Рача шаньга да сöчöн, пувъя пирöгда черинянь — став тайö чöскыдторсьыс, позьö шуны, пызаныс чегис. Коми национальнöй пöжасъясысь öтдор танi вöлi и öнiяджык кадся вöлöга: торт, кекс, хворост... И, дерт жö, тупöся нянь, кодлы медсясö и вöлi сиöма Кулöмдiнын медводдзаысь на нуöдöм татшöм выставка-конкурссö.
—Видзöдлöй, кутшöм сöмын вузöс огö кужöй лэдзны асьным. Карысь вайöм дорсьыд сiйö весиг бурджык на,— тöдчöдiс пöжасьысьясöс, жюриöс, уна лыда ньöбасьысьöс чолöмалiгöн районса администрацияöн юралысьöс вежысь Лидия Николаевна Колесникова.—Няньыд—быд лунъя медся коланатор, и мед эськö йöзыслöн некор эз вöв сы кузя сьöкыдлун. Мед лавка джаджъяс «нюмъялiсны» да быдöн вермис бöрйыны аслыс лöсялана да донтöмджык пöжас.
Донъяс йывсьыс казьтыштöмыс абу весьшöрö. Найö со öнi бара на содiсны. Прöдукция вöчысьлы лоö содтöд вештысьны пызьысь, няньшомö сорасъясысь, транспортысь. Нянь рынок вылын ыджыдъясыс абу йöйöсь: кöть кутшöм дон он пукты тайö вöлöга вылас, быть ньöбасны. Со и колö быд ногыс ышöдны ас производительясöс. Дерт, водзтi моз некод нин оз уськöдчы быдтыны войвыв му вылын сю, шобдi, рудзöг, ид, но серпассö позьö вежны йöзлысь корöмъяс тöд вылын кутöмöн, конкуренция сöвмöдöмöн, бур тöвар вöчысьяслы отсалöмöн. И район да республика тшупöдъясын öнiя кодь конкурсъяссö нуöдöмыс — зэв бур мöвп.
Тайö пöрйö ассьыс вöчöмторсö районса культура керкаын петкöдлiс конкурсö вит пырöдчысь. Жюри, кöнi вöлiны райадминистрацияын, уджöн могмодан шоринын, предпринимательяслöн координационнöй сöветын да мукöдлаын зiльысьяс, донъялiс пöжасъяссö нёль номинацияын. Веськыда кö, тайöс вöчнысö вöлi сьöкыд, сэтшöм уна да бур вöлi вузöсыс. Шуам, Кулöмдiнса нянь завод вöзйис 29 сикас пöжас, и вузасьысьяс Вера Владимировна Яковлева да Светлана Францевна Попова висьталiсны, мыи тайö предприятиелöн абу на став ассортиментыс. Сiдзжö жюрилы дыр ковмис бöрйысьны Зимстанысь «Мария» ТПП ООО-лöн, Кебанъёльысь «Зубко» ИП-лöн, Кулöмдiнысь сельполöн, «ТОХ»ООО-лöн пызанъяс дорын. Конкурс нуöдысьяс шуисны, мый медводдзаысьтö местаяс юклыны оз кутны, но быдöнöс пасъясны торъя номинацияын.
А сэк костi ордйысьысьяс тыр öдöн вузасисны. Кöть и выставка йывсьыс юöрыс абу ёна паськалöма, ньöбасьысьыс вöлi уна, и некод куш киöн эз пет. Сiдз, юрсиктса олысь Леонид Михайлович Попов тыра пакетъяс киас нуигмоз нюм сорöн шуис, сэсся пö лавкаö вежон чöж позяс не ветлыны. А пенсионерка Доминика Николаевна Попова, кодi гортса пöжасъяснас нималö сикт пасьта, эз сöмын окотапырысь ньöб татчöс вöзъянторъяссö, но и водзöс пыдди тöдмöдiс аслас рецептъясöн.
—Миян котырын,—висьталiс Кебанъёльса пöжасянiнöн веськöдлысь Нина Ивановна Зубко,—уджалö 5 морт, ставныс ыджыд сяма специалистъяс. Няньысь кындзи лэдзам уна мукöд юмов вöчöмтор. Видлам öти рецепт, да бура кö инасяс, пöжассö нуам ог сöмын асланым лавкаö, но и мукöдлаö. Некымын сикас нянь мöдöдам 26-öд номера профтехучилищеö, посёлокса лавкаясö, а сiдзжö Кулöмдiнö да Кужбаö.
Нянь нимöдан луныс помасис пöшти став вузöссö иналöмöн да предприятиеясöн веськöдлысьяскöд семинар котыртлöмöн. Пасъям, сiйöс нуöдiсны ичöт предпринимательство районын сöвмöдан торъя уджтас серти, кодöс вынсьöдiс юралысь Сергей Петрович Каплин. Водзмöстчисны таын райадминистрацияысь экономика юкöн, йöзöс уджöн могмöдан шöрин, ичöт бизнес сöвмöдöм кузя координационнöй сöвет.