Поезд гиля-голя грымöдчöмöн вöрзис. Вочасöн лöнисны пассажиръяс, кодъяс сöмын на янсöдчисны колльöдчысьяскöд. Кодсюрö пыр на билетъяс серти корсисны ассьыныс пуксянін, мукöдыс вагон öшинь стеклö бердö ляскысьöмöн зiлисны медбöръяысь аддзывны перрон вывсянь чышъянъясöн да киясöн öвтысь тöдсасö, рöдвужсö. А менö, юркарö командировкаö волысьöс, некод эз колльöд. Та вöсна важöн нин пукалi билетын индöминын да видзöдалi вагонын öтлаын мунысьяс вылö, думысь корси сэтшöм мортöс, кодкöд эськö лöсялiс вирöй, мед сутки чöж рельсъяс вылын камöдчысь вагонын позис тöдмасьны да кад коллялiгмоз ньöжйöникöн варовитны, ворсыштны шахматöн да, мый да. А то öтнад сы мында каднад туй пöлöн быдмысь вöр вылад дзоргöмöн гажтöмысла тшаксялан.
Плацкартнöй вагонад йöзыд уна. Оз и дугдывны гызмасьны öтарö-мöдарö. Öтияс пырöны, мöдъяс петöны. Менам йöртöдын пукалiсны крукыля беддя пöль да сы арлыда жö пöч, тшук гозъя. Найö поезд вöрзьöдчöмкöд тшöтш лэпталiсны пызан вылö сёян-юан да пиньтöм вомъяснас кутiсны надзöник мутшкыны-сёйны. Шуйга бокын öта-мöдыслы паныдöн вöлiны кык ныв, найö дугдывтöг пыльсъялiсны-сералiсны, кыйкъялiсны öтарö-мöдарö, тыдалö, бöрйисны зонъясöс. Медбöрын орчча йöртöдысь том йöз казялiсны жö найöс да нуöдiсны картiасьны. А ме, пöрысь гозъялысь сёйöмсö видзöдiгмоз, артыштi, кымын во нин коли бöръяысь Мöскуаö волöмсянь. Артмис матö дас во. Сiйö кадсяньыс прамöя нин нитшсявны удитi. И со бара мöдöдлiсны недыр кежлö йöзсö видзöдлыны да ачымöс петкöдлыны. Öдйö тай и дышöдiс шума да няйт ыджыд карыд. Пыр и кыскыны мöдiс гортö, кöнi сынöдыс сöстöм, ывларуыс кöдзыдджык, да и йöзыс сибыдöсь.
Чеччи да видзöдлi вагон кузя öтарö-мöдарö. Пыр на думысь корси аслым туй дженьдöдысь ёртöс. Син улö уси салдат, кодi ки пöвнас шыбитiс вылi джаджйö чемодансö да мöдöдчис тамбурлань, тыдалö, куритчыны. Вöтчи сы бöрся. Салдат кыскис зепсьыс сигарет пачка, вомнас восьтiс, вомдорнас жö топöдiс пыркнитöм бöрын мыччысьысьяс пиысь öти сигарет. Вöлисти казялi, мый шуйга бушлат соскыс сылöн куш. Дзижкнитi зажигалкаöн да мыччи бисö: «Прикуривай, служивый». Салдат азыма кыскыштiс табак тшынсö, пуркнитiс тамбурлöн жугалöм стеклöа öшиньлань, гогнитiс юрнас, аттьö пö. Некымынысь чигаркасö нёньыштöм бöрын нин вочавидзис: «Был когда-то служивым».
И тайö кывъясыс быттьö кырыштiсны менсьым морöс пытшкöс, сэтшöм дона коми нога акцент кылiс наысь.
- Кытысь нö ачыд лоан? – пыр жö вуджи ме мам кыв вылö.
- Илля Шорысь, - чуймöмöн видзöдлiс ме вылö салдат.
- А ме Веждiнысь. Сергей, - нюжöдi сылы киöс тöдмасьöм могысь.
- Володя, - зон топыда жмитлiс менсьым киöс.
Вöлi сiйö ыджыд тушаа, паськыд пельпомъяса, рудов юрсиыс плеш дортiыс читкыльтчыштöма, быттьö мöс нюлыштöма, кельыдлöз сöдз синъяса, сöстöм чужöма. Пасйи аслым, мый татшöмъястö нывъясыд ёна радейтöны.
- Сойтö нö кытчö воштiн?
- Грозныйö коли.
- А-а, - довкнитi юрöн ме.
Сёрни кыдзкö кусiс. Меным эз вöв лöсьыд тайö юалöмсьыс, а Володя тшöтш чöв олiс.
Чигаркаяс кусöдiм да пырим вагонö. Вöзйи салдатлы вуджны менам йöртöдö сiйö пызан дорас, кöнi первойсö кык нылыд пукалiсны. Володя эз мöд петитчыны.
Матыстчис проводник, видлалiс билетъяс. Ме юалi сылысь, абу-ö мыйкö сур сямаыс, мед дженьдöдны кадсö. Тöда öд, мый налöн пыр лöсьöдöма пассажиръяслы вузалöм вылö быдторйыс. Недыр мысти пызан вылын сулалiсны нин сулеяяс. Володя босьтiс öтиöс, лыддис: «Тагъя сур. Сыктывкарса сур завод».
- Со öд, асланым вöлöма.
- Да, öнi вина-сурыд абу дефицит, - вочавидзи ме стöканъяс тырталiгмоз.
Лэптi туй вылö лöсьöдлöм кутшöмсюрö сёян, юим морт стöканöн. Бара пансис сёрни. Юасим-висьтасим. Вочасöн ёнджыкасö мöдiс сёрнитны салдат. Сылы, тöдöмысь, дыртö нин ас йöзыдкöд аддзысьлывтöгыд окота коминад сёрнитны лоöма, гажыс бырöма. Туяд öд абу сьöкыд тэкöд öтлаын веськалöм мортлы, кодöс таöдз некор на эн аддзыв, да и водзö вылö паныдасьлöм, дерт, оз жö ло, восьтны ассьыд сьöлöмтö, петкöдны сэтысь став чукöрмöм лёксö и бурсö. А та бöрын кыдзкö пыр жö кокньöдыштö. Артмö, быттьö поп водзын висьтасин. Ме сылöн сёрнитiгöн сöмын кадысь кадö юрöн довкйöдлi, дакайтi. Ачым öд висьтавнытö абу мастак, вот кывзынытö – мöд делö.
Боктiным мунiсны кык ныв, кодъяслöн помасьöма картiасьöмыд. Налы, буракö, эз ло лöсьыд вöтлыны миянöс да пуксисны водзöджык. Володя колльöдiс нывъясöс синъяснас да бергöдчис меланьö.
- Да, вöлi кад, кор ме нывъяссьыд эг жö öтдортчыв, та вöсна и киöс воштi.
Ме лöсьöдчи кывзыны салдатсянь интереснöй висьт, и эг ылав.
* * *
- Сэтшöмöн нин менам чужсьöма, мый ог вермы крукасьтöг прöйдитны мичаник нывъяс боктi, да и асьныс менö тшöтш радейтлiсны. Сиктын пыр вöлi йöз син водзын, зонъяс пиысь медводдзаяс лыдын. Ворсi гитараöн, гудöкöн. Быд гажöдчанiнын пыр колана морт. Нинöм йылысь эг думайтлы, олi, кыдз гаж. Нывъястö вежлалi чуня кепысь моз. Öтилöн, Маруся нимыс, пи быдмö месянь. Ылöдлi сiйöс да эновтi. Öнi эськö сы дорö... Но öд юръяндзим, шуас, первой пö тешитчин, а вермытöмö воин да бöжтö кок улад сюркнялöмöн бöр локтiн.
ДОСААФ пыр велöдчи шоперö, тайö ёна ковмис бöрвылас. Коркö армияын водительяслöн ордйысьöмын первой места босьтi. И веськалi генераллы син улас. Овыс Морозов, некор ог вунöд, нэм чöж юрын коляс. Босьтiс менö ас дорас. Чайтi, мый сiйöс новлöдлыны кута, а, вöлöмкö, сылы шопер колö дача вылас. Вайöдiсны менö сэтчö да быттьö райö веськалi.
Местаыс мича, джуджыд керöс вылын дачасö лэптöмаöсь, ылöдз ставыс тыдалö вöр-ваыс. Неылын горулын ю визувтö, гöгöрыс гажа пожöма яг. Чорыд туй вайöдö дачаöдзыс, да и гöгöрыс ставыс асфальт вöртiыс гуляйтöм вылö вольсалöмаöсь. Кытшалöма бетоннöй потшöсöн. Керкаыс кирпичысь, куим судта, сэтшöм манера, кутшöмöс тай «Богатые тоже плачут» сериалад петкöдлiсны. Му пытшкас пыдöдз жö кодйысьöмаöсь, дзик Гитлерлöн бункер кодьыс, гаражыс сэнi жö. Ме сiйö керкаас ачымöс няйт ёкмылькöд öткодялi. Деревнясьыд сэтшöминад веськалi да, дерт жö, рай кодьöн меным и кажитчис. Дача водзас бассейн. Вöчöмаöсь да ваыс вежсьö ачыс, пыр югыд, оз гудыртчы.
Меысь öприч нöшта вит салдатöс видзöны. А ковмас кö, телефон пыр позьö отсöг корны карса воинскöй частьысь. Весиг велöдчана тревогаяс нуöдлiсны, дас минутöн и воöны.
Сетiсны сьöд «Волга», медым новлöдлыны Морозовлысь гöтырсö – Светлана Сергеевнаöс. Неуна сы йылысь висьтышта.
Ар комын вита, но кажитчö томджыкöн. Зэв мича, том дырйиыс, дерт, нöшта на дзирда вöлi. Кутшöм платтьö пасьталас, сэтшöм сылы и мунö. Видзöдлан да дуль-ваыд войтыштас.
Службаыд, дерт, эз вöв сьöкыд, он öткодяв строевöй частяд мырсьöмкöд. Меным нöшта на уджыд сюрлiс машина дорад, а вот мукöд салдатыслы ёна гажтöм вöлi. Сöмын асфальтсö чышкöны гожöмнас, а тöвнас лым весалöны. Юöмысь ёна ковмис видзчысьны, тöдлас кö Морозовыд, пыр и туркнитас. Тайöс ме пыр и гöгöрвои, мыйöн вои, да ньöтчыд эг юлы, кöть вöлi гусьöникöн салдатъясыд и тыртчыласны. Мöд татшöм служитаніныд öд сэсся оз нин сюр.
Мöд салдат нöшта вöлi микроавтобусöн ветлöдлö, асывнас карысь вайö служанкаясöс да пусьысьöс, накöд тшöтш сёян-юан, пыр мед вöлi выль. Важмыштöмсö бöр нулывлiсны карас.
Меным ёнджыкасö лои ветлöдлыны пажын бöрын, генеральшаыд дыр узьö да. Лэччас столöвöйö, кор ставыс нин дась. Служанка сылы сöмын мыччалö, а сiйö нöшта и чиганитчö. Дерт, миянöс, салдатъястö, столöвöяд эз вердлыны. Ми кухняас бергалiм, но сёйим чöскыда. Пусьысьыд эз öбöдитлы ми воктö. Сёйöм бöрын Светлана Сергеевнаöс, кодöс шуткаöн нимтылiм «Боярыня Морозоваöн», нуöдлывлi карö, кöнi сiйö кытшовтлiс магазинъястi, ательеястi да парикмахерскöйястi. Пыравлiс тöдса офицер гöтыръяс дорö. А меным нö мый, кытчö шуас, сэтчö и нуа. Рытъяснас гöститны ветлывлiс. Налы öд нинöм сэсся вöчнысö. Майбыр, уджавны оз ков. Овлывлiсны и миян дача вылын войпукъяс, сэки вель уна гöсьт чукöрмывлiс. Нывбабаяс быдсямапöлöс кузь платтьöаöсь, сьылi гöгöрыс быдсöн зьвер куяс гартышталöмаöсь, мед сöмын öта-мöднысö парскыны паськöмнаныс. Мужикъяс жö фракъясаöсь. Ме некор татшöмтортö кино вылысь кындзи эг аддзыв да дивö кодь вöлi. Сэтшöм культурнöя заводитасны, а бöрас быдторйыс жö овлö, кыдзи и миян Комиад. Сэсся ми – шоперъяс, разöдалам коддзöмаяссö асъядорыс гортъясас.
Коркö öтчыд Боярыня Морозова ветлiс гöсьтитны карса кутшöмкö чин ордö. Прамöя «грузитчöмаöс» лои гортас вайöдны. Машинаын пыр вöлi гажа, сералiс, сьылыштавлiс, а воöм бöрын дзикöдз онишмунiс. Пыртi машинаöс гаражö. А гаражсяньыс öдзöс веськыда генераллöн узьлан комнатаö эм. Светлана Сергеевна сетiс ассьыс ридикюльсö, корсь пö ключсö, сэтi веськыда пыра. Машина öдзöссö восьтi, а Боярыня петнысö оз вермы. Ковмис меным отсавны. Кияс улын том нывбабаыдлöн вöсньыдик платтьö улад ставыс кылö. Надзöник кыски машинаысь, шуйга кисö шыбитi пельпом вылö, а веськыд киöн киняувтiыс босьтi, ки улö веськалiс небыд морöсыс. Став тушаöй сырмис, зэлалiс тайö здукас, лолöй сувтіс. Катöдi пос кузя вылыс судтаас, а сэнi öдзöсыс бара игана. Корси сумочкасьыс ключсö. Сюрис. Пыртi Морозоваöс узьланiнас, водтöдi вольпасяс. Крöватьыс паськыд, дзонь семья тöрас, а найö кыкöн узьлöны. Вылiас öшлöма вон сямаöс, зэв мича, ставыс узор. Но меным некор вöлi любуйтчыны налöн шойччанiнöн. Висьталi нин тай, мый ставыс менам зэлалöма, вот-вот пезьдас. Мыйöн крöвать вылас водтöдi Светлана Сергеевнаöс, сiйö сöмын ыджыда лолыштiс. А ме ньöжйöникöн нуöдi сы вывтi киясöн вылiсяньыс улiöдзыс да и ... грекö вöйи. Эг вермы кутны ачымöс. Бöрыннас, дерт, таысь каитчыны ковмис, а сэки геройöн ачымöс чайтi, быттьö подвиг вöчи. Дерт, татшöм мича аньсьыд кодлöн сьöлöмыс оз нöйтчыны кут...
Бöрыннас шебралi Светлана Сергеевнаöс, петi бокиса öдзöсöдыс, игналi. А ключыд ордам коли. Мый вöчны? Сiйöс öд кыдзкö бöр Боярынялы сумочкаас колö сюйны. И мöвпыштi сэки вöчны öдйö мöд ключ, мед сыöн нин игнавны öдзöссö, а Морозовалысь бöр местаас пуктыны. Гаражысь лöсялана кöрт торыд сюри, тискиö топöдi да и мастеритi сэтшöмöс жö.
Помалöм бöрас пыр жö видлi аслам ключöн восьтны öдзöссö, бура воссис. Сюйыштi Светлана Сергеевналы сумкаас ассьыс ключсö и петны нин кöсйи, но эг вермы кутчысьны, бара на матыстчи крöвать дорас. Шебрассö вештi..., и выльысь вирöй пузис. Сэтшöм мичаа куйлö Боярыня, киясыс вöльнöя шевкнитчöмаöсь, кудритöм еджыд юрсиыс паськалöма юрлöс вылас. Верман мöй татшöмтортö аддзöм бöрын асьтö кутны? Вот и ме эг вермы. Сэтчö и унмовссьöма.
Садьми, кор кодкö пельпомöд вöрзьöдiс. Синъясöс восьтi, видзöда да, Светлана Сергеевна ме вылö дзоргö, оз вермы гöгöрвоны нинöм. Эз тай ков плеть, чышкыштiс менö вольпась вывсьыд, быттьö эг и вöвлы сэнi. Повзьöмвывсьыд чепöсйыссис параднöй öдзöсöдыд, дерт, аддзылiсны. Тадзи и йöзасим.
Кыдзи сöмын воис генерал, пыр жö корис менö ас ордас. Пыри, чесьт сетi, мися, радöвöй Мингалёв тiян тшöктöм серти воис, а аслам пидзöсъясöй дзöрöны. Скöр пукалö Морозов, быдсöн чужöмыс муговмöма. Висьтав пö ставсö, мый вöлi тэнад менам гöтыркöд. Он кö, юртö керала. Стенас разнöй стариннöй ружьеяс да сабляяс öшалöны, збыль вермас скöрйывсьыд сöтыштны. Быть висьтав. Веськыда ставсö ме и крапкöбтi. Вот, мися, мыжа, генерал ёрт, öнi сэсся верманныд мекöд вöчны, мый кöсъянныд.
Ладнö, шуö, ме тэö ассьым киясöс няйтöсьтны ог кут, а мöдöда сэтшöминö, кöнi сэсся колян кö ловйöн, тэнад шуд, а он кö, сiдзи Господьыс шуöма. Но меным син улö та бöрын эн сюрöдчы, вермас лоны зэв лёктор, öнi нин пö муртса кутчыся. Видзöда да, чабыртöма пызан пöвъяссö кияснас, а чуньясыс едждöмаöсь быдсöн. Ог помнит, кыдзи и петi кабинетсьыс.
Бöрынджык тöдмалi, мый лоöма Боярынякöд. Тöдса салдаткöд паныдасьлi, кодкöд öтлаын вöлі дача вылад служитi, да сійö висьталiс. Корöма гöтырсö Морозовыд, зэв мелiа сёрнитöма, быттьö нинöм оз тöд.
- Светочка, кымын во нин ми öтлаын олам?
- Да дас во нин артмö, - вочавидзöма гöтырыс, а ачыс оз гöгöрво, мый водзö лоö.
- А помнитан, кутшöмöс ме тэнö босьтлi?
- Кысь нö вунöдан, бура помнита.
- А ме тэнсьыд сэкся паськöмтö пыр на видза. Ноко, мерайтлы, - и мыччö полиэтилен мешöк.
Пöрччис Боярыня ассьыс дона платтьöсö, кышалiс кыдзкö важ томдырся мисьтöминик донтöм паськöмсö.
- Öнi сэсся пöрччы вывсьыд зарнитö да эзысьтö.
Пöрччöма, пукталöма пызан вылас.
- Видзöдлы жö ас вылад.
Ыджыд рöмпöштанысь кор аддзöма асьсö, синва пырыс серамыс петöма. А генерал матыстчöма гöтырыс дорö, юрсиöдыс кутöма да öдзöсöдыс и тойыштöма кокньыдика.
- Кутшöмöн ме тэнö босьтлi, сэтшöмöн и бöр мун. Туй вылад сьöмтор пуктi, бать-мам дорöдзыд воан. Ме ылi деревняысь тэнö вайлi, чайтi, мый лоан вернöйöн, а тэ эн куж овнытö. Öнi ов, кыдз кужан.
* * *
Володя ланьтлiс, мыйкö визьйöдлыштiс пызан вылö пань воропöн, сэсся нуöдiс водзö:
- А менö сiйö жö луннас ыстiсны выльлаö. Буретш Чечняад кыптiс зыкыд и веськалi первойяяс лыдас, кодъясöс шыбитiсны Грозныйтö штурмуйтны. Чайтi, мый гуляйтöм кодь лоö, но артмис мöдарö. Збыльысь ад сэнi вöлi, насмукатö вöтлö. Крöшитiсны ми воктö капуста моз. Первой луннас жö и воштi сой пöлöс да аттьöалi Енмöс, мый ловйöн коли. Ас садьö вои госпитальын, ки пöла нин вöлi. И сэтшöм жаль ачым аслым лои, синваöй тюрöмöн тюрö. И кодлы ме öнi кола? Вот гортö муна, пöрысь ай-мам дорö, виччысьöны, кöнкö, мый воа да кокньöда налысь олöмсö, а мыйöн ме отсала? Кор ачымöс муртса справитны верма.
Володя нирснитiс ки мышнас син дорсьыс сöдзтысьöм войтсö да бара лöнис, чöла видзöдiс вагон öшинь сайын котöртысь серпас вылö.
- Но, тэ, детина, эн дзикöдз сьöлöмнад усь. Со кутшöм на том, олöмыд сöмын на заводитчö, - заводитлi ме такöдны сiйöс, но тшöкмунi салдатлöн сьöкыд видзöдлас улын.
- Кокни тiянлы тайöс шунытö, кор ставыс тыр-бур, а меным öд сöмын на неважöн кызь арöс тыри, а лоö кодлöнкö сьылi вылын нэм чöж öшавны. Локтöм йылысь весиг телеграмма эг сет, видзöдла ылiсянь ас чужанiн вылö и водзö тюра. Нинöмла старикъясöс бöрдöдны, мед оласны водзö, кыдзи олiсны, быттьö эз и вöв налöн пиыс. Да и йöзыслысь жалитöмсö терпитны тöданныд кутшöм лоö... Вот пö, шуасны, кутшöм морт вöлi, а коньöрöн лои. Ог, ме гортö ог лок! Кöнкö бокын мыйкö аскöд вöча.
Сёрни миян лöдсавтöм бипур моз кусi. Ме видзöдлi Володялöн томсянь водз пöрысьмöм чужöм вылö, казялi юрсьыс дзор сiяссö. Эз вöв окота выль сёрни заводитны Маруся йылысь, кодi, колöкö, пыр на виччысьö сiйöс, батьтöг быдмысь пи йывсьыс эг гарышт ни. Вель дыр олiм чöв, юим коляс сурсö.
* * *
Поезд сьöкыд кöлесаяснас грымöдчигтыр пыр водзö и водзö тюрис Коми му вывтi нин. Мöдiсны паныдасьлыны тöдса станция нимъяс.
- Регыд менам станцияöй, - торкис чöв-лöньсö Володя. – Менам керкаöй поездсяньыс тыдалö. Петала тамбурас да сэсянь бурджыка видзöдла, стеклöыс вагонас буса да лёка тыдалö.
Дыр кыссис тайö часыс. Медбöрын кольны жö кутiс. Володя чеччис, мöдöдчис вагон помлань. Недыр мысти ме вöтчи сы бöрся. Сулалыштiм ыркыдiнас да куритчыштiм. Медбöрын поезд надзмöдiс öдсö, сэсся и дзикöдз сувтiс. Проводник восьтiс öдзöс, ветьöкöн чышкалiс перилöяссö.
- Со миян керканым, - гусьöник шуыштiс Володя.
Но ме и ачым нин аддзи тайö пелькиник мича стрöйбасö, лöсьыда потшöм усадьбасö да дзиръя дорын сулалысь олöма нин гозъяöс. Батьыс Володя кодь жö ыджыд тушаа, паськыд пельпомъяс вылас плавгöма пупайка. Сiйö сулалiс потшöс сюръяö мыджсьöмöн, куритчис да видзöдалiс перрон вывтi жуысь йöзöс. Мамыс веськыд кисö синъяс весьтас лэптöмöн видзöдiс миянлань жö, шуйга киас кутiс рос.
А вагонö пыралiсны нин выль мунысьяс, найö броткисны миян вылö туй шöрын сулалöмысь. Со и вöрзис нин поезд, надзöникöн мöдiс вешйыны бöрлань Володялöн керкаыс.
Ме тайö кадö мый вынысь тойыштi салдатöс восьса на öдзöсöд, а бöрсяньыс шыбитi сылысь чемодансö, кодöс сыысь гусьöн петкöдлi тамбурö. Володя виччысьтöмысла муртса эз усь, кор воис перрон вылö, неуна котöртыштiс водзö, бергöдчылiс чуймöм чужöмнас мелань.
А керка дорсьыс пиыслань чепöсйисны нин батьыс, кодлöн пупайкаыс котöртiгас уси муас, да вежыньтчöм чужöма мамыс, кодi сiдзи эз и гöгöрво шыбитны кисьыс россö.
- Вот кодлы тэ колан, йöюк, - кывкöрталi ме.
Поезд тронулся. Постепенно успокоились разноголосо гомонящие пассажиры, только что расставшиеся с провожающими. Кто-то всё ещё искал указанное в билете место, кто-то, прижавшись лицом к вагонному стеклу, силился в последний раз увидеть своих родных и близких, машущих с перрона платками и руками. Меня же, приезжавшего в столицу в командировку, никто не провожал. Поэтому я давно уже сидел на своём законном месте и высматривал попутчика, с которым можно было бы побеседовать, сыграть в шахматы, одним словом, скоротать время, сидя в погромыхивающем на стыках рельсов вагоне. А то ведь одному, не перекинувшись ни с кем словечком, целые сутки таращить глаза на проплывающие мимо окон деревья довольно таки скучное занятие.
В плацкартном вагоне народу много, так и снуют туда-сюда, одни заходят, другие выходят. Напротив меня примостились старичок с бородкой и сухонькая старушка, оба с палочками, видно, супруги. Как только поезд тронулся, они сразу открыли свои сумки, вытащили на свет божий немудрёный харч и заставили работать свои беззубые челюсти. Слева на боковых сиденьях обосновались две молоденькие девушки, они, как воробьи, беспрестанно щебетали между собой, время от времени прерывая свою беседу заразительным смехом, при этом не забывая оглядываться по сторонам, видать, присматривали парней. Наконец группа молодых людей с соседнего купе увела их к себе играть в дурака. Я же, втихомолку наблюдая за жующей пожилой парой, прикидывал, сколько же лет прошло с тех пор, как я в последний раз побывал в Москве. Получалось никак не меньше десяти. За это время порядком успел мохом обрасти. И вот снова мне была предоставлена возможность за государственный счёт съездить в столицу, чтобы на людей посмотреть и себя показать. Быстро же, однако, надоел шумный и грязный большой город. Через пару дней уже стало тянуть обратно к себе на родину, где хотя климат и суровый, но зато люди спокойные.
Встал и оглядел вагон из конца в конец, всё ещё надеясь найти товарища, с которым совпали бы наши интересы. На глаза попался солдат, он одной рукой легко закинул на полку чемодан, а сам направился к тамбуру, видимо, покурить. Я последовал за ним. Солдат вытащил из кармана пачку сигарет, встряхнул, губами вынул одну сигарету, а пачку положил обратно в карман. Только сейчас я заметил, что левый рукав бушлата у него пустой. Я щёлкнул зажигалкой и протянул ему трепыхающийся огонёк: «Прикуривай, служивый». Солдат глубоко затянулся табачным дымом, пыхнул в сторону тамбурного окна с разбитым стеклом и кивнул в знак благодарности головой. Уже после нескольких затяжек он ответил мне как-то отрешённо: «Был когда-то служивым…»
Его ответ словно зазубренным ножом полоснул меня по сердцу, ведь такой милый и знакомый акцент душевной музыкой зазвучал в этих нескольких словах, который очень трудно, порой невозможно скрыть человеку, родившемуся и выросшему в коми деревне.
- Откуда сам-то будешь? – сразу же перешёл я на родной язык.
- С Ильяшора, - удивлённо взглянул на меня солдат.
- А я с Веждино. Сергей, будем знакомы, - и протянул ему свою руку.
- Володя, - парень сильно пожал мою ладонь.
Был он высокого роста, широкоплечий, русые волосы возле висков курчавились, будто корова языком лизнула, голубоглазый, с открытым чистым лицом. Тут же подумалось, что такие, должно быть, девушкам сильно нравятся.
- Руку-то где потерял?
- В Грозном оставил.
- Понятно, - кивнул я в ответ.
Разговор затух. Мне стало неудобно за свой нескромный вопрос, а Володя тоже молча курил.
Перекурили и вошли в вагон. Я предложил Володе перейти в моё купе и сесть на место двух девушек, которые ушли к парням играть в карты. Он согласился.
Подошёл проводник, проверил билеты. Я спросил у него, нет ли чего-нибудь горло промочить, знаю ведь, эти предприимчивые люди всегда кое-что имеют в запасе. Через некоторое время на столе уже красовались несколько бутылок пива. Володя взял одну и прочитал на этикетке: «Тагъя сур. Сыктывкарский пивзавод».
- Смотри, наше, оказывается.
- Да, теперь такой товар уже не дефицит, - заметил я, наполняя стаканы пенящимся напитком.
Поднял на стол приготовленную в дорогу кое-какую закуску, купленную в столице. Выпили по стакану слегка горчащего пива. Снова завязался разговор о том, о сём. Но постепенно инициатива перешла к солдату. Он, видно, уже сильно истосковался по родному языку, что без всяких расспросов, медленно потягивая пиво, стал рассказывать о себе. В пути нетрудно раскрыть всё самое сокровенное, что накопилось на сердце, излить горе совершенно незнакомому человеку, которого ты в первый раз видишь и больше никогда не встретишь, а на душе после этого становится легче. Получается то же самое, как будто исповедался в своих грехах перед священником. Так и с Володей. Я же только внимательно его слушал, время от времени согласно кивая головой. Сам ведь рассказывать не мастер, обидел меня бог красноречием.
Мимо нас прошли две девицы, отыгравшие в карты, покосились на нас, занявших их места, но ничего не сказали и, пройдя немного дальше, уселись на свободные места. Володя проводил их глазами и снова повернулся ко мне.
- Да, было время, я тоже не отворачивался от девочек, из-за этого и руку потерял.
Я приготовился услышать интересный рассказ и не обманулся в своих предположениях.
* * *
- Таким уж я уродился, видимо, что не могу пройти равнодушно мимо красивой девушки, да и сами они меня любили. В селе всегда был на виду, можно сказать, первый парень на деревне. Играл на гармошке, на гитаре, пел. На любой вечеринке самый желанный гость. Ни о чём тогда не думал, жил, как получится, девушек менял, как перчатки. У одной, зовут Марусей, даже сын от меня растёт. Обманул её и без всякого зазрения совести бросил. С радостью бы обратно к ней вернулся, да ведь не примет. Скажет, инвалидом стал, так теперь, как шкодливый пёс, заскулил, хвостом завилял и назад просишься...
Через ДОСААФ на шофёра выучился, это мне сильно помогло в дальнейшем. Проводили как-то соревнования водителей в армии, я там первый приз взял, ну и генералу на глаза попался. Морозов фамилия, век не забуду. Он меня к себе взял. Я-то думал, что самого возить буду, а, оказывается, ему шофёр был нужен для дачи. Как туда привезли меня, такое ощущение, ну, будто в рай попал.
Место чертовски красивое, на высоком берегу, чудесный пейзаж, далеко кругом видать. Недалеко внизу река плещется, вокруг сосновый бор простирается. Асфальтовая дорога к самой даче подходит, да и вокруг дачи тропинки для гуляний заасфальтированы. Вокруг участка высокий красивый бетонный забор, но, конечно, без колючей проволоки. Дом кирпичный, трёхэтажный, наподобие того дома, который показывали в сериале «Богатые тоже плачут». И в землю зарылись глубоко, подвал - как бункер Гитлера, гараж тоже там. Я как вошёл в этот дом, то почувствовал себя кусочком грязи, до того всё пышно обставлено. Из деревни ведь попал в такую обстановку и, конечно, показалось всё это мне раем. Перед дачей бассейн, вода меняется автоматически, всё время прозрачная, чистая.
Кроме меня, ещё пять солдат там службу проходили. А если понадобится, можно из части подмогу попросить по телефону. Даже учебные тревоги проводили, в течение десяти минут прибывали.
Посадили меня за руль чёрной «Волги», чтобы жену генерала Морозова – Светлану Сергеевну возить. Несколько слов о ней скажу.
Ей было лет тридцать пять, но на вид никогда столько не дашь. Такая видная, в молодости, наверно, была ослепительной. Любое платье ей идёт, какое ни оденет. Посмотришь – слюнки текут! Только успевай облизываться.
Служба моя, конечно, была не бей лежачего, не сравнишь со строевой частью. У меня хоть при машине постоянно работа была, уж я её так мыл и лизал, чтобы сверкала всё время, а другим солдатам на этой даче вообще делать было нечего. Целыми днями они то спали, то слонялись по территории туда-сюда. Летом асфальт подметали, а зимой снег чистили. За воротник закладывать надо было очень аккуратно, чуть что, генерал сразу менял состав на других солдат, благо у него в этом недостатка не было. Это я сразу усёк, поэтому ни разу у меня проступков не было. Очень жаль было бы потерять такое место службы.
Другой солдат, тоже водитель, ездил на микроавтобусе. Он привозил служанок и повара утром на работу, а вечером обратно отвозил. В его обязанности также входило подвозить продукты питания, чтобы всё было свежим. Если чуть просрочат, то тут же обратно увозят в город.
Генеральша до полудня валялась в постели, поэтому основная работа у меня начиналась с часу-двух. Она спускалась в столовую на всё готовенькое, тут уж служанка возле неё суетится, бегает, подаёт и уносит обратно. А та ещё нос воротит, трудно угодить ей. Нам – солдатам, конечно, в столовую путь был заказан, мы кормились на кухне. Но почти так же вкусно, как и господа. Повар нас не обижал. После обеда я обычно возил генеральшу, которую мы между собой называли «Боярыня Морозова», в город, где она обходила магазины, ателье, парикмахерские. Частенько заходила к жёнам офицеров. А мне-то что, куда прикажет, туда и везу. По вечерам в гости ездила, а чем ещё ей было заняться? Красота, работать не надо! Бывали и у Морозова на даче праздники, много народу собиралось. Женщины в самых ослепительных нарядах, с мехами на плечах, каждая норовит перещеголять других. Мужчины такие чопорные, во фраках. Я никогда раньше такого, кроме как в кино, не видывал, поэтому всё было в диковинку. Так культурно начинают, а затем как развезёт от горячительных напитков, тоже по-всякому бывает, как и у нас в коми деревне. Напоследок под утро уже мы – шофера развозим всех гостей по домам.
Однажды Боярыня Морозова была в гостях у какого-то городского чиновника. Довольно сильно «нагруженную» домой отвёз. Всю дорогу была в хорошем расположении духа, весёлая, смеялась, пела, а под конец её вовсе развезло. Завёл машину в гараж. А с гаража чёрный ход ведёт прямо в спальню генерала. Светлана Сергеевна дала мне свой ридикюль, мол, найди ключ от чёрного хода и она прямо в спальню поднимется. Открыл дверцу «Волги», а Боярыня сама выйти не в состоянии. Пришлось мне помочь ей в этом. Поддерживаю, а под руками ощущаю тело молодой красивой женщины, только слегка прикрытое тонким материалом шёлкового платья. Потихоньку вывел Светлану Сергеевну из машины, её левую руку набросил себе на плечи, а свою правую подсунул под мышками её правой руки, веду, а в ладонях у меня мягкие большие груди переливаются. Всё тело моё тогда напряглось до предела. Таким образом мы с ней поднялись на верхний этаж и остановились возле закрытой двери. Я поискал в ридикюле, нашёл нужный ключ, открыл замок и завёл Светлану Сергеевну в спальню, уложил в постель. Кровать широкая, целая семья может спокойно расположиться, а они вдвоём там спят, хотя чаще всего Боярыня одна. Ведь генерал частенько пропадает в командировках. Над постелью висит такой балдахин, типа нашего полога от комаров, очень красивый, весь в узорах. Но мне некогда было любоваться этими красотами, как говорил уже, всё тело было напряжено до такой степени, что вот-вот выстрелю. Как только уложил в постель Светлану Сергеевну, она только глубоко вздохнула, глаза уже закрыты, спит, как ребёнок. Я же медленно-медленно провёл руками по её телу с головы до ног, да и не сдержался, согрешил. Не смог удержать себя. Теперь, конечно, очень сильно раскаиваюсь за содеянное, бог меня за это жестоко наказал, а тогда чувствовал себя героем, как будто подвиг совершил. Конечно, у какого нормального мужчины сердце не забьётся при виде такой красавицы?
Накрыл Светлану Сергеевну одеялом, вышел и закрыл дверь ключом. А ключ-то у меня остался. Что делать? Ведь он должен лежать в сумочке Боярыни Морозовой. Задумал тогда я сделать новый, точно такой же, ключ Морозовой положить ей в ридикюль, а дубликатом закрыть снаружи дверь чёрного хода, чтобы всё было в ажуре и никто ничего не заподозрил. В гараже нашёл подходящую железку и смастерил другой ключ. Всё сделал, как надо. Попробовал своим ключом открыть и закрыть замок, работает отлично. Положил ключ Светлане Сергеевне в ридикюль и хотел уже выйти, но не удержался, дурак, подошёл к постели Боярыни, откинул одеяло… И снова кровь моя вскипела. Так красиво она лежит, светлые кудрявые волосы рассыпаны по всей подушке, руки раскинула, как будто просит: «Иди ко мне!» Разве после этого сможешь удержаться? Вот и я не смог. Там и уснул.
Проснулся оттого, что кто-то меня за плечо теребит. Глаза открыл, вижу, что Светлана Сергеевна на меня смотрит удивлённо, мол, откуда ты взялся такой? Как плетью меня вышибло с кровати. С перепугу вылетел через парадную дверь и, конечно, не остался незамеченным для прислуги.
Как только генерал приехал с командировки, сразу вызвал меня к себе. Зашёл, как положено, руку к козырьку, мол, рядовой Мингалёв по Вашему приказанию прибыл, а у самого коленки дробь выбивают. Сидит Морозов хмурый, брови сдвинул, смотрит на меня пронизывающим насквозь взглядом. Рассказывай, говорит, что у тебя было с моей женой. А врать будешь – голову отрублю! На стене у него целый арсенал разного старинного оружия от алебард до сабель развешан, запросто может со злости мою дурную башку отсечь. Никуда не денешься, всё рассказал без утайки. Виноват, говорю, товарищ генерал, теперь можете со мной сделать всё, что угодно.
Ладно, отвечает, я свои руки об тебя марать не буду, а направлю в такое место, где ты сможешь кровью искупить свою вину. Останешься жив – значит, так угодно Богу. А мне на глаза больше не попадайся, и так уже еле сдерживаюсь. Смотрю, а он вцепился руками в край стола, пальцы белые от напряжения. Я и не помню даже, как вышел из его кабинета.
Уже впоследствии узнал, что стало с Боярыней Морозовой. Встретился случайно со знакомым солдатом, с которым вместе на даче у генерала Морозова служил, вот он и поведал мне обо всём. Вызвал её к себе генерал, мило побеседовал, делая вид, что он ничего не знает. А в заключение разговора спрашивает:
- Светочка, а сколько лет мы с тобой вместе живём?
- Да уже десять лет, получается, - отвечает жена, сама ещё не понимая, к чему такие вопросы.
- А помнишь, какую я тебя взял?
- Конечно, разве такое забудется?
- А я твоё тогдашнее платье всё ещё храню, - и достаёт полиэтиленовый мешок. – Ну-ка, примерь.
Разделась Боярыня, кое-как напялила на себя тот невзрачный, бедный наряд, который когда-то украшал её в молодости.
- А теперь сними с себя всё золото и драгоценности.
Сняла украшения, положила на стол.
- Посмотри на себя в зеркало.
Та прямо захлебнулась от смеха, ведь себя в таком виде давно уже не видела.
А генерал подошёл к ней, взял за волосы и легонько выпихнул в дверь.
- Какой я тебя взял когда-то в дальней деревне, такой и возвращаю твоим родителям. Я думал, что ты станешь мне верной женой, но ты не оправдала моих надежд. На дорогу тебе я деньги положил, до дома доедешь. Живи, как хочешь!
* * *
Володя замолк, что-то начертил ложкой на столе, а затем продолжал:
- А меня в тот же день направили на новое место службы. Как раз тогда в Чечне завертелась мясорубка, я попал в число первых, кого бросили Грозный штурмовать. Все думали, что там будет лёгкая прогулка, вышло же совсем наоборот. Вот и ад же был, насморк моментом вышибает. Нашинковали нас там, как капусту. В первый же день я потерял руку, но остался жив. В сознание пришёл: лежу в госпитале, от руки только культяшка коротенькая осталась. И так жалко мне себя стало, слёзы прямо сами и текут, лежу и глаза потихоньку вытираю простыней. Кому теперь я такой нужен? Вот приеду домой к родителям, а чем я им помочь смогу, когда сам себя еле-еле справляю.
Володя быстро смахнул тыльной стороной ладони капельку с глаз и отвернулся к окну, стал смотреть на почти не меняющийся пейзаж.
- Ну, ты, парень, совсем-то уж не падай духом, ведь такой молодой, жизнь только начинается, - начал я неумело успокаивать солдата, но тут же осёкся, встретив его тяжёлый взгляд.
- Вам легко так говорить, когда всё при себе. Мне ведь только-только двадцать лет исполнилось, а придётся всю жизнь на чужой шее сидеть. О приезде даже телеграмму не дал, посмотрю из вагона на свой дом издали и дальше покачу. Незачем стариков расстраивать, пусть живут, как раньше жили, как будто и не было у них сына. Да и жалость людей не смогу перенести. Вот, скажут, каким здоровым уехал, а вернулся инвалидом. Нет, я домой не вернусь. Где-нибудь в чужой стороне кончу себя, и всё!
Разговор наш потух, как костёр, куда больше не подбрасывали дров. Я смотрел на рано постаревшее Володино лицо, заметил седину у висков. Не было желания заговорить о Марусе, которая, может, всё ещё ждёт его, о сыне, растущем без отца. Довольно долго сидели молча, каждый думая о своём, лениво потягивали пиво.
* * *
Поезд, погромыхивая тяжёлыми железными колёсами на стыках рельсов, катил уже по Коми земле. Всё чаще стали встречаться знакомые станции.
- Скоро моя станция, - прервал молчание Володя. Выйду в тамбур и оттуда погляжу на свой дом, он рядом со станцией, здесь стекло мутное, плохо видно.
Долго тянулся этот час. Но, наконец, и он истёк. Володя встал с места, пошёл в конец вагона и вышел в тамбур, где смешался с другими пассажирами, сходящими на этой станции. Некоторое время спустя я тоже присоединился к Володе. Но вот поезд замедлил ход, дал длинный гудок и с шипением остановился возле перрона. Проводница открыла дверь, опустила ступеньки, тряпочкой протёрла перила и вышла наружу.
- Вот мой дом, - тихонько произнёс Володя мне почти в самое ухо.
Но я уже и сам увидел аккуратный домик, приусадебный участок, огороженный добротным забором, отца с матерью возле калитки, с интересом разглядывающих выходящих из вагонов людей. Отец такого же высокого роста, как и Володя, на широкие плечи накинут ватник. Он стоял, опираясь на заборный столбик, рассеянно смотрел на снующих по перрону туда-сюда людей и спокойно курил. Мать, прикрыв правой рукой глаза от слепящих лучей солнца, держала в левой руке метёлку.
А в вагон заходили новые пассажиры, они недовольно ворчали на нас, стоящих на их пути. Вот уже поезд тронулся, потихоньку поплыл назад Володин родной дом с родителями.
В это время я изо всех сил толкнул солдата в открытую ещё дверь вагона, а следом выкинул его чемодан, который тайком вынес в тамбур. Володя от неожиданности еле-еле удержался, чтобы не упасть на асфальт, обернулся и посмотрел удивлённо на меня. А от дома к нему уже устремились отец, фуфайка с его плеч упала на землю, но он даже не обернулся, и мать с внезапно перекосившимся лицом с метёлкой в руке, которую она так и забыла бросить.
- Вот кому ты нужен, дурачок, - мысленно завершил я свой разговор с солдатом.
Назад в раздел
