Ландыш
Адак шыже толеш шочмо мландыш –
Кеч-монат шкенжын жапше лийман...
Ыле ӱдырын лӱмжӧ Ландыш,
Ыле тудо пеледыш лӱман...
Шарнымашым нимо ок леведыс.
Пыртлан веле шинчам кумалтем –
Ончылнем пеледеш ош пеледыш,
Весела оҥгырлам рӱзалтен.
Конда угыч тора годсо шошым,
Угыч ныжылгын шӱмым туржеш.
Угыч ӱдыр эн волгыдын, ошын
Мый декем шулдыраҥын куржеш.
Но молан воктенем ыш чарналте?
Але мыйже шым мошто вучен?
Куштырак сӱан оҥгыр йоҥгалте,
Тугай лывырге,
сае,
чечен?
Ала тиде сӱан оҥгыр огыл? –
Мый лӱметым шарналтышымат,
Чодырасе пеледышын оҥгыр
Лӱҥгалтале яндарын, шыман.
Ну а мландыш...
Ош лум возеш мландыш...
Кеч-монат шкенжын жапше лийман...
Ыле ӱдырын лӱмжӧ Ландыш –
Ыле тудо пеледыш лӱман...
1986
Источник:
Mari-el.name
Назад в раздел
|