Бипур

Уль резюв чискис, эз кöсйы öзйыны. Гöрöда кабыр нюжöдчис бипурлань, чöвтiс сюмöд турушка. Посньыдик увъяс саялiсны тшын пиö, косьмыштiсны, да битор быттьö яндысьöмöн дзигöдiс найöс. Недыр мысти сьöд тшын лöзöдiс, резюв шыбитiс би кывъяс да трачкöмöн кутiс ломтысьны.

Сой кыза ув вылын друг кыськö мыччысис кодзувкот. Гöрд. Ыджыд. Сiйö ружтöмöн кыскис мыш вылас руд пожöм лыс. Ув помын кодзувкотлысь туйсö потшис би. Кодзувкот вöрöдыштiс усъяснас, бергöдлыштiс юрнас. Сэсся котöртiс ув мöдар помö. Но сэн би ыпъялiс да нюлiс нин увсö гöгöрбок.

Кодзувкот шыбитчывлiс öтарö и мöдарö, но гöгöр ыргис би... Кодзувкотлы бергавны колис сöмын весьт кузя ин. Кытшъяс сылöн чинiсны и чинiсны. Би саридз босьтiс кок увсьыс дiторсö. Кодзувкот чöвтiс мыш вывсьыс руд пожöм лыссö да заводитiс бергавны дурпоп моз.

Пожöм лыс чишнитiс, сылöн биторйыс воис кодзувкотöдз. Кодзувкот ёкмыльтчис, пöрис ыпъялысь ув вылö да сьöдöдiс.
Ён дядьöлöн лолыс тырис бипур пöльтiгöн. Пуксис. Перйис зепсьыс «Астра». Нюжöдчис билань. Кыскис сэтысь ыпъялысь ув.  Пöльыштiс ув вылысь кодзувкот шой да пестiс чигаркасö.

Добра мудз мортлы бипурыд.

Назад в раздел