Ворсысьяс:
ВАСЬКА ПЕТЫР — ар комын вита
АННА — сылöн гöтыр, сыкöд тшöтшъя кымын
НИКОЛАЙ ВАСИЛЬЕВИЧ — управляющöй, шöр арлыда
ÖНДРЕЙ — отделениеын уджалысь, ар комын вита, Сенька Людмилалöн пи
ЛАДИМЕР — отделениеын уджалысь, том зон
НИНА — Варов Катялöн внучка, дас кöкъямыс арöса
СЕНЬКА ЛЮДМИЛА — Петырлöн соседка, олöма нывбаба
ВАРОВ КАТЯ — Людмилакöд тшöтшъя кодь
ПЕРВОЙ ЮКÖН
Петкöдчöмыс мунö öнiя кадö, сиктын. Керка пытш. Тöдчö, мый овлöмаöсь гöлякодь. Стенын карточкаяс, весиг югыд бумага клеитöмаöсь мич вылö. Пельöсын öбраз. Пызан, лабич. Пельöсын джодждöра чукöр. Керка пытшкын Сенька Людмила да Варов Катя. Лöсьöдöны пызан вылö сёян-юан. Стенын кывъя часiыс оз мун. Пызан помö пуктöмаöсь чай тыра стöкан, шаньга. Тöдчö, мый кодкö кулöма. Пöжас-сёян тыра тасьтiясла вошлывлöны занавес сайö, кöнi, тыдалö, залавкаясыс, лöсьöдöм сёяныс.
СЕНЬКА ЛЮДМИЛА (гораа ышловзьö тасьтi вайигмоз). Со öд олан-олан, чеччан да кын. Парасьыдлы эськö эз на и уна вöв.
ВАРОВ КАТЯ (мунö занавес сайö и сэсянь). Мöйму сизимдас вит тырöмöн вöлi висьтасьö. Нэмöвöйся Парась жö нин миян вöлi.
СЕНЬКА ЛЮДМИЛА (лöсьöдыштö пызан вылö вайöмторсö). Абу на уна. Сизимдас витыд.
ВАРОВ КАТЯ (локтö). Сэсся öд кутшöм удачаыд лоö. Парасьыд лекарствотö вöлi семечкиöс моз нин килльö. Чуман тыр лöсьöдöма вöлi.
СЕНЬКА ЛЮДМИЛА (пуксьылö). Кöть тай кутшöм он ло, пыр овнытö окота. Менö мукöддырйиыс юр висьöм топöдлас да ставыс мустöм лолö. Кокньöдыштас кор неуна, то гöгöрбок мича.
ВАРОВ КАТЯ (бöр саймовтчö). Висьö жö нин вöлi Парасьыд. Вежон сайын видлыны волi да вуджöр кодь нин вöлi куйлö (бöр локтö стöканъяс вайигмоз). Нылыс, Нинаыс, со кыдзи талун бöрдiс. Бöръя каднас сiйö гежöда нин волывлiс мам дорас. Волi кö тшöкыдджыка, колöкö, мамыс дырджык на олiс. Ныв да внук-внучка вылö любуйтчöмыс нюжöдыштiс на нэмсö. Öнiтö бöрд кöть эн нин...
СЕНЬКА ЛЮДМИЛА. Некодлöн волытöгыд да видзöдлытöгыд сьöкыд жö сылы. Дивъя и кулi. Ва мыччысьыд кор эз вöв. Тэ со öнi лöвтан, а öд эн жö ёнасö пыравлы.
ВАРОВ КАТЯ (дöзмыштö). Яндысь покончасьыс. Кыдзи эг? Тэ дорысь тшöкыдджыка на пыравлывлi.
СЕНЬКА ЛЮДМИЛА (öзйö жö). Ме дорысь эськö эн на тшöкыдджыка да.
ВАРОВ КАТЯ (öвсьыштö). Со тэ кутшöм! Не кö ме, эськö и колльöднысö нинöмöн вöлi. Асывбыд пуси-пöжаси. Со тай пызан тырыс.
СЕНЬКА ЛЮДМИЛА (дэльöдö). Пöжасьöмыд тай. Аддзöмыд ошйысянтор. Вит шаньгатö пöжалöмыд да.
Найö кöсйöны нин вуджны ыджыд гöлöс вылö, но пырöны Ладимер да Öндрей. Öндрей сувтыштлö порог дорас, видзöдö мам вылас. Ладимер воськовтö пызан дорöдз.
ЛАДИМЕР (шмоньлива). Лок, Öндрей, пыр. Кокным кузь на. Абу на некод локтöма.
ВАРОВ КАТЯ (Ладимерлы). Тi нö клубö локтанныд али нимлун сёйны? Öд мортöс гуалiнныд. Гигзянныд сэнi!
ЛАДИМЕР. Мый сэсся лимзавны?
ВАРОВ КАТЯ. Бöрдны али абу, тiян делö. Но öд оз жö ков сералöмöн пырны.
ÖНДРЕЙ (воськовтö). А кодi миянлы Парасьыс?
СЕНЬКА ЛЮДМИЛА. Кыдзи кодi? Нэмсö орччöн олiс.
ЛАДИМЕР. Орччöн эськö да.
ÖНДРЕЙ (дорйысьö). Ме тай нинöм сы йылысь лёксö эг шу. Корисны тай да гусö кодйыны волi.
ЛАДИМЕР. Кымын кулысьлы пö гу кодъян, сымында öшиня и лоö мöдаръюгыдас керкаыд. Ме ас пайысь нёльöс нин кодйи.
ÖНДРЕЙ (пуксьö). Менам, сiдзкö, öшинь сермунöма нин сэтчöс керкаыс. Менö виччысьö.
СЕНЬКА ЛЮДМИЛА. Сэсся öд тэныд юны оз жö ков локны. Мода вылас пукышт да и мун.
ÖНДРЕЙ. Пукышта, дерт. Сiдз öд, Ладимер?
ЛАДИМЕР (тапкöдö сылы пельпомас). Сiдз, другö, сiдз. (Видзöдö öшиньö.) Со Васька Петыр Аннаыскöд локтöны. Öндрей бöрся мамыс кутас кыйöдчыны, мед оз уна ю. Петыр бöрся Аннукыс. Вот добраыд меным лоас. Киöд кутысь некод абу. Сюрыштас и юны. (Вашъялö.)
ВАРОВ КАТЯ. Дугды, колöкö, Ладимер. Эн öд, мися, нимлун сёйны лок.
Пырöны Васька Петыр да Анна. Васька Петыр сувтыштлö порог дорö. Видзöдö став вылас. Бергöдчылö бöрвылас сулалысь Анналань.
ЛАДИМЕР. Парась тьöтка, прöстит, вöлi кö мыйкö миян костын лёкыс.
АННА (чышкыштö жö син доръяссö). Мыйлакö тай кулан мортыд.
ПЕТЫР. Вежаньöй, лок миян дорö, лок. Варовитыштам. Мый тэныд вöлi не овнысö кöть нин нöшта во дас. Мед кö нылыд карын. Керка со эм. Картупельтö ачыд на пуктiн. Пестö эськö вайи тöв кежлад. Поткöдлi и тэчи. А тэ со кулiн, вежанюшкоöй менам. Сё зöлöтаöй. Öнi сэсся некод нин менö оз кут тэнад кодь пöсь шаньганад вердны. Ог нин видлы и тэнсьыд сöчöнтö. Со öд шогыс миян кутшöм (Юö. Мукöдыс тшöтш. Быдöн сёйöны).
Васька Петыр друг чеччö да петö. Аннаыс сы бöрся.
ВАРОВ КАТЯ. Нормис дзикöдз мортыс. Да, вежаньтö гуалöмыд, вежань гуалöм на и эм.
АННА. Помнита, кыдзи Петыр первойысьсö гажа юрöн гортö локтiс. Пырис да шатовмунiс. Сэтшöма гöрдöдiс, мый лун-мöд яндзимысла синсö дзебис, кыв он пычкы ни.
СЕНЬКА ЛЮДМИЛА. А мастерлуныс кутшöм вöлi. Куш чер помысь вöлi кöть пызан вöчас.
АННА (ышловзьö). Сiйö öд и тшыкöдiс. Мый нö? Эз али мый? Кодкö кö стрöитчö, сiйöс тай и чукöстöны. Сьöм вöлi оз босьт. Винатö юыштлiс дай. Сэсся тай вина гагйыд шашаритчис.
СЕНЬКА ЛЮДМИЛА. Ме дорö кö мыйкö вöчны локтасны да сьöм оз босьтны, дерт жö, вина ковмас мыччыны. Йöзсяньыс абу лöсьыд. Шуасьны кутасны. Казачитöм кодь лоö.
АННА. Эн нин сёрнитöй. Сiдз тай и менам Петырыд торксис.
ВАРОВ КАТЯ. Вомас öд эз жö кисьтавны. Ачыс юис.
СЕНЬКА ЛЮДМИЛА. Тэ, Катя, вай ланьт. Пыр мыйкö крукасьны видзöдан.
ВАРОВ КАТЯ. Ог крукась. Абу мöй сiдзи? Ки-кок кöрталöмöн некодлы на вомас эз кисьтлыны.
Пырö Николай Васильевич.
НИКОЛАЙ ВАСИЛЬЕВИЧ (пуксьö). А ме татчö со кутшöм могöн вои.
СЕНЬКА ЛЮДМИЛА. Кутшöм мог нö?
НИКОЛАЙ ВАСИЛЬЕВИЧ. Парасьлöн нылыс керкасö миянлы, совхозлы, пес вылö вузалiс. Сы вöсна вай тэрмасьыштöй.
ВАРОВ КАТЯ. Кыдзи тэрмасьыштöй? Мый нö войнас али мый кутан косявны?
НИКОЛАЙ ВАСИЛЬЕВИЧ (коса). Ог шу, мый войнас. А аски-аскомысь кутам разьны.
СЕНЬКА ЛЮДМИЛА. Он жö öд аски-аскомысь? Дзик пестöмöсь али мый? Гожöм со пуксьö. Он öд гожöмнас конторатö ломтöй.
ВАРОВ КАТЯ. Нелямын лунсö öд танi вöчны лэдзан жö. Ас керкасяньыс жö Парасьсö сэк мöдöдам.
НИКОЛАЙ ВАСИЛЬЕВИЧ (чеччö). Некутшöм нелямын лун йылысь сёрни оз ло. Аски-аскомысь кутам косявны.
СЕНЬКА ЛЮДМИЛА. Дивö тай шуан. Покончасьыс яндысь.
НИКОЛАЙ ВАСИЛЬЕВИЧ. Парасьыдлы öнi дзик нин веськодь. Кöть кытысянь колльöдöй. Шуим косявны и ставыс. Тайö керка местаас детсад зымöбтам. Асьныд жö зыньганныд, мый челядьсö некытöн видзны. Важ детсадыслöн со йиркыс усьö.
ВАРОВ КАТЯ. Сiдз эськö да.
НИКОЛАЙ ВАСИЛЬЕВИЧ (гöгöрбок видзöдлö). Петкöдöй, мый шогмана. И мед сэсся бöрас эн шуасьöй, мый став добрасö пузувтiм.
СЕНЬКА ЛЮДМИЛА. Парасьыс эськö меным джодждöрасö колис да.
ВАРОВ КАТЯ. Мед эз. Сiйöс Анналы сетны вöлi шуö. Öнтай тайöс висьтавны и ывлаас петкöдлiс. Зэв тай колысь.
СЕНЬКА ЛЮДМИЛА. Меным нö мый эськö колис? Эсiйö снимокъяссö öд ог гортö катöд.
НИКОЛАЙ ВАСИЛЬЕВИЧ. Но-о. Сэсся и нинöм абу вöснаыс зыкö воинныд.
ВАРОВ КАТЯ. Мый аддзан, сiйöс и босьт. А джодждöрасö эн вöрзьöд. Сiйö Анналöн.
СЕНЬКА ЛЮДМИЛА. Сараяс кö мыйкö абу. (Петö.)
Кылö сьылöм. Сьылö Васька Петыр. Сöмын öти пöлöс сьылан «Кыдз садöк пиын кай». Сьылö лёкногöн горзöмöн. Пырö Васька Петыр, бöрсяньыс вöтчö Анна. Петыр коддзöма.
АННА (сiйöс кутiгмоз). Кытчö нö пыран? Лок мунам, вод.
ПЕТЫР (нетшкысьö). Ог. Час ме эсiйö, сё петукъясыслы, петкöдла. (Аддзö управляющöйöс, повзьыштö быдöн, сувтö.)
НИКОЛАЙ ВАСИЛЬЕВИЧ. Тэ тай бара тöкаритöмыд?
ПЕТЫР (юрсö öшöдö). Да, неуна юыштi, Николай Васильевич.
НИКОЛАЙ ВАСИЛЬЕВИЧ. Неуна тай. Кок йылад он сулав да.
ПЕТЫР (нюмдö). Мый тэ, Николай Васильевич. Да ме öти плака кузя на мунны верма.
НИКОЛАЙ ВАСИЛЬЕВИЧ. Мед гортад усйысьöма. Öнi жö.
ПЕТЫР (зiльö воськовтны бурджыка. Сувтыштлö). Со видзöдлы, Николай Васильевич, код абу. Дзик садь.
НИКОЛАЙ ВАСИЛЬЕВИЧ (скöра). Тырмас тшöкöлдывайтнытö. Он кö дзик пыр жö вош менам син водзысь, аски жö тодмышкала.
ПЕТЫР. Абу, мися, код. Муна дзик пыр жö. (Петö.)
АННА. Пасибö, Николай Васильевич.
НИКОЛАЙ ВАСИЛЬЕВИЧ. Оз кö аски пет, збыльысь вöтла. Тырмас сiйöс видзны.
АННА (косакодь). Петас, петас. Ме садьмöда, вöтла удж вылас. (Петö.)
Пырö Сенька Людмила.
СЕНЬКА ЛЮДМИЛА. Нинöм эз и сюр.
ВАРОВ КАТЯ. Мый морсö нö сэтысь корсин? Мый вöлi, ставсö нин нылыс нуис.
СЕНЬКА ЛЮДМИЛА (пуксьö). Дивö тай. Косявны нин керкасö кöсйöны.
ВАРОВ КАТЯ. Кöсйöны тай. (Пуксьö жö.) Мыйсяма йöз лоины? Бур олöмысла асьнысö оз тöдны, кытчö воштыны...
Ывласянь бара кылö лёкгоршöн сьылöм «Кыдз садöк пиын кай». Пырö Васька Петыр. Сы бöрся Ладимер да Öндрей.
ВАРОВ КАТЯ. Ланьт! Вежаньсьыд яндысь!
ПЕТЫР (сьöкыдпырысь чеччö). Кодысь?! Вежаньысь? (Босьтö покончалы вылö лöсьöдöм штопкасö да öдйö юö). Мед эськö рöдвуж пöвстсьыд быд вежöн кодкö кулiс. Сэк эськö пыр позис дармöвöй вина юны. Гы-гы-гы! (Шатовтчö да пуксьö. Ставöн шай-паймунöмаöсь. Ладимер да Öндрей зырыштчöны лёкысь Петырлань, но нывбабаяс кутöны).
ЛАДИМЕР. Мый тэ шуин?! Петыр, мый шуин?!
ÖНДРЕЙ. Косьöбта кыз пель бокад таысь.
ВАРОВ КАТЯ. Абу тай яндзимыд, Петыр.
ПЕТЫР (лэптылö юрсö, öдва сёрнитö нин). И тэ, Катя, мед коктö нюжöдiн. Тэнад гöбöчад дозйыд уна чукöрмöма. Вежон позьö юны. Гы-гы-гы!
СЕНЬКА ЛЮДМИЛА (шлапкöдчö). Дивö тай! Та выйöдз воан мортыд.
ВАРОВ КАТЯ (син дорсö чышкалö). Менам кулöм вылö радлö. Мисьтöм чужöм.
Васька Петыр пöрö джоджö. Аннаыс кöсйö лэптыны, но оз вермы. Некод оз отсав.
АННА. Юр яндзим тай! Юр яндзим тай! (Чужöмсö тупкöмöн пуксьö лабичö. Сэсся чеччö да бöрдiгтыр петö ывлаö. Сенька Людмила вöтчö сы бöрся.)
ВАРОВ КАТЯ (скöра). Гажтöм меным гортын öтнамлы. Думайтанныд, мый ме тiянлысь бызгöмтö кывза? Мед ог. Гажтöм! Помнитан, кыдзи дзик первойысьсö тэ, Öндрей, пырин ме ордö винаыдла?
ÖНДРЕЙ. Ог. Кысь нö помнита.
ВАРОВ КАТЯ. Нёль во сайын вöлi да кысь помнитан. Тэ тöрытъясö вунöдiн нин да. А ме помнита.
Босьтi сэки öти доз, гашкö, мися, пес вайысьлы ковмас. А тэ казялiн ньöбöмсö. Рытнас горт шöрöдз пырин. Джоджсö кыкысь и воськовтiн да пызан дорö шлапкысин. Вай пö винатö вузав. А меным рыт колльыны некодкöд. Час джын первой юаси тэнад олöм-вылöм йылысь. Ставсö брольöдiн, гöтыртö дивитiн.
ЛАДИМЕР (серöктö). Вот и талун сусед гозъясö няйтöн резöма.
ÖНДРЕЙ. Энлы, Ладимер, буракö, управляющöй локтö. Сылöн гöлöсыс.
Ладимер джöм сувтö. Видзöдö гöгöрбок. Сэсся уськöдчö занавес сайö.
ЛАДИМЕР (мыччысьлö). Лок, Öндрей, татчö. (Варов Катялы.) Тэ бара эн миянöс явит.
Öндрей да Ладимер саймовтчöны. Пырö Николай Васильевич.
НИКОЛАЙ ВАСИЛЬЕВИЧ (гöгöрбок гоннялö). Ставныс нин мунiсны?
ВАРОВ КАТЯ. Кодъяс?
НИКОЛАЙ ВАСИЛЬЕВИЧ. Пьяник чукöрыс.
ВАРОВ КАТЯ (тшöтш гоннялö). Синтöм али мый? (Индö Васька Петыр вылö.) Со тай морт куйлö.
НИКОЛАЙ ВАСИЛЬЕВИЧ (видзöдлö). Кутшöм морт? Васька Петыр да.
Васька Петыр кыпöдчö, скöра видзöдö управляющöй вылö.
ПЕТЫР. Мый тэ шуин? Ме абу морт?
НИКОЛАЙ ВАСИЛЬЕВИЧ (веськодя). Абу, дерт. (Сэсся скöра.) Ме тэныд мый шулi. Мун гортад.
ПЕТЫР. Ме абу морт?.. Васька Петыр абу мöрт? (Зырыштчö управляющöйлань). Ме абу морт!
НИКОЛАЙ ВАСИЛЬЕВИЧ. Аски сёрнитны кутам. Видзöдлам, мый кутан сьывны. Палялан да. (Петö.)
ВАРОВ КАТЯ (Петырлы). Мый нö пузин? Збыльысь кö вöтлас? Кытчö сэсся мунан? Сиктад öд совхозысь öприч некытчö.
ПЕТЫР. Мед кö вöтлас. (Весиг палялыштöма скöрмöмысла.) Менö мортöн нин оз лыддььыны. Тэ, гашкö, Катя тьöт, он жö да?
ВАРОВ КАТЯ. Мыйысь тэнö мортнас лыддьыны. Сэтшöма öнтай менö дöзмöдiн да.
ПЕТЫР. У-уп... Пöдтö. Лолöй печатайтчас, буракö. Ёнджыка лои даръясьöма. Катя тьöт, тэ нö чеччин жö нин?
ВАРОВ КАТЯ. Эг на водлы. Тэ öд рытъя унмаыс. Мукöддырйиыс луннас весигтö бöрöзда бокын сурган-узян.
ПЕТЫР. Пöдтö! Лолавны ог вермы. Тöдiн кö эськö, Катя тьöт, кутшöм сьöкыд. Мортöн со оз лыддьыны весиг.
Ладимер да Öндрей петöны занавес сайысь.
ÖНДРЕЙ. Тэныд эськö пель бокад лöсыштны. Ставсö дзугин. Со, Катя тьöт тэ вöсна миян вылö лöгасис.
ПЕТЫР (оз кывзы, ассьыс дольö). Ме абу морт? (Видзöдö Ладимер да Öндрей вылö). Тi йöз, а ме, сiдзкö, абу морт.
ЛАДИМЕР. Ланьт нин. Кутiн сэнi дольны. (Пуксьöдö мырдöн-сорöн Петырöс. Ciйö оз водзсась. Шемöса пукалö.)
Пырö Нина. Сiйö дженьыдик юбкаа, баситчöма-краситчöма. Ладимер эновтö Петырöс да сюся видзöдö ныв вылö. Öндрей веськодя шеныштö кинас.
НИНА. Видза оланныд. (Варов Катялы.) Ме, бабö, тэ ордö кежи, а некод абу. Индiсны со, мый тэ танi.
Мужичöйяс, Васька Петырысь öтдор, чолöмасьöны.
ВАРОВ КАТЯ (уськöдчö Ниналань). Нинук али мый? Тэ али мый?
НИНА (кутлö). Ме, ме, бабö.
ВАРОВ КАТЯ. Дивö тай. Кылöм ни тöдöм.
НИНА. Эз мöй папö письмöсö гиж. (Шензьö.) Но-о. Ссылкаö ыстiс, а ачыс абу и гижöма.
ВАРОВ КАТЯ. Гижлiс, гижлiс. Но öд ме эг на чайт, мый татшöм öдйö локтан. Тöрыт на письмöыс сöмын воис да.
НИНА (видзöдлö мукöд вылас). Тайö нö кодъяс?
ВАРОВ КАТЯ (Öндрей вылö индö). Тайö Öндрей. (Индö Ладимер вылö.) Тайö Ладимер. Да тэ сiйöс помнитан. Кор тай ичöтдырйиыд тöвся каникул дырйиыд волiн, сiйö тэнö ёна даддьöн кыскавлiс. Он мöй помнит?
НИНА (шензьö). Вова. Тэ али мый? Со кутшöм тэ лоöмыд! Абу и ас кодьыд. А ме тэнö ёна казьтывлi.
ЛАДИМЕР (небыда). А ме тэнö сэки, гожся каникул дырйи, ёна виччыси. Тэ эн и лок.
НИНА. Папö эз лэдз. Нинöм пö сиктас вöчны.
ЛАДИМЕР. Мöд гожöмнас виччыси и.
ВАРОВ КАТЯ. Тэ öд, Нинук, сэсся эн и волы баб ордад. Ме карад унаысь лэччывла. А тэ эн и волы.
НИНА (видзöдö Васька Петыр вылö). А тайö дедыс кодi?
ВАРОВ КАТЯ. Кутшöм дед? Тайö жö дядя Петяыд. Он мöй помнит. Кодi тай тэныд пуысь чачö вöчлiс.
НИНА. Чачö? А-а. Да, да. Сiйöс ме воштi. Збыль öмöй тайö дядя Петя. Татшöм пöрысьыс?
ПЕТЫР (чеччö лабичысь). Нинук али мый? Сiдзкö, тэ помнитан чачöсö? Помнитан? Кöсъян, ме тэныд öнi выльöс вöча. Воштiн кö. Час, пöвтор корся. (Петö.)
НИНА. Кутшöма пöрысьмöма.
ÖНДРЕЙ (кыскыштö Ладимерöс). Вай мунам, а то и миянöс пöрысьöн шуас. (Ладимер пыксьö. Тыр синмöн видзöдö Нина вылö.)
ВАРОВ КАТЯ (Öндрейлы да Ладимерлы). Öнтай управляющöй висьталiс, мый Парасьыдлысь керкасö косявны кутасны. Аски либö аскомысь. Мый колö, босьтöй татысь да нуöй. Вошас добраыс. Кöть эськö нинöм абу да.
ЛАДИМЕР. Меным нинöм оз ков.
ВАРОВ КАТЯ (индö джодждöра вылö). Сiдзкö, петкöд тайöс Петыръясö. Парасьыс Анналы тшöктiс сетны.
Öндрей то öтитор босьтлас, то мöдтор. Ладимер босьтö джодждöра чукöр, виччысьö ёртсö.
НИНА (век на шензьö). Бабö, тайö дядя Петя, кодi тай туй саяс олö. Öнi локтiгöн сэнi кутшöмкö нывбаба вöлi лёкысь бöрдö.
ВАРОВ КАТЯ. Да. Туй саяс и эм керкаыс. Аннаыс али мый лёкысьсö бöрдö?
НИНА. Ог тöд кодi. Анна али Марья. Кодкö тай бöрдö вöлi лыддьöдлöмöн-а.
Пырö Васька Петыр. Киас пöвтор. Саймовтчылö занавес сайö. Петкöдö пурт. Пуксьö лабичö.
ПЕТЫР (заводитö вöлавны). Час, ме тэныд здукöн чачöсö вöча. (Вöлалö. Пуртыс то оз сатш, то вильснитö. Сiйö оз казяв, кыдзи ставöн мунöны. Водзö вöлалö. Оз сяммы. Разялö кизьяссö. Бара босьтчö). Вöча чачöсö. Сэкся дорсьыс мичаджыкöс. Васька Петыр абу морт? (Вöлалö, но нинöм оз артмы. Шыбитö пуртсö).
Пырö Анна.
АННА (скöра бöрдö). Яндысьтöм бугыль. Муртса челядьсö эн ви.
ПЕТЫР (чеччö). Мый? Кутшöм челядь? Кодöс эг ви? Муртса?
АННА. Вина вöсна муртса челядьсö эн кольмöд. Тэрмасян горштö тыртны. Пачсö бура ваймöдтöг пöдлалöмыд! Мед оз пайкны, уськöдчöмыд! Эг кö гортö пет, то челядьыс чадас и кольмисны. Яндысьтöм бугыль!
ПЕТЫР. Мый? Кольмисны? Челядь кольмисны?! (Уськöдчö, петö. Анна сы бöрся.)
Недыр мысти пырö Варов Катя. Сiйö видзöдö ен ув пельöсö, кытысь кодкö босьтöма нин öбразсö.
ВАРОВ КАТЯ. Кöсйи енсö гортö петкöдны. А кодкö удитöма босьтны. Кодi нö öбразсö петкöдic? Нина? Öндрей? Петыр? Сенька Людмила? Управляющöй? Ладимер, гашкö? Кодлы ciйö ковмöма? Енмыс!
ЗАНАВЕС
МÖД ЮКÖН
Петкöдчöмыс мунö ывла вылын. Сулалö скамья. Парасьлысь керкасö косялöмаöсь. Сы местаö брусысь панöмаöсь выльöс. Керка вевтöдзыс кольöма öти судта. Асыв. Мыччысьö Васька Петыр. Скöр чужöма. Гöгöрбок кытшовтö стрöйбасö. Сы гöгöр брусъяс.
ПЕТЫР (горзö). Сё петукъяс! Но, сё петукъяс! Бара на абуöсь! Лун шöр кадöдз оз убöлитны локны. Час, воласны! Ме налы петкöдла пуж! (Пуксьылö, звирк чеччö да водзö горзö.) Сё петукъяс! Некод на абу! Бара öтнамлы ковмас.
Локтö Анна.
АННА. Петыр, мый сикт пасьталаыс бара горзан?
ПЕТЫР. Горзытöг ог ов! Некод абу да!
АННА. Сэсся горзыны колö.
ПЕТЫР (сы вылö уськöдчö). Челядьыд садьмисны нин! Вердны колö! Ме тшыг и!
АННА (вешйыштö). Эн горзы. Час, пыра да чöвта сёянсö. Пусис нин кöнкö.
ПЕТЫР. Ставныд öткодьöсь. Нюжмасянныд. Век мырдöн тшöктыны колö. (Анна мунö.)
Локтö Сенька Людмила. Аддзö Петырлысь скöр чужöмсö.
СЕНЬКА ЛЮДМИЛА. Мый нö лоис?
ПЕТЫР (бара кытшовтö стрöйбасö). Мый лоис?! Мый лоис?! Нинöм эз ло. Зарадка вöча со.
СЕНЬКА ЛЮДМИЛА (матыстчö керкалань). Зарадкатö öд горзытöг вöчöны. (Тапкöдö керъяссö.) Мыйкö тай керъясыс сьöдöдны нин кутöмаöсь. Тöлысь сайö, буди, лэптанныд нин?
ПЕТЫР (пуксьö кер вылас). Оз лэдзны да. Пыр öтарö-мöдарö котрöдлöны. Детсадсö öд челядь виччысьöны. Налы öд овны кöнкö колö.
СЕНЬКА ЛЮДМИЛА. Татшöм чом кодь керкатö позис нин лэптыны. Водзтi вöлi чомöр вöчам, да и кыпалас.
ПЕТЫР. Сiйö водзтi. Öнi со кутшöма тiльсям строительнöй бригадаад. Арöдзыс оз эшты. Челядьсö кытöн видзны кутасны?
СЕНЬКА ЛЮДМИЛА. Öндрей да Ладимер помсьыд, он, дерт, öддзöдчы. Керка дорсьыд бурджык вина стöкан кыпöдасны.
ПЕТЫР. Вежон эз нин юны. Гашкö, тöрыт. Тöлысьыс öд заводитчис. Талон сетаkiсны вина вылад.
АННАЛÖН ГÖЛÖС. Петя, лок сёй. Кöдзалас шыдыс!
СЕНЬКА ЛЮДМИЛА. Пыр, Петя, нуръясь. Лунтыр кертö ковмас тэчлыны. Сёйтöгыд оз кыпавны.
Петыр пырö. Людмила тьöт öтнасöн кытшовтö стрöйбасö, тапкöдö керъяссö. Локтöны Öндрей да
Ладимер. Öндрей неуна гажа нин. Мыйкö йöткалö мöдсö.
ЛАДИМЕР. Людмила тьöт, Васька Петырыс нö эз на мыччысьлы?
СЕНЬКА ЛЮДМИЛА. Петалiс нин. Сёйны пырис.
ÖНДРЕЙ (серöктö). Öнi сылöн вытьыс ыджыд. Öтиторйысь пола: тшöгас да паськöмыс оз кут тöрны. Выльöс ковмас ньöбны. Вот на рöскодыд.
Мыччысьö Васька Петыр. Кылö Öндрейлысь бöръя кывъяссö.
ПЕТЫР. Эн шогсьы. Тэнсьыд сьöмтö ог кор.
ÖНДРЕЙ. Первой чолöмась.
ПЕТЫР. Чолöм, сiдзкö. (Киасьö Öндрейкöд да Ладимеркöд.) Мый нö та дыра? Лун шöрыс суас.
ÖНДРЕЙ (гылыда нюмдö. Кыскö зепсьыс стеклö мыськалан доз). Эн тэрмась. Первой öддзöдсö видлам, а то пакталас. Петыр, пырав да мыйкö сёйны петкöд.
ПЕТЫР. Тiян делö. (Горöдö.) Анна, вай няньтор да нöшта мыйкö...
АННАЛÖН ГÖЛÖС. Эн мöй пöт?
ПЕТЫР (горöдö). Вай шуöны!
Локтö Анна, киас нянь да картупель тыра блюд.
АННА. Мый нö друг ковмис?
ПЕТЫР (юрнас довкнитö Öндрейлань). Оз меным. Эсiйöяслы.
АННА. Тöдi кö эськö, эг вай...
Васька Петыр кытшовтö стрöйбасö, юрсö катлöдлö.
ПЕТЫР. Та кыза кернад вöдитчыны öтнам ог вермы. Мый и вöчны? Детсадсö öд колö кыпöдны. Кöнi нö челядьыс овны кутасны? Талун эськö, бурногöн кö, матичсö нин позис пуктыны.
АННА. Колöкö, ме отсышта...
ПЕТЫР. Нöшта мый? Сювйыд вöсни.
АННА. Збыль öд верма. Йöймöдчин сэт. Детсад вöснаыс.
ПЕТЫР. Тэтöг нин кыдзкö. Со управляющöй локтö. Сыкöд и тöлкуйтам.
Матыстчö Николай Васильевич.
НИКОЛАЙ ВАСИЛЬЕВИЧ. Чолöм гозъялы! Думайтi, мый танi удж пуö. А танi, вöлöм, мусукасьöны.
ПЕТЫР. Сiйöс и коли вöчны. Öтнам öд ог вермы керсö тажъявны. Тэ öд он жö кутчысь кер помас.
НИКОЛАЙ ВАСИЛЬЕВИЧ (видзöдлö гöгöрбок). Кöнöсь нö удал зонъясыс? Öндрейыс да Ладимерыс кöнöсь?
ПЕТЫР. Кытчöкö тай мунiсны-а.
НИКОЛАЙ ВАСИЛЬЕВИЧ (нюммунö). Но-но-о... Тэ вылö, Петыр, Öндрей войдöрлун мыйкö каттьысьö вöлi. Ог пö вермы тэкöд уджавнысö.
ПЕТЫР. Ме сыкöд ог жö.
АННА (Петырлы). Петя, эн тадзисö.
ПЕТЫР. Тэ кö пырин, бурджык вöлi (Анна вöляысь мунö).
НИКОЛАЙ ВАСИЛЬЕВИЧ. Мый нö, асывсяньыс зi чушкис али мый?
ПЕТЫР. Тшöкöлдывайтöм дорсьыд кö эськö татчö унджык йöзöс ыстiн, бурджык вöлi да. Тэ сöмын падмöдан. Детсадсö öд эштöдны колö. А тэ со вежон чöж кежлö миянöс карта дзоньтавны ыстiн.
НИКОЛАЙ ВАСИЛЬЕВИЧ. Скöт картасö öд ремонтируйтны жö колö. Кывзы, Петыр, мый тэ дурмин тайö детсаднас? Весиг со Öндрейсö да Ладимерсö дзерöдан.
ПЕТЫР. Найöс дзерöдан! Мед он. Накöд мöй верман öдйö уджавны!?
НИКОЛАЙ ВАСИЛЬЕВИЧ (нюммунö). Но, мужикъяс пöвстас эз кут уджавсьыны. Сiдзкö, бабаяс дiнö мун. Мöс лысьтыны.
ПЕТЫР (скöрысь). Ог морав. Менам местаыс танi. Детсад дорас. Сiйöс эштöдöм бöрын кöть кытчö муна. Весиг доярöн.
НИКОЛАЙ ВАСИЛЬЕВИЧ. Но бур. Сёрни уна, сёрнитны некор. Меным колö на гоз-мöдлаö кежавны. Петыр, тэ верман талун шойччыны. Оз жö нин Öндрейыс да Ладимерыс локны-а. Ме накöд мöдлаын варовита. Кутасны лун и вой уджавны. Кöсйöны кö быттьö совхозас кольччыны. Шойччы, Петыр (аддзö локтысь Аннаöс). Анна, кылан, мый Петырыд детсадсö эштöдöм бöрын кöсйö вöчны?
АННА (сувтыштлö). Мый нин сэтшöмсö?
НИКОЛАЙ ВАСИЛЬЕВИЧ. Доярöн пö лоа. (Мунö.)
АННА. Эн сöр. Петя, температуритiс али мый?
ПЕТЫР (скöра). Видлам и дояравны...
АННА (шлапнитö кинас). Дивö тай. Он жö дояравны кут. Мöсъяс дорö?
ПЕТЫР. Тэныд кутшöм шог таысь? Кöть кытчö муна.
АННА. Мый тэкöд, Петя, йöйталан сэнi.
ПЕТЫР (кутлö гöтырсö). Нинöм, нинöм. Колö уджсö вежны. А управляющöй дояравны шуис. Лёксö песö. А ме скöрйывсьыд кöсйыси. Öнi бöр косны ог кут. Тэ менö тöдан. Со тайö детсадсö стрöита и муна.
АННА. Но тэ челядь йывсьыд думыштлы. Найöс öд эльтны кыкнаннысö мöдасны. Забеднö лоас налы.
ПЕТЫР (вешйыштö). Мый нö, тэ думысь, меным бара юны заводитны? Сэки найöс нинöмöн эз эльтлыны?
АННА (шемöсмö). Да ме ог тшöкты юны. Ог. Ачыд мöвпышт. Верстьö мужик, а мöсъясöс кутан лысьтыны. Налысь нёньсö везйöдлыны. Этша мöй сиктас нывбабаыс? Дзикöдз бöръя каднас дурмин тайö детсадйöн. Гортад уджыс эндiс.
ПЕТЫР. Нинöм, дэльöдыштасны да дугдасны.
АННА. Но öд оз жö сэсся ков тадзи дурмыны. Öти дум сöмын öнi тэнад. Тайö стрöйба дорас дась узьлыны. Йöйталан сэнi. Сiдз нин йöзыс жеръялöны да. (Мунö.)
НИНА (сувтö). Петя дядь.
ПЕТЫР (чöвтö брус помсö). Мый нö?
НИНА (пуксьö брус вылö). Сiдз, нинöм. Муна со вöлi, кытчö кок нуас. Талун öд ме карö нин лэччыны думайтi.
ПЕТЫР (тшöтш пуксьö). Мый нö, танi оз овсьы али мый?
НИНА. Гажтöмкодь. Кывзы, Петя дядь, мый тэ водз асывсянь сёр рытöдз пыр танi?
ПЕТЫР (öвтыштö кинас). И тэнсьыд синтö вежа.
НИНА. Менсьым нö мыйла вежан? Сiдз юала.
ПЕТЫР. Детсад öд танi лоö. Челядь кутасны овны. Дзик со менам öшинь улын моз. Тэ бурджык висьтав, кыдзи сэн, карас? Оз на бастуйтны? Öнi тайöн уналаын посйысьöны.
НИНА. Оз на. Тi со, сиктсаяс, буракö, во дас сайö бастуйтанныд нин-а.
ПЕТЫР (ырсмунö). Ми? Эг на думайтлöй.
НИНА. Мыйла эськö йöв ни яй абу? Уджаланныд кö öд, эм. Гусьöнмоз пыр бастуйтанныд быттьö.
ПЕТЫР (вежö сёрнисö). Ме тай ас пайысь уджала-а. Кывзы, Нина, мыйла тэ та дыра баб дiнад эн волы? Батьыд со оз жö мыччысьлы и. Во кызь, буди, эз нин танi вöв-а.
НИНА. Папö и оз лэдз татчö. Нинöм пö сэнi, тьöмöяс, сьöд пемыд йöз дорас гартчыны. А ме сэтшöма кöсйи. Кор тай öтчыд, ичöтдырйи волi, сэксянь пыр кöсйи. (Ышловзьö.) Абу колöма öнi и волынысö. Абу колöма.
ПЕТЫР (чеччö весиг). Мыйла?
НИНА (жугыля). Паплöн сиктыс меным век вöлi югыд шондi кодь, кодi вот-вот мыччысяс да шонтас сьöлöмöс. Гашкö и лапкор кодь, кодi кыскö тöрöшитчысь дойсö. Карсаяс пöвстас сэтшöм шог вöлi мукöддырйиыс овны. А дум вылö усяс тiян сиктыд, и кокнялö сьöлöм вылын. Эмöсь, мися, йöз, авъяöсь да югыдöсь. Ме öд ставнытö, кодöс сэкнад, каникул дырйиыд, аддзывлi, помнитi. И тэнö, и Воваöс, и... ставнытö. Сэтшöм шаньöсь тi сэк ме дорö вöлiнныд. Тэ со чачö вöчин. Вова даддьöн кыскавлiс, эбöс быртöдзыс. Абу, абу колöма волынысö.
ПЕТЫР. Вежсим али мый? Лёкöсь али мый лоим?
НИНА. Асьныд мöй он казялöй. Öнi, тöдан, кутшöм сьöлöмöн татысь муна. Абу сэсся, мырддисны менсьым донаторсö, тiян мича бур йöза сикт йылысь казьтылöмсö. Öнiяыс кутас син водзын пыр сулавны. А сiйö и вежöртö оз ловзьöд, и сьöлöмтö оз шонты. Важсö со öдйö кисьтам, Парась баблысь керкасö моз. А выльсö со мый дыра кыпöдам. Тайö детсадсö моз. Да оз на и артмы.
ПЕТЫР. Дугды вай, Нина. Збыльысь öмöй ми сэтшöм лёкöсь лоим. Колöкö, челядь синмöн сэк лёксö эн казяв да.
НИНА (чеччö). Челядьыд лёктö бурджыка аддзöны. Эз, эз вöв сэки лёкыс.
ПЕТЫР. Тэ тай менсьым дзикöдз сьöлöмöс уськöдiн. Мыйла и висьталiн?
НИНА. Да тэ и ачыд аддзан жö. Прöста асьтö ышöдан, он кöсйы вöлi сьöлöм пырыд лэдзны. Мыйла бара папöй татчö, баб дiнö, ыстiс ссылкаас-а?
ПЕТЫР. Кутшöм ссылкаö? Мыйысь?
НИНА (вежсьö, лоö збойджыкöн). Эм мыйысь. Менö вежыштны кöсйис. Эштöма нин. Ог вежсьы и ог кöсйы.
ПЕТЫР (шензьö). Мыйкö тэ, Нина, тешкодясян талун. Нинöм ог гöгöрво.
НИНА (кöсйö сiйöс кутлыштны). Топöда кö да окышта, гöгöрвоан сэк. (Öвсьö.) Но ме муна сэсся. Колöкö, баб кö абу, бöр на татi кута мунны да. (Мунö, бергöдчылö.) А тэ Людмила пöчлысь юав. Сiйö тöдö ставсö.
ПЕТЫР (öтнас). Нинöм ог гöгöрво. (Бара босьтчö брусö, оз вермы кыпöдны.) Тьпу-у! Колö талун матичсö пуктыны. Колö! (Думыштчö.) Час, ме моль бöж колльöдысьяс дорö ветла. Гашкö, гоз-мöд мужик отсыштасны. Мынтыся кö. Ассьым сьöмсö сета кö. (Öдйö мунö.)
Кост.
ПЕТЫР (вомгорулас ропкö). Некод öд эз и кöсйы отсыштнысö. Трасичаяс! (Аддзö Ладимерöс.) Мый нö, Ладимер, жугыльтчöмыд?
ЛАДИМЕР. Жугыльтчана делöыс да.
ПЕТЫР (тапнитö пельпомас). Водз на тэныд майшасьнысö. Том на.
ЛАДИМЕР. Петыр, тэ вай висьтав, кокни абу ютöгыс?
ПЕТЫР. Шензя, кыдзи пывсьöм бöрын морт, кодi тай дивуйтчö, кытчö воши мудзыс.
ЛАДИМЕР. Кыдзкö тэ гöгöрвотöма сёрнитан. (Петыр пуксьö.)
ПЕТЫР. Выльöн быттьö, мися, чужи...
ЛАДИМЕР. А абу гажтöм? Меным тай нö зэв гажтöм ютöгыс.
ПЕТЫР. Юигад öд торъя гаж оз жö кöвъясь.
ЛАДИМЕР. Сiдз эськö да. Но век жö олöмсö вежыштан. А сiдзсö, ютöгыд, öти пöлöс сьыланкыв сяма лоö.
ПЕТЫР (сюся видзöдö залö). Мыйкö быттьö вежсьыштöмыд тэ. Мыйкö лоис али мый?
ЛАДИМЕР (довкнитö юрнас). Нинöм сэтшöмыс эз ло. Сiдз, ассьым думъясöс песа. (Чеччö.) Оз öд Öндрейыд талун лок. Дзик код мунiс.
ПЕТЫР. Мед шкоргö. Кывзы, Ладимер, а тэ нылöс лöсьöд. Гажтöмыд сыкöд оз босьт.
ЛАДИМЕР. Ас сиктса дорад кыдзкö сьöлöм оз кыскы. Ичöтсянь ставнысö тöда ли мый да сiйöн. Сiдз бызгыштны позьö, а вот сьöлöмöн ог вермы накöд. Бокысь воöмкöд кö, мöд сёрни. Дзик кор тöдтöм. Со тай Варов Катялöн Нинаыс воис, да пыр жö и сьöлöм вöрзис. Сiдзсö öд абу синмад шыбитчана. Миян сиктын басöкджыкöсь эмöсь.
ПЕТЫР. Сiдзкö, сыкöд и лöсяв водзö.
ЛАДИМЕР (вежö сёрнисö). Тэ, кывлi, доярö кöсъян мунны, кор детсадсö помалам?
ПЕТЫР (скöрмыштö). Со нин сиктыс ставнас тöдö.
ЛАДИМЕР. Ог и тöд весиг, кодi висьталiс. Кодкö эськö юöртiс да. Збыль мöй?
ПЕТЫР (чеччö, ветлöдлыштö). А кытчö воштысьнысö? Кöсйыси да. Менам эськö мöд думъяс юрын жуöны да. Шуам, петасны кö тайö детсадсö водзö лэптыны пöдрад серти, кутчысян он?
ЛАДИМЕР. Сiдзсö эськö бурджык да. Öнi сöмын лунсö лотам. Сетасны кö пöдрад, ме эськö босьтчи.
ПЕТЫР. А Öндрей?
ЛАДИМЕР. Сiйö öдвакö, сылы мед сöмын мыйкö мынтыштасны-а. Пöдраднад öд синсьыд би петмöн колö уджавны. Но öд оз сет управыд.
ПЕТЫР. А оз кö, то ме доярöн уджышта да кута ачымöс управö вöзйыны. Öнi со уналаын тадзи вöчöны. Йöзыс мед бöрйисны-а. (Тайö шуалiгас локтö Сенька Людмила. Кылö да сувтö.) Тэ эськö, Ладимер, лэптан он китö, мед ме лои?
ЛАДИМЕР. Мыйла ог. Кыкнан киöс на лэпта. (Казялö Сенька Людмилаöс, ланьтö.)
ПЕТЫР (казялö жö сiйöс). Тэ, Людмила тьöт, танi пукышт, мед дзикöдз оз киссьы стрöйбаыс дыр сулалiгас. Ладимеркöд час öти кузьджык кер ваям матич вылö, кодöс дасьтiм. (Кыскыштö зонмöс.) Лок. (Мунöны. Локтö Анна.)
АННА (Сенька Людмилалы). Со кутшöм мича луныс. Сё майбыр.
СЕНЬКА ЛЮДМИЛА (пуксьö скамья вылö. Анна сулалан кольö). Тэ том ичмонь кодь лоöмыд.
АННА. Сэтшöмкодь и эм. Быттьö Петякöд выльысь гижсим да олöм тэчны босьтчим.
СЕНЬКА ЛЮДМИЛА (вашкöдö). Эз на видлы?
АННА. Эз. Мед оз жö вомдзась. Некыдзи ог на эскы. Весиг вöтö уськöдчылö код юраöн. Брöд пöсялöмöн садьма.
СЕНЬКА ЛЮДМИЛА. Кыдз нö öвсис?
АННА. Сэкинад. Парась гуалöм бöрын. Асывнас чеччи, дзоньнас тiралö. Лёкгоршöн горзö, мый сiйöс управляющöй мортöн абу лыддьöма. Сэсся вель дыр чöла пукалiс, пукалiс да шуис, мый чöвта пö юöмсö. Мися, дугды сёрнитнытö, быд пöкмелля пöжигöн тайöс долян. Збыльысь пö кöсъя. Муртса пö челядьöс со эг кольмöд кувтöдз.
СЕНЬКА ЛЮДМИЛА. Кöсъясны кö тай, ас кокнаныс мунны вермöны жö. Дугдынысö, мися, шуа.
АННА. Ме öд весиг öнi на ог эскы. А öд лолавнысö весиг кокньыдджык лои. И челядьным сы дiнö жмитчыны кутiсны. Сё майбыр эськö да...
СЕНЬКА ЛЮДМИЛА. Лöсьыд, сiдзкö, овнытö лои.
АННА (ышловзьö). Лöсьыднадтö лöсьыд. Но дышджык лои. Водзтi, юигас, сулея юрсö кö вöлi мыччан, мусö и васö бергöдас. Котöрöн вöчö. Да и оз на быдторйö кутчысь.
СЕНЬКА ЛЮДМИЛА (нюмъёвтö). Сiдзкö, мед бара юны босьтчас.
АННА (повзьö). Ен мед видзас. Но оз кö кут горт гöгöр нинöм вöчны, то ковмас видны босьтчыны. Öнi тай ог на-а. Йöймöдчöма детсаднас да. Асьсö оз тöд, кытчö воштыны да сiйöн буди.
СЕНЬКА ЛЮДМИЛА. Сiйö мый на. Öнтай локтiгöн кылi, кыдзи Ладимерлы висьталiс, мый управляющöйö асьсö кöсйö вöзйыны. Кытчö бара сюйсьö-а. Кымын вылын мортыд пукалö, сымын ёнджыка усигад дойман. Да и абу вежалана удж управляющöйлöн. Увсянь и вывсянь зыртчыны кутасны. Ставныс мыйкö корны босьтчасны. Ме думысь, лоны кö, то медся ыджыд чина мортöн, мед тэысь вылын некод нин абу. Либö сьöд удж вöчысьöн. Сылысь оз жö ёна уна корны.
АННА. Меным, збыльысь кö, веськодь, кодöн сiйö кöсйö лоны. Кöть черöн ветлöдлас, плöтничайтас, кöть кутас доярöн, кöть му вылас медся ыджыднас лоас. Мед сöмын горт гöгöр ноксис-а.
Локтöны Васька Петыр да Ладимер. Вайöны кер. Матыстчö Николай Васильевич.
АННА (Сенька Людмилалы). Людмила тьöт, лок пырав миянö, сёрни эм.
СЕНЬКА ЛЮДМИЛА (Васька Петырлы). Тадзи и кутам тэ да ме öта-мöдысь пышъявны? (Аннакöд мунöны.)
НИКОЛАЙ ВАСИЛЬЕВИЧ. Мый нö, Петыр, талун матичöдзыс воöдчыны кöсъян? (Шпыннялö.)
ПЕТЫР (скöрысь). Кöсъям. (Ладимерлы.) Воöдчам öд? (Мöдыс сöгласа гогйöдлö юрнас.)
НИКОЛАЙ ВАСИЛЬЕВИЧ. Оз кöсйы тiянкöд, вина юысьяскöд, уджавны сэсся сiйö. Керкасö пö помалам да доярö муна. Зывöк пö тiянысь.
ПЕТЫР (скöра). Эг эськö сiдз шу да. Мый содталан?
НИКОЛАЙ ВАСИЛЬЕВИЧ (шпыннялö). Сiдз тай ме гöгöрвои-а.
ПЕТЫР (Ладимерлы). А тэ эн дузъяв. Ассяньыс содталö.
ЛАДИМЕР. Тайö бара содталас.
НИКОЛАЙ ВАСИЛЬЕВИЧ (гöлöссö чорзьöдö). Ме тiян бердö босьтча. Кутанныд гöг вöрзьытöдзыд керсö тiльны... Öндрейкöд.
ЛАДИМЕР. А тэ эн ёнасö горзы. Абу öд казакъяс. Ог тэныд, отделениелы уджалам.
НИКОЛАЙ ВАСИЛЬЕВИЧ. Ланьт. А то...
ЛАДИМЕР (юрсö лэдзö). Со öд, кыв шуны оз позь.
НИКОЛАЙ ВАСИЛЬЕВИЧ. Оз. Он кужöй овнысö да. (Петырлы.) Петыр, а ме тэ дiнö могöн.
ПЕТЫР. Кутшöм мог нö суис?
НИКОЛАЙ ВАСИЛЬЕВИЧ. Лок пуксьылам. Ладимер, тэ тшöтш лок. (Пуксьöны.) Рытладорыс сельполы пес вайны кöсйим. (Петырлы.) Ачыд тöдан, öта-мöдлы отсасьтöг некыдзи. Колö налы отсыштны. Сöвтчыны кутан. Матичсö лэптанныд да шойччыштöй и песла!
ПЕТЫР (сувтö). Ог эшты ме. Гортын уджыс юр выв тыр.
НИКОЛАЙ ВАСИЛЬЕВИЧ (быттьö оз кыв). Ладимеркöд ветланныд.
ЛАДИМЕР (тшöтш сувтö). Рытнад ме ог жö эшты.
НИКОЛАЙ ВАСИЛЬЕВИЧ (скöра). А тэнсьыд ме ог и юась. Кайлан, а то...
ЛАДИМЕР (скöра жö). Мый, а то...
НИКОЛАЙ ВАСИЛЬЕВИЧ. Ачыд тöдан. Бöръя сёрни вöлi тэкöд. Ме сайын ставыс. Верма и совхозсьыд тодмышкавны.
ПЕТЫР (бöр пуксьö). Мый тэ мортсö пыр повзьöдлан?
НИКОЛАЙ ВАСИЛЬЕВИЧ (бара быттьö оз кыв). Тэ кö кайлан, то найöс ог и вид. Дорйы, колöкö, йöзсö.
ПЕТЫР. Мый тэ менö накöд зурöдан? Нарошнö?
НИКОЛАЙ ВАСИЛЬЕВИЧ. Ме зурöда? Йöймин али мый?
ПЕТЫР. Ладимер мед кайö, а ме ог.
НИКОЛАЙ ВАСИЛЬЕВИЧ. Мый нö аснырасян? Водзтi тэ сёрниаджык вöлiн, юигад.
ПЕТЫР (ырсмунö). Мый ме ютöгыс тiянлы горшад тасаси али мый? Синмö тойлаланныд. Ог мун и ставыс. (Мунö.)
Ладимер кöсйö жö мунны, но управляющöй скöрпырысь кутö дöрöм соскöдыс, пуксьöдö.
НИКОЛАЙ ВАСИЛЬЕВИЧ. А тэ мый ныртö лэпталан? Мед сэсся мöдысь эг кывлы, а то...
ЛАДИМЕР (жугыля). Метö кайла. Öтнамлы, дерт, сьöкыд лоö-а...
НИКОЛАЙ ВАСИЛЬЕВИЧ (чеччö). Тадзи бурджык лоö. А öнi мун син водзысь. Но мед вöлi рытнас кайлöма песла. (Ладимер мунö. Николай Васильевич довъялö сцена вывтi.) Колöны меным Ладимер да Öндрей кодь йöзыд. Татшöмъясыд менам кабырынöсь. Вугыр йылын чери кодьöсь. Кор ковмас кыскышта. Мыйла ме наысь мынтöдчыны кута? Таысь тусь ни пызь. Со öнi Ладимерсö топöдлi. Тöдö, мый мыжа. Оз ыръянит. Пуö бöрöн дась кайны, медым сöмын эг тодмышкав. Колöны, колöны меным татшöмъясыд. А Васька Петырыскöд... Водзтi Ладимерсьыс на кокньыдджыка кöртвомавла вöлi, кор юис... А öнi... Сы сайын мыжыс абу. Вот и куражитчö. И он зыртышт. Оз ю. А ставныс кö дугдасны? Йöйман сэк. (Мунö.)
Локтöны Васька Петыр да Сенька Людмила. Мыччысьö Ладимер. Оз казяв Васька Петырöс да Сенька Людмилаöс. Юрсö лэдзöмöн локтö.
ЛАДИМЕР. Мыйкö талун инö ог öшйы… Быттьö вошöма мыйкö. Нинаыс дум вылын. (Аддзö сулалысьясöс.) Петыр, вай отсышт меным пессö вайны. Кыкнад öдйöджык. Öтнамтö сёрма.
СЕНЬКА ЛЮДМИЛА. Кытчö тэд тэрмасьнысö.
ПЕТЫР (кутыштлö нывбабаöс сойбордöдыс). Энлы, Людмила тьöт. (Ладимерлы.) Ог ме кöсйы кайлынысö. Ог. Управыд пö бензопила вöсна тадзи пессьö. Сельпо предыд кöсйысьöма гусьöн вузавны. И оз сельпоыслы вайны, а аслыс, предыслы.
ЛАДИМЕР. Ме пайысь эськö мед кодлы да.
ПЕТЫР. Казачит, сiдзкö, веськодь кö. А ме ог мун.
ЛАДИМЕР. Ковмас, тыдалö, öтнамлы. Вот, Петыр, сiдзкö, помалам бöръя радсö. (Мужикъяс пукталöны брусъяссö.)
Мыччысьöны Варов Катя да Анна.
АННА. Со и Людмила тьöт танi.
СЕНЬКА ЛЮДМИЛА. Со тай сулала. Петырыдкöд варовитiм.
АННА. Эн мырддьы менсьым.
СЕНЬКА ЛЮДМИЛА. Эн пов.
Локтö Николай Васильевич. Мужикъяс помалöны матич лэптыны.
ПЕТЫР. Но, буракö, ставыс. Аски сэсся вевтсö вöчам и детсад лоö дась.
ЛАДИМЕР (видзöдлö кияссö). Мыссьыштны эськö колö.
ПЕТЫР. Миянö пырав. (Ладимер пырö. Локтö управляющöй. Киас бумагаöн гартыштöм тубрас.)
НИКОЛАЙ ВАСИЛЬЕВИЧ (дöзмöм чужöма). Петыр. Эн мöвпышт?
ПЕТЫР. Пыр тай мыйкö йылысь мöвпалан. Сiйöн тай мортыд олö.
НИКОЛАЙ ВАСИЛЬЕВИЧ (матыстчö Петыр дорö дзик дiнас, видзöдö). Тэ меным коз пу йылысь турисö эн мойд. Варовитан сэнi. Кайлан, мися, он вöрас?
ПЕТЫР. Ассьыд гостö пыркöдышт. Удж бöрад и тэныд позьö. Бензопила вылад.
НИКОЛАЙ ВАСИЛЬЕВИЧ (скöрмö). Кутшöм бензопила нин гартö татчö?
ПЕТЫР. Кутш кодь. Эн йöйöн йöзсö лыддьы.
ВАРОВ КАТЯ (повзьыштö). Косьö воас и быдöн. (Матыстчö на дiнö.) Николай Васильевич, вöвтö кор сетан?
НИКОЛАЙ ВАСИЛЬЕВИЧ (бугжыльтчылö сы вылö). Тöвнас.
ВАРОВ КАТЯ. Тöвнас кö и тöвнас. (Петырлы.) Петыр, тэ меным сэки отсыштан?
ПЕТЫР (неуна сайкалыштö). Мый верма, отсышта.
НИКОЛАЙ ВАСИЛЬЕВИЧ (вешйыштö). Со тэ кутшöм. А талун он кöсйы? (Видзöдö бокö.) Со Аннаыд локтö. Сiйöс усьöда. (Матыстчö Анна.) Анна, висьтав мусукыдлы, мед песла рытнас кайлас.
АННА (нюммунö). Ме öд абу управляющöй. Гортгöгöрса уджсö индыны сöмын верма.
ПЕТЫР. Шензя ме тэ вылö, Николай Васильевич.
НИКОЛАЙ ВАСИЛЬЕВИЧ (пуксьö). А ме тiян вылö шензя. Вежсинныд да. Водзтi эн татшöмöсь вöлöй. А тэ, Анна, кымынысь кевмысьлiн, медым верöстö эг вöтлы. Бурыд тай öдйö вунö.
ПЕТЫР. Бурыс аслыд вöлi. Кымын шойччан лун ковмылiс тшупсьыны. Пемдытöдзыс мукöддырйиыс.
НИКОЛАЙ ВАСИЛЬЕВИЧ (зывöка нюмдö). Уджалан луннас он вöлi сяммы да...
ПЕТЫР. А тэ дзеблiн юöмöс. Тöдан вöлi, мый Васька Петыр палялас да дас морт пыдди уджалас. И ме тöдi тайöс. Сы вöсна и, гашкö, велалан тшöкыдджыка юнысö.
НИКОЛАЙ ВАСИЛЬЕВИЧ. Давай. Ме вылö ыстысь.
ПЕТЫР. Нимыд мисьтöм, мед тэ вылö ыстысьны. Со Ладимер локтö. Ме сiйöс ог жö тшöкты кайнысö.
ЛАДИМЕР. Бурногöн кö корас, то кайла эськö.
НИКОЛАЙ ВАСИЛЬЕВИЧ (коксö кресталö). Мый тэкöд бурасö варовитны, он гöгöрво да.
ПЕТЫР. А тэ видлiн? Видлiн?
ЛАДИМЕР. Мый тiянкöд. Пурсьöй метöг. (Кöсйö мунны.)
ВАРОВ КАТЯ. Нöшта öд кöсйö, мед Нинаöй сыкöд паныдасьлiс.
ЛАДИМЕР (ырсмунö). Оз мöй мунны талун кöсйы?
ВАРОВ КАТЯ. Верма кутны мунöмсьыс, кöсъя кö, кöть эськö быттьö мый сылы татшöмсьыд, кодi быдторсьыс пышйыны заводитö.
ЛАДИМЕР (педзö). Мыйла пышйыны? Ог некытчö пышйы. Мый сёрнитны весьшöрöсö. (Видзöдö матыстчысь Сенька Людмила вылö.) Со Людмила тьöтлöн вежöрыс бура вартö. Ставсö висьталас.
СЕНЬКА ЛЮДМИЛА. Мый нö висьтавны?
ЛАДИМЕР (довкнитö Васька Петырлань да управляющöйлань). Эсiйöяслысь юав.
СЕНЬКА ЛЮДМИЛА (на дорö). Мый висьтавны?
ПЕТЫР. Да нинöм. Ладимер кывсö песö.
АННА. Ме висьтала. (Управляющöйлы.) Да, ме ёна тэ водзын кевмысьлi. А мый вöчан? Кытчö воштысян? Тэ ёнасö эн жö Петыр радиыс да ме ради ов.
НИКОЛАЙ ВАСИЛЬЕВИЧ (шпыньмунö). Час аслам олöм вылö сьöвзя да тiян вöсна овны кута.
ПЕТЫР. Энлы, Анна.
АННА. Мый, энлы. Тэ он на ставсö тöд. Ме тэ вöсна кымынысь гöрдöдлi да лöзöдлi.
СЕНЬКА ЛЮДМИЛА (шензьö). Мый нö ставныд татчö чукöртчöмныд? Абу мöй уджалан лун?
ПЕТЫР. Ми со матич Ладимеркöд лэптiм. Шойччыштны колö. Анна со пажын вылö воис. Катя тьöт да тэ, ачыд тöдан, излетъяс нин. Миян пöвстын öти уджалысьыс, Николай Васильевич.
НИКОЛАЙ ВАСИЛЬЕВИЧ (чеччö). Тырмас. Эн ёнасö гöлöзубрит. (Варов Катялы.) Ме рытнас тэ дорö пырала.
ВАРОВ КАТЯ. Абу менам нинöм. Ог видз.
НИКОЛАЙ ВАСИЛЬЕВИЧ. Меным вылö сюрас на. Вöлыд кö колö.
ВАРОВ КАТЯ (дöзмö). Мый тэ вöлöн ыршасян? Быттьö аслад. Ковмас кö, сiдз на кора. Эг öд дас нёль арöссянь колхозад прöстаысь став уджсö мырк. Вöвтö, буракö, пес вайны нажöвитi жö.
НИКОЛАЙ ВАСИЛЬЕВИЧ. Видзöдлам...
ВАРОВ КАТЯ. И видзöдлыны оз ков. Ыджыд тай шышка. Абу на тэ муыслöн гöгйыс. (Мунö.)
НИКОЛАЙ ВАСИЛЬЕВИЧ. Мыйсяма йöз тi.
ПЕТЫР. Вирöй пузис тэ вылö.
НИКОЛАЙ ВАСИЛЬЕВИЧ. Мыйыськö?
ПЕТЫР. Бурöн миянкöд ов, а тэ гусьöн пурсьысь пон моз гачад кутчысьны видзöдан. Бурнад кö, ми век дасьöсь гöгöрвоны. А мöд ногöн кö, то шева лöгасьö.
Локтö Öндрей. Сiйö гажа на. Киняулас кабала пиö гартыштöма водка доз.
НИКОЛАЙ ВАСИЛЬЕВИЧ (Петырлы). Бурöн шуан? А тэ кöсъян? (Öндрейлы.) Судзöдiн?
ÖНДРЕЙ (збоя нюжöдчылö). Так точно, судзöдi.
НИКОЛАЙ ВАСИЛЬЕВИЧ. Сiдзкö, бурöн видлам. Со мый, ёртъяс! Ёна нин талун зыксим. А главнöйтор йывсьыс кутiм вунöдны.
ЛАДИМЕР. Мый нö вунöдiм?
НИКОЛАЙ ВАСИЛЬЕВИЧ. Важсö вунöдам. Пöль-пöчьяслысь обычайяссö.
ПЕТЫР (шензьö сы вылö). Мыйкö тэ друг аслыспöлöсногöн кутiн варовитны.
СЕНЬКА ЛЮДМИЛА. Ме видзöда нин. Мый нö вунöдiм?
НИКОЛАЙ ВАСИЛЬЕВИЧ. А мый вöлi вöчöны найö керка матич лэптiгöн?
ПЕТЫР. Нöк кашник вöлi сэтчö пысалöны. Сэсся сiйöн и быдöн лэптöны.
НИКОЛАЙ ВАСИЛЬЕВИЧ. Стöч сiдз. А сэсся мый?
ÖНДРЕЙ. Мый? Мый? Вина юыштöны. (Разьö тубрассö.) Со тайöс. (Окыштö дозсö.)
НИКОЛАЙ ВАСИЛЬЕВИЧ (дöзмыштö Öндрей вылö). Дугдыв пöшекеняасьнытö. (Мукöдыслы.) Со тi талун, Васька Петыр гозъя Ладимеркöд партитчöмöн, ёна дивитiнныд менö. Он пö вермы бурногöн миянкöд сёрнитны. Сiдз?
ПЕТЫР. Он и вермы да.
НИКОЛАЙ ВАСИЛЬЕВИЧ. А вай видла ме тiянкöд морт ногöн, ас сиктса морт ногöн кöть сёрнитны.
ЛАДИМЕР. Быттьö артмас кö.
НИКОЛАЙ ВАСИЛЬЕВИЧ. Артмас. Сöмын эн повзьöй татшöм морт нога сёрнисьыс. (Петырлы.) Петыр, ме со пель сэрöгöн кывлi, мый тэ нин управляющöйöн лоны усьласян? Эн, эн шензьы. Меным öд ставыс пельöдз воö. Зэв öдйö. А тэ пуксьыв, пуксьыв ме местаö. Кыстö нюжöдан! Он али мый? Кутчысьлы öнiя олöмöн да öнiя йöзöн веськöдлыны.
ПЕТЫР. Эн повзьöдлы ёнасö.
НИКОЛАЙ ВАСИЛЬЕВИЧ. Ме ог повзьöдлы. Ёна-ö тэ верман Öндрейсö да Ладимерсö кесйöдлыны? Шыш на верман.
ÖНДРЕЙ (гöрöктö). Менö? Васька Петыр меöн веськöдлыны кутас?
НИКОЛАЙ ВАСИЛЬЕВИЧ. Со мый сiйö вочавидзö. А ме верма мыйла? Сы вöсна, мый верма и ставыс. Велалi уна вонад.
СЕНЬКА ЛЮДМИЛА. Ме аддза жö, мый сямман.
НИКОЛАЙ ВАСИЛЬЕВИЧ. Тэ, Людмила тьöт, ланьт эськö. (Петырлы.) А тэöн, Петыр, веськöдлыны ог куж. Быттьö веськыда кö нин. Ог сяммы и ставыс. Он ю да.
ПЕТЫР. Бара шеваыд лöгасис.
НИКОЛАЙ ВАСИЛЬЕВИЧ. Энлы тшöтясьны. Помöдз висьтала да сэк. Мыйла ог куж? Эг велавлы да сiйöн.
ÖНДРЕЙ. Миянкöд сiдзкö сямман, а сiйöс стрöжитны он нин?
НИКОЛАЙ ВАСИЛЬЕВИЧ. Ог. Но со öд кутшöм ме. Со öд кытчöдз вои.
СЕНЬКА ЛЮДМИЛА. Мый нö лöвтны босьтчин? Жалитасны мед али мый?
НИКОЛАЙ ВАСИЛЬЕВИЧ. Тэ, Людмила тьöтка, öнiя Петырыскöд он жö лöсяв. Он öд? Тöда, он.
Потшöстö öнi сiйö оз вöч. Винаыд тэнад оз ков. Со öд кытчöдз воим. Менö тi со дивитiнныд. А öд ме, Петыр, Анна, тiянкöд öтлаын коркö кöмтöг котравлi, öтлаын быдмим-туим. Сiдзкö, кутшöм вын-эбöс колö вöлi вöчны олöмыслы, кодъяслыкö, медым ме со татшöмнас лои! А! Кутшöм сöтанаясыс менö татшöмнас вöчисны?
СЕНЬКА ЛЮДМИЛА. Мый нö дурмöдчинныд талун ставöн? Сöмын бызгöны нинöм абусö.
НИКОЛАЙ ВАСИЛЬЕВИЧ. А ми думöн ставным тадзи мöвпалам, мый татшöмöдзыс воим, кодъяскö татшöмнас вöчисны, сöмын гора ог шуалöй-а.
ÖНДРЕЙ. Кодкö вöчас, асьным кö огöй.
НИКОЛАЙ ВАСИЛЬЕВИЧ. Мöдысь эн шу! Колö кодлыкö тайö! (Тапкöдö аскöдыс вайöм тубрассö.) Со тайöс вайи. Думайтанныд, ачым мöвпыштi? Мед эг. Совхозсянь тшöктiсны. На вылын нöшта чина йöз сычвидзöны. И на вылын на эмöсь чинаджыкъясыс. Пом ни дор оз тыдавны. Сэтысь, вылыс сёр вывсьыс, мыжаяссö колö корсьны. Тадз ме думайта. Сэнi куткырвидзысьясыс миянöс татшöмнас вöчисны, мый морт ногаöсь нин эг лоöй. Быттьö сёй талялысь вöвъяс. Сюйöны тай найöс сёй гуö. И найö, мый вермöны гöгралöны-лойöны сёйсö. Гуыс джуджыд — чеччыштны он вермы. Ми сэтшöмöсь жö. Лойсям-талясям öти гуын, сиктын шуа, öта-мöднымöс лёкнымла чужъялам, мый ог вермöй гусьыс чеччыштнысö. И со мый выйöдз воим. А миян кодьыс вöльнöй светас мыйта! Ставныс асланыс сёй гуынöсь. Вöвъястö, мудзасны да, луд вылö на йирсьöд-чыны, кöть домалöмöн, а лздзлывлöны. А миянöс со оз. Пыр лёкöдöны, гудрасьны тшöктöны. Сiдзи нин мусö гудралiм, мый... Но да ладнö. Öндрей, öнi кисьтав. Чомöр кö и чомöр. Кöть нин тайö важсö, пöльясöн лöсьöдöмторсö талун ог вунöдöй.
ÖНДРЕЙ (восьтö дозсö). Некытчö кисьтавнысö да?
ВАСЬКА ПЕТЫР (Анналы). Анна, котöртлы гортö, вай стöканъяс, мыйкö вомас сюйны.
АННА (повзьöмöн). Тэныд нö вайны жö... Стöкансö шуа?
ПЕТЫР. Вай. Ва аслым кисьта. Чомöр радиыс точкам. Детсад радиыс. (Анна мунö.)
НИКОЛАЙ ВАСИЛЬЕВИЧ. Петыр, он тэ вермы тайö гусьыс чеччыштны. Он.
ПЕТЫР. А верма кö.
НИКОЛАЙ ВАСИЛЬЕВИЧ. Гашкö, и верман. Но водзöсö мый? Тэ со öтарö-мöдарö шыбласян. То доярöн кöсъян, то управляющöйöн. Асьтö такöдан, нинöм вöчнысö он вермы да.
ПЕТЫР. Мый сэсся тэ думысь...
НИКОЛАЙ ВАСИЛЬЕВИЧ. Да нинöм. Прöста мöвпала, мый кодъяслыкö колö вöлi та выйöдзыс миянöс, сиктнымöс, вайöдны. Вочасöн, казявтöг вöчисны.
Локтö Анна, вайö стöканъяс, сёян.
ÖНДРЕЙ. Горш таркакылö. Вай кисьтала.
ПЕТЫР. Меным эн. Кисьт куимлы. Николай Васильевич кö быттьö тiянкöд оз зывöкты юнысö.
НИКОЛАЙ ВАСИЛЬЕВИЧ. Вай дугды кывнад парсйöдлыны йöзсö. Ставным нин öткодьöсь. Кисьт, Öндрей.
Öндрей кисьтö куим стöканö. Васька Петыр аслыс кисьтö ведраысь ва.
ÖНДРЕЙ. Сiдзкö, чомöр ради.
— Папö, папö!— кылö челядь гöлöс. Ставöн шай-паймунöны, öдйö вöрöмöн бергалöны места вылас, гудрасьöны.
ПЕТЫР. Анна, кодi нö. Оз Васюкыд?
АННА. Абу сылöн гöлöсыс.
ÖНДРЕЙ (босьтö стöкансö). Юам, сiдзкö, чомöр ради.
НИКОЛАЙ ВАСИЛЬЕВИЧ (босьтö жö). Юам. Сöмын тайö и коли вöчны.
ЛАДИМЕР (босьтö жö). Абу эськö ёна окота да.
Петыр босьтö жö асладорсьыс. Юöны. Петыр горш косьмöмысла ньылыштö ыджыд вомтырöн. А сэсся тшöкмунö, киясыс лёкысь шенасьöны. Ставöн видзöдöны сы вылö.
ЛАДИМЕР. Менам ва вöлi.
ПЕТЫР. Водка, в-водка кисьтöмныд!
АННА. Эн жö водка ю?
СЕНЬКА ЛЮДМИЛА. Кодкö тай стöкантö вежис.
ÖНДРЕЙ. Ме эг-а. Ме бара водкатö ва вылö ог веж.
ЛАДИМЕР. Сiдзкö, ме али мый? Ме эг. Петыр, ме эг.
НИКОЛАЙ ВАСИЛЬЕВИЧ. Давай, бара ме вылö став лёксö вештöй. Вештöй! Петыр, сё збыль, эг ме.
ПЕТЫР. Сё петукъяс. Абу тай кодлыкö яндзимныд. (Анна шлюпкыны-бöрдны заводитiс.) Тасаси горшас кодлыкö ютöм вöснаыс! Сё петукъяс! (Винаыс неуна шонтыштö сiйöс, раммöдö.) Ок, эськö пель бокъясаныд кö сетавны.
НИКОЛАЙ ВАСИЛЬЕВИЧ (пуксьылö, тупкылö чужöмсö). Со öд кытчöдз воим. Муыс совхозлöн, тайö керкаыс совхозлöн жö. Асланым нинöм абу.
ПЕТЫР (раммыштöма нин). Но и мый? Челядь кутасны овны. Детсадйын.
НИКОЛАЙ ВАСИЛЬЕВИЧ (тэрмасьöмöн разьö кабала тубрассö). Мед оз челядь. Совхозсянь индöд воис — лöсьöдны татчö отделениелысь контора. Со пöвсö вайи. (Кöсйö тувъявны стенас рамкапытшса гижöдсö).
ПЕТЫР (скöрмö). Мый?! Контора!.. (Мырддьö рамкасö да швачкö стенас.) Контора али мый стрöитi. Тiянлы сiдз эм кöнi пукавнысö да?
НИКОЛАЙ ВАСИЛЬЕВИЧ. Мый ме вылö вувзьысин? Ме öд куражитчи. Но тшöктöны петны татчö. Важ детсад йирксö лöсьöдыштам да гоз-мöд вотö сэнi оласны на. Челядьыд.
Мыччысьöны Нина да Варов Катя. Нина ыджыд сумкаа.
ВАРОВ КАТЯ. Нина, колöкö, он на лэччы? Олыштан на?
НИНА. Лэчча. (Аддзö ставнысö да сувтö.) Мый нö татчö чукöртчöмныд? (Казялö бöрдысь Аннаöс.) Анна тьöтка, мый лоис?
АННА. Петыр водка юис. Кодкö стöкансö вежис да.
ВАРОВ КАТЯ (аддзö рамкасö). Мый тайö? Парась керкасьыс öбразыс али мый? (Лэптö.) Абу тай öбраз. Кöнi нö эськö сiйö?
НИНА (лёкысь видзöдö став вылас). Кодi кисьтiс Петырыслы? Абу тай тi йöз! Мыйсяма тi йöз! Та выйöдз öд эн жö на воöй!
ПЕТЫР. Энлы, Нина. Абу сыын делöыс, кодi кисьтiс. Гашкö, ачым сорси, мöд стöкан босьтсис. Гашкö, эстысянь да. (Индö чуньнас бокö.)
НИНА. Мыйсяма йöз лоöмныд! (Öдйö мунö. Варов Катя нöшта босьтлö рамкасö, бöр пуктö да вöтчö сы бöрся.)
ПЕТЫР. Öндрей, эз нин кольышт?
ÖНДРЕЙ. Эмышт на.
ПЕТЫР. Кисьт меным ставсö. (Öндрей кисьтö, но аслыс кольö на. Петыр босьтö стöкансö. Анна эськö кöсйö мырддьыны, но верöсыс лёкысь вештыштö. Петыр шога видзöдö стöкан вылас. И сьылö стöч «Бур батькöд-мамкöд олöм» мелодия ногыс жугыля, сьöлöмсяньыс). Кыдз садöк пиын кай. (Лёкысь ньылалiгтыр юö. Занавес пöдласьö. Пöд-ласьöм бöрас нин кылö Петырлöн лёкногöн мöд мотив вылö сьылöм.) Кыдз садöк пиын кай! Кыдз садöк пиын кай!
П О М
Назад в раздел
