сайсь машина, Маркелычень седе курок ускизе правленияв, пек энялдсь икелензэ молемс фермань ванстомо. Мартонзо арсизь кадомс иредезь ванстыцянтькак, яла, келя, мейсэяк лезды.
— Тень эйстэ кодат ней сторожт, пильге лангсояк а аштеви, — мерсь Маркелыч. — Вансынек, мезе ули валске…
Теке машинасонть ускизь фермань ванстыцянть кудов. Нинстэнь кармавтсть: иредеманзо явавтсы — одс илязо симе, веть моли Маркелычень полавтомо.
Эзь учово лездыцясь. Чокшне састь мельганзо — иредезь ды, текень пес, порксазь. Секень вант, кияк лябизе…
ОБУЦЯТ СТАКА…
Яша якась вирев. Сась тосто сизезь. Иван атя кавани цёранть, маленковской колмоце стопка уш нурти:
— Те кадык ули меельце. Тонеть ламо симемс а эряви, обуцят иредьстэ берянь.
РУЗОНЬ КАВАНЯМКАТ
Андрейвелень эрзя мольсь Миколань праздникев рузонь велев.
— Эх, сват, исяк бу теть эряволь самс, — мерсь кудазорось. — Зяро каванямканок, зяро винанок ульнесь!
Сон таргизе кисетэнзэ, венстизе инжентень.
— Таргак!
Таргасть-тейсть, кудазорось кевкстни:
— А мекс свахась эзь са?
— Ды сон а тарги.
ТАНДАВТНЕМКА
Лёнька атя валскень перть веши нинзэ пельде прянь витемка. Бути, мери, а кандат, туян Куцькавелев.
— Тов мезекс молят? Роднянокак тосо арась…
— Кадык прям керясызь…
(Тевесь оно мейсэль: зярдо-бути, умок-умок, Куцькавелесэ маштсть Игнадвелень эрзя.)
КИНЬ МЕЙСЭ АНДЫТЬ-КАВАНИТЬ
Коля тердизе шабранзо, симиця цёранть, кудоютконь тевсэ лездамо. Важодемадо мейле совасть кудов, озасть столь экшс. Ванька сими ансяк, мездеяк а ярсы.
— Тон ярсак, апак ярса иредят, — кавани эйсэнзэ кудазорось.
— Мон ансяк ярсынь кудосо…
— Мезде истя каванинзеть азоравась?
— Пельменть, максот-тевелявт…
— Вантая, кода вечктянзат! Мон истя ярсан ансяк тувонь печкемстэ!
Веленек содыть: шабратне атят-бабат симить, паро ярсамот а содыть…
КОЛЬСТИМИК…
Сундерьгадома шкава Люба ютызе Верепенть кудонь пес. Кувси, келя, кулома лангсо. «Инеськеть, кандодо куш аламошка…»
Банка потмакссо кадновсть чевгелень човорявксонь тортат. Невтинь сынст Любанень, сон ансяк ахолдась прясонзо: «Каяк!».
Каинь кече, Люба дёдизе сельгень прамс, мейле мери: ёжос, келя, сеске сась.
Валске ранаяк кие-бути чаки кенкшес.
Лисинь кудыкелев, марян, Любань вайгелезэ кенкш удало:
— Кольстимик исяк. Ней витемак!
Каия тензэ мезе кадовсь. Люба сэвезь сэвинзе тортатнень.
Кечентькак ёртыя вельксканзо.
— Иля,— мерян, — сакшно. Неят, ней уш меземгак арась…
ПРЯСТ ПУВОРЯВЛИНЬ…
Чинь-чоп Зина бабань кудосо симицят. Икеле чистэнть салызь ярмаконзо, омбоцестэнть — покш котёлонзо.
— Сасавлинь — пряст пуворявлинь! — корты Зина баба. — Эзинь фатя ансяк…
ТОНАВТЫЦЯ
Андрейвелень лавкасо маштсь винась. Гришка ней эрьва чи яки Игнадвелев. Кедьсэнзэ сумкань кондямо, кодат кандтнить школасо тонавтыцятне. Юты зярояк шка, Гришка мекев эскели.
Верепень бабатне арсить эсь ютковаст, ков истя Гришка яки.
— Гришка, — кевкстизь, — тон а тонавтыцякс прят ладик, эрьва чи якат Игнадвелев сумка марто?..
— Те цёратне кучнить эйсэнь вина мельга.
КАМАЗ-ось ЧУМО
Вася ансяк озась райпонь машинас, кавксть уш сяворькшнесь эйсэнзэ латкс. Секень вант, покш зыянс пачтясы симемась. Ансяк кодаяк а лоткавтови — кургонть дратвасо а стасак.
— Монь, цёрат, арсян, паньсамизь… — мелявты шофёр ялгатнень икеле.
— Иля пеле, минь тонеть арсетяно паро алиби, — оймавтызе Миша лелясь. — Тон ансяк путт тенек.
Вейке пильгесь тесэ, омбоцесь лавкасо. Вася кандсь кавто суликат: пельчи арсить цёратне алиби.
— Тон, теня, кортак истя… Келя, «КАМАЗ»-онь прицеп эйзэть эшкевсь, ды тон сяворить килангсто…
Вася арси. Апак учо неи: киланга арды прицеп марто «КАМАЗ». Кода кирнявты таркастонзо:
— Оно, се прицепесь монь эшкимим!
КОДА ЮРКА КАЛМС ПОНГОНЕСЬ
Юрка ялганзо марто витнесь райононь администрациянь кудопрянть. Тевтнень прядомадо мейле арсизь «шлямс» тень. Рамасть симемапель ды, ломань сельме икелев а понгомадо, кузсть симкшнеме витнезь кудонть потмарс. Талайс ульнесть тосо. Зярдо весемесь симевсь, седе од цёратне валговсть, Юрань вана моцезэ эзь сато, тоско матедевсь.
Веть сыргозсь — а чарькоди, косо сон. Верьксэсь вельтязь, эрьва ёндо стена.
«Те, нать, кулынь, калмсан…»
Те арсемадонть Юркань рунгозонзо теке коткудавт педясть. Пек тандадсь цёрась. Ушодсь пижнеме. Валскес, зярс эзь ашолгадо, раздесь кирьгапарензэ.…
Те вестэнть администрациянь кудосонть ванстыцякс удось Витяшка. Похмелиясоль. Вень перть крёстнесь конянзо, пельсь тарканзо кадомо, арсесь, чопачатне истя тердить эйсэнзэ.
АПАК ПАНДО ДОЛК
— Люба, тон кода Чукалсто Андрейвелев понгить?
— Ды маныть Роштовасто максынь Гритынень суликас ярмак. Те шкас а панды…
— Ды тон превстэть лисить! Гритынень ярмак максомс…
— Ды монськак истя арсян. Колмоце ие янксян…
ЁМАВКС
Андрей сыргась тикшень ледеме. Сайсь мартонзо ярсамка, кренч ведтентькак эзь стувто пештямс. Ушодомадо икеле аламошка крёпадсь ды урядызе суликанть сельме икельде тикше потс, сеск аволь симеве. Кавто икелькст ютась, сась мелезэ оштё крёпадемс. Вешни суликанть — кодаяк а муеви. Ледемантькак стувтызе, обедс вешнесь. Кежензэ састь: тестэ пелюмасо леди, тосто… Мейле — глиньк! — марясь. Суликазо порксавсь.
ПУРЕ
Саран ошсто Матрёнень сась Гена цёразо. Ваны, авазо иредезь. Кежень пачк цёрась муизе пурензэ ды валызе лаханьс, косо авазо човори тувонень ярсамка.
Матрёнь седеесь а таркасонзо — зяро ули-паро ёми! Ваны вальмава — Володя симиця ялгазо юты.
— Володя, ули мелеть корштамс?
— Бути каят, мекс арась!
Матрё покш кечесэ амольдясь лаханьстэ ды венстизе Володянень.
Володядо мейле Велепестэ састь Люба, Олдо, Райка, лият, кить марясть стяконь каванямодонть. Чокшнес лаханесь чамсь. Ули-парось эзь ёма.
ВЕСЕ СЭВЕЗЬ
— Колянь пиресэ унжат арасть.
— Те кода истя?
— Ды тосо тенст уш а мезть тейнемс, нетькстнэньгак сэвизь…
НУЗЯЛДСЬ
Подстанциясо электриктне чинь куншкат снартасть важодема таркасо симеме. Апак учо марить, прок кие-бути кенкшенть вачкодизе.
— Азёка, Миша, ваныка, кие тува яки… — кармавтызь вейкенть варштамо кенкш удалов. Тона нузялдсь ваномс, капшась симемкантень, оймавтомань кис манинзе ялгатнень:
— Ды те вирьваныесь…
Ансяк явизь симемапеленть, совась… райононь прокурорось.
…Премия те ковстонть киненьгак эзть максо.
КРЁСТ
Валерка усксь крахмалонь заводов модамарть. Тосто самсто лоткавтызе Од Кшуманцянь содавиксэзэ:
— Теня, низаням кулось… Эряви крёстонть ускомс калмазырев…
— Тейсынек!
Валерка содась: паро тевень кис тензэ кандыть, секс эзь отказа лездамодо. Крёстонть кепедизь кузовас, кабинас тензэ венстясть сулика.
Валерка истякак ульнесь токадезь — зярс учось крахмальнойсэ очередензэ, чийнесь тосконь лавкав, рамась чапамодонть. Ней апак учонь суликась седеяк тарказонзо ладявсь — кудонть эйстэ аламо таркань ютазь, Валерка лоткась ды симизе винанть, крёстонтькак стувтызе ускомс калмазырев. Кудов пачкодсь ёжовтомо.
Валске нарядсо завгарось кевкстни эйсэнзэ:
— Тон кинь калмамо пурныть, кодамо крёст усксят кузовасо?
Валеркань теке коня ланга вачкодизь.
— А-а-а, ды те Од Кшуманцянь…
ЯРМАКОНЬ ПИТНЕ
Велень цёратне умок кедьсэст ярмакт эзть кирде, питнесткак, ловт, а содасызь. Весе ярмактнень лангсо, конат появакшныть кудосо, азортнэ аватне. Валерка салась нинзэ зепстэ зярыя лопат, ды седе курок ялгатнень марто симемест. Мольсть лавкав. Зина микшницясь кевкстни:
— Тыненк мезе?
— Весементь лангс дай вина…
Зина ловнынзе ярмакост.
— Ды тень лангс ней кшияк а рамават, аволь сулика…
КЕКШЕЗЬ ЧЕНЬКС
Исяк Нина пансь ченькс ды, кадык кекшизеяк, мелявты: аволизе муе тевс панезь симемапеленть мирдезэ. Гайневтсь роботасто кудов:
— Митя, ченьксэнть, чей, эзик муе?
— Тонсь марят, вайгелем аволь иредезень… Козонь урядык?..
— Буто а содат… Муськема машинкасо…
Нина сась чокшне кудов, тосо увт моли. Митя таго муизе ченьксэнть.
СИМЕМАНЬ КАРШО КАМПАНИЯ
Васенцекс те кампаниянть ушодовомсто кутузкав саизь Масёнь Андреень. Чинь-чоп фермань тувотне кадновсть апак андо, цирнемадост фермань прявтонть пилензэяк потомсть. Омбоце чистэ кучсть фермав тувонь андомо кемень ломанть. Ней ансяк чарькодизь, кодамо покш Андреень питнезэ. Кеменнень эзь тееве се, мезе кенерсь тееме «симицясь» ськамонзо.
ПАНТИКРИСТ
Иван аравтозь тувонь фермань прявтокс, косо трявить ниле тёжат ракшат. Аравтомс аравтызь, ды цёрась пек вечксы симеманть. Меельце шкастонть пек тонадсь «пантикристэнтень». Мезе те истямось? Наста шабразо важоди лавкасо урядыцякс. Туи тосто крысань-чеерень порневть ламбамопельть, тень эйстэ теияк «пантикристэнть».
ХУДОЖНИК
Андрей умок уш сими, кодаяк а лоткавтови. Сон кудовгак а совси, уды баня кудыкеле. Тоско човордавкстнэнь пряли, конатнень низэ теекшнынзе модамарень таргамонень. Весе тевензэ-мелявксонзо стувтынзе, прянзояк, ловт, ёмавтызе. Сыргозсь весть — ваны: пирезэ таргазь, пире куншкасо модамарень покш оровт. Мольсь шабранстэнь ды корты тензэ:
— Неть модарькатнень мон некак рисовинь…
ВЕРЬГИЗ
Вирев туемадо икеле Андрей парынестэ крёпадсь пуреде, арсесь: килангось васоло, ардомсто иредемказо чукаеви. Вирев пачкодсть, тагояк прянзо каванявтызе:
— Кандодо зярояк, верьгизэкс карман роботамо.
Кандсть тензэ — Андрей прась ды корнозевсь.
АСИМИЦЯ
Вирев молемадо икеле кудазорось весень парынестэ каванинзе: мелест илязт кольстеве. Вирев сайсть бензопила, узереть. Вирень керицятне эль кузевсть кузовас — истя лоподекшнесть.
Пачкодсть вирев — таго симсть маленковскоень-маленковскоень. Эзь симе ансяк содамозо, Миколь, сон недляшка уш ванстась прянзо пиже гуйденть.
Кода эзть симе цёратне, тевест ялатеке ушодызь, кармасть чувтонь керямо-сявордомо. Чувтось прамо, сынь ве ёнов эскелькс-
как а теить, пильгест а усковить. Миколь жо ёроков, оргоди ве ёнов. Истя чийнесь-чийнесь — ды тарад лангозонзо прась.
— Ванок, кода лисни, — дивси Миколь. — Нетненень эскелькс а тееви — сыненст мезеяк. Мон кургс эзинь сае — тарадось лангозон сяворсь…
РАКАТ
Цёратне плотницясть, оймсемстэ кундасть ведра ракат. Пидизь, ойсесть ярсамо. Эйстэст вейкенть се чистэнть ульнесь чачома чизэ. Сон арсесь каванямс ялгатнень ды секс рамась лавкасто сатышка симемапель. Пейдемань кис ладизь истя: кие а ярсы ракадо, сенень винаяк а кандыть. А ярсыцякс ульнесь ськамонзо бригадань прявтось, Иван атя. Кодгемень иеть эрясь масторланг-
со, неть нулгодькстнэнь кургс эзь сайне.
Ансяк кода отказамс симемкадонть? Ды атясь синдизе обу цянзо, саизе весемеде покш раканть ды ушодсь поремензэ пестэ пес. Цяторды — сонсь эль а укснови.
Майсеманзо неезь, цёратне полавтызь коест:
— Иля майсе, Иваныч, симть зяро мелеть. Минь тонеть ракавтомо мертяно симемс…
КИНЬ КАВАНЯМС?
Модамарень путомадо мейле весе совасть кудов, озасть столь экшс. Ченькс марто четвертеськак стявтозель икелест. Эзть фатяяк, симевсь. Меельценть нуртизь стопкас. Кинень сонзэ кандомс?
— Эрьга, кадык Андрей симсы, сон течи весемеде пек сизесь сока удало…
Зоя — хроп! — чочизе стопканть ды сеск гылмадизе. Мейле мери:
— Андрейнень оштё мутадо…
МЕЗЕЯК А КЕКШЕВИ…
Ков ансяк эзизе кекшне кренчень веденть Гринянизэ! Капста пандяс кекшнизе, нерьгстакшнызе килав капста алов… Муизе! Эйкакшонь лавсес кекшнизе… Муизе! Навоз куця алов валякшнызе бутыленть… Тостояк муизе! Лаханьс чопавтекшнызе… — тезэньгак превензэ сатотсть!
Течи Гринянь тердизе шабразо, кадык лезды муемс кекшезенть, исяк низэ пансь ды кекшизе…
Шерлок Холмс Гринянь кочкарянзо ваксс а путови. Ансяк чалгась кузтемлангс, мери шабранстэнь:
— Вешнек кузтемалдо!
Тона эцесь, алкукс тосо бутылесь.
— Мезе мон тонстеметь теевлинь?! Кода ансяк чарькодить?!
Гринянь кенярксозо потмозонзо а кельги.
— Тонь крыльця лазось свал чатыль, ней вана а чаты…
УРЬВАКСТОМКА
Роштовань колмоце чистэ Миколь сыргозсь шалномадо.
— Сыргозеде седе курок! Нейке ладясынек, зярдо свадьбанть налксесынек!
Кодамо свадьба? Миколь кодаяк а сы ёжос. Варштась пертьпельга: вакссонзо уды тейтерьава, педязь педясь ёжозонзо.
Столь экшсэ озадот тейтеренть ниле лелянзо, эрьванть мокшнанзо ломанень пряшкат…
«Понгинь… — кивчкадсь Миколень прява. — Сави урьвакс-томс…»
РОШТОВА
Роштовасто Андрейвелев эрьва ёндо сыльть инжеть. Сыльть родняст туртов. Игнадвелень колмо цёрат, колмо шабрат, истя жо пурнасть Роштовав. Ансяк родняст арась тосо. Арсесть-арсесть ды прасть истямо мельс: кевкстиндерясызь, кинь сынь, ёвтамс нитнень лемест. Истя тейстькак. Ве кудосо Ёгорень кевкстизь, кие сон. Ёгорь мери:
— Мон Просонь мирдезэ.
Стёпа мери:
— Мон Машконь мирдезэ.
Колмоце ялгасткак ёвтызе нинть лемензэ. Чоп истя пурнасть, кудов кисткак стувтызь. Овсе роднякс теевсть весе Андрейвелентень.
СТОПКАНЬ-СТОПКАНЬ…
Кудонь чапицятне сиведизь пряст вейке азорнэнь.
Ладизь питненть, зяроксть кармить андомост, зяроксть нуртить тенст ченькстэнть.
— Эрьва ярсамсто стопкань-стопкань, а чокшне — кинень зяро кельги…
КОЛМО СЭДТЬ
Миколь арды Игнадвелестэ, сонсь парсте мамштазь. Пачкодсь сэденть видьс, ваны: эйстэст колмо. Конаванть ардомс? «Сырган тия…» — сась мельс Миколь… ды сяворсь сэдь алов. Тосто лиси-лиси, а лисеви. Неявить тензэ колмонст кузтемат. Веенстнэва снартась куземе… ды кеверсь леентень. Паро, неицянзо ульнесть, таргизь…
КУДОНЬ КАЛАВТОМА
Микольть-Васькат таго иредьстэть. Кардамонь кис Васькань авазо таргинзе цёранзо зепстэ кемень целковойтнень ды кекшинзе лия таркас.
Васька сась ёжос, кармась вешнеме зепеванзо ярмаконть. Ярмакось арась.
— Авай, тон эзик сае ярмаконть?
— Эзия…
Васька лиссь ушов, курок совась мекев. Кедьсэнзэ узере.
— Мезе, сави кудонть калавтомс. Ярмакось косояк тесэ…
— На ярмакот! — авазо таргизе зепстэнзэ мерьказь ярмаконть.
Войнадо
ПАРОНЬ ЛЕДСТЯМГА
Андрейвелев ве шкасто эрьва кизэ сакшность Армениясто строицят. Весть минь пилорамасо чочкт пилятано, састь тов армянтнэяк. Минь лоткинек оймсеме, Ванька атя кевкстизе сыре армянинэнть, косто сон.
— Кечеванонь…
— Мон тосо 1930-це иетнестэ служинь. Араратось кадык а маласояк, кавксоньгемень вайгельпеть, ялатеке парсте прязо неяви…
— Ней те пандось Турциянтень ютась, — мелявтозь мерсь сыре армянинэсь.
— Бути аволь рузонь солдаттнэ, тынк эйстэ мезеяк аволь кадово, — мелявтозь мерсь Ванька атя.
— Истя, истя, — поладызе валонзо сыре армянинэсь. Мазый аватнень саилизь мартост, цёратнень маштылизь… ракшатнень-мезтнень истя жо саилизь эстест…
Оймсема шкась прядовсь. Армянтнэ, теке мекшт, кундасть тевень тееме: пильсизь кадовозь лазонок, вачкизь тракторс, ускизь ды вачкизь кудо икелев.
Ванька атя яла кортась сыре армянинэнть марто.
САМОЛЁТ ЛАНГА ВИНТОВКАСТО
Исак Лексеич, кортыть, ульнесь войнасо. Сонськак ламо теде ёвтнекшниль. Весть, келя, ашти окопсо, те шкане ливти немецтнень ёндо самолёт. Ледсь винтовкасто — лётчикесь понгсь видьстэ сельмс. Вана вейке истямо ёвтнемазо.
— Фронтось ютась Белоруссиява. Минек позициясь ульнесь садпиресэ. Эзинек кенере кирнявтнеме окопс, ушодсть леднеме ланганок артиллерийской орудиясто. Мейле кармасть ливтнеме вельксканок «мессершмитт»… Ротастонть кадовинек ансяк кавонек. Самолёттнэ ливтнесть овсе вельксканок, неявсь мик, кода лётчиктне невтнесть тенек мокшнат…
ИВАН АТЯНЬ ПЕЛЬДЕ
— Войнась прядовома лангсоль. Дрезден маласо минь саинек полонс кемгавтово немецть, ютксост ульнесь офицергак.
Кие-бути мерсь:
— Эрьга, ледьсынек…
Зяро эйстэнек маштозельть ниле иень перть минек ёндояк, сынст ёндояк! Мон арсезевинь теде ды меринь ялгатненень:
— Сайсынек оружияст ды нолдасынек. Мон тесэ командирэсь.
Немецень офицерэсь прась пильгепезэнь ды кармась кемень палсеме.
* * *
— Аляка марто минь служинек колмо иеть вейсэ. Весть час-
тенек лоткась модамарень паксяс. Минь ялгань марто кочкинек ведра модарька, пидинек ды кавонек сэвинек. Мезеяк а теят, войнасо вачо пеке ламо савсь кирдемс.
Немецтне потамсто окоптнестэ саилизь весе ули-парост, кадылизь ансяк консерваст. Минь мейле пидилинек эйстэст ям.
Пек маштовсть тенек Американь консерватне, кшись. Кшись вельтязель цалафансо, истя ванстовиль кавтошка-колмошка ие.
ДАЛЬНЕЙ ВОСТОКСО
— Кенеринь воёвамо японецтнэнь мартояк.
Ютатано леень трокс, лишметнень пильгест алов, чаротнень алов зяро калт понгить!.. Немецтнень коряс японецтнэ пек лавшольть, меремс, икелев уш содылинек, мезе учомс пельдест. Секс истя бойкасто войнаськак прядовсь…
ИЗНЯМО
Эрьва иестэ, маень 9-це чистэ, Андрейвелень куншкасо памятникенть ваксс пурнавить ломанть. Войнань пачк ютыцятне кортыть, сыре аватне авардить…
Ды вейкеяк покшчи а ютни Бирынь кортамовтомо. Кодат улить валонзо, весе уш икелев содыть. Мон яла пелькстынь ялган марто, истя-а истя карми ней кортамо. Ды вана таго макссть тензэ вал.
«Товарищи!.. — ушодсь сон. Ды сеск прядызе кортамонзо: «…как зеницу ока!»
Манявинь течи, эзинь сода валонзо.
Пек маштовсть тенек Американь консерватне, кшись. Кшись вельтязель цалафансо, истя ванстовиль кавтошка-колмошка ие.
ДАЛЬНЕЙ ВОСТОКСО
— Кенеринь воёвамо японецтнэнь мартояк.
Ютатано леень трокс, лишметнень пильгест алов, чаротнень алов зяро калт понгить!.. Немецтнень коряс японецтнэ пек лавшольть, меремс, икелев уш содылинек, мезе учомс пельдест. Секс истя бойкасто войнаськак прядовсь…
ИЗНЯМО
Эрьва иестэ, маень 9-це чистэ, Андрейвелень куншкасо памятникенть ваксс пурнавить ломанть. Войнань пачк ютыцятне кортыть, сыре аватне авардить…
Ды вейкеяк покшчи а ютни Бирынь кортамовтомо. Кодат улить валонзо, весе уш икелев содыть. Мон яла пелькстынь ялган марто, истя-а истя карми ней кортамо. Ды вана таго макссть тензэ вал.
«Товарищи!.. — ушодсь сон. Ды сеск прядызе кортамонзо: «…как зеницу ока!»
Манявинь течи, эзинь сода валонзо.
Ды вейкеяк покшчи а ютни Бирынь кортамовтомо. Кодат улить валонзо, весе уш икелев содыть. Мон яла пелькстынь ялган марто, истя-а истя карми ней кортамо. Ды вана таго макссть тензэ вал.
«Товарищи!.. — ушодсь сон. Ды сеск прядызе кортамонзо: «…как зеницу ока!»
Манявинь течи, эзинь сода валонзо.
КУНДЫЗЬ ЛЕМЕНЗЭ
Сёко баба сыргась тейтеренстэнь Свердловскоев, тосо тейсть тензэ операция. Теде мейле куватьс эзь моле, кулось. Кудонзо велесэ миизь. Од азортнэ кудонть урядамсто мусть каштомлангсто нула потс тапарязь ярмакт. Сынст лангс поминызьгак бабанть.
ПЕШТЕТЬ
Митё атя марто сыргинек вирев пештес. Пурнынек кескавонь-кескавонь, иесь ульнесь пеште лангс сюпав. Оймсинек-теинек, кудо ёнов сыргама.
— Я, — мерян, — ней кона ёнов? — Монсь салава пейдян, арсян, мезе ули седе тов. Шабрам куш сыре, вирьга-кальга а якиця, секс тесэнь китнень а содасынзе.
— Мон тонь лангс кеминь… — Митё атя ён а саи, кона ёнов сыргамс, мезе теемс.
Шкань ютазь лисинек пиче вирентень, тестэ Верепень кудотнеяк уш неявить. Митрей атя оймензэ таргизе, весёлгадсь.
Мольтяно кудо ёнов — каршозонок Палё баба.
— Митрей, каванямака пештесэ…
— А каванятан. Стувтык: од шкава мон вешинь кедьстэть пештеть — эзить максо?..
Палё бабань кавания мон. Сон тусь эсь киванзо. Кевкстия Митё атянь:
— Ульнесь истямо тев?
— Ульнесь, ульнесь… — Атясь кувакасто таргизе оймензэ.
«ЗЯРДОЯК А ВЕЛЯВТАН...»
Миколь эри Саранскойсэ, кудов сакшны сеедьстэ, тетянзо-аванзо а кадны мельтеме. Весть кевкстия:
— Максовольтькак теть паро кудо, кавто этажос, веле куншкасо… — савлить мекев велев эрямо?
— Путост те кудонть эрьва ужас машинань-машинань, ялатеке а сан. Мон истя безардинь эйкакшпингестэ тувонь фермань чинеденть, а варштавлиньгак те ёнов! Тетям-авам пингень перть тосо важодсть, миньгак мартост. Пильгенек ведратнес понгить, минсь канднетяно, лездатано… Арась, зярдояк тей а велявтан…
ТАНДАВКС
Вишкинене тетям кучимим лишмень ветямо. Келя, ванстыцясь, Якут атя, сайсы лишменть. Пачкодинь бригадав. Ванан, крандазсо ломань уды. Маримим, сыргозсь. Усанзо покшт, корты судонь пачк. Истя тандадынь эйстэнзэ, кудов чиинь, пильгень модас эзть токше.
ТЕ ВАНА КАЛДОРДЫ!
Галдор-гулдор… — клуб икелев лоткась машина. Руль экшсэ Вася од цёрась.
— Кода калдорды тонь машинась! — кортыть тензэ ялгатне.
— Те мезе! — корты Вася. — Марявлинка тетянсенть, сон уш калдорды дык калдорды!
МЕЛЬС ЭЗЬ ТУЕ
Михалыч арды Чукалсто, килангсо озавтсь те велень ава.
— Кода Чукалсо эрямось? Паро предэнк? — ушодсь а мезде теемадо аванть кевкстнемензэ.
— Ды сон цёрась сэтьме, прязояк ули. Ансяк вана кода сыть тензэ Селищань Порцькась ды Андрейвелень Лишмень Чамась, чинь-чоп симкшнить ды картасо налксить…
Михалыч лоткавтызе машинанть, мери:
— Валгт!
Авась кортась сондензэ.
КОПЁР
Районов сась од прявт. Обуцядонзо кулясь седеяк икеле пачкодсь. Келя, пек а вечксынзе симицятнень ды пек а вечксы ярсамосо копёронть.
Пурнынзе райононь покшось предтнэнь, парторгтнень. Кортамось мольсь чикуншкас. Теде мейле, кода свал, весе сыргасть столовоев ярсамо. Сась тов васенцеськак. Ваны, стольтнень ланга путозь копёр. Ямсояк копёр.
— Тынь ярсадо, монь тевть учить… — мерсь сон ды тусь.
Цёратне чокшнес тешкстасть од прявтонть самонзо. Вармазейкань прявтось ансяк муст-муст пейдсь. Обедтэ икеле сон сов-
сесь столовоев, мерсь аватненень, кадык куш косто муить копёр, конанть одось пек вечксы.
САВТЫНЗЕ КЕЖТНЕНЬ
Миколь сокась пиче вирь вакссо. Неизе, кода вирь чирес лоткась «легковушка». «Молян, ванса, кие сась», — арси эсь пачканзо.
Мольсь — кияк арась, машинань кенкшесь келес панжадо. Учось аламос, ломань арась. Эцесь машинас. Несь коньяк сулика. Саизе мартонзо. Сонсь соки, сонсь копори…
Теке чокшнестэнть Миколень саизь ЛТП-в. Пек уш савтынзе покш прявтонть кежензэ.
ИНЖЕ
Юркань чачома ёнксозо — Чувашиясь, секс весе мерить тензэ «чуваш». Сыль весть сон тосто Игнадвелев, килангсо теевсь содавиксэкс эсензэ кондямо «чуваш» марто. Тердизе инжекс.
Ютасть зярыя чить. Юрка ваны вальмава, инжесь эскели сонзэ ёнов. Тень цёрась кодаяк эзь учне, мери нинстэнь:
— Мерть тензэ, туинь Чебоксаров. — Сонсь кирнявтсь кашт-
лангс, кекшсь шаршав экшс.
Инжесь секс сась варштамост — учось, каванясызь. Теемс а мезе, кудазоравантень савсь анокстамс столь, таргамс сулика. Инжесь сими-ярсы, кармась уш кудазораванть кутморямо.
Юрка салава ваны ды грози:
— Вана сан Чебоксарсто, тонавттан…
МЕЗЕЯК ЭЗЬ ЧАРЬКОДЕ
Микольть-Гришкат якасть Оброчноев ракшань ускомо. Шкась сатстневсь куватьс, цёратнень пекест вачсть. Кудов ардыть. Вейкесь руль экшсэ, омбоцесь вакссонзо. Гришка юксизе сюлмонзо, ушодсь тямкаезь ярсамо, ялганстэнь мезеяк а максы. Ярсыцянть лангс ванозь, Миколень пек састь кежензэ. Эзь кирдеве, мери тензэ:
— Те тон мезде истя тямкат? Некак скалонь одардо, лемесь кургот вакска мик чуди…
Неть валтнэде Гришкань уксноманзо мик кепететсть, энялдсь лоткавтомс машинанть. Кирнявтсь кабинасто, куватьс арасель. Велявтсь — Миколь тензэ мери:
— Азё кузовас!
Гришка истяк мезеяк эзь чарькоде, кузсь кузовас, мекев ушодсь каволямо.
ПУРНЫЦЯТ
Седикеле Роштовасто велева ютасть пурныцят. Совасть ве кудос — азорось поровт икеле иредьстэ празь ашти. Те эзинзе лоткавто пурныцятнень. Вейкесь ютась икелев, ушодсь пештямо сюкорнэтнень. Те шкане иредьстэсь максызе вайгелензэ:
— Куш эйкакштненень мезеяк кадодо…
БАГРЫМ
Талызинасо Багрым теевсь содавиксэкс татар марто. Мезть уш тосо кортасть, кияк а соды. Ансяк омбоце чистэнть уш тона ёндо састь зярыя татарт, усксть Багрымнень хромовой кемть ды ревень шуба. Тень кис Багрым невтсь тенст, косто керямс вирь. Вирень керицятне уш пештизь нурдост, пурнасть сыргамо, те шкане пачкодсь ваксозост вирень ванстыцясь. Сон кармавтынзе кадомс керязь чувттнэнь ды пачтясь саламодонть ков эряви.
— Багрым тенек мерсь вирень керямодо, — иди прянзо татарось.
— Минек истят вирень ванстыцят арасть, — кортыть тензэ.
Кавтошка иеть теде мейле Багрым эзь яка Талызинань базаров. Ансяк нужась кармавтызе. Лоткась ваксозонзо уш содавикс татарось, мери:
— Тон Багрым?
— Арась, мон Мамаев… — Сонсь седе курок лишме лангс ды кудов.
Ялатеке сасызь. Путнесть тензэ манчемань кис.
ПЕК ИЛЯК КУЧКОРЕ!
Седикеле пек стакаль рамамс почт, секс сетнень, кие важодсь пекарнясо, питнепест а ёвтави кодамоль народ ютксо. Текень пес роднятне-раськетне мелявкст эзть сода почтонь кувалма. Энялдсь весть Маня лелянзо нинстэнь саемс тензэ кескав почт, ярмакткак макссь. Келя, лиси машина, сан мельганзо. Я-а-а, омбоце чистэ сась Манянь мирдезэ, вешинзе ярмактнень, келя, почтнэ а эрявить. Ютась оштё часошка, сась Маня… почтнэнь мельга. Кода марясь, мезе лиссь, ушодсь мирденть мурнеме-сюдомо. Лелязо те шкане поровт вакссо карсесь кемть.
— Карсесынь, Крахмальнойстэ сасаса мирдеть, пелекуломс чавса!
Маня тесэ уш тандадсь:
— Коля, лелинем, сасасак, пек уш иля кучкоре эйсэнзэ!
Коля эсь пачканзо раказевсь: «Пек тень эрявить мелявксонк…»
ВАСТОВОМА
Од шкава Сергей яксесь Ольга ваксс. Мейле тейтересь тусь Московов, сакшны велев ансяк инжекс. Вана нейгак сась свадьбав. Сергей вастовсь икелень алужонзо марто, корты тензэ:
— Паряк, вастовдано икелень таркасонок?..
— Эрь, вастовдано. Ансяк ней мон истяк прям а максса теть кутморямс. Сайть мартот ярмакт.
Сергеень потмозояк кутятотсь чокшненть учозь, сонсь секе тев кевкстни эсь прянзо: «Те кода истя куроксто максызе прянзо вастовомс мартон?»
Ютксост кортамонть Ольга ёвтнизе Сергеень нинтень, эсензэ ялгантень, ды мерсь тензэ молемс мартонзо вастовомо сонзэ таркас.
Истя тейстькак.
Сась вастовома шкась. Сергей салава ношкстась сёлт чиресэ банянть ёнов, талнозь совась кудыкелев. Тосо сонзэ учость уш. Капшазь ёкстынзе аванть коморс ярмактнень, ушодсь палсеме.
Сонсь палси, сонсь корты:
— Тонь чинетькак ошонь…
Те шкане низэ кода вачкодьсы пиле юрга:
— У-у-у, идемевсь, тонеть эряви ошонь чине?! Невтян теть ош!..
Тесэ ансяк чарькодсь Сергей — аватне манизь…
Мейле кавтошка недлят якась чурька пандянть малава, низэ мезеяк тензэ эзь пиде.
АВА, ВОЕНКОМ, МАШИНА...
Те ульнесь умок, ялатеке те шкас велесэ ледстнить, кода райононь военкомось, апак урьваксто цёрась, манякшнызе минек велень вейке аванть. Васня вастневсть, мейле буто цёрась алтась урьвакстомо. Тень марязь, авась максынзе алужонстэнь весе ярмаконзо, конатнень таштынзе, тона алтась рамамс тензэ машина. Теде мейле алужонть теке неевтезэ ульнесь! Сон од машинасо тусь лия марто лембе ёнов оймсеме.
Мекев вастовсть уш судсо. Ансяк тесэяк покордазь авантень видечись эзь муеве, сонзэ кедьсэ арасель кодамояк конёв, кона кортаволь ярмаконь максомадо. Машинась кадовсь военкомонтень. Ялатеке райононть тензэ савсь кадомс. Апародонть аваськак тусь велестэнзэ.
УЗЕРЕ
— Тетяй, узере муинь!
— Чатьмонть, ломанть аволидизь маря…
— Сонзэ обушказо лазовсь…
— Ёртык! Ломанть аволидизь нее…
КИЕ ПОНГОНЕСЬ?
Закарункань Миколь чинзэ лисемадо икеле колхозонь паксясто ледсь тикше. Лугась тустоль, ледемс а псиль, цёрась важодсь паро мельсэ ды эзь фатяяк, кода ваксозонзо састь милиционерт. Сюлмсизь кедензэ ды ускизь Игнадвелев, милицияв. Миколь аштесь-аштесь, энялдсь нолдамонзо венелев. Ваны, милиционерэсь ськамонзо. Таргизе зепстэнзэ брусоконть ды вачкодизе тонань пря ланга. Сонсь кекшсь милициянь кардазсо лишмень очкос, ланганзо сравтсь тикше.
Истяк кияк эзь чарькодеяк, кие понгонесь се вестэнть милицияв.
ТУВОНЬ САЛЫЦЯТ
Андрейвелень тувонь фермасто кундасть салыцят: вейкесь а мари, омбоцесь а корты, колмоценть превензэ а сатыть.
— Кода кундыть? — кевкстнить милиционерэнть.
— Кундамс сынст пек стакаль. Практически арасель кодамояк возможность…
ФИЗИКАНЬ ЗАКОН
Кой-зярдо вейке тонавтыцянок сакшныль школав иредьстэ. Матедеви, чурави алонзо.
— Некак чуравиде, Степан Федотыч?..
— Тынь мезе, стувтынк физикань закононть?! Те ловось солась кемтнень лангсто, ды теевсь ведь…
КИЕ ЛЕДНЕСЬ?
Аляка молиль кудов. Апак учо кие-бути ледсь, пулясь ливтясь пиле ваксканзо. Леднемадонть сон сеск пачтясь милицияв. Куликов милиционерэсь пельчи вешнесь гильзатнень школань садсто.
— Мезе вешнетядо? — кевкстизе Миколь.
— Кие-бути леднесь садсо… А содат кие?
— Ды те мон пансинь локшосо скалтнэнь.
— Иля манче, — кардызе Аляка. Мезе, мон а содан, кода пистолетэсь ледни, кода локшось лакштяи?..
Истяк эзизь муеяк ледницянть.
СЕКС, МЕКС КОРНОТАДО...
Школанть перька стявтыть од пирявкс. Колмоце чи уш озить цёратне. Ней вана текень пес ёмась пиласткак.
— Сёма, тон салык пиланть? Мекс?
— Мекс корнотадо... Эно, молян, туса…
ПОЛЬКА БАБА
Вирев пачкодемстэ Полька баба васня часошка удыль Звезда кужосонть, мода лангсо, мейле сыргиль.
Кулось вечкевикс ломаненек, Полька баба, кандынек тензэ беремань-беремань паксянь цецят.
Кода аламо эряви ломанентень! Вейке лишмес путынек кандолазтнэнь, омбоцентень — крёстонть. Прядовсь ломаненть эрямо кизэ. Мода лангсто тусь вирень меельце вечкицясь.
ЭРЯВИ ЗЯРДОЯК ТОНАВТНЕМС
Колят-Васят вастовсть малавиксэст калмамсто. Сынст тердизь крёстонь тееме. Пелькстазевсть цёратне. Вася мери:
— Мекс а кунсолат эйсэнь? Тон монень эйкакшокс сават!
— Тон, мезе, стувтык? — дивазевсь Коля. — Мартот сисем иеть ве классо тонавтнинек, сисем иеть ве парта экшсэ аштинек. Стувтык, зяро заданият тетрадьстэнь салыть?!
Сась ваксозост Васянь цёразо:
— Эно монгак зярояк лаксян, — мери.
— Ды тон узереяк кедьсэть эзить кирде!
— Ды мезе ней? Эряви зярдояк тонавтнемс. Тынь оно, овсе сыредиде…
ПОКШ КАЛ
Патань Андрей таргась Бибайстэ покш кал. Сонськак а кеми — Бибайстэ истямо кал! Маризе те кулянть Пичай. Чийсь Бибай чирес. Саизе кундазь калонть кедезэнзэ — стака… Калось нолажтсь кедьстэнзэ ды прась мекев Бибайс.
Пижень Вася кундась покш ёзнэкал бригадань лейстэ. Брага ютыль вакскаст.
— Митё леляй, ваныка, кодамо покш кал кундынек! — пижнить тензэ эйкакштне. Тона саизе калонть пулодо ды — кургс! Сяторк эзь тее, целанек некак нилизе. Вася кода ушоды авардеме…
СНИМИМИЗЬ…
Нинку сась Московсто фотоаппарат марто. Снимси весень. Миньгак энялдынек снимамс эсь прянок. Нинку аравтымизь: монь, Брагань Васянь, Масёнь Андреень ды Николай Петровичень. Кармавтымизь пейдеме. Мейле кепедизе фотоаппаратонть ды «штёлк!» мерсь.
— Тон, патяй, некак нарьгат лангсонок? — салава кевкстия Нинкунь.
— А тон арсить — тынк лангс алкукс карман кадрань ютавтомо?..
МАСЁ АТЯ
Мон вишкинелинь, Масё атя сырель, каштлангсто валгониль бути ансяк венелев. Манчема чистэ Верепенек манчинь, кадновсь апак маня ансяк шабрань атясь. «Кода ней манямс сонзэ?» — мелявтынь. Окойники чарькодинь кода.
Совинь тенст ды поровт лангсто атянтень пидинь:
— Масё покштяй, тонь мекс-бути вельсоветэв тердидизь…
Атясь чокшнес мольсь тов. Пачкодсь, кевкстни:
— Мекс тердимизь?
…Эх, и понгсь сестэ монень тетянь пельде!
«НЕЙ БУ ПСИ ЯМ!»
Телень куншкат Васькань каладсь тракторозо. Колхозсо се шкава арасель вельтязь витнема тарка, весе тевтне теевильть ушосо. Васька котьми тракторсонть, кирнявты, ушоды перьканзо чийнеме:
— Вана ней бу пси ям! Вана ней бу пси ям!..
ВЕЧКЕВИКС БОДЯ
Сергей, зярдо марясь, покштязо берянь, прянь-полдань синдезь чийсь Игнадвелестэ Андрейвелев. Совась кудос — покштязо арась. «Чей, эзь куло?» — талнозевсь цёрынесь. Мари, мезе-бути калскаи каштлангсо. Кузсь — тосо покштязо пештть чулгси.
«ТЕТЯЙ, ТЕ МОН…»
Окрем урвакстськак, эйкакшонзояк уш кассть, сонсь яла норовиль оргодемс чокшне ланга ульцяв, вечкиль кутмордамс косояк чопода таркасо од тейтерь. Весть истя апсордсь од тейтерь, лепштни-кутмори эйсэнзэ. Тейтересь вайгель макссь:
— Тетяй, те мон…
САИНК-САИНК, МОНЬ ОШТЁ УЛИ…
Гришка тусь эрямо Нижноев. Весть молинек тензэ инжекс. Сынек, кудазорось кудосо арась. Низэ корты: келя, курок сы, тусь инжень ильтеме…
Миньгак сонстемензэ лисинек кузтемпес таргамо. Вантано: сы Гришка. Мон вайгелень апак максо хоп ноцковтыя прястонзо шапканть.
— Саинк-саинк, монь оштё ули… — маринек Гришкань сорныця вайгелензэ.
— Эх, цёра, цёра! Велесэ ульнить весемеде виев, мездеяк эзить пеле, тесэ, ванан, тандадыть…
ТОЛЯ-МИЛИЦИОНЕР
Армиядо мейле Толянь саизь милицияв шофёрокс. Оршавтызь милициянь оршамосо, ды омбоце чистэ уш сон сыргась начальникенть марто Саранскоев. Зярс тона промкссоль, Толя ютызе ошонть нучк-пачк. Пекезэ илязо вачо, рамась лавкасто крендельть, понгавтынзе кирьгазонзо ды истяк, милиционерэнь формасо ды кирьгасо крендель марто, якась чинь-чоп. Кияк эзизе лоткавто.
ВЕРЬГИЗЭНТЬ КУЛОВТЫЗЕ
Полё баба одсто мездеяк а пелиль. Войнань шкава велес верьгизт пачколильть. Весть истя совась верьгиз олгсо вельтязь кардазонтень, повизе вейкине ревенть, лисемс моцезэ эзь сато. Варяяк тензэ а муеви. Полё чарькодсь, мейсэ тевесь, сайсь сянго ды лазызе верьгизэнть. Омбоцеде верьгизс эртевсь сэрей сандей пачк молемстэ. Кедьсэнзэльть новтат. Кода вачкодьсы верьгизэнть эйсэст! Тона, нать, пек тандадсь, ардсь сядошка метрат, прась ды кулось.
ЛЕКАРЬ
Андреень ормалгадсь потмозо. Секень вант, симсь мезеяк. Снартась прянзо лецямо. Сайсь бутыль, палка пес тапарясь вата, навизе керосинс, кирвазтизе, мейле нерьгстызе бутыльс. Аламос кирдизе, мейле таргизе ды седе курок комавтызе бутыленть пекензэ лангс. Пекезэ ловажас таргавсь бутылентень.
Теде мейле цёранть савсь ускомс больницяв.
ИНЕВЕДЕНЬ КАПСТА
Кодгеменце иетнестэ, седе мейлеяк ульнесть истят шкат, зярдо лавкатнень лався ланга аштесть ансяк иневедень капста марто банкат. Сынст кияк а рамиль, эсенек капстадонть ярсак зяро мелеть. Ды сась Рая микшницянть мельс нерьгстнемс неть банкатнень винань вечкицятненень. Саят сулика — мартонзо сайть колмо банкат капста. Цёратне а саить капстанть, келя, минь истямодо а ярстано. Рая ялатеке нерьгсты тенст неть банкатнень. Нерьгсты — сынь ялатеке кадовить тоско. Истя некеть колмо банкатнень марто весе винась миевсь, капстась жо зняро ульнесь — зяро кадовсь. Ансяк ярмакт кисэнзэ эрьванть пельде Рая сайсь…
«СВЯТОЙ ВЕДЬ»
Сергач вакссто — тов ардомс кодгеменьшка вайгельпеть — мусть лисьмапря, косо, келя, ведесь пек лезэв. Веленек кармасть тов ардтнеме. Лиясто пельчи аштить тосо ведь мельга очередьсэ. Васня веденть пештильть стякодо, мейле ярмакт кармасть кисэнзэ саеме — фляганть кис колмо целковойть. Юра шофёрось ды ялгазо весть мерсть ломантненень:
— Мезекс тенк ардтнемс тов? Минсь мольтяно ды пештясынек весе флягатнень. Ярмак ансяк максодо ды тешкстынк эсенк флягатнень.
Истя тейстькак.
Цёратне пачкодсть Пролетариянь лисьмапряс, пештизь флягатнень, пельчи удость Казнеевкань вирьсэ ды ансяк мейле састь кудов. Пурназь ярмактнень лангс недляшка симкшнесть. Нед-
лянть прядовомсто Юра иредемань пачк манявсь, ёвтась аванстэнь, мезе лангс рамсить ялганзо марто симемапеленть.
Кежиявтсть ломантне лангозост, Юрань партиястояк панизь.
ВЕЧКЕМАНЬ ТЕВ
Атят-бабат сыргасть олгс. Вачкизь нурдонть парсте, сыргавтызь таркастонзо лишментькак. Пачкодсть пиче виренть видьс. Ды тесэ мирдесь ледстизе од шканзо.
Низэ кардызе: вана, келя, пачкодтяно кудов…
Цёра кода азаргады! Перьгавтызе лишменть ды кирвазтинзе олгтнень. Весе палсть.
КАЛДАМАЗ
Вишкинестэ Калдамаздо покш лей эзинек содакшно. Тов якинек калонь кундсеме. Сайтяно мартонок зобунят — илейстэ кодазь аволь покш кептерть — ды Калдамазов. Кундатанояк тосто суронь кувалмосо колоньгеменьшка калнэть — а уш кенярксось зяро! Мейле пенек пурнавтано ямонь пидеме. Эрьвась канды зярыя модарькат, алонь-алонь, коморошка ямкскеть, чурькат… Калт-
нэ покш чугунсонть ансяк лемень кис. А уш танстезэ те ямонть а ёвтавияк кодамо!
ИЛЯ ЗГИЛЯ СЭРЕДИЦЯ ЛАНГСО
Больницясо од лецицясь секе тев ракси-згили вейке сыре атянть лангсо. Атясь кармавтсь телефононь пачк туемс тензэ клюшканзо. Валске ансяк ушодсь лецицясь згилямо лангсонзо — атя клюшкасонзо кода вачкодьсы!
Теде мейле атянть ильтизь Берсеневкав.
БОМБА
Васьканень низэ тусь больницяв банкасо какао. Сеск эзь симеве, цёрась путызе банканть столь потс. Путызе ды стувтызе. Весть веть кода леди мезе-бути! Васькань вакссо аштесь Игнадвелень цёра, пильгезэ синдезель, эйзэнзэ понгавтозельть эрьва кодат сталмот… Кода кирнявты сон неть сталмотнень марто, кода лиси палатасто… — пильгезэ мекев сивсь. Васькань омбоце чистэ тень кис панизь больницясто. Сивезь пильгесь туемстэнзэ грозизе:
— Пичкан, пачкодян велезэнк — пелекуломс чавтан.
ТАШТО УЗЕРЕ
Кошкань Вася тусь шабранзо туртов ташто узере.
— Ваныка, 1914-це иень узересь...
— Чей, а правда?... — Атя кецязевсь, икелень узеретне ульнекшнесть алкуксонь, куш мезе эйсэст керяк. Сайсь эске ды снартась керямонзо. Весть вачкодсь — узересь лапшкадсь. Атясь путынзе сельмукшонзо, ваны: кодамояк аволь 1914-це — 1974-це иесь тешкстазь узересэнть. Манизе атянть Вася.
ШАМПАНСКОЙ
Зина микшницясь ды Паша атя эрить теке кискат-псакат. Ялатеке атянтень савкшны пшкалемс шабрантень, секе тев моли лавкав мезеньгак рамамо. Лавкасо зярыя чить уш лавсятнень лангсо ашти ансяк шампанской. Паша атя вестькак сонзэ эзизе варчне ды а содыяк, кода панжомс суликанть. Пшкадсь Зинанень:
— Кода куш панжомс?
— Тон васня парсте шумбурик, мейле панжик.
Паша атя ансяк лиссь кенкш удалов, седеезэ эзь кирде, ушодсь шумбурямо. Кенерсь сеземс суликанть прясто цивтордыця конёвонть, се кода леди! Прясто пильгс валновсь Паша атя, кургозонзо ве петнявкскеяк эзь понго.
Истя Зина пандызе тензэ кеженть.
САЛОВ ЯМ
Тикшень ледемстэ, сюронь урядамсто ярсылинек вейке покш вакансто кавксо эли кемень ломанть. Мартонок секе тев понгиль Паша атя. Мартонзо ярсамось — безарькс, атясь ярсы пек саловсто. Амольди салдырьксстэ чувтонь пенчсэнзэ сал ды каясы ямс.
— Ваи алов, — мери.
Минь весть теинек сонзэ ладсо. Сон амольдясь сал, миньгак весе амольдинек. Сон каизе ямс, миньгак каинек. Сон мерсь:
— Ваи алов.
Миньгак истя меринек.
Теде мейле атясь лоткась мартонок ойсемеде.
ИЛЯЗО КОЛЕ
Ялгам марто якинек ведьпачань кундсеме. Кундынек: сонгак, монгак. Ней, мерян, кода бу а кольстемс.
Омбоце чистэ совась тенек ялгань низэ. Кевкстимим:
— Тон мезе теить ведьпачанть марто?
— Ваткия ды салтыя…
— Монь чаулась мекс-бути нерьгстызе кельмеме холодильникс.
«ТЕ А ВЕРЬГИЗ...»
Лёня кундась туворс верьгиз. Нерензэ кершизе, ветизе велев. Пенек пурнавсть верьгизэнть ваномо.
— Ды те а верьгиз — киска! — мерсь Митё лелям (сон пек вечки весень лангсо згилямо). Вана нейгак нерьгстызе верьгизэнть чувтонь коймесэ кургс. Верьгиз — хроп! — амсордызе койменть, ды эйстэнзэ кадовсть ансяк пелькскеть.
«НОЛДЫК КАЛОНТЬ!»
Весть Лексейка кундась пиче вирень сёлтсто покш кал. Калось кирнявтнесь-кирнявтнесь берёк лангсо, истя кирнявтськак мекев ведьс. Лексейка мельганзо. Кундызе, лепштизе мештезэнзэ, сонсь кодаяк ведьстэ а лисеви, секень вант, лепии. Ялгатне пижнить: «Нолдык калонть!» Сон эсензэнть соды.
Лисевсь. Кал марто.
ТУНТА
Истя мерильть бригадань вейке лишментень. Лишмесь пок-
шоль, виевель, ансяк зярдояк бойкасто а ардыль. Ансяк бути свадьбань ускомо саилизь, сестэ бойкасто ардыль. Тонавтызь лишменть: нуртильть тензэ зярояк — Тунта шанчсэ ардыль.
ПАРО РАСЬКЕНЬ
Велес кучсть од прявт. Цёрась теке бояр, сэрей, мазый, превензэяк улить.
Вейке ававт мери урьванстэнь:
— Чачтындерявлить тень пельде, эйкакшот кодамо улевель! А мезе монь гулдобась?..
Урьвась ававтонть кунсолызе, чачтась… предэнть пельде.
СОКАТНЕ А ЭРЯВИТЬ
Тона пингенть ушодовомсто Андрейвелень ломантне марясть: сыть тракторт, ды ней уш сокатне а кармить эрявомо. Эсест койсэ капшавтызь те тевенть, саизь ды пултызь сокаст. Учить-учить: трактортнэ а сыть яла. Мекев савсь теемс сокат…
КШУМАНЦЯНЬ КОММУНАДО
Сонзэ пурнызь-теизь истя: саизь сюпавтнень лишмест-скалост, лия ули-парост ды сыргасть од таркас эрямо. Коммунас ансяк сетне пурнавсть, кинь арасель кодамояк ули-парозо, важодемеяк а пек вечкильть. Од таркасо весе ярсасть ве котёлсто. Васня печксизь тувотнень, реветнень, мейле пачкодсть скалтнэс, лишметнес… Зярдо весе сэвевсть — каладсь коммунась.
МИКАИЛА АТЯ
Од шкава, ёвтнекшнесть, Микаила атя истямо шумбра ульнесь, Саргань ведьгев вакссто усксь Андрейвелев покш кев. Илизь нее-муе, сявордызе Дерькаинь сёлтс. Кортнить, се кевесь нейгак тосо, куш сёлтось умок уш коськсь. Сыречисэ Микаила атя овсе лоткась неемеде, ялатеке весе кудоютконь тевтнень топавтыль сонсь, ломантненьгак содыль апак нее.
Весть веть сылинь Чукалонь клубсто. Марян, кие-бути пенгть лазны. Пшкадинь. Микаила атя содымим, куш, койсэнь, а содамальгак тензэ монь — одан ды а савкшны мартонзо кортнекшнемс. Микаила атя пек превеель, пек вадрясто маштыль покш числань ловомо, ламо мезе содась веленть умонь эрямосто.
СВЯТОЙ ЛИСЬМАПРЯ
Од шкава Иван атя тусь эрямо Андрейвелестэ Пролетарияв. Сон ульнесь те посёлканть меельце эрицякс, весемеде мейле кадызе тарканть ды сырестэ уш тусь Талызинав. Кирдиль ламо неш-
кеть, якиль поминкава ловомо. Атясь превеель ды ламонь содыцяль. Сынь весть варштамонзо, ды сон ёвтнесь тень истямо тев.
— Умок-умок Полудмитриевка ды Од Чамза ютксо пурнавкшныль покш ярмунка, ков сюпав микшницят-рамсицят сакшныльть оштнестэяк. Тейнильть нурямкат, сакшныльть циркень бороцицят… Весть ярмункадо икеле кармавтымизь святой лисьмапрянь ванськавтомо. Потмаксстонзо таргинек пельведрашка ярмакт, ютксост ульнесть сияньгак. Содылинек, сюпавтне секе тев каильть лисьмас ярмакт.
Те лисьманть чирес озномо ломанть якить те шкас.
ЛАПОТЬ
Лапоть, Маляр ды Лутуня стявтсть Чамзасо кудо. Теизь кудонть, идезь ярмактнень явизь колмов.
— Митрич, — корты Лутунянень Лапоть, — мезекс тонеть ярмактне? Эрят ськамот… Монь жо кото эйкакшон…
— На, саить весе, каторжанин… — мерсь Лутуня ды максынзе тензэ весе ярмактнень.
КИЕ КИНЬ ЛАНГСО ПРЯВТ
Сёмат-Микольть ваныть тувонь стада. Сась ваксозост колхозонь прявтось. Ваннызе, кода ашти тевест, мерсь: келя, вандынь чистэ Сёма кадови покшонь таркас.
Омбоце чистэ Сёма сась стада ваномо локшовтомо, ве тев содась: пансесь тувотнень мельга Миколень. Миколень ланга човт чудить, чокшнес моцезэ маштсь. Фермань прявтось тень редизе, энялдсь колхозонь прявтонтень:
— Инеськеть, каик Сёмань покшсто!
Омбоце чистэ прявтось таго пачкодсь стада ваныцятнень ваксс, мери:
— Тон, Сёма, ней а покшат…
Сёма таго сайсь кедезэнзэ локшо.
КУЛОВОНЬ ПУРНЫЦЯ
Седикеле навоздо ды куловдо башка велень паксятне лия удобреният эзть сода. Телень перть велева пурныльть сараз вацть ды куловт. Сёма эрьва кудос совиль, эрьва кудосо мейсэяк ды каванясызь. Авамгак кандыль тензэ. Сёма комавтсы стопканть ды мейле куватьс никси кшинть…
ГРИТЫ
Ёгорь валскень перть кудосо азаргали. Мезе понги кедензэ алов, мерьки, яжи, вальмава ёртни. Вальмалганзо те шкане ютыль Гриты. Ёгорень низэ энялдсь тензэ:
— Паряк, тонь кунсолотанзат, ойми…
Гриты совась, шумбракстнесь, кевкстизе Ёгорень, мезе теи:
— Ванат, весе вальмава ёртнинь — столесь а кельги…
— Пилат ули? — кевкстизе Гриты.
— Ули…
— Туик!
Цёратне пилизь столенть кавтов ды ёртызь вальмава.
Лездась Гриты…
КАЛЬМАР
Роштовадо икеле тувонь фермав усксть кельмевтезь калт. Ускицяст, Иван, вейке ящикенть салызе эстензэ. Арсесь, вейке пельксэнть сайсы кудов, омбоценть мисы шабранстэнь, Машо бабанень. Истя тейськак, миизе кавто суликадо. Валске прязо стакадояк стака, тодовонть эйстэ кодаяк а сезеви. Те шкане совась тенст Машо баба, кедьсэнзэ мезе-бути ачарькодевикс.
— Иван, те тон мезе тень истямо кандыть? Вантакая… Теке мень-бути корён, эйсэнзэ ансяк пильгть… Кодамо те кал?
Иван комась туевксэнть вельксэс. Ваны, тонань сельмезэ прок сонзэ ёнов пезнавтозь. Апаркстомсь мик. «Монь лангс ваны…» — салавинька тошкась.
Тандадоманть пансизе Ванька, кото иесэ цёрынезэ, сон ансяк вансь телевизорга ведьсэ эрийтнеде кино.
— Ды те кальмар, тетяй! Иля пеле!
«...ТЫНЬГАК ЭРЯТАДО!»
Роштовасто Ванянень совасть инжекс симиця ялганзо. Симсть, мезест муевсь, ды Ваня ушодсь прянь шнамо. Панжизе шифоньерэнть, кармась тосто ули-паронзо таргсеме: од сивекс, од камбраз, новтат, ождят…
— Нетядо!!! Ато мертядо — тыньгак эрятадо!
* * *
Шабразонок састь соцобеспечениянь ломанть, бажить содамс, кода эрить, мезде ярсыть эйкакштне. Панжизь холодильникенть — тосо лембе кемть.
— Нетне мекс тесэть?
— Ки илинзе сэве.
* * *
Андрей миинзе буканзо Чукалонь колхозов, кисэст ярмактнень максызь ансяк иень ютазь, зярдо миллионт появасть. Ней кавто букатнень кис сонензэ ве суликаяк эзь рамаво.
МИРИЦЯ
Охремт-Игайть пелькстыть эсь ютковаст, эрявить-арась баня лазтнэ валакавтомс. Кодаяк вемельс а сыть.
— Адя, кевкстьсынек Миронычень…
Мироныч строицясь аволь уш кодамо, седе виде ули меремс — кодамояк сон а строиця. Ды ялатеке, бути кевкстнить эйсэть, эряви мезеяк ёвтамс. Куш сень кис, илязт сёвнозеве седе пек эсь ютковаст сыцятне.
— Мон вана кода тенк мерян… — Сон оштё весть варштась эрьванть сельмс ды кувака чатьмонемадо мейле поладынзе валонзо: — Валакавтомс эрявить… Ансяк валаня ёнксонть чавома алов…
ТУВОНЬ ПЕЧКЕМА
Шабрам тердимим тувонь печкеме. Таргизе полок лангсто винтовканзо, зарядизе, ды лисинек кардазс. Тувонть икелев каясь сюро. Тувось истямо покш, некак кеменьшка пондот эйсэнзэ. Шабрам винтовканть кепедизе ды — цят! — ледсь тувонть коняс. Туво сырк эзь тее, сяторды ды сяторды зёрнадонть. Кеменьксть леднесь шабрам — тувонтень мезеяк арась. Семс эзь правтово, зярс эзинь мере ледемс пиле юрс.
ЧУКАЛОНЬ ОДИРЬВА
Васька атя сайсь сюпав урьва Чукалсто, мельспарозо а кекшевияк. Ансяк кеняркшнось сон истя а куватьс. Кодамо тевс а кармавтсызь урьванть — мезеньгак тееме а машты. Кармавтызь саразонь андомо. Сон кевкстни:
— Тынь кода саразонк тердтядо ярсамо?
— Кода тынь, истя миньгак, — мерсь ававтозо. Урьвась лиссь кузтемпес ды пижни:
— Кода тынь, истя миньгак, кода тынь, истя миньгак…
Кармавтызь кшинь панеме. Диви, а чарькоди урьвась, мекс кшинь панема керезесь эрьваксть седе вишкине.
Чийнесь аванстэнь, кевкстизе, мекс истя лисни… Чарькодсь авазо — а маштовить тейтерензэ кшитне ярсамс, ды ававтось тень а невти. Сонгак эзизе яволявто чарькодезенть тейтеренстэнь, кевкстизе ансяк:
— Тейтерем, кодамо эрямось мирде экшсэ?
— Вадря. Ансяк вана чама нардамось валске ланга свал начко мекс-бути эрси…
ПРОТАСОВАНЬ ОДИРЬВА
Михал колмоксть урьвакстнесь, ды колмоксть нитне оргодсть эйстэнзэ, пек уш сон тюри иредьстэ. Тетязо путсь цёранстэнь превть:
— Урьвакст ней Протасовань тейтерь лангс. Оно, Уськерей секе тев сими ды чави нинзэ, сон ялатеке эри мартонзо.
Михал истя тейськак. Ней сими, тюри — Протасовасто саевть нись ялатеке а кады эйсэнзэ.
СЮЛОНЬ ЛАЗНОМКА
Иван атя печксь туво, аванстэнь мерсь лазномс сюлотнень.
Матрё бабанень малав вейксэньгемень, ансяк тензэ зяро кодаяк а максат, сон те шкас ламо мезе теи кудоюткова, пиди-пани. Цёранзо кармавтоманть, кона сонськак уш, ловт, атя, арась мелезэ топавтомс.
— Вай, ды сюлотнень лангсо куясь араськак…
— Авай, кода парсте неят! Тувось ушосо, тон кудосто неик, кодат сюлонзо…
КАШТОМОНЬ УШТОМКА
Вера бабань урьвазо лия велень. Пек дока, свадьбадо мейле сеск стясь каштомикелев. Вера баба сыргозсь — каштомось уштозь уш. Омбоце чистэ сонсь седе икеле сыргозсь — ды уштомо. Колмоце чистэнть урьва таго икельдизе…
Истя зярсыя пелькстасть. Окойники Вера баба эзь цидярдо, кадызе тарканзо. Велесэ ки ушты каштом — се кудазоравась.
ВАРЬГА
Поминамсто самсто Просо бабань прась кедьстэнзэ варьгазо. Сон моли ды кучкори эйсэнзэ.
Каршонзо вастовсь ломань:
— Мекс кучкорят варьгат?
— Ды поминамсто сан… Пек ярсавинь, а комавангак…
* * *
Миколь кой-зярдо чупаськали лия авас. Неизе шабразо, сеск пачтясь нинстэнь. Тона сельгень прамс чийсь ды сеск вальмас:
— У-у-у, идемевсень злыдарь!
— Ней мезе, симемеяк совамс уш а мерят?..
— Симемс мерян, ды мезекс понкстнэнь кайсемс?..
ПАРСТЕ ЭРЯН…
Тюмот-Миклёт сыргасть Андрейвелев Роштовав. Миклё а моликсэль, оршамс тензэ а мезе. Тюмо ладсизе:
— Эсень пальтом теть максса.
Састь шабра велев. Ков а совить, Тюмо шны прянзо:
— Мон парсте эрян, пальтонгак кавто. Вейкесь оно, сонзэ лангсо… — сонсь невтни Миклё лангс, — омбоцесь эсень лангсо…
Миклё модань пачк анок туемс. А соды мезе теемс, симияк — а иреди. Куш сайть ды ёртык пальтонзо. Ансяк ковгак а молят — ушось пек якшамо.
Назад в раздел
