Мам

Бандзибъяссьыд алöй кыа бердiс –
Арлыдыд со квайт дасöд нин вуджö.
Чужöм вылад парманымлöн серыс:
Уна вожа пулöн сэнi вуджöр.

Бöръя вынöдз зiльлiн ныв-пи вöсна, -
Томысянь öд дöва ним тэд колис.
Мудзöм синмыд ямöм ты кодь öнi,
Кодöс оз нин юктавны сöдз ёльяс.

Война кадö пыклiн тужа-нужа,
Тырмылiс тай сöткöмыс и ёрччöм.
Юрси сiад кынмöм еджыд пужйыс
Оз нин сывлы медъяр шондi водзын.

Тэысь мича мортыс абу некод.
Чой-вок нимсянь мамлы муöдз копыр.
Сöмын муса Рöдинаöс тэкöд
Öткодявлö том и верстьö войтыр.

Эз вöв кокни тэнад баба рöкыд, -
Со мый вöсна ручка вильдö кисьым.
Гижны меным тэ йылысь зэв сьöкыд,
Но не гижны – ещö сьöкыд висьöм.