Шуöм кывным муö усьö.
Сэсся рудзöг петас мусьыс.
Сэсся воöм бöрас сiйöс
изас коми мортлöн киыс.
Сэсся пöрысь коми пöчö
рудзöг пызьсьыс няньшом вöчас.
Сэсся, няньшомыс кö туяс, —
пöчö пöжалантор сюяс.
Сэсся, пачсьыс перйöм бöрын,
пуктас няньсö пызан шöрö.
Рудзöг няньсö пуктас сэсся
пельöсувса Енлы весиг.
Сэсся шойна вылö мöдас.
Сэнi куйлö вужйыс-рöдыс.
Налы рудзöг няньсö ваяс.
Кутас казьтывлыны найöс.
Накöд пукалыштöм бöрын,
гортас мöдас мир туй шöрöд.
Рудзöг няня пызан дорö
сиктса медбур йöзöс корас.
Гашкö, юасьтöг да кортöг
пырас пöрысь пöчö ордö
мортöс виысь, вина юысь,
ёрсьысь-керысь, лёк кыв шуысь.
Гашкö, Васа сэнi лоас.
Гашкö-й, Вöрса сэтчö воас.
Гашкö, восьса öдзöс пырыс
сэтчö Омöльыс тшöтш пырас.
Гашкö, татшöм гажлун дырйи
лоасны и багатыръяс.
Кума-кама, тарки-йирки
пырас Пера. Локтас Йиркап.
Локтысьяслы оз ло помыс.
Лоас пöрысьыс и томыс.
Тима Вень и Виттор Савин —
татчö чукöртчасны ставöн.
Ставныс тöрöдчасны найö
рудзöг няня пызан сайö.
Гашкö, пызан саяс сэнi
кодкö казьтыштас и менö.
Мед жö эськö рудзöг тусь моз
шуöм кывйöй муас усяс...
Мед жö нэмъяс мысти сiйöс
изас коми мортлöн киыс.
Назад в раздел
