"Шӱмым айлыше тат-влак..."
Шӱмым айлыше тат-влак –
Ошын-ошын кунам
Лум йога пеш тыматлын,
Шӱлыш семын шыман.
Леведеш уло мландым.
Шып велеш да велеш –
Шкат ок пале моланжым...
Тыге просто кӱлеш.
Просто ты ош тӱняште
Ош лумлан лачак жап,
Да лушка ошкылмаште
Уло чон, уло кап.
Уш коштеш ала-кушто.
Тиде жап тудланат
Тугай нугыдо-куштылго
Иканаште – ӧрат!
Чыр огеш код ик лукышто –
Огеш кӱл тергымат:
Пӱтынь мландынак кумдыкыш
Лум велеш эр-касат.
Сӧра тудо пиалым.
Но тичмаш пиаллан
Айдем ӱмыр-идалык
Чӱдӧ пешак молан?
Чон гын тидым ок шоно.
Эркын лум велмыжат –
Эн чот вучымо омо,
Курым шуйышо тат.
Пуйто пелыгыч шелме
Тиде тат ден йырет.
...Ош лум велме покшелне
Кузерак тый илет?
Ушан-ныжыл мутетым
Кӧлан кызыт ойлет?
Кӧлан шокшо шӱметым
Кызыт тые пайлет?
Тый арале ты шокшым,
Ит шалатыл виеш –
Лум йоген чарнымеке,
Утыр йӱштӧ лиеш.
Ну а кызыт йырвашын
Лач мемнанак лӱмеш
Чонло мут гае рашын
Лум лумеш да лумеш...
Источник:
Mari-el.name
Назад в раздел
|