«Паметь» циклысь
Гумла вылын лунтыр.
Из да кыскав войбыд.
Велавтöгыд киад
Пырö тырыс йики.
Шойччыштны кö артмас –
Пöрччысьны оз удит,
Усьö – быттьö кулöм
Кытчöсюрö усьö.
Вир-яй быттьö пуысь.
Сöмын унмыс пышйöм.
Чужанiныс ылын,
Дона Эстон муыс.
Думыштнытö полан:
Мый сэн вермис лоны,
Фашистъялöн киын,
Коньöр чужан муыс
Öнi налöн киын…
Мари месань шог жö.
Вышивайтчö. Узьтöг.
Ёрöм война мунöм
Оз тай петлы юрысь.
Россия, дерт, тöдö,
Кутшöм сiйö – мездыс,
Кодi эст му вылын
Сöмын во и вöлi.
Кутшöм гажтöм войяс!
Киыд ёнтö – дойöдз.
Ем кö эськö босьтны
Да кыскавны став кысö!
Юавнысö полö,
Мари кыв оз тöд на,
Ачыс йöзлöн гортын
Весиг ем оз вöрöд.
Сэсся другысь казьтiс:
Ичöт мари нывка
Вышивайтны кöсйис,
Мамыслы пыр долис:
«Имым пу, мен, мамöй!
Мамö, имым пу мен!»
Другысь вой шöр войнас:
- Авий, имам пу мен! –
Кылiс паччöр дорсянь.
Мари месань чуймис.
Эз-ö пельыс пöръяв?
Эст ныв ёна том на,
Ныв пыдди на туяс.
Мунiс нылыс дорö,
Копыртчис сы дорö,
Сывъялiс зэв ёна,
Окыштiс мам сямöн –
Сьöлöмыс мед бурмас.
Кыкнаныс та бöрын,
«Имам пу»-сö кылiг,
Серöктасны гора,
Ловлы весиг кокни.
Сывъясясны сэсся,
Пукаласны ды-ыр на,
Перъяласны йики,
Быттьö вышивайтан
Мари ног узоръяс.
Мунiс нылыс коркö,
Кöнi, мый – оз висьтась.
Вышивайтчысь бурджык
Сыысь абу мирас.
Юалас кö кодкö,
Велöдчöма кöнi,
Дерт жö, кöнкö, казьтас
Ассьыс «Имам пу»-сö.
Назад в раздел
