Мӧҥгӧ корно

Чеверласыме корно олмешын
Лийже мӧҥгышкӧ толмо корнет –
Кӧ умбач ик гана кеч
толеш гын,
Чучеш шергын пеш калыкмутет:

«Кушто ме она ул, тушто сае...»
Сай деч сайым арам ит кычал –
Вет садикте ялт мӧҥгысӧ гае
Кумыл шокшо тылат ок логал.

Мылам палыме улыт южгорно,
Кӱртньыгорно да вӱдтолкынет.
Но ушем гыч нигушко ыш торло
Кеҥеж годсо кечан йолгорнет.

Ты йолгорно – чон кумылым лоҥшо –
Тул шижмашым шӱм лишке конда.
Тыге самырык ватын ош оҥжо
Пӧръеҥ кид ден улналын омда...

Кажнына ты йолгорно вошт эртыш
Шочмо сурт гыч
я мӧҥгӧ асун –
Да эре тунам вачыш эҥертыш
Уржавуй ден нелемше пасу.

Кӧ шарна дыр вес тӱсым, вес кидым.
Но кеч-кӧн икте лийын эре:
Лекме годым пыштен колтен киндым,
Суртын шӱлышым тушко йӧрен.

Таче корно моткоч кӱчыкемын:
Чуч шоналте – шукта Интернет.
Но садак ок вашталт нимо семын
Коржын моштышо мӧҥгӧ корнет.

2006

Источник:
Mari-el.name