Сулала бокшаын. Увтасын сёльгö ёль. Оз тыдав. Сöмын кыв-ворыс, гуся сьылöмыс йиджö сюрсаöдз. Ставсö сайöдö кельыд гöрдöн лöнялысь воййыв турун. Чунь йылöн öдва судза ляпкыдджык йывъясöдзыс.
Муна, воййывсö вешталiг. Крукася. Кок улын воймöм керъяс, сьöд сотчöм мыр. Абу. Абу мыр, а керка пельöсö сувтöдлöм сюръя. Коркö тан сулавлiсны керкаяс. Баксывлiсны зэр водзын ыжъяс. Кыалы воча шыасьлiс-кадавлiс зарни сорса петук. Сылöн йöлöгаыс дыр котралiс мöдлапöвса вöрöд пуысь пуö, пуысь пуö, кытчöдз эз вошлы-сывлы шондiлöн зарни югöръясын.
Пуö. Олöмыс пуö. Олысьыс мунö муö. Пуяс, йöз, пемöсъяс, ставыс водöны муö. Водöны чеччытöм вылö. Кок улын кос воййыв заяс. На улын муртса тöдчыштöны подув керъяс.
Керъяссö тайöс коркö увъя конда кодь мужик пöрöдiс яг шöрысь. Ымöстiсны пуяс, кор рутшка-ратшкакылiгтыр гыпкысис муö ниа. Чинталiс пуяссö мужик, бруткис вуж додь вылö. Öти лунöн кыпöдiсны керкасö. Вина-сура пызан сайын сиисны сё во овны месай-месаньлы, нэмыс сулавны — керкалы.
Дженьыд вöлöма керка нэмыс. Ещö на дженьыдджык олысьясыслöн. Подув кер вылö öнi оз нин ышмыны пучейяс. Вильснита. Сiсь керйысь чуктö болоньыс. Пытшкас дзувъялöны кодзувкотъяс. Тэрмасьöны дзебны виччысьтöм грöзысь, неминучаысь еджыд небыдик колькъяссö. Налöн олöмыс сэнi. Водзö олöмыс.
А вöлi öд тан и мöд олöм. Асывводз тайö бокшаöд лэччывлiсны кокни вöраса нывъяс. Сöстöм вала. Вежа вала. Зонпосни чилзiгтыр котöртлiсны, дöрöмъяс пöрччалiгмоз, öд вылысь мед бурскысьны ичöтик гобльöгö. Сёльгö ёль. Сёльгывлiс и сэки. Ворсöдчис изйысь петöм лапкор-чачаöн. Лэчча ёльлань. Гашкö, сiйö жö ордымöдыс, кытi лэччывлiс оз вом дора чöдлач синъяса нывка.
Берегсянь оз тыдавны керъяс. Оз тыдавны сьöд изъяс — важ горъя пачлöн колясъяс, важ олысьяслöн да оланiнъяслöн пасъяс. Нинöм абу гижöма на вылö. Да и мыйла? Ме и сiдз аддза найöс, кодъяс танi мыр бертлiсны, гöрлiсны. Кодъяс сьылiсны нор да гажа сьыланкывъяс. Кодъяс мусукасьлiсны да быдтысьлiсны танi.
А нимъяс... Мый меным нимъяссьыс. Кокниджык-ö лоö, тöдмала кö, мый дзор тошка нюкыльтчöм пöльöсö шулiсны эз Тюрööн, а Микулöн? Мый сирöд вужля кодь латшкöс мужикыс абу Кернöг, а Пöкей? Мый вала лэччысьыс абу Пыста, а Матрен? Мый сэтшöмыс нимыс? Вичко книгаын — вичко ним, а пармаыс да ёльыс ас ногыс пыртлiсны йöзöс. Мый меным öнi кöвъявлöм нимъяссьыс?
Лöнь. Оз кыв ни морт чукöстчöм, ни мöс бакöстöм. Сöмын пуяс шувгöны зумыша. Сöмын ёль чольгö мыш сайын. Сöмын воййыв туруна бокша водöма гöрд сыръя быгалöм чышъян моз. Эз-ö Пыста вала лэччигас уськöд сiйöс рыська пельпом вывсьыс?
Чöв олö бокша.
Назад в раздел
