На главную страницу
Отправить сообщение
Карта сайта

Закрыть
Логин:
Пароль:
Забыли свой пароль?
Регистрация
 Войти  Регистрация













Календарь

Нималана шылад лöсьöдысь (на коми языке)

02.04.2018 15:17

Шойнатыын Россияса культуралысь лунсö пасйигöн нуöдiсны Александр Георгиевич Осиповлы сиöм «Нималана сьылан» гаж. Тайö гажыс йитчöма и А.Г.Осиповлы 95 во тырöмкöд. Пытшкöслун сертиыс татчö чукöртчöмыс вöлi зэв тöдчана, уна тöдöмлуна, лов кыпöдана да уна йöза. Локтiсны Эжваысь, Сыктывкарысь, Кöрткерöсысь, Типöсиктысь, Подтыбокысь да асьныс – Шойнатыысь. Творческöй рытсö вöлi дасьтöмаöсь кык юкöнысь: нималана шылад лöсьöдысь А.Г.Осипов да ловруöн да бордъясöн петан сьыланъяс. Веськöда ассьым висьтасьöмöс: медводз миянöс зэв шаня да кыпыда паныдалiс Шойнатыö пыран туйвежас сиктöн веськöдлысь томиник ань Христина Николаевна Гевейлер, кодi висьталic, мый сиктö пыран уличасö нимтiсны А.Г.Осипов нимöн. И тасянь сiйö вайöдic сиктса музейö. Танi нин ми ньöти майшасьтöг пуксим да заводитiм кывзыны А.Г.Осипов йылысь музейöн веськöдлысь Галина Ивановна Панюковаöс. Дзонь жыр чуктöдöмаöсь Кöрткерöс районса нималана йöзлы. Пыранiнсянь веськыда öшалö Александр Осиповлы сиöм стенд. Татысь ми аддзам, мый Александр Осипов чужис 1923 вося март 15-öд лунö, а олöмсьыс мунiс 1973 вося январ 31-öд лунö. Танi жö снимокъяс вылын керка, кöнi овлicны Осиповъяс, кык ыджыдджык чой – Мария да Раиса Саша вокыскöд, Александр Осипов да Людмила Николаевна гöтырыскöд сулалöны кычанпиöс да каньöс кутöмöн. Стендсö мича вöчöма да ламинируйтöма. Но сьöлöмсянь ми кывзим висьтасьöмсö Г.И.Панюковалысь, мый семьяыс Осиповъяслöн зэв музыкальнöй. Дарья Яковлевна да Георгий Тихонович семьяын вöлöма кöкъямыс челядь и сöмын висьöмъясысь мездысьöмаöсь куим чоя-вока: Мария, Раиса да Саша. Коркö-некоркö семьясьыс мунас и батьыс, Георгий Тихонович. Сэк жö и мамыс чорыда висьмас. И 1933 воас Сашаöс сетасны детдомö. Медводз олас Сыктывкарын, сэсся Выльгортын, а сэсся сiйöс вуджöдасны Кулöмдiнö, кöнi быдмас 1936 вося январ тöлыссянь – 1939 воöдз. Мыйла Выльгортысь «туркнитiсны» Кулöмдiнö? Висьтасьысьяс да документъяс серти зонмыс вöлöма зэв ышмалысь да этш тöдтöм, визув да збой; и сiдз, детдомсянь детдомö вуджöдан документъясас пасйöмаöсь «дезорганизатор порядка». 1937 вося «Вöр лэдзысь» газетын старшöй пионервожатöй Елизавета Васильевна Выборова висьтасьöма, мый Саша Осиповöс лёка асьсö кутöмысь оз позь примитны пионерö. Водзö висьталö, мый зонкалы козьналöм скрипкаыс да детдомлы ньöбöм баяныс сiйöс öдйö и усьпаньйыв пуксьöдiсны. Выльгортса детдомын олiгöн эм снимок, кöнi шуйгаладорсяньыс медводдза радас коймöд мортöн пукалö Саша, сылöн киас мусаник кычанпи. Вермис-ö тайö пиукыс лоны лёк мортöн, дезорганизаторöн? Водзö аслас олöмын пыр ачыс и гöтырыс снимайтчылöмаöсь понпиöн да каньöн. Сöмын Кулöмдiнын казялöмаöсь сылысь енбиалунсö. Öти репрессируйтöм велöдысь немеч Кек тайö зонмыслы козьналас скрипка да быттьö пö сылысь лёк этшсö сы вылысь дукöсöс моз кульыштiсны. Сыкöд быдмысьяс бура помнитлöмаöсь, мый детдомын олiгöн Саша ёнакодь дзерöдлöма ичöтджыкъяссö: ас пыддиыс посниясöс джодж мыськöдлöма, пес пыртöдлöма, крöватьсö лöсьöдлöма да сiдз водзö. Сэк пö Кулöмдiнса детдомыс вöлöма образцовöйöн. Вöлöма детдомас йöзкостса инструментъяса оркестр и 1937 воас тайö оркестрнас веськöдлöма Александр Осипов – дас нёль арöса зон. Тайö кадас сiйö бура нин тöдмасьлöма балалайкаöн, домраöн, гитараöн, скрипкаöн, фортепьяноöн, гармошкаöн, но медся радейтана инструментöн вöлöма немечöн козьналöм скрипка. 1938-1939 воясас веськöдлöма Кулöмдiнса культура керкаын народнöй оркестрöн. 1940 воö Сыктывкарын восьтö йöзкостса инструментъясöн ворсöм вылö художественнöй студия, а сэсся лöсьöдö «Асъя кыа» ансамбль. Сылысь творческöй туйсö «вомöналö» война. 1941 вося сентябр тöлысьö босьтöны немечьяскöд тыш вылö сапёрöн. Во служитöм бöрын, 1942 вося гожöмö, чорыда доймалö: снарядлöн осколокъясыс веськалöны шуйга морöсас да киас. Тайö вöлi, кыдз профессионаллы, асьсö воштöмöн. Шуйга киыс ньöти эз сетчы удж бергöдöм вылö. Тыш вылысь демоблизуйтчöм бöрын воис Сыктывкарö. Паныдасис Серафим Алексеевич Поповкöд, кодкöд лöсьöдiс уна сьыланкыв. Пыр Серафим Поповöс сiйö чуймдлic аслас зiльлунöн, чорыд руöн аскöдыс водзсасьöмын, коми сьыланлысь мичлунсö кылöмын да сöстöм лолöн найöс петкöдöмын. Шыладсö сьыланъяслысь ёнджыкасö вöчöма фортопьяноöн, но кывзысьтöм шуйга кисö скöра зульöдлывлöма клавишъяс бердö, ёнджыкасö кикарнас клавишасö личкавлöма. Серафим Попов Александр Осипов йылысь гижис «Лунная соната» поэма, кöнi визьнитöма: «…Мöд ног сылы ог куж юкны сьöлöмысь медся нин мусаджык кывъяс…». Война бöрын А.Г. Осипов помалöма Вологдаса да Саратовса музыкальнöй училищеяс, сэсся Горький карса консерватория, Москваса Гнесин нима музкально-педагогическöй институт (1960 воын), став экзаменсö сдайтлöма «вит» вылö. Война вылысь локтöм бöрын бара жö сюртчö «Асъя кыа» ансамбльö и уджалö 1943 восянь 1958-öд воöдз. Ыджыд таланта мортыс вöлi профессия боксянь медводдза коми музыкант, композитор, бура кылысь, гöгöрвоысь да коми ног шыладсö вöчысь. Тайö кадас сiйö чукöртic да шыльöдic Виктор Алексеевич Савинлысь сьыланкывъяссö, ёртасис кывбур пестысьяскöд, кыдз Серафим Поповкöд, Николай Фроловкöд, Владимир Поповкöд, Василий Лыткинкöд, Фёдор Щербаковкöд, Альберт Ванеевкöд, Геннадий Юшковкöд да уна мукöд гижыськöд, тшöтш рочьяскöд, кыдз Лебедев-Кумачкöд, Александр Мурзинкöд. Ыджыд майшасьöм вöлi cэк, кор вöзйисны коми кып вылö Александр Осиповлысь югыд да сьöлöмö йиджана «Менам Отчизна» сьыланкыв, мый лöсьöдлiс ас кадö Фёдор Щербаков, кöнi кывъясыс: «Отчизна – тэ менам Отчизна – тувсов шондiа югыд страна», сьыланкывлöн медбöръя строкаясыс кып жанрлы эз лöсяв, кöть и Геннадий Юшков босьтчывлic вежны сэсь припевсö да кывъяссö: «Тайö му вылас кö ми бырам, сэсся некор Комиыс оз ло». Сьыланкыв помыс кыпсö пöртö бöрдöдчанкывйö (причитаниеö), но тайö сьыланыс вöлi сьöлöмö медся ёна йиджанаöн да коми йöзсö бордйöданаöн. Уна коми сьыланкыв вöчис Александр Осипов. Аслас гижöдъясын пасйö, мый 1957 воын гижис сё сьыланкыв, 1970 воын – 150-öс нин. Сылöн зэв югыд, мича, медся мыла, коми ладöн кокниа юргана сьыланкывъяс. Ошкывлiсны сылысь коми шылад дорас кутчысьöмсö, шулiсны, мый «Александр Осипов сьыланкывъясын коми кывйыслöн бордъяс, а шыладас – сöстöм коми ловруыс». Радейтiс коми кывсö и коми ногöн мыла сьывлiс. Но вöлiны здукъяс, кор ёна дöзмöдлicны сiйöс роч ногöн лывкйöдлана коми гижöдъяс. Аслас творчествоын пыр коми ногöн зiлис вöчны сiйö, мый гижöма ас чужан муын. Ёна туялiс и коми-пермякъяслысь сьыланнога уджъяссö. Сора тöлысся 1962-öд воö ветлiс коми гижысьяскöд Кудымкарö, кöнi вöлiны Георгий Торлопов, Серфим Попов; шылад вöчысь Яков Перепелица, сьылысь Ия Бобракова да коми йöзкостса сьыланкывъяс туялысь Александр Осипов. Танi Кудымкарö мунiгöн Серафим Поповлöн да Александр Осиповлöн чужö «Катшасинъяс» сьыланкыв. Висьталöны, мый тайö эз сöмын вöв лирическöй сьыланкыв, а пытшкöсса дзебасын сiйö нуис политика кöр: öтувтчыны коми-пермякъяскöд öти ён да мича культураö. 1965 воын Александр Осипов Москваса консерватория бердса аспирантураын дорйис «Коми йöзкостса сьыланкыв» йылысь кандидатскöй диссертация. Диссертацияас аддзöма и сетöма удмуртъяслысь, коми-пермякъяслысь да коми-зыряналысь уна öткодь сьыланнога шыладъяс, быттьöкöн важ (древньöй) шыясыс öти морöспаньысь петлöмаöсь. Тадз пыдiсянь шыладъяс дорö матыстчöмыс быдöнöс, комиссияса пукалысьясöс, шемöсö вайöдас, чуймöдас. Москваса творческöй олöмыс ёнджыкасö сiйöс вöйтчöдiс коми йöзкостса сьыланкывъяс туялöмö. Но Мария чойыслöн пиыс, А.Осиповлöн племянникыс, филологияса доктор Владимир Николаевич Дёмин тöдчöдöма, мый Сыктывкарысь сылы ковмöма мунны 1958-öд воын сы вöсна, мый сiйö вöлi веськыд, стöч да синмö шуысь зумыд кывъя мортöн, öти кывйöн кö, эз лöсяв накöд, кодъяс дзугисны коми сьыланнога культурасö. Но пыр волöма шойччигмоз да чойсö видлiгмоз Сыктывкар бердса Тентюков сиктö. Александр Осипов 1940-öд воын Республикаса коми радиостудияын котыртлöма йöзкостса сьыланкотыр, кодi лоöма водзö «Асъя кыа» ансамбльлы подулöн. Öнiя кадö сьылöны сöмын А.Г.Осиповлысь вит-квайт сьыланкыв: Серафим Поповлöн    «Шор», «Катшасинъяс», «Луныс коли важöн», «Ой, ёна жö нин войыс кузь», Фёдор Щербаковлысь «Кор ми аддзысьлам тэкöд», Альберт Ванеевлöн «Рöднöй школа». 1990 воö А.Г.Осиповлысь сьыланкывъяссö зэв мыла сьывлöма филармонияса сьылысь Дарья Игнатова, но сцена вылö петкöдчигöн Дарья нимсö сылысь концерт нуöдысьыс вежлöмаöсь Наталья нимöн. Бöръя кадö вочасöн кыпöдöны Александр Осиповлысь творчествосö. Эжваса музыкальнöй школаын велöдысь Светлана Вадимовна Головина пыртöма велöдчан уджтасö Коми муысь петöм шылад вöчысьясöс, композиторъясöс. Медым «йиджтысьны» А.Осиповлöн югыд шылада сьыланö, корлöма Сёськаысь челядь водзын сьылöм вылö сöстöм, мича гöлöса Дина Михайловна Караваеваöс. Челядьöн бöрйöмöн да инструментъясöн ворсöмöн найö лэдзöмаöсь челядьлы музыкальнöй школаясын велöдöм вылö нотоясöн «Катшасинъяс» небöг. Ыджыд пай пуктö А.Г.Осиповлысь творчествосö туялöмö Н.А.Митюшова. Сiйö аддзöма да вайöма А.Г.Осипов йылысь Шойнатыса музейö 47 вöрзьöдлытöм да тöдлытöм на документ. Шойнатысаяслöн эм лача, мый вичкоысь коркö петкöдасны сиктса культура юкöнсö да лэптасны выль культура керка, кодлы сетасны Александр Георгиевич Осиповлысь ним. А ме серти кö, важöн нин колö коми композиторъяс йылысь лэдзны энциклопедия, мыйöн восьса сьöлöмöн кутасны йöзыс видзны да паськöдны коми сьылан культурасö. И нöшта на, тайö А.Г.Осиповлы сиöм творческöй лунсö нуöдлiсны Шойнатыын сöмын 1998, 2013 и 2018 воясын, а колö вöчны тшöкыдджыка. Дзоньнас творческöй луныс мунic тайö сиктас зэв кыпыда да бура, лöсьыда мöвпыштöмöн.

Мария Плоскова, Сыктывкар-Шойнаты, снимокъясыс авторлöн.

 

Ловруöн да бордъясöн петан сьыланъяс

А.Г.Осиповлы сиöм аддзыслöмъясын мöд лунджынъяс Шойнаты культура керкаын вöчисны творческöй рыт, кöнi петкöдчисны ас йöз да воысь гöсьтъяс. Медводз, дерт, Шойнатыса артистъяс ылькнитiсны сцена вылö. Нимкодь вöлi сыысь, мый гажсö восьтiсны челядь «Лысва» сьылысь котырöн. Найö тувсовъя кадсö визьнитiсны Серафим Поповлöн «Шор» сьыланкывйöн, а сэсся на бöрын Алёна Мишарина да Матвей Макаров сьылiсны медся тöдчана да коми йöзлысь радейтана «Катшасинъяс» сьыланкыв. Тайöн найö тöдчöдiсны, мый тайö сьыланыс коми йöзыслы дзик кып кодь и кутчысьö сьöлöмас поснилы и гырысьлы. Тайö жö сьыланыслысь вынсö да сьöлöмъяс шымыртанлунсö петкöдiс профессиональнöй сьылысь Василий Прокопьевич Рочев. Збыль вылас казялiм сьыланыслысь Коми му дорö помтöм муслун да мыла, юргана кöрсö, окота вöлi артисткöд öтвылысь сьывны. Асьныс шойнатысаяс, «Йöлöга» хорын сьылысьяс босьтöмаöсь Михаил Лебедевлысь «Видз вылын» да Серафим Поповлысь «Öшинь дорын». Налöн сьыланъясысь кылан коми шылад лöсьöдысьлысь югыд сьöлöмкылöм, коми йöзыслысь нэмöвöйся уджсö донъялöм, на гöгöр кытшалысь вöр-васö пыдди пуктöм да пыр асьнысö томöн кылöм. Нормöдiс ставнымöс Серафим Попов кывъяс вылын вöчöм «Ой, ёна жö нин войыс кузь», мый кокни вöляöн петкöдiс видзöдысьяслы Вера Витальевна Булышева, «Зарни ёль» ансамбльса сьылысь. Пыр на сылöн гöлöсöн ас пытшсьыд кылан: «Тэ бара öтнад, öтнад тай он узь – и бара некодлы он норась». Жугыль, нор, но югыд сьыланыс том нывлöн, чайтчысьсьö, мый нылыс веськыд, восьса сьöлöма и дивитны зонсö оз кут, мый ставöн бöрйöны ас дорас радейтана пöлöс. Тадз Александр Осипов петкöдiс мыла шыясöн коми нывлысь майшасьöмсö, сылысь русö, характерсö. Медся торйöдчана мичöн тайö гаж вылас паныдасим Подтыбокса «Зорюшка» йöзкостса сьылысь котыркöд. Найö эз сöмын асьнысö петкöдлыны выль костюмъясöн, но и вунöдöм сьыланъяслысь восьтiсны дзирдсö. Костюмъяс да мичмöдчанторъяссянь найöс казялан мыйтакö чувашъяс вылö мунöмöн. Нэм джын нин эг кывлöй Серафим Поповлöн кывъяс вылын «Пöпутчик», «Лирическöй», «Асьным сьылам». Тайö сьыланкывъясыс дзик востым кодьöсь вöлiны. Найö мыйтакö корисны мöвпавны и лöсьöдчисны быдöнлы пуксьыны сьöлöм вылас. Зэв ладöн петкöдчисны «Эжваса йöлöга» йöзкостса сьылысь котырысь баянöн ворсысь Александр Гениевич Горчаков да югыд гöлöсöн сьылысь Нина Васильевна Прокофьева. Найö босьтöмаöсь Александр Мурзинлысь, Серафим Поповöн комиöдöм «Ты вылын» сьыланкыв. Танi аддзан и кылан, кыдзи öтка баян улын петö сьылысьлöн мича да мыла гöлöсыс, сэк жö казялан ветымынöд воясся сьылан манерасö, лиризмсö. Налöн петкöдчöмыс визьнитiс, мый татшöм сьыланлы оз ковны оркестръяс. Танi морт, кодi сьыланыслы сетö мылсö и бордйöдö кылана öтка ворсöмöн. Тадз, тыдалö, Александр Осипов кöсйис кывны ассьыс сьылансö, мед сьылысьлöн шысясыс петiсны морöспаньсьыс да вайöдiсны быдöнлы вежöрöдзыс. Нина Васильевналöн тайö зэв бура артмис. Пыр нюмыд кыптö, кор аддзан Типöсиктса «Оз тусь» сьылысь котырöс. Налöн сьылан манераас делöвöй стиль, бура тöдöны мый сьылöны и кыдзи сьывсьö. Найö ловзьöдiсны Фёдор Щербаковлысь «Кор ми аддзысьлам тэкöд» сьылансö. «Ёна жö нин войыс кузь» сьылiс нин Вера Булышева, а Кöрткерöсса «Зыряночка» восьтiс сиктса аньяслысь сьöлöмкылöмъяссö дзик мöдногöн, мый радейчöмтö суö уна нылöс. Менö чуймöдiс налöн уна гöлöсöн сьылöм, паськыда сьыланкыв кузяыс «кывтöм», сьыланкывсьыс шылад лöсьöдысьсö и асьнысö аддзöм. Шаня дасьтысьöмаöсь тайö рыт кежлас «Сьöлöм сьылöм» сьылысь котыр, мыйöн веськöдлö аккордионöн ворсысь Елена Васильевна Ануфриева. Найö босьтöмаöсь Виктор Савинлысь «Сьöлöм сьылöм» и таöн найö матыстöны коми йöзöс пасйыны сылысь 130-вося тшупöда пассö. Ёна матынöсь öта-мöд дорас вöлiны Александр Осиповлöн да Виктор Савинлöн творческöй туйясыс. Дзонь нэм нин сылöн сьыланыс «йöз сьöлöмö чуксасьö коми сьыланкывйöн». И тайö гажас Нёбдiнса «Сьöлöм сьылöм» сьылысь котыр асьнысö петкöдiсны дзик сисьяс моз, бура вежöртöмöн донъялiсны вунöдöм сьылансö, ышöдiсны лöсьыда пасйыны Нёбдiнса Викторлысь тшупöда пассö. Концертлöн мöд юкöнас юргисны профессиональнöй композитор Алексей Генлöн да самодеятельнöй композитор Геннадий Поповлöн выль сьыланкывъяс, йöктiсны и «Мича Райда» улын, öткöн сьылicны «Север» сьылан котырысь Ксения Пономарёва да Сергей Недведцкий. Гажсö сигöртic Кöрткерöсса «Зыряночка» сьылысь котыр. Став гажсö, локтысь гöстьяслы пызансö, мунысь йöзöс колльöдöмсö вöлi вывтi бура котыртöма. Быдöнлы Шойнатыын вöлi кыöма öкмыс синбордъя катшасинъяс, и найö лоины Александр Осиповлысь гажсö нуöдан пасöн. Найöс ми нуим сьöрысь югыд мöвпöн да водзö вылö гажсö видзöмöн.


  

Автор: Мария Плоскова, Шойнаты, снимокъясыс авторлöн

Возврат к списку







Архив публикаций
   
Пн Вт Ср Чт Пт Сб Вс
25 26 27 28 29 30 1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 31 1 2 3 4 5


Фотоальбом




Rambler's Top100


Главная | Новости | ФУКЦ РФ | Сообщество
Сайт находится в стадии информационного наполнения.
Ваши замечания и пожелания Вы можете оставить здесь.




© Филиал ГРДНТ им. В.Д. Поленова "ФУКЦ РФ", 2007-2018.
При использовании материалов
ссылка на сайт www.finnougoria.ru обязательна.
В оформлении сайта использованы работы Павла Микушева.
Республика Коми, г.Сыктывкар, ул. Ленина, д. 73,
тел./факс (8212) 440-340,
e-mail: fucult@finnougoria.ru