Лышташ-влак ужаргальыч, шаршудо ужаргале,
Сар шӱшпык чашкерлаште лым ок лий – шӱшка.
Куатым поген шуктыш, каваште чумыргале
Эн пӧрвӧ шошо йӱр – тугай лыжга, ласка.
Йӱк деч посна лупшале да озымым тарватыш,
Нур мучко куржын эртыш, рвезын тавалтен.
ӧндале нӧргӧ пызлым, шыма куэм авалтыш,
Куэже веселан лупша лышташлаж ден.
Каласкала шке ужмыжым, ойла ала-мом чокым,
Ала-кӧлан йӱд омыжым ок шылте – кутыра.
Тудат пала вет але вожылалме шотым –
Кузе чытет ош кап ден вожылде вара?
Векат, шке шӱм-чон денже шижын, пален налын
Йоҥгалтше майын тӱсшым, муро семжымат.
Вет май тугае ныжыл, май тугае салып,
Кузе ойлет тыгайлан: тудо винамат.
Ом ойло ӧпке мутым, нигӧм мый ом титакле,
Шкежат ужар май семын юарлен моднем.
Вет мый илем тӱняште – кодшо кыша-пале,
Шарналже тудым олык, ынже керт монден.
Нуреш кодем мый шкемым, нӧлташ нуршудо лийын,
Эр лупсын чинчыж семын йымыктен йӱлаш.
А мӱй пушан кеҥежым палаш саван тул вийжым,
Волгенче семын йолгышо тӱсшым ончалаш.
Саваже ок чамане, сава пӱчкеш чожикын –
Мый кӱпчык гае пушкыдо мландыш йӧралтам.
Тыге кодат тӱням еҥ-шамыч иктын-иктын,
Но нунын почешат ок пыте шудо там.
Ок пыте ужар олык, огеш йом шӱшпык муро,
Куэ ден пызлын капыштым йӱр мушкеш тугак.
Пӱртӱс гай курымашлык, ок пыте илыш-курым, –
Тек акым веле пуыжо у тукым шергынрак!..
1979
Назад в раздел
