Ужар ӱшык – кожла – шогылтеш гӱжланалын,
Кожла вуйышто кече модеш, пуйто ур.
Чодыра воктенак тымык ял верланалын,
Лӱмжым веле нур дене кылден – Аганур.
Лӱмыштак тудын кумылжо почмо – пашаче.
Кеч-кунам кече дечын ондак кынелеш.
Шке пиалжым тудат паша ден виса таче,
Пагыт дене пырля нойыде ошкылеш.
Корным ончыко йоҥгыдын, пеҥгыдын такыртыш,
Тӱсшымат калык вий сылнештен вашталта.
Ожно тудын воктенак илен, маныт, таргылтыш, –
Кызыт тиде шомак ньогамат воштылта...
Марий ял колыштеш патыр пагытын йӱкшым,
Да шкежат шыма семым шыман ешара.
Шой эҥер ужаш шоныш иктаж гына йӱксым? –
Таче модыт пырля йӱксӧ ден ӱжара.
Нунылан тыште чынжымак сае да эрык –
Чодыра тӱр марте плотина возылден.
Шке йымакше шылтен имне пукшымо верым,
Саде таргылтыш верым, пич купым, шылтен...
Лийын мутшо йомак гай йомартле
Одарын,
Шочмо ялже нерген йӧратен кутырен.
Таче йӱкшӧ, палем, эшеат чот одарын
Пеледалт кая ыле у пагыт нерген.
Такшым, илыш нерген муро сем огеш чарне –
Тудым сылнын, моштен тарватат земляк-влак.
Кузе тӱвыргӧ сад пеледаш огеш ярне,
Калыкат паша ден огеш ярне тугак.
Тӧр урем ден эрта тудо илыш озала,
Вуй ӱмбалныже кече модеш, пуйто ур...
Элем дене пырля тымык йӱдым возалын,
Тымык эрым моктен, кынелеш Аганур.
Источник:
Mari-el.name
Назад в раздел